1. ¿Xí non gonyno par guidxin gacno cristianos ni nadip xfe?

 ¿NIGOLÚ radziguiaʼno órni rabiʼno balaati naguel raniʼs toib mbiox né radxin racbu toib buñgox ja? Ralooypani stipláacani racni. Per, órni buñ raniʼs ló sentido espiritual diti racni scú (1 Cor. 13:11; Heb. 6:1). b Par labúu guidxinno gacno cristianos ni nadip xfe, raquiin guidzaktzayno Jehová. Láaca raquiinno que espíritu santo gacné lóono par gapno galán cualidades, par guisuidyno tipnés dxiinien ni labúu gacné lóono né par tzoʼno puext guicaʼno tipnés responsabilidad después (Prov. 1:5).

2. ¿Xí rasuidy Génesis 1:27 lóono? ¿Xí guisuidyno ló artículo reʼ?

² Jehová bisaʼbu buñgudxlio; láabu bisaʼbu buñguieeu né buñgonaʼ (Bíil Génesis 1:27). Buñguieeu né buñgonaʼ diti toibsi midid nacyibu ló sentido físico, per diti nosi ló ngú. Por ejemplo, Jehová bidudy gadzéga dxiin buñguieeu né buñgonaʼ, né par gony cumpliryibu né láani, tigaagayibu raquiinyibu gadzéga cualidades né gadzéga dxiin ni ganyibu gonyibu (Gén. 2:18). Ló artículo reʼ, sasuidyno xi labúu gony hermanas mbioxhlas par guidxinyibu gacyibu cristianas ni nadip xfe. Né ló artículo ni sieed, sasuidyno ni labúu gony hermanos mbioxhlas.

3, 4. ¿Púti labúu guidzel hermanas mbioxhlas ejemplos galán ni labúu guisuʼyibu? (Láaca bibiʼ dibuj).

³ La Biblia rabeʼ loguiaʼ ejemplos galán de xidal buñgonaʼ ni gondxiʼ né buny xchiin Jehová (bíil artículo ni sieed ló jw.org «¿Qué aprendemos de las mujeres de la Biblia?»). Mod ná texto temático, diti godudy midid bunyibu toib cós né gocyibu fiel ló guirá cós. Láaca, sigory lainy congregación xtunylo noʼ xidal hermanas ni nadip xfe ló sentido espiritual, ni labúu guisuidylo xidal cós de layibu.

⁴ Pal naclo toib hermana mbioxhlas, buny pensary ló tipnés hermanas ni nac toib ejemplo galán par looy né goloʼ guiclo guisuʼlo layibu. Par labúu gonylo láani, cuá cuidad cualidades sacró ni napyibu, né de ngú buny pensary ximod labúu gaplo cualidades cu. Ló stipnés párrafos ni sieed, sasuidyno tzón cualidades ni raquiin gap guirá cristianas ni nadip xfe.

5. ¿Xigony cristianas ni nadip xfe non gacyibu buñdxo?

⁵ Galbuñdxo. Buñgonaʼ ni nac buñdxo radzaktzay Jehová né stipnés (Sant. 4:6). Por ejemplo, nacbu buñdxo né nadxiʼbu Bixiosbu ni noʼ guibá, por ngú rasobbu ni ma golú Jehová par guisanir lainy congregación né lainy famil (1 Cor. 11:3). c

6. ¿Ximod labúu guisuʼ hermanas mbioxhlas galbuñdxo xtuny Rebeca?

⁶ Guinino de Rebeca. Láabu gócbu toib buñgonaʼ ni naní góc guic, né gonbu pu ór né ximod gonybu toib cós (Gén. 24:58; 27:5-17). Per láaca gopbu respet buñ né bisobbu (Gén. 24:17, 18, 65). Pal looy, xomodca Rebeca, naclo buñdxo né naplo respet ni rasanir, sacnélo xfamilo né congregación xtunylo.

7. ¿Ximod labúu guisuʼ hermanas mbioxhlas modestia xtuny Ester?

 ⁷ Modestia. La Biblia ná que «sabiduría noʼni né buñdxo»(Prov. 11:2). Ester góc toibtica xpiin Dios ni diti bisian láabu, ni bislooy cualidad reʼ. Por ejemplo, órni bidxin gócbu reina, diti biatzbu. Láaca, bicadiagbu né cuanalbu consej ni xprimbu Mardoqueo bidudy láabu (Est. 2:10, 20, 22). Looy labúu guisuʼlo ejemplo de modestia xtunybu pal ranablo consej galán né rasoblo láani (Tito 2:3-5).

