JEHOVÁ ma bidudy xidal galrrascad lóono, guiráno radudyno guixquix láabu portín ma lóono ragoʼno guicno ximod gonyno né guiráni. Toibtica de galrrascad láani ngú vino. La Biblia ná: «Páa racni par guibaladx buñ né vino ronyni que guibaladx xcalnabany buñ» (Ecl. 10:19; Sal. 104:15). Per sigory radudyno cuent que tipnés buñ nigolú reʼyibu alcohol. Buñ gadzé mod ronyibu pensary por lagary ro rabésyibu né costumbres ni napyibu. ¿Ximod non guibiʼno tema reʼ lóono ni nacno cristianos?

Órni coʼno guicno xi láani gonyno, xalagary coʼno cuent ro rabésno o ro goniʼsno, non coʼno cuent ximod rabiʼ Dios alcohol. Modreʼ labúu sabanyno nakit.

Sigory ma bidudyno cuent que ló Gudxlio reʼ tipnés buñ nigolú reʼ. Noʼ ni reʼ par guisac sacró. Stipnés reʼ par guialadxyibu galnagan ni cacalóyibu. Tipnés lagary tipnésyibu nigolú reʼ par guislooyibu que ma napyibu íz o que nadipyibu.

Lóono ni nacno cristianos ni Bisaʼ lóono ragonés lóono. Ló Xtiitzbu sieed mod rarecaa buñ órni nigolú reʼ. Por ejemplo ló Proverbios 23:29-35 ritlaa de buñ ni rasochgoluʼ né ló galnagan ni ragoʼni láabu. a Toib anciano de Europa ni laa Daniel raniʼ ximod bibanybu antes ni ñacbu Testigo, láabu nábu: «Ni godudy midid gooya alcohol ngú buny que buni tipnés cós mal né nigolú bitudyni naʼ ló galrrioʼob né rasetnaladxsiya láani nigoreʼ».

¿Xí láani sacné lóono par ganno xí gonyno né diti tudy midid gueeno alcohol? Guibiʼno cós xomod rabiʼ Dios láani.

Ganno xi ná la Biblia de alcohol né xigony reʼ buñ láani.

Xtiitz Dios diti náni que mal gueʼ buñ alcohol. Xalagary ngú náni que sacró rasac buñ órni reʼ láani, Eclesiastés 9:7 ná: «Godó xcalrrolo goxtiguie né goloʼ nakit xcalnabanylo laʼga cayeʼlo vino». La Biblia ná que tipnés buelt Jesús né xpiin Jehová láaca goʼyibu vino (Mat. 26:27-29; Luc. 7:34; 1 Tim. 5:23).

Diti ngúca láani gueʼ buñ tidxó alcohol né nigolú guisoch. La Biblia nayadit ná: «Diti guisochto né vino» (Efes. 5:18). Láaca náni que «ni rasoch […] diti sioʼyibu ló Gobierno xtuny Dios» (1 Cor. 6:10). Jehová diti rioladx tudy midid gueʼ buñ né nigolú guisoch. Xalagary coʼno cuent ni raniʼ buñ ni nagoo lóono, ronyno rutirigaʼlni lóono por guibiʼno cós xomod rabiʼ Dios láani.

Noʼ ni ná: Naʼ labúu reeya né diti rasochni naʼ. Per mod ronybu pensary nacni toib riesga. La Biblia nayadit ná que buñ ni nigolú reʼ vino, tanli buñguieeu o buñgonaʼ, labúu tzaguiabyibu ló galkié né ma diti sadzakyibu Jehová sacró (Tito 2:3; Prov. 20:1). Jesús dada goniʼ que tipnésyibu ma diti labúu sioʼyibu ló Gudxlio copy por ni radudy midid reʼyibu (Luc. 21:34-36). Per, ¿xí labúu gony cristianos par diti tzoʼyibu ló galnagan xtol alcohol?

Mod ma bisuidyno labúu nagoʼni ló riesga balaati alcohol reeno por lagary ro rabésno.  Por ngú, lóono ni nacno cristiano ronyno por gonyno ni rioladx Jehová ló galrro né ló galrreʼ. La Biblia radudy consej reʼ lóono: «Por ngú, ná pal cayóto o cayeʼto, o cayonyto nitisi cós, colgony guirá cós par gonyxiroʼto Dios» (1 Cor. 10:31). Guibiʼno tipnés galrranabdiitz né tipnés principios ni sieed ló la Biblia ni non guisetnaladxno.

¿Reeya alcohol par guidzaʼga sacró stipnés la? Éxodo 23:2 ná: «Diti guicanalo guirá buñ». Ló versículocu, Jehová gochbu israelitas que diti ñonyibu cós mal ni rony stipnés buñ. Né consej reʼ racnéni cristianos ni noʼ ló naareʼ. Pal ragoʼno cuent ni raniʼ né ni rony stipnés ndeʼ labúu ñony que ma diti nasobno consej xtuny Jehová né ñalsitno de láabu (Rom. 12:2).

¿Reeya alcohol par guislooya que nadipa la? Tipnés lagary ni gueʼgolu buñ guirá ór diti mal láani (1 Ped. 4:3). Per guibiʼno xi consej radudy 1 Corintios 16:13 lóono: «Colguiguaná, colguisagaʼ dxich ló fe, colgap balory, colgac nadip». Riendxichni que alcohol diti rony nadipni más toib buñ. Xalagary ngú ma diti ronylo pensary sacró né ma diti ragoʼlo guiclo gonylo xinésni. Xalagary gony nadipni looy, ni nigolú gueʼlo alcohol rastoʼbyni xfuerslo. Isaías 28:7 náni que ni rareʼ ló néz xtol alcohol rasisyibu né riabyibu.

