«Pal guinabto Bixiosa nitisi cós, láabu sadudybu láani lóoto ló laaya» (Juan 16:23).

Ni goniʼ Jesús rasuidyni lóono que Jehová racladx guininéno laʼpabu, diti non guiquiinno dioxh, ángeles o xfamilno ni ma goity, né raniiny láabu gonyno láani ló laa Jesucristo. Órni ronyno oración ló laa Jesús caslooyno Dios que nanno que racadiagbu lóono portín Jesús goity por lóono. Jesús goniʼ: «Ni toib labúu guidxin ronoʼ Bixiosa pal diti nacni por naʼ» (Juan 14:6).

«Colguixal xcalnabanyto nislóbu» (Salmo 62:8).

Órni raninéno Jehová, non gonyno láani suusi naninéno bixiosno ni ronladx lóono. Xalagary golno toib oración ni sieed ló libro o gonyno láani de memory, non guininéno Dios né respet né guinino ni noʼ lainy xcalnabanyno.

«Ndeʼ confianz ni napno láabu: labúu guinabno nitisi cós ni noʼ de acuerdo mod ni nábu né láabu racadiagbu lóono» (1 Juan 5:14).

Ló la Biblia, Dios raniʼ xi láani gonybu por lóono né xi ranabbu gonyno por láabu. Par guicacuentbu oración xtunyno gonyno oración «ni noʼ de acuerdo mod ni nábu». Par labúu gonyno ngú, rasac guisuidyno la Biblia, modcu simbutzayno láabu né sacadiagbu lóono né guidopy xcalnabanybu.

Guinabno ni caquiinno. Labúu guinabno Dios gacné lóono tudyno dzú, xomod galrro, lairy o toib lagary ro cuésno. Láaca labúu guinabno láabu gacnébu lóono gonyno xinésni né guidudybu fuers lóono par guicalóno prueby. Láaca non guinabno Dios guitudy scásiʼ xcalkiéno, guidudybu más fe né ganbu lóono (Lucas 11:3, 4, 13; Santiago 1:5, 17).

Guinabno por stipnés. Buñ rioladx órni xiin ronladx saʼ. Jehová nac Bixiosno, né por ngú raniiny láabu ganno saʼno. Non guinabno lóo Dios por tzeelno, por xiinno, por xfamilno né por ximigno. Santiago, toibtica ni góc xpiin Jesús goniʼ: «Colgony oración por stipnés» (Santiago 5:16).

Guidudyno guixquix. La Biblia ná que Dios ni Bisaʼ lóono buny xidal cós tzaay por stipnés: «Bisiabbu guié desde guibá par labúu natopto xiroʼ cosech, par ñapto xiroʼ galrro né nadzaa lainyto né ñoʼ nakit xcalnabanyto» (Hechos 14:17). Pal ronyno pensary ló guirá ni ma buny Dios por lóono, saniiny guidudyno guixquix láabu. Per láaca non guisobno ni rony mandarybu, modcu radudyno guixquix láabu (Colosenses 3:15).

Rioʼ ór labúu guireʼganno pal diti nimaca racapy Dios oración xtunyno. ¿Radudy ndeʼ diitz que diti rioʼ Dios galrrasaʼ por lóono la? ¡Yaca, diti radudyni diitz ngú! Guisuidyno ni gosaclóo tipnés buñ ni raslooy que raquiin gonyno oración guirási ór.

Ló primer artículo bisetlano ni gosaclóo Steve. Láabu raibybu lóono ximod birecaabu: «Pal diti ñoni oración, nasnita esperanza xtuni». ¿Xí gocné láabu? Gosaló bisuidybu la Biblia né gonbu que non gonybu oración guirá ór. Steve ná: «Radudi guixquix Dios portín guirá ximiga ronladx né racné naʼ. Nigoreʼ nabani más goxt que nírcu».

¿Né xí góc né Jenny, ni gosac que diti non nacadiag Dios láabu? Láabu nábu: «Dzú ni cacalóya galnagan gonaba lóo Dios ñacné naʼ ñenna xigony nigolú mal gosaca». ¿Ximod gocné oración láabu? «Órni goninéya Dios ngú gocné naʼ par nabiʼya naʼ xomod rabiʼbu naʼ. Bidudi cuent que ná pal xcalnabani ragotz dool naʼ, Dios diti ronybu ngú. Láaca gocnébu naʼ diti nareʼgana». ¿Ximod birecaabu? «Oración gocnéni naʼ nabiʼya Jehová xomod ximigdxina, xomod Bixiosa ni ronladx naʼ né xomod toib Dios ni nabany. Láabu guirá ór sioʼbu né naʼ né sacnébu naʼ pal roni ni nábu».

Nigoreʼ guibiʼno ni gosaclóo Isabel. Dzú gócxiimbu doctor góoch láabu que xpadaʼbu diti sal nasac. Bidopy xcalnabanybu, dada goyoʼ buñ ni góoch láabu que más galán natudybu xiimbu. Láabu nábu: «Ór cú buni pensary que galrrioʼob nagaity naʼ». ¿Xí bunybu? «Guirá ór gonaba Dios ñacné naʼ». Bidxin midid gosanbu xpadaʼbu ni laa Gerard, xiimbu diti gool nasac. ¿Bidudy Isabel cuent que Dios cuapy oración xtunybu la? ¡Scú láani! ¿Né ximod cuapy Dios láabu? «Ná ma godudy 14 íz radudi cuent que xiingaʼna nacbu toib galnasác rodann par naʼ. Órni rabiʼya nakit noʼ xcalnabany xiinna ná caxoʼbu, ngú raslooy naʼ que Dios cuapy oración xtuni».

Guirá diitz sacróyen reʼ ronyni que guisetnaladxno ni goniʼ salmista: «Looy Jehová sacadiaglo oración xtuny buñ nadaʼa. Sony nadiplo xcalnabanyibu né sioʼlo galrrasaʼ por layibu» (Salmo 10:17). ¿Noʼ xiroʼ razón par gonyno oración guirá ór ja?

Ló la Biblia labúu golno xidal oración ni buny Jesús. Ni más rimbuno ngú oración ni bisuidybu xpiimbu. ¿Xí rasuidyno ló oracióncu?