8. Órni hermanas cuu ximod gactzay né ximod guacyibu lairy, ¿ximod labúu guicanalyibu consej ni sieed ló 1 Timoteo 2:9, 10?

⁸ Guibiʼno stoib mod ni bislooy Ester modestia. Láabu «nigolú móz gócbu», per diti biyopybu mod nasanadx buñ láabu (Est. 2:7, 15). ¿Ximod labúu guisuʼlo láabu? Toib mod ni labúu gonylo láani rarexani ló 1 Timoteo 2:9, 10 (bíil láani). Reʼ apóstol Pablo goniʼ que hermanas non guactzay xhap, né coʼ xcalrrien. Diitz griegas ni biquiimbu raslooyni que cristianas non guacyibu lairy sacró né tzoʼyibu galrrasaʼ por ni rasac stipnés. ¡Nigolú rabaladxno por hermanas ni raslooy que nadip xfe por mod rocyibu xhapyibu!

9. ¿Xí rasuidyno de Abigaíl?

⁹ Discernimiento. Cualidad reʼ, láacani ngú coʼ buñ xcalrrien, ni radudy diitz, ganno xi láani cós tzaay né xi láani ngú cós mal né órcu gonyno xinésni. Guibiʼno ejemplo xtuny Abigaíl. Tzeelbu diti golútzay ni buny, né láabu bidudybu cuent que ngú narecaani mal par guirá ni rabés laniolidxbu. Abigaíl nimaca buny alga, né por ni goloʼbu xcalrriembu bilaa xidal buñ (1 Sam. 25:14-23, 32-35). Discernimiento láaca racnéni lóono par ganno pu ór guinino né pu ór yaca, né par tzoʼno galrrasaʼ por stipnés né diti gonyno xitcal ni labúu gony que diti guisacyibu sacró (1 Tes. 4:11).

10, 11. ¿Ximod sacnéni looy ni guisuidylo goʼoltzaylo né guicaʼlo sacró? (Láaca bibiʼ retrat).

¹⁰ Galán láani que cristianas guisuidy gony tipnés cós ni labúu gacné layibu. Tipnés cós ni bisuidylo dzú góclo mbiox sacnéni looy laʼga nabanylo. Guibiʼno tipnés ejemplos.

¹¹ Bisuidy goʼoltzaylo né guicaʼlo sacró. Lainy tipnés lagary par buñ diti rasac que buñgonaʼ guisuidy goʼol né guicaʼ. Per ndeʼ nigolú raquiinni par guirá cristiano (1 Tim. 4:13). d Por ngú diti guidudylo lagary tzoʼ ni guicaa looy par guisuidylo  goʼoltzaylo né guicaʼlo sacró. ¿Ximod sacnéni looy? Sacnéni looy par diti guisac naganlo guidzelo né gaplo toib dxiin né guidxinaʼlo ni guálo. Láaca labúu sasuidytzaylo xquiichlo né saclo toib galán mextra de Xtiitz Dios. Per ni máspa la, órni goʼolo la Biblia né gonylo pensary ló ni ma bíilo, más sadzaktzaylo Jehová (Jos. 1:8; 1 Tim. 4:15).

12. ¿Xí rasuidy Proverbios 31:26 looy?

¹² Bisuidy gooylo diitz né stipnés. Ndeʼ nigolú rasacni par guirá cristianos. Discípulo Santiago bidudy toib consej lóono ni radzak né láani: «Raquiin tzoʼto puext par guicadiagto, diti nimaca guiniʼto» (Sant. 1:19). Ni guicadiagtzaylo órni noʼ ni caniné looy, nacni toib mod ni labúu guislooylo que rioʼlo xalagary buñ (1 Ped. 3:8). Pal radudylo cuent que diti cayenlo ni cayapybu looy o ni rasacbu, buny galrranabdiitz láabu né respet . De ngú, buny pensary antes ni guicapylo láabu (Prov. 15:28, nota). Gonabdiitz looy: «Ni guiniya ¿nigolúni la? ¿Sacnéni láabu la? ¿Napni respet né galrronladx la?». Buny pensary ló hermanas ni nadip xfe ni sacró rooy diitz né stipnés, né bisuʼ layibu (bíil Proverbios 31:26). Cuá cuidad ni raniʼyibu né ximod raniʼyibu. Buny por gonylo modcuca, né conforma guisuidylo gonylo láani, sabiʼlo que sadzaklo más sacró stipnés.

