NÁ XCALNAYAʼ Adán né Eva bunyni que ñapno galkié né ñaityno, ni raniiny Dios par buñgudxlio diti ma bidzaʼni. Ló guidopyca la Biblia, guirá ór Dios raiby lóono que diti ma bidzaʼ xpensarybu.

• «Buñ ni rony xinésni xtunyibu sac gudxlio, né por tipzó sabanyibu loni» (Salmo 37:29).

• «Láabu sagaibybu galgoity por tipzó, né Señor Jehová ni rony Mandary Gudxlio né guibá, sasiá nís ni rareʼ bisaló guirá buñ» (Isaías 25:8).

• «Último enemig, galgoity, sanitlóni» (1 Corintios 15:26).

• «Galgoity ma diti sioʼni más, ma diti sioʼ ni guisac maláy, láaca ma diti sioʼ ni guicalas rudx, láaca diti sioʼ ni tudy ló galrrioʼob» (Revelación [Apocalipsis] 21:4).

¿Xí láani gony Dios par «capybu» galgoity o par guinitlóbu láani? Xomod ma bisuidyno, la Biblia nayadit ná que «buñ ni rony xinésni [...] sabanyibu» tipzó ló Gudxlio. Per láaca náni que «diti noʼ buñ ni rony xinéspani ni guirá ór rony cós tzaay né dipa raché» (Eclesiastés 7:20). ¿Radudyni diitz que Dios satudy scásiʼ cós mal ni gonyno par labúu guibanyno tipzó la? Yaca, Dios dipa sony ngú, portín Dios «diti labúu rascú» (Tito 1:2). Per ¿xí láani gonybu par gac cumplir ni ma goniʼbu par buñgudxlio?

Galnadxiʼ bichiinni Jehová naxelbu xiimbu ñaity por lóono né nalaano ladxña galgoity. Par labúu ñax diʼin ni bisiané Adán lóono non ñaity toib buñ ni diti nap galkié xomodca góc Adán. Guiráno nacno buñ galkié né sioʼ dzú saityno, por ngú la Biblia nayadit ná: «Ni toibyibu labúu ralaa buch, né diti labúu quiixbu Dios par guilaa láabu, (né sac ni riax vida xtunyibu nigolú rasacni, diti labúu saguiixyibu láani)» (Salmo 49:7, 8).

Órni toib buñ galkié raity nosi labúu raguiixbu xcalkiécabu. Diti labúu ralaabu láacabu nili labúu raguiixyibu xcalkié stoib buñ (Romanos 6:7). Biquiinno toib buñ ni diti nap galkié ni ñaity diti por xcalkiécabu, ñaitybu por xcalkiéno (Hebreos 10:1-4).

Ngúpa ni buny Dios. Bixelbu Xiimbu ni noʼ lainy guibá ni laa Jesús, ñeed ló Gudxlio xomod toib buñ ni diti nap galkié (1 Pedro 2:22). Jesús goniʼ que bieedbu «par gaitybu né modreʼ guilaabu xidalguixo buñ» (Marcos 10:45). Goitybu par gonybu gan galgoity né modreʼ labúu guibanyno tipzó (Juan 3:16).

Ló naareʼ nabanyno ló dzú nagan, xomod goniʼ la Biblia guibanyno ló «dzú ni ma guidubylagaʼ» gudxliogoxreʼ (2 Timoteo 3:1). Tiemp reʼ saloxni ló «día del juicio ro guinitló buñ mal» (2 Pedro 3:3, 7). Per buñ ni nadxiʼ a Dios diti sanitlóyibu órni guidxin dzúcu, né «sabanyibu por tipzó» (Mateo 25:46).

 Láaca xidalguixo buñ labúu sabany tipzó órni guiás lad gueʼet. Jesús labúu ralís gueʼet. Órni goyeebu gudx ni laa Naín, galrronladx bichiin láabu golísbu toibguielot xiin toib gonaʼ viod (Lucas 7:11-15). Láaca, apóstol Pablo goniʼ: «Naʼ rabésa que Dios gony ni ma goniʼ [...] que siás gueʼet ni buny xinésni nisló Dios né ni diti buny xinésni». Ni guiás gueʼet raslooyni balaati nadxiʼ Dios buñgudxlio (Hechos 24:15).

Xidalguixo buñ labúu sabanyibu tipzó. La Biblia ná: «Buñ ni rony xinésni xtunyibu sac gudxlio, né por tipzó sabanyibu loni» (Salmo 37:29). Ór cú labúu guibaladxno né guinino diitz ni goniʼ apóstol Pablo ma de goló chop mil íz: «Galgoity, ¿pu noʼ victoria xtunylo? Galgoity, ¿pu noʼ xcotzlo?» (1 Corintios 15:55). Orcúra sanitló xi enemigno galgoity.