¿XIMOD GUICHOCNO LÓ GALRRIANLADX?
3 | Goleʼ galrrianladx ló xpensarylo
La Biblia ná:
«Ma diti guibanyto mod nabany buñ ló naareʼ; xalagary ngú, colguitzaʼ mod ronyto pensary, modcu stiplóocato ganto xí láani ngú cós tzaay, xí láani ngú ni racacuent né ni raniiny Dios gonyto» (ROMANOS 12:2).
¿Xí radudyni diitz?
Dios racaa cuidad ni ronyno pensary (Jeremías 17:10). Non guicaano cuidad ni ranino né ni ronyno, per diti ngúsi. Galrrianladx ralanyni ló xpensaryno né lainy xcalnabanyno, por ngú non cueʼno tiplad nitisi cós ni guichiin lóono guianladxno saʼno. Nosi modreʼ labúu satzaʼno mod nacno né sachocno ló galrrianladx.
Buny por gonylo ndeʼ:
Goniʼ né guidopynac xcalnabanylo xi rasaclo por stipnés né xi ronylo pensary de layibu, máspa pal nacyibu de stoib gudx o color. Gonabdiitz looy: «¿Ximod rabiʼya layibu? ¿Diti tan riabyibu naʼ galán por cós ni naana de layibu la o por ni góoch stipnés buñ naʼ?». Diti tzoʼlo ló redes sociales, diti guibiʼlo películas o gonylo tipnés galnakit ni guikíil looy guianladxlo buñ.
Xtiitz Dios labúu cueʼni galrrianladx ni noʼ ló xpensaryno né lainy xcalnabanyno
Rasac naganno guinino ximodpa ronyno pensary né ximodpa rasacno. Per Xtiitz Dios labúu gacné lóono, portín «láani rabeʼ loguiaʼni ni ronyno pensary né ni noʼ lainy xcalnabanyno» (Hebreos 4:12). Por ngú, bisuidy ni ná la Biblia né bitzak xcalrrasuidyni né ni ronylo pensary. De ngú, buny por gonylo pensary mod náni. Xtiitz Dios labúu «cueʼni né guicantaʼni» galrrianladx ni noʼ ló xpensaryno né lainy xcalnabanyno (2 Corintios 10:4, 5).
