1. ¿Xí raquiin gony cristianos buñguieeu par guirebuʼ ni gonyibu?

 REY DAVID gochbu Salomón: «Góc nadip né buny xomod toib buñguieeu» (1 Rey. 2:1-3). Guirá buñguieeu cristianos galán guisobyibu consej reʼ. Par tzeeni galán láayibu raquiin guisuidyibu guisobyibu ni rony mandary Jehová né guisobyibu láani ló xcalnabanyibu (Luc. 2:52). ¿Xigony rasac que mbioxhlas buñguieeu guidxin gac nadip fe xtunyibu?

2, 3. ¿Xigony nigolú rasac que herman mbioxhlas guidxin gacyibu cristianos ni nadip xfe?

² Buñguieeu cristianos napyibu xiroʼ responsabilidad lainy xfamilyibu né lainy congregación. Pal naclo toib buñguieeu mbioxhlas sigory ma bunylo pensary ló responsabilidad ni gaplo después. Sigory ma goloʼlo guiclo gaclo precursor, siervo ministerial né después guidxin gaclo anciano. Pentzi nainy guicaʼlo buñ né tzoʼ xiinlo (Efes. 6:4; 1 Tim. 3:1). Par tzagaʼlo metas cu né guirebuʼ xtunylo, raquiin gac nadip fe xtunylo. b

³ ¿Xí sacné looy par gaclo toib cristiano ni nadip xfe? ¿Xí dxiinien ni rasac non guisuidylo né gantzaylo gonylo? Né ¿ximod labúu tzoʼlo puext nigoreʼ par labúu guirebuʼ guirá dxiin ni gonylo después? Ganno ximod.

4. ¿Púti labúu guidzelo ejemplos galán? (Láaca bibiʼ retrat).

⁴ Golútzay ejemplos galán. Labúu guicaʼlo cuidad xidal buñguieeu ni diti bisian Jehová ni ritlaa ló la Biblia ni gondxiʼ Dios né gon xcudx Dios de xidal mod. Sigory lainy xfamilo né láaca lainy congregación xtunylo láaca noʼ herman ni nadip xfe ni labúu guisuʼlo (Heb. 13:7). Láaca naplo ejemplo ni diti raché xtuny Jesucristo (1 Ped. 2:21). Órni guisuidylo guirá ejemplos re, buny pensary ló cualidad ni gop tigaagayibu (Heb. 12:1, 2). Después, buny pensary ni raquiin gonylo.

5. ¿Xí raquiin gonylo par tzoʼ xcalrrienlo, né xigony nigolú rasacni? (Salmo 119:9).

⁵ Gon né «goloʼ xcalrrienlo» (Prov. 3:21). Buñguieeu ni rony ndeʼ rabeʼbu tiemp né ronybu pensary antes de coʼbu guicbu gonybu toib cós. Por ngú buny rutirigaʼlni looy par tzoʼ xcalrrienlo, né diti guisnitlo láani. ¿Xigony? Ló Gudxlio reʼ noʼ xidal mbioxhlas ni radudy lagary que xpensaryibu né xcalnanyibu conésni layibu (Prov. 7:7; 29:11). Láaca, televisión, películas, internet né redes sociales labúu guichiinni looy par gonylo toib cós. Por ngú, ¿xí raquiin gonylo par tzoʼ xcalrrienlo? Primer, bisuidy principios ni sieed ló la Biblia né buny pensary xigony ni raniʼ Jehová racnéni looy. Después, biquiin guirá ni ma bisuidylo par coʼlo guiclo gonylo ni rioladx Jehová (bíil Salmo 