Dios góoch láabu: «Portín dzú ni looy guálo láani [...] saitylo» (Génesis 2:17). Pal Adán ñoʼx né ñaity diti ñoʼ xi portín ñaiby Dios láabu ngú. Adán gonbu que pal diti ñoobu xcaa yac cú, diti ñaitybu.

Adán né Eva diti goyoʼ xi portín ñooyibu xcaa yac cú, portín lainy lagary mózcu goyoʼ xidal yac cuánnax (Génesis 2:9). Pal diti ñooyibu xcaa yac cú, naslooyibu que rasobyibu Dios ni goloʼ layibu ló Gudxlio, né modcu naslooyibu que napyibu respet derech ni nap Dios par gaiby layibu xi non ñonyibu.

Par guienno xigony goity Adán né Eva, non guisuidyno xi góoch Buñdzab a Eva né ximod dada lóono raguiñani. Buñdzab ni nac toib ángel mal, biquiimbu toib beʼel par goniʼbu toib galrrascú rodann. La Biblia ná: «Scú láani, beʼel gócmu nimal ni más mañós que stipnés nimal guiʼix ni noʼ ni Jehová bisaʼ. Ór cú gosaló gochmu buñgonaʼ: ¿Nigolúpa Dios ma goniʼ que lóoto diti non guáto guirá yac ni radudy xcaa ni noʼ lainy lagary sacróyen la?» (Génesis 3:1).

Eva cuapy láamu: «Lóodo labúu guádo xcaa guirá yac ni noʼ lainy lagary sacróyen. Per Dios ma goniʼ de xcaa yac ni sagaʼ galay lagary sacróyen: Diti non guáto láani, yaca, diti non canto láani; pal ronyto ngú saityto. Ór cú beʼelcu góoch a buñgonaʼ: Diti nigolúni, lóoto diti saityto. Portín Dios nan que dzú ni lóoto guáto láani, saxal bisalóto né sacto xomod Dios, simbuto cós tzaay né cós mal». Modreʼ Buñdzab bislooy que Jehová rascú né que noʼ cós tzaay ni riaabu par Adán né Eva (Génesis 3:2-5).

Eva biluladx ni goniʼ Buñdzab. Bibiʼtzaybu yac cú. Goniiny ñoobu xcaani... Biscaʼbu ñabu, bichoʼbu cuánnaxcu né godóbu láani. La Biblia ná xi góc ór cú: «Bidudybu láani tzeelbu órni ndeʼ bidxin ronoʼbu né láaca gosaló godó láani» (Génesis 3:6).

¡Balaati goyoʼ Dios nabann órni bibiʼbu xiimbu ni ronladxbu que diti bisob! ¿Xí bunybu ór cú? Jehová gochbu Adán: «Né galrrasanís lacaalo soolo páa dada guibiguetlo gaclo yoo, portín de láani goyaʼlo. Portín yoo looy né yoo gaclo stoib» (Génesis 3:17-19). Né scú gocni, «Adán bibany gagayoʼ treint íz, né goity» (Génesis 5:5). Órni goity Adán, diti goyeebu lainy guibá nili stoib lagary, antes de nasaʼ Jehová láabu de yoo, Adán diti goyoʼbu ló Gudxlio, né órni goitybu gócbu yoo stoib, binitlóbu. ¡Nabann ni gosaclobu!

Órni Adán né Eva goloʼyibu guicyibu diti guisobyibu Dios, bidxin gocyibu buñ galkié né ma diti labúu bibanyibu tipzó. Desde ór cú, gosaló bioʼxyibu. Per xcalnayaʼyibu diti nosi golaani layibu; guiráca xiinyibu bidxin góc buñ galkié. Romanos 5:12 ná: «Por toibsi buñguieeu, galkié goyoʼni ló gudxlio, né galgoity goyoʼni por galkié, né modreʼ galgoity golaani guirá buñgudxlio portín guiráyibu bichéyibu».

La Biblia ná que galgoity nacni xomod toib lairygueʼel ni rasieg guirá gudx (Isaías 25:7). Lairygueʼelcu rasiegni guirá buñgudxlio xomod toib xcaay ni nap venen, ni toib buñ diti labúu ralaa. Scú láani, «Adán bitudy galgoity guiráno» (1 Corintios 15:22). Nigoreʼ, ranabdiitzno ni gonabdiitzca apóstol Pablo: «¿Chú láabu guilaa naʼ de galgoity?». ¿Noʼ chú labúu guilaa lóono la? (Romanos 7:24).