Mod goyaʼno raslooyni que labúu guibanyno tipzó
GUIRÁNO racladxno guibanyno goxtiguie por tipzó. Sacróyen nabanyno tipzó né diti naxoʼno né ñoʼno nakit. Labúu nadudyno más tiemp né xfamilno, nimbuno stipnés lagary ló Gudxlio, nasuidyno ñonyno toib dxiin, ñapno más galnan né nasuidyno nitisi cós ni ñacladxno.
¿Xigony raniiny buñ guibany tipzó? La Biblia ná que Dios goloʼ lainy xcalnabanyno guiniiny lóono guibanyno tipzó (Eclesiastés 3:11). Né láaca raibyni lóono que «Dios ngú galnadxiʼ» (1 Juan 4:8). Mod ná texto reʼ, Dios nadxiʼ lóono né dipa nagoʼbu ndeʼ lainy xcalnabanyno pal diti labúu nabanyno tipzó.
Ni toib buñ raniiny gaity. Né la Biblia ná que galgoity nacni toib «enemig» (1 Corintios 15:26). Rioʼ ór radxinni nimaca, rioʼ ór radxinni después, per de que sadxinni, sadxinni. Xidal buñ diti rioladx gony pensary ló galgoity, dada radzuibyibu gaityibu. ¿Sioʼ dzú labúu sonyno gan enemig reʼ la?
NOʼ RAZÓN PAR GAPNO ESPERANZA
¿Nanlo que Dios dipa goniiny que buñgudxlio ñaity la? Libro ni sieed ló la Biblia ni laa Génesis raslooyni que Dios goniiny nabanyno tipzó ló Gudxlio. Jehová * bisaʼtzay Gudxlio, goloʼbu guiránac ni raquiin buñ par guibany goxt. Ór cú bisaʼbu primer buñguieeu ni góc laa Adán, goloʼbu buñguieeu reʼ ló toib lagary móz ni góc laa Edén. Né «bibiʼ Dios guirá ni bisaʼ, né ¡colguibiʼ! nigolú sacróyen gocni» (Génesis 1:26, 31).
Adán goyaʼbu mod nac Dios; diti gopbu galkié Deuteronomio 32:4). Tzeelbu ni góc laa Eva, láaca diti gop galkié, guidopyzobu nasacdxiich gocni. Jehová góoch layibu: «Tzoʼ xidal xiinnto né guidalto, guistzato gudxlio né ganto guirá ni noʼ loni, ganto guirá nimal ni noʼ ló nisdaʼ né nimal ni rasapy, né guirá ni nabany ló gudxlio» (Génesis 1:28).
(Par labúu nadalyibu ló Gudxlio biquiin xidal íz. Par labúu ñac cumplir ni goniiny Dios, non ñoʼ xiin Eva, né xiin Eva non ñoʼ xiinyibu, dada nadalyibu ló guidopynac Gudxlio (Isaías 45:18). Pal Adán né Eva diti labúu nabiʼyibu ximod ñac cumplir ni goniʼ Dios né nosi nabanyibu par nabiʼyibu xiinyibu né sigory xiacyibu, ¿ñoʼ xí portín nanab Dios layibu nadalyibu ló guidopynac Gudxlio la?
Láaca Dios góoch láabu ñanbu guirá nimal. Adán non nabeʼ laa guirá nimal né ngú niné xiroʼ tiemp láabu (Génesis 2:19). Láaca par labúu nasuidybu ximod ñanbu guirá nimal, Adán non nimbutzaay layimu, né nandxichno que naquiimbu más tiemp par ñonybu dxiincu.
Por ngú, órni Dios gonab a Adán né Eva ñan guirá nimal né nadalyibu ló guidopynac Gudxlio, raslooyni lóono que Dios bisaʼ layibu par nabanyibu xidzú tiemp. Scú gocni, Adán labúu bibany xidal íz.
DIOS BISAʼ BUÑGUDXLIO PAR NABANYIBU TIPZÓ LÓ TOIB GUDXLIO MÓZ
BIBANYIBU XIDAL ÍZ
Adán (930 íz)
Matusalén (969 íz)
Noé (950 íz)
Ló naareʼ (70-80 íz)
La Biblia ná que, antes de ñac toib Guiérodann, buñ bibany más que ló naareʼ. Génesis 5:5 ná: «Adán bibany gagayoʼ treint íz». De ngú rasetlani, xhoop buñguieeu ni bibany más de gagayoʼ íz: Set, Enós, Quenán, Jared, Matusalén né Noé ni gop xhoopgayoʼ íz dzú bidxin toib Guiérodann (Génesis 5:6-27; 7:6; 9:29). ¿Xigony bibanyibu xidal íz?
Guiráyibu golyibu diti xidzú de goló Adán né Eva buny galkié. Sigory por ngú bibanyibu más tiemp. Per ¿pal diti ñapno galkié labúu nabanyno más tiemp la? Né ¿ximod labúu gonyno gan galgoity? Par guicapyno galrranabdiitz reʼ, nír raquiin ganno xigony rioʼxno né raityno.
^ Párrafo. 6 La Biblia ná que laa Dios ngú Jehová.