13. ¿Ximod labúu guisuidylo gonylo mandad? (Láaca bibiʼ retrat).

¹³ Bisuidy gonylo mandad. Ló xidal lagary, buñgonaʼ ngú ni rony dxiin rioʼ. Pentzi xinaʼlo o stoib hermana ni nan, labúu guisuidy looy gonylo láani. Toib hermana ni laa Cindy ná: «Toibtica galrrascad ni más rasac ni bidudy xinaʼya naʼ láani ngú ni bisuidybu naʼ, que órni nadip ronylo dxiin, rasaclo sacró né looyca. Ni bisudi ñonytzaaya galrro, nasiáya, naguiba lairy né nasiiya cós, nigolú gocnéni naʼ né bidudyni lagary ñoni más xchiin Jehová. Xinaʼya láaca bisuidy naʼ nagobioya sacró stipnés, né por ngú bimbuya hermanos né hermanas ni bisuidy naʼ xidal cós» (Prov. 31:15, 21, 22). Buñgonaʼ ni nadip rony dxiin, ni ragobioo stipnés né ni nan rony mandad nacyibu toib galnasác par xfamilyibu né par congregación (Prov. 31:13, 17, 27; Hech. 16:15).

14. ¿Xí rasuidylo ni goniʼ Crystal, né ló xí cós non coʼlo guiclo?

¹⁴ Bisuidy guidxinaʼlo ni guálo. Guirá cristianos ni nadip xfe non coʼyibu guicyibu guisuidyibu guidxinaʼyibu ni guáyibu por stipláacayibu né tzoʼ nakityibu né ni napyibu (Filip. 4:11). Toib hermana ni laa Crystal rabexa: «Dzú góca mbioxhlasien né goyaʼya scuel, goyoʼ tipnés cós ni labúu nabúya par nasudi, né bixiosa né xinaʼya gochyibu naʼ nasudi ñoni toib  dxiin ni labúu ñacné naʼ. Por ejemplo, bixiosa gochbu naʼ nasudi nabeʼya cuent, né ngú nigolú gocnéni naʼ». Diti nosi gonylo puext par guidzelo toib dxiin, láaca biyopy mod guisuidylo ganlo ximod gonylo gaxt bidxiich (Prov. 31:16, 18). Pal diti cuenunysi rioʼlo ló diʼin né rioʼ nakitlo mod nabanylo, labúu coʼlo guiclo ló metas ni naplo lainy xcudx Jehová (1 Tim. 6:8).

15, 16. ¿Xigony nigolú rasac hermanas ni diti noʼ tzeʼel? (Marcos 10:29, 30).

¹⁵ Pal raplo cualidades ni rioladx Jehová né rasuidylo cós ni labúu gacné looy, sioʼlo más puext después. Guibiʼno tipnés cós ni labúu gonylo.

¹⁶ Labúu coʼlo guiclo diti nimaca gonylo galtzeʼel. Xomod goniʼ Jesús, noʼ tipnés ni ragoʼ guic diti gony galtzeʼel, ná lagary ro rabésyibu, buñ rakíil saʼ par gony galtzeʼel (Mat. 19:10-12). Stipnésyibu diti rony galtzeʼel por stipnés razón. Pal diti ma noʼ tzeʼelo, diti gonylo pensary que diti tampa rasaclo par Jehová né Jesús por ni diti noʼ tzeʼelo. Ló guidopynac Gudxlio, hermanas ni diti nap tzeʼel nigolú rasacyibu par congregación. Galnadxiʼ né ni rioʼyibu galrrasaʼ por stipnés ronyni que stipnés herman guibiʼ layibu xomod xinaʼyibu, beelyibu né bisanyibu ló sentido espiritual (bíil Marcos 10:29, 30; 1 Tim. 5:2).

17. ¿Xí láani sacné hermanas mbioxhlas par tzagaʼlyibu meta ni tzodieʼyibu ló xchiin Jehová?

