Ló tipnés artículos ni ma godudy, bisuidyno que gudxliogoxreʼ mápa mer sanitló né bisuidyno que Dios mápa mer guinitló guirá buñ mal né guirá galnagan ni noʼ. ¿Xigony napno confianz que scú sácni? Portín xtiitz Dios la Biblia ná:

«Gudxliogoxreʼ cadudy xtzúni» (1 JUAN 2:17).

Nandxichno que sioʼ buñ ni guilaa, portín texto cuca náni:

«Ni rony ni ná Dios sabany tipzó».

Por ngú, par labúu guilaano raquiin guisobno Dios. Per par labúu guisobno láabu, raquiin guimbuno láabu.

Jesús goniʼ: «Ndeʼ radudy diitz guibany buñ tipzó: que guimbuyibu looy, toibguielot Dios ni nigolú» (Juan 17:3). Par labúu guilaano órni guidxin fin xtuny gudxliogoxreʼ né par labúu guibanyno tipzó, raquiin guimbuno Dios. Ndeʼ radudy diitz que diti nosi ganno que noʼ Dios, né ganno tipnés cós de láabu. Raquiin gacno ximigbu. Né órni nainy lóono gacno ximig toib buñ non cueʼno tiemp par guimbuno láabu. Scúca raquiin gonyno né Dios. Guisuidyno tipnés xcalrrasuidy la Biblia ni racné lóono guidzaktzayno Dios.

Par labúu guibanyno, raquiin guáno guirá dzú, per Jesús láaca goniʼ: «Diti de páasi rabany buñ, láaca de guirá diitz ni rareʼ roʼ Jehová» (Mateo 4:4).

Ló naareʼ radzelno xtiitz Jehová ló la Biblia. Laʼga cayolno la Biblia rasuidyno ni bunybu ló dzú ni see, ni cayonybu ló naareʼ né ni gonybu ló dzú ni sietra.

¿Xí labúu gonyno pal nainy lóono guisobno Dios per rasac naganno guisianno cós ni nábu que nac mal? Pal rasac naganno láani, ni sacné lóono ngú guimbutzaayno Dios.

Guibiʼno xi gosaclóo toib buñgonaʼ ni cueʼno laa Sakura. Bunybu galyoxh, per órni gosalóbu bisuidybu la Biblia bisuidybu ni rony mandary Dios: «¡Colgalsit de galyoxh!» (1 Corintios 6:18). Sakura gonab xcalrracné Dios né bitzaʼbu mod bibanybu. Per raquiin gonyrabu xtem par diti tzaguiabbu loni stoib. Láabu nábu: «Órni ritzanló pensary yox lainy bichoguica, ranaba xcalrracné Jehová né guidopy xcalnabani, portín nandxichi que diti labúu goni gan láani tobi. Oración ma bunyni que guibigaxa más Jehová». Xomodca Sakura, xidalguixo buñ ma cayimbuyibu Dios, né láabu cadudybu galnadip buñ par guidzaʼ mod nabany né guibanyibu xomod nábu (Filipenses 4:13).

Órni más rimbuno Dios, más simbubu lóono né sabiʼbu lóono xomod ximigbu (Gálatas 4:9; Salmo 25:14). Modcu labúu salaano órni guidxin fin xtuny gudxliogoxreʼ né labúu guibanyno ló Gudxlio copy ni guidudy Dios lóono. ¿Né ximod sac Gudxlio copy cú? Ló artículo ni sieed sabexa láani.