1. ¿Xí labúu guinabdiitzno lóono órni ronyno pensary ló fe ni gop Abrahán?

 NÁ XIDAL buñ ma bicadiag de Abrahán, casi guiráyibu diti nanyibu de Abrahán. Per lóono rimbutzaayno láabu. Por ejemplo, nanno que la Biblia rabeʼ laabu «bixios guirá ni nap fe» (Rom. 4:11). Labúu guinabdiitzno lóocano pal labúu gacno xomod Abrahán né gapno toib fe nadip. Labúu gonyno láani.

2. ¿Xigony nigolú rasac guisuidyno ejemplo xtuny Abrahán? (Santiago 2:22, 23).

² Ni labúu gacné lóono par gapno fe xomod Abrahán láani ngú guisuʼno ejemplo xtunybu. Guirá ór bisobbu ni buny mandary Dios láabu: bireʼbu lidxbu né seebu toib lagary ni diti bimbubu, bibanybu lainy yoʼ lairy né dada goyoʼbu puext nagaitybu xiimbu Isaac. Modcu bislooybu que nadip fe xtunybu. Por fe né por guirá ni bunybu cuacuent Jehová láabu né gócbu ximigbu (bíil Santiago 2:22, 23). Jehová nainy que guiráno, dada looy, coʼ nakitno láabu né gacno ximigbu. Por ngú bunybu que tanli Pablo né Santiago nacaʼyibu ni buny Abrahán. Nigoreʼ guisuidyno cós ni rasac ni ritlaa ló capítulo 4 xtuny Romanos né capítulo 2 xtuny Santiago de buñguieeu reʼ ni góc xpiin Dios.

3. ¿Xí versículo bisetlaa Pablo né Santiago?

³ Pablo né Santiago bisetlayibu ni ná Génesis 15:6, ni ná que Abrahán «gop fe lóo Jehová, né Dios goniʼ que  Abrahán buny xinésni». ¿Xí radudy diitz que Jehová guiniʼ que toib buñ rony xinésni? Que noʼbu nakit né buñcu né ronybu pensary que diti napbu dool. Radziguiaʼno que Jehová guiniʼ que toib buñ galkié diti nap dool. Sigory nainy looy guibiʼ Jehová looy modcuca, né labúu gonylo láani. Guisuidyno xigony goniʼ Jehová que Abrahán buny xinésni né xi raquiin gonyno par láaca guiniʼbu modcu de lóono.

4. ¿Xí láani racaa lóono ni nacno buñ galkié par gonyno xinésni?

⁴ Ló guiich ni bicaʼ Pablo par Romanos, goniʼbu que guiráno nacno buñ galkié (Rom. 3:23). ¿Ximod labúu tzoʼ nakit Dios né lóono né guiniʼbu que ronyno xinésni? Pablo biquiin ejemplo xtuny Abrahán par gocnébu guirá cristianos ni natzaay xcalnabany par nacapyibu galrranabdiitzcu.

5. ¿Xigony goniʼ Jehová que Abrahán buny xinésni? (Romanos 4:2, 4).

⁵ Jehová goniʼ que Abrahán buny xinésni dzú bibanybu lainy gudx Canaán. ¿Xigony goniʼbu que Abrahán buny xinésni? Diti gocni por ni bisobtzaybu Xiley Moisés (Rom. 4:13). ¿Ximod nanno láani? Portín gudx Israel cuaʼ Ley reʼ más de 400 íz después. ¿Xigony goniʼ Jehová que Abrahán buny xinésni? Jehová bislooy xcalrronladx né goniʼbu que Abrahán buny xinésni por fe ni gop Abrahán (bíil Romanos 4:2-4).

6. ¿Xigony raniʼ Jehová que buñ galkié rony xinésni?

⁶ Después, Pablo golexa que órni toib buñ rap fe lóo Dios, «rony xinésni por fe xtunybu» (Rom. 4:5). Né goniʼbu: «David láaca raniʼ de galnakit ni rasac toib buñ ni Dios raniʼ que rony xinésni per diti por dxiin ni ronybu: Nakit rioʼ guirá buñ ni godudy scásiʼ guirá galkié ni buny, né ni biaa xcalkié; nakit buñguieeu ni diti sasetnaladx Jehová galkié ni buny» (Rom. 4:6-8; Sal. 32:1, 2). Dios ratudy scásiʼ xcalkié buñ ni nap fe lóbu; ma diti ragoʼbu cuent láani. Jehová rabiʼ buñcu xomod buñ ni rony xinésni né ni diti nap dool por fe ni napbu.

7. ¿Ximod buny xpiin Dios xinésni ni bibany ló dzú ni see?

