1. ¿Xigony labúu guinino que esperanza ni gop Abrahán ñac cumplirni?

 JEHOVÁ bidudybu xtiitzbu ximigbu Abrahán que por descendencia xtuny Abrahán guirá gudxrop ni noʼ ló Gudxlio nacaʼ galnasác (Gén. 15:5; 22:18). Abrahán gop xiroʼ fe lóo Dios, gondxichbu que ni goniʼ Jehová sac cumplirni. Per, órni Abrahán ma nap 100 íz né tzeelbu 90, biinreʼ ni diti bisian Jehová, yása tzoʼ ni toib xiinyibu (Gén. 21:1-7). La Biblia ná que Abrahán «gopbu esperanza né gopbu fe que sadxin sacbu bixios xidal gudxrop, xomod góoch Dios láabu» (Rom. 4:18). Né, mod ma nanno, esperanza ni gopbu góc cumplirni: Abrahán góc bixios Isaac, xiingaʼnbu ni nigolú golésbu. ¿Xigony gondxich Abrahán que Jehová ñony cumplir ni ma goniʼ?

2. ¿Xigony gondxich Abrahán que Jehová ñony cumplir ni ma goniʼ?

² Abrahán bimbutzaaybu Jehová, por ngú, «gopbu xiroʼ confianz» que ñac cumplir ni góoch Jehová láabu (Rom. 4:21). Por fe ni gop Abrahán, Jehová cuacuent láabu xomod buñguieeu ni buny xinésni (Sant. 2:23). Mod ná Romanos 4:18, fe ni gop Abrahán né esperanza xtunybu bidzakni saʼni. Nigoreʼ guisuidyno ni raniʼ apóstol Pablo de esperanza ló capítulo 5 xtuny Romanos.

3. ¿Xí rabexa Pablo de esperanza?

³ Pablo golexa xigony labúu gandxichno que «esperanza diti sascúni lóono» (Rom. 5:5). Láaca racnéni  lóono guienno ximod labúu gac más nadip esperanza ni napno. Conforma guisuidyno ni ná Romanos 5:1-5, buny pensary ximod esperanza ni naplo cayac nadipni conforma radudy dzú. Láaca, ni guisuidyno saslooyni looy ni labúu gonylo par gony nadiplo láani más. Primer guisuidyno de toib esperanza sacróyen ni ná Pablo, diti sascúni.

4. ¿De xí cós raniʼ Romanos 5:1, 2?

⁴ (Bíil Romanos 5:1, 2). Pablo bicaʼ diitzreʼ par herman ni goyoʼ lainy congregación xtuny gudx Roma. Layibu maca bisuidyibu de Jehová né de Jesús, ma bislooyibu que gopyibu fe né ma gocyibu cristianos. Por ngú Dios goniʼ que bunyibu xinésni por fe ni gopyibu né góc ungiryibu né espíritu santo. Né desde dzúcu, gopyibu toib esperanza sacróyen ni ñac cumplir.

5. ¿Xí esperanza nap ungidos?

⁵ Después, Pablo goniné a cristianos ungidos de gudx Éfeso de esperanza ni ma bidudy Dios layibu. Golexabu biinreʼ que ñanéyibu cós ni rasac par buñ ni nayaa (Efes. 1:18). Né gochbu a buñ colosenses púti nacaʼyibu esperanza ni golésyibu. Gochbu biinreʼ: «Ni cabés lóoto guicaʼto lainy guibá» (Col. 1:4, 5). Por ngú cristianos ungidos napyibu esperanza de guiásyibu lad gueʼet né guibanyibu por tipzó lainy guibá ro sony mandaryibu né Cristo (1 Tes. 4:13-17; Apoc. 20:6).

6. ¿Xí goniʼ toib hermano ungido de esperanza ni napbu?

⁶ Nigolú rasac par ungidos esperanza sacróyen ni napyibu. Por ejemplo, ló íz 1991 hermano Frederick Franz goniʼ: «Esperanza ni napno sac cumplirni, né sac cumplirni par guirá né tigaaga 144.000 ni noʼ lad tidxó xiil, né  sac cumplirni midid ni diti ritzanló ló xpensaryno». ¿Ximod gosacbu después ni bunybu xchiin Dios por xidalgoluʼ íz? Láabu nábu: «Rasacsa esperanza cu par lóono. Laʼga más tiemp sanéno cabésno láani, más rasacni par lóono. Diti xilaʼsi cuésno láani, ná guiquiin cuésno timillón íz. Más rasac esperanza ni napno nigoreʼ que nírcu».

7, 8. ¿Xí esperanza nap casi guirá xpiin Dios? (Romanos 8:20, 21).