Pal nainy lóono gapno fuers par gonyno xinésni, non guiyopyno xcalrracné Jehová né gonyno rutirigaʼlni lóono par guiguanano né gac nadip fe xtunyno (Sal. 18:32). Par labúu gonyno láani modcu, non guibiʼtzayno né cueʼno nitisi cós ni labúu ñony que ma diti nadzakno Jehová sacró. Ngúca buny Jesús órni goyoʼ ló Gudxlio, né xidal buñ gon que Jesús góc toib buñguieeu nadip né ni gop balory.

¿Reeya par diti goni pensary ló xcalnagana la? Toib ni bicaʼ salmo gochbu Jehová ndeʼ: «Órni godudy midid goyoʼya ló galrrasaʼ, looy gocnélo naʼ né bisialdólo xcalnabani» (Sal. 94:19). Pal noʼ cós ni ragoʼ looy ló galrrasaʼ diti guiyopylo xcalrracné alcohol, xalagary ngú biyopy xcalrracné Jehová. Toib mod ni labúu gonylo láani ngú guininélo Jehová guirá ór. Xidalyibu ma biyopyibu  xcalrracné toib herman ni nadip xfe lainy congregación. Órni toib buñ rayopy xcalrracné alcohol par guicaló galnagan ni nap, diti napbu fuers par guicalóbu tentación né gonybu xinésni (Os. 4:11). Daniel, ni bisetlano nagaa ná: «Buni rutigoygaʼlni naʼ par diti ñoʼya ló galrrasaʼ né par ma diti nagotza dool naʼ. Gooya par nachoga loni, per xalagary ñacni scú gopa más galnagan né ma diti goyoʼ ximiga». ¿Xí láani gocné láabu? Láabu rabexabu láani scareʼ: «Bidudi cuent que non nayobi xcalrracné Jehová diti ló alcohol. Né xcalrracnébu labúu cualóya xcalnagana». Diti guialadxno, ná ralooyni mod cadudyno diti napni remeidy, Jehová guirá ór sioʼbu cu par gacnébu lóono (Filip. 4:6, 7; 1 Ped. 5:7).

Pal nagapsi ór reʼlo alcohol, labúu gonylo galrranabdiitz reʼ looy. «¿Ma góoch toib xfamila naʼ o ximiga que noʼbu galrrasaʼ balaati alcohol reeya la?». Ngú labúu ñacni toib señ que ma cayanélo láani o ma nacni toib galnagan sin nadudylo cuent. «¿Reeya más alcohol que nírcu la?». Ngú labúu nadudy diitz que diti nacni toib vis par looy, sigory moda ma nézcu canáslo. «¿Rasacnagana tudy chop tzón dzú o más par gueeya alcohol la?». Ngú labúu nadudy diitz que ma biaʼlo reʼlo o que ma láani nabanylo. Sigory ma caquiinlo xcalrracné doctor par ma diti gueʼlo.

Par diti guicaló buñ galnagan reʼ, tipnés cristianos ma goloʼyibu guicyibu diti gueʼyibu xitcal de alcohol. Stipnés herman diti reʼyibu alcohol portín diti rioladxyibu mod nacni. Pal rimbuno tipnés herman ni ma goloʼ guic diti gueʼ alcohol non gapno respet layibu né diti guinino mal de layibu.

Tipnésyibu láacayibu raniʼyibu xi láani gonyibu. Sigory ranyibu balaati midid reʼyibu. Tipnésyibu ragoʼyibu guicyibu balac buelt gueʼyibu. Gonyibu láani ló toib galrro o tibuelt lainy xomal. Por ejemplo, tipnésyibu reʼyibu vino o cerves né midid, diti reʼyibu stipnés alcohol ni más nadip nili ló coctel o ni notz toib cós. Órni nanno balaati midid  gueeno, diti rasacnaganno gapno respet láani. Toib cristiano ni nadip xfe ni ma goloʼ guic gony né rony láani, diti noʼ xi portín guitoybu.

Per láaca non tzoʼno galrrasaʼ por stipnés. Romanos 14:21 ná: «Más galán láani diti guá buñ beʼel nili gueʼ buñ vino par diti guirel ñeʼ herman». Ló stoib diitz non tzoʼno galrrasaʼ por stipnés, né guislooyno galnadxiʼ. Pal radudyno cuent que ni gueeno alcohol, labúu gonynani toib hermano, sigory por ni napno galnadxiʼ láabu diti ñeeno alcohol órcu. Modcu saslooyno que napno respet por mod rasac stipnés né diti rioʼno galrrasaʼ por lóosino, xalagary ngú por stipnés (1 Cor. 10:24).

Lóono ni nacno cristianos láaca rasobno ley ni rabeʼ buñchiin de alcohol. Por ejemplo, pentzi ni diti tampa nap íz diti labúu gueʼyibu alcohol o ni guixony camión o stipnés máquinas (Rom. 13:1-5).

Jehová ma bidudy permís lóono par cuuno ximod guibaladxno né xidal galrrascad ni ma bidudybu lóono. Por ngú guiráno labúu ganno xi láani guáno né xi láani gueeno. Gonyno por guiquintzayno permíscu guirá ór né guislooyno Bixiosno ni noʼ guibá né guirá ni ronyno que nainy lóono coʼ nakitno láabu.