¹⁷ Labúu tzodieʼlo ló xchiin Jehová. Casi guirá predicación ni rac ló guidopynac Gudxlio, hermanas rony láani (Sal. 68:11). ¿Labúu coʼlo guiclo tzodieʼlo ló xchiin Jehová la? Pentzi labúu gaclo precursora, gonylo dxiin ló construcción o gaclo betelita. ¿Xí láani sacné looy par tzagaʼlo meta ni naplo? Goniné Jehová, goniné herman ni ma nodieʼ ló xchiin Jehová né gon xi láani raquiin gonylo. De ngú bicaʼ ló guiich ni gonylo par tzagaʼlo meta cu. Pal riodieʼlo ló xchiin Jehová, saxal xidal puert sacróyen par looy ló xchiin Jehová.

18. ¿Xigony nigolú rasac que toib hermana gap cuidad órni cuubu chú guicaʼ láabu? (Láaca bibiʼ retrat).

¹⁸ Labúu coʼlo guiclo guicaʼ buñ looy. Cualidades né dxiin ni bisuidyno dada nigoreʼ sacnéni looy par tzeeni galán  looy lainy xcaltzeelo. Nigolú, pal nainy gonylo galtzeʼel, non cutzaylo chú láabu gac tzeʼelo. Nacni toibtica cós ni coʼlo guiclo ni más rasac ló xcalnabanylo. Bisetnaladx que buñguieeu ni gac tzeʼelo, láabu sacbu guiclo (Rom. 7:2; Efes. 5:23, 33). Por ngú gonabdiitz looy: «¿Nacbu toib cristiano ni nadip xfe la? ¿Rienni que Jehová ngú ni más rasac par láabu la? ¿Rabútzaybu xí láani gonybu la? ¿Radudybu cuent pu rachébu la? ¿Rapbu respet buñgonaʼ la? ¿Labúu sanbu naʼ ló sentido espiritual, material né emocional la? ¿Rony cumplirbu né responsabilidad ni napbu la? Por ejemplo, ¿xí asignaciones napbu lainy congregación, né ximod rony cumplirbu láani?» (Luc. 16:10; 1 Tim. 5:8). Né, pal nainy guidzelo toib galán hermano par gac tzeʼelo, láaca non gonylo rutirigaʼlni looy par gaclo toib galán tzeʼel par láabu.

19. ¿Xigony labúu guinino que toib privilegio láani gacné buñ tzeʼel?

¹⁹ La Biblia ná que toib galán tzeʼel nacbu toib «ni racné» tzeʼel ni nac buñguieeu (Gén. 2:18). ¿Radudy ndeʼ diitz que buñgonaʼ diti tampa rasac la? Yaca, nacni toib privilegio. Rioʼ ór la Biblia rabeʼ laa Jehová ni «racné» (Éx. 18:4; Heb. 13:6). Toib buñgonaʼ nacbu toib ni racné, órni racnébu tzeelbu né ronybu dxiin par guirebuʼ ni ragoʼ tzeelbu guic gony. Láaca, nadxiʼbu Jehová, por ngú racnébu par guiniʼ buñ sacró de tzeelbu (Prov. 31:11, 12; 1 Tim. 3:11). Pal cayonylo pensary guicaʼ buñ looy, labúu gonylo puext né gony nadiplo galnadxiʼ ni rasaclo por Jehová né gonylo rutirigaʼlni looy desde nigoreʼ par gacnélo xfamilo né congregación xtunylo.

20. ¿Ximod racné toib xinaʼ mbiox lainy xfamil?

²⁰ Labúu tzoʼ xiinlo. Pal ronylo galtzeʼel, looy né tzeʼelo labúu tzoʼ xiinto (Sal. 127:3). Por ngú galán láani gonylo pensary ló ni raguiña gantzaylo xiinlo. Cualidades né guirá ni bisuidyno ló artículo reʼ nigolú sacnéni looy. Né xcalnadxiʼlo, xcalrronladxlo né xpaseinyslo, sacnéni xfamilo guibany nakit né sacnéni xiinlo guisacyibu sacró né guisacyibu que ronladxlo layibu (Prov. 24:3).

21. ¿Balac rasac xhermanno buñgonaʼ par looy, né xigony? (Bibiʼ retrat ni sieed laidy guiich reʼ).

²¹ Hermanas mbioxhlas, nadxiʼdo lóoto por guirá ni ronyto por Jehová né por xcudxbu (Heb. 6:10). Ronyto rutirigaʼlni lóoto por gapto cualidades, rasuidyto cós ni ragoʼ nakit lóoto né buñ ni nagoo lóoto, né ronyto puext par ni gonyto después. ¡Nigolú rasacto par xcudx Jehová!