⁷ Casi guirá buñ ni rony xchiin Jehová ló naareʼ, napyibu stoib esperanza. ¿Xí esperanza? Esperanza ni láaca gop Abrahán: Guibanyibu por tipzó ló Gudxlio xan xomandary Gobierno xtuny Dios (Heb. 11:8-10, 13). Pablo láaca bicaʼ de esperanza sacróyen reʼ (bíil Romanos 8:20, 21). Órni bisuidylo ni raniʼ la Biblia gac ló dzú ni sietra, ¿xí láani más bioladxlo? ¿Bioladxlo ni ma diti gaplo galkié la? ¿Bibaladxlo órni gonlo que buñ ni ronladxlo labúu guiásyibu lad gueʼet né guibanyibu lainy toib lagary móz la? Por esperanza sacróyen ni radudy Dios, looy labúu sabanylo sacró ló dzú ni sietra.

⁸ Guiráno napno toib esperanza ni ragoʼ nakit lóono, guibanyno por tipzó lainy guibá o ló Gudxlio. Né esperanza ni napno labúu gac nadipni guirá dzú. ¿Ximod labúu gonyno láani? Par ganno láani, guisuidyrano ni bicaʼ Pablo. Xtiitzbu sacnéni lóono par gandxichno que esperanza ni napno diti sascúni lóono.

9, 10. Xomodca Pablo, ¿xí cós nanno que sasaclono? (Romanos 5:3; láaca bibiʼ retrat).

⁹ (Bíil Romanos 5:3). Pablo goniʼ alga ni sigory sadziguiaʼ lóono: Ni tudy buñ ló galnagan labúu gony nadipni esperanza ni napno. Guiráno ni nacno cristianos nanno que sacalóno galnagan.  Gonyno pensary ló ni góoch Pablo a cristianos de gudx Tesalónica: «Órni goyoʼdo ca né lóoto, gochdo lóoto que sacalóno xiroʼ galnagan, né mod ma nanto, scúpa cayacni» (1 Tes. 3:4). Né bicaʼbu par corintios: «Nainy lóodo ganto galnagan ni cualódo [...] bidxin midid dada bidzuibydo ñaitydo» (2 Cor. 1:8; 11:23-27).

¹⁰ Ndeʼ láaca cayacni ló naareʼ. Lóono ni nacno cristianos nanno que sadudyno ló galnagan (2 Tim. 3:12). ¿Xí galnagan ma cualólo desde dzú gosalólo goplo fe lóo Jesús né góclo xpiimbu? Pentzi ximiglo o xfamilo buny borla looy, o dada diti godabioyibu looy sacró. ¿Ma cualólo galnagan ló xchiinlo por ni ma goloʼlo guiclo diti guiscúlo o cuanlo la? (Heb. 13:18). ¿Ma cualó buñchiin looy por ni raibylo stipnés buñ esperanza ni naplo la? Nac nitisi galnagan ni cacalóno, Pablo goniʼ que non guibaladxno. ¿Xigony?

11. ¿Xigony ma goloʼno guicno gony guantaryno?

¹¹ Rabaladxno órni radudyno ló galnagan, portín láani racnéni lóono gapno toib cualidad ni rasacgoluʼ. Romanos 5:3 ná: «galnagan ronyni que gony guantaryno». Guirá ni nacno cristianos radudyno ló galnagan. Guiráno non coʼno guicno gony guantaryno. Nosi pal rony guantaryno labúu sacaʼno galnasác ni cabésno. Diti nainy gacno xomod buñ ni Jesús buny pensary ló órni goniʼbu de ladx ni riab lad guiee. Layibu racacuentyibu «diitz sacró» né galrrabaladx, per «órni rioʼ galnagan o persecución» rareʼganyibu (Mat. 13:5, 6, 20, 21). Nigolú, ni toib buñ rioladx tzoʼ ni guicaló láabu o tudybu ló galnagan, per ni gony guantaryno sacnéni lóono. Guisuidyno xigony.

12. ¿Ximod racnéni lóono ni gony guantaryno?

¹² Discípulo Santiago goleʼ loguiaʼ ximod racné lóono ni rony guantaryno. Bicaʼbu: «Per colgony guantary, portín pal rony guantaryto sacnéni lóoto gonyto xinésni né diti sioʼ ni siatz lóoto» (Sant. 1:2-4). Ni rony guantaryno napni toib dxiin. ¿Xí dxiin? Racnéni lóono gapno más paseins, gapno más fe, gapno más confianz lóo Dios. Per diti ngúsi. Láaca racnéni lóono stoib mod.

13, 14. ¿Xí rac órni rony guantaryno, né ximod raguiñani esperanza ni napno? (Romanos 5:4).

¹³ (Bíil Romanos 5:4). Pablo bisetlaa que «órni rony guantaryno ronyni que guicacuent Dios lóono» (Rom. 5:4). Ngú diti radudy diitz que Jehová rabaladx órni radudyno ló galnagan, xalagary ngú radudyni diitz que rabaladxbu órni rony guantaryno. ¿Ragoʼni gan xcalnabanylo ni nanlo que, pal raclo fiel né rony guantarylo, labúu coʼ nakitlo xcalnabany Jehová ja? (Sal. 5:12).

¹⁴ Gonyno pensary ló Abrahán. Dios cuacuent láabu, portín buny guantarybu prueby ni cualóbu. Jehová bibiʼ láabu xomod ximigbu né goniʼbu que Abrahán buny xinésni (Gén. 15:6; Rom. 4:13, 22). Ngúca rac né lóono. Ni guicacuent Jehová lóono diti nacni por guirá dxiin ni ronyno nili por responsabilidad ni napno lainy congregación, nacni por ni nacno fiel né rony guantaryno. Né ndeʼ, guiráno labúu gonyno láani, nac nitisi íz ni napno, mod cadudyno o dxiin ni nanno ronyno. ¿Cadudylo  ló toib prueby nigoreʼ la? Bisetnaladx, que pal raclo fiel, Dios sacacuent looy. Ni nanno que Jehová noʼ nakit né lóono napni galnadip: rony nadipni esperanza ni napno.

15. ¿Xí más golexa Pablo, né xí labúu guinabdiitzno lóocano?

¹⁵ Mod ma bisuidyno, Pablo goniʼ que Dios sacacuent lóono pal rony guantaryno. Nigoreʼ guisuidyno ximod golexabu láani más: «Órni Dios racacuent lóono ronyni que gapno esperanza» (Rom. 5:4, 5). Tidxó antes, ló Romanos 5:2, Pablo goniʼ que cristianos xtuny Roma napyibu toib esperanza, «esperanza ni napno que guicaʼno gloria xtuny Dios». Por ngú pentzi guinabdiitzno lóocano: «Pal cristianos cu ma napyibu toib esperanza, ¿xigony raniʼ Pablo de esperanza stoib?».

16. Golexa ximod toib buñ labúu gap confianz que esperanza ni rasetlaa la Biblia nigolúni. (Láaca bibiʼ retrat).

¹⁶ Labúu guienno ni goniiny Pablo nadudy diitz pal rasetnaladxno que esperanza labúu rac nadipni más. Por ejemplo, buny pensary ló primer buelt ni goyoʼ ni góoch looy esperanza ni guibany buñ por tipzó ló toib Gudxlio móz. Sigory bunylo pensary que nigolú sacróni par gacni nigolú. Per, conforma bimbulo Jehová né ni rasetlaa la Biblia gac, goplo más né más confianz que esperanza cu, sac cumplirni.

17. ¿Ximod cayac nadip esperanza ni naplo después ni goyonislo?

¹⁷ Dada después ni goyonislo, esperanza xtunylo cayac nadipni, portín casuidylo né caniʼslo ló sentido espiritual (Heb. 5:13–6:1). Sigory ma godudylo ló ni rasetlaa Romanos 5:2-4, ni radudy diitz, que ma cualólo galnagan né ma bibiʼlo  que Jehová racacuent looy. Nanlo que Jehová noʼ nakit né looy, por ngú nandxichlo que láabu sony cumplirbu guirá ni ma goniʼbu. Esperanza ni naplo más nadipni que nírcu. Nacni más nigolú, más xiroʼ, nacni más xtunylo né más dxich. Raguiñani guidopy xcalnabanylo, por ejemplo, ló mod ni radzaklo xfamilo, xi ragoʼlo guiclo gonylo né ximod raquiinlo xtiemplo.

18. ¿Xí garantía radudy Jehová lóono?

¹⁸ Después ni bisetlaa Pablo que ni racacuent Dios buñ, radudyni esperanza, goniʼbu toib cós ni rasacgoluʼ: labúu gapno confianz que esperanza cu sac cumplirni. ¿Xigony? Portín Pablo bidudy garantía ni sieed de Dios a cristianos: «Esperanza diti sascúni lóono; portín xcalnadxiʼ Dios ma bixúni laidy xcalnabanyno por espíritu santo ni ma cuaʼno» (Rom. 5:5). Por ngú labúu gaplo confianz que esperanza ni naplo sácni nigolú.

19. ¿Xí nandxichno?

¹⁹ Galán láani guisetnaladxlo Abrahán. Jehová bidudy xtiitz láabu, cuacuentbu né bibiʼbu Abrahán xomod ximigbu. Ni Abrahán golés, góc cumplirni. La Biblia ná: «Después ni bislooy Abrahán paseins, cuaʼbu promesa reʼ» (Heb. 6:15; 11:9, 18; Rom. 4:20-22). Xomodca Abrahán, nandxichno que, pal diti rasianno Jehová, esperanza xtunyno diti sascuʼni lóono, xalagary ngú, sacaʼno galnasác. Esperanza ni napno nigolúni, né ngú ragoʼ nakit xcalnabanyno (Rom. 12:12). Pablo bicaʼ: «Dios ni radudy esperanza gacné lóoto guibaladxto né guiguaʼto sacró né saʼto por ni napto confianz láabu, par gapto xiroʼ esperanza por xcalnadip espíritu santo» (Rom. 15:13).