⁷ Ná Abrahán, David né stipnés xpiin Dios bunyibu xinésni, gocrayibu buñ galkié. Per por fe ni bislooyibu Dios goniʼ que diti gopyibu dool, né máspa la, diti gocyibu xomod buñ ni diti bisob láabu (Efes. 2:12). Ló guiich ni bicaʼbu par Romanos, Pablo goniʼ que par labúu gacno ximig Jehová rasac gapno fe. Modcu góc né Abrahán né David, né ngúca labúu gac né lóono.

8, 9. ¿Xí rony pensary tipnés buñ, né xigony?

⁸ Por xidalgoluʼ íz, buñ ni rasanir lad xidal Iglesias radíilyibu né saʼyibu por mod radzak fe né dxiin ni rony buñ. Tipnésyibu ná que par labúu guilaa buñ nosi non gapyibu fe lóo Jesucristo. Sigory ma bicadiagno diitz reʼ: «Cuacuent Jesús lainy xcalnabanylo né salaalo». Sigory líderescu rony pensary ló ni ná Romanos 4:6, ro raniʼ Pablo de «buñ ni Dios raniʼ que rony xinésni per diti por dxiin ni ronybu». Né  stipnésyibu raniʼ que par labúu guilaa buñ non saayibu o guixixipyibu dada guidxinyibu ronoʼ xquidaʼyibu né gony cós tzaay. Pentzi rayopybu galrracné ló ni ná Santiago 2:24: «Buñ rony xinésni diti nosi por fe xtunybu láaca por dxiin ni ronybu».

⁹ Por ni rony pensary guirá líderescu gadzé mod, tipnés biblistas ná que Pablo né Santiago gadzé mod bunyibu pensary mod radzak fe né dxiin ni rony buñ. Goniʼyibu que Pablo buny pensary que nosi raquiin gap buñ fe par guicacuent Dios láabu, per Santiago buny pensary que raquiin gony buñ dxiin. Toib teólogo golexa: «Santiago diti bieen xigony goniʼ Pablo que toib buñ rony xinésni nosi por fe diti por dxiin ni ronybu». Per tanli Pablo né Santiago bicaʼyibu guirá ndeʼ né xcalrracné espíritu santo xtuny Jehová (2 Tim. 3:16). Per noʼ toib mod ni rarexani ni diti nagan par guienno xi láani goniʼyibu. Par ganno xi láani, non ganno xi goniʼyibu antes ni naniʼyibu guirá ni bisetlayibu.

10. ¿De xí «dxiin» bisetlaa Pablo? (Romanos 3:21, 28; láaca bibiʼ retrat).

¹⁰ ¿De xí «dxiin» bisetlaa Pablo ló Romanos 3 né 4? Goniʼbu de «dxiin ni nanab». ¿Xí Ley gocni? Láani ngú Ley ni bidudy Dios né xcalrracné Moisés (bíil Romanos 3:21, 28). Ralooyni que tipnés cristianos judíos gosac naganyibu ñenyibu que ma diti non nasobyibu Ley. Por ngú, Pablo biquiin ejemplo xtuny Abrahán par golexabu que Dios diti racacuent buñ por «dxiin ni nanab ley», xalagary ngú nacni por fe ni nap  buñ. Ni goniʼbu rony animarni lóono portín rasuidyni lóono que par labúu guicacuent Dios lóono non gapno fe lóbu né lóo Cristo.

11. ¿De xí «dxiin» goniʼ Santiago?

¹¹ «Dxiin» ni ritlaa ló capítulo 2 xtuny Santiago diti nacni «dxiin ni nanab ley» ni bisetlaa Pablo. Santiago goniʼ de guirá ni rony toib cristiano ló xcalnabany. Guirá dxiincu raslooyni pal toib cristiano nap fe lóo Dios o yaca. Guisuidyno chop ejemplos ni biquiin Santiago.

12. ¿Ximod golexa Santiago mod radzak fe né dxiin ni ronyno? (Láaca bibiʼ retrat).

¹² Ló primer ejemplo, Santiago bisetlaa que cristianos diti non nabúyibu buñ né non nagobioyibu buñ toibsi midid. Bunybu que cristiano nadudy cuent que pal nagobioyibu buñ ric né nabixladxyibu buñ pobre, ná naniʼyibu que napyibu fe, ni ñonyibu naslooyni que diti nacni scú (Sant. 2:1-5, 9). Ló ni rarop ejemplo, goniʼbu de buñ ni nabiʼ xherman ni naquiin lairy o galrro né diti ñonybu xitcal par ñacnébu xhermanbu. Ná buñcu naniʼ que nap fe, per pal diti naslooybu láani diti noʼ pu naquiinni. Santiago bicaʼ: «Fe, pal diti raslooyno que napno láani diti nabanyni» (Sant. 2:14-17).

13. ¿Xí ejemplo bisetlaa Santiago par nadudybu diitz que non guislooyno né dxiin ni ronyno que napno fe? (Santiago 2:25, 26).

¹³ Par labúu naniʼbu de toib buñ ni bislooy que gop fe, Santiago bisetlaa ejemplo xtuny Rahab (bíil Santiago 2:25, 26). Buñgonaʼ reʼ bicadiag de Jehová né gonbu que Jehová cayacnébu  israelitas (Jos. 2:9-11). ¿Xí láani bunybu par bislooybu que gopbu fe lóo Jehová? Gonbu chop espías israelitas par diti nagaity buñ layibu. Né xomodca Abrahán, Dios goniʼ que bunybu xinésni ná gócbu buñ galkié né diti gócbu israelita. Ejemplo xtunybu rasuidyni lóono que nigolú rasac guislooyno né ni ronyno que napno fe.

14. ¿Ximod rabexa ni gadzé mod bicaʼ Pablo né Santiago?

¹⁴ Mod ma bisuidyno, Pablo né Santiago goniʼyibu de fe né de dxiin ni rony buñ de gadzé mod. Pablo gochbu guirá cristianos judíos que diti nacacuent Jehová layibu pal nosi ñonyibu ni gonab Ley. Né Santiago goniʼ que guirá cristianos non naslooyibu fe ni napyibu por mod ñonyibu.

15. Bisetlaa tipnés mod ni labúu guislooyno né ni ronyno que napno fe. (Láaca bibiʼ retrat).

¹⁵ Órni Jehová goniʼ que non guicanalno mod buny Abrahán par guiniʼbu que nacno buñ ni rony xinésni, diti radudyni diitz que gonyno modpa buny Abrahán. Noʼ xidal mod ni labúu guislooyno mod ronyno que napno fe. Labúu guicacuentno ni nacopysa cadxin lainy congregación, gacnéno herman ni cadudy ló galsii né gonyno cós tzaay por xfamilno. Guirá ngú rioladx Jehová (Rom. 15:7; 1 Tim. 5:4, 8; 1 Juan 3:18). Toib mod ni rasac ni labúu guislooyno que napno fe láani ngú guinino xtiitz Dios né gan (1 Tim. 4:16). Guiráno labúu guislooyno né ni ronyno que napno fe que guirá ni ma goniʼ Jehová sácni né que mod ronybu guirá cós  nacni galán. Né pal ronyno láani napno confianz que Dios saniʼ que nacno buñ ni rony xinésni né sacno ximigbu.

16. ¿Ximod radzak esperanza né fe ni gop Abrahán?

¹⁶ Ló capítulo 4 xtuny Romanos, radzelno stoib lesiony ni rasac ni rasuidy ejemplo xtuny Abrahán lóono: nigolú rasac gapno esperanza. Jehová bidudy xtiitz que por Abrahán, «xidal gudxrop» nacaʼyibu galnasác. ¡Nigolú móz esperanza cu! (Gén. 12:3; 15:5; 17:4; Rom. 4:17). Per, órni Abrahán gop 100 íz né Sara 90, diti ma goyoʼ xiinyibu. Par buñ diti nagan nasnityibu esperanza xtunyibu. Ná gocni toib prueby xiroʼ par Abrahán, «gopbu esperanza né gopbu fe que sadxin sacbu bixios xidal gudxrop» (Rom. 4:18, 19). Bidxin midid esperanza cu góc cumplir: Abrahán góc bixios Isaac, xiimbu ni golésbu (Rom. 4:20-22).

17. ¿Ximod nanno que Dios labúu guiniʼ que ronyno xinésni né gacno ximigbu?

¹⁷ Xomodca Abrahán, labúu gonyno que Jehová guiniʼ que ronyno xinésni né gacbu ximigno. Por ngú, órni goniʼbu de Abrahán, Pablo goniʼ: Diitz «Dios goniʼ» diti nosi cuáni par láabu, xalagary ngú láaca cuáni par lóono, ni Dios saniʼ que ronyno xinésni portín ronyno crer ló ni golís Jesús Señor xtunyno lad gueʼet (Rom. 4:23, 24). Raquiin gapno guionca cós ni gop Abrahán. Ló artículo ni sieed guisuidyno ni goniʼ Pablo de esperanza ni ritlaa ló capítulo 5 xtuny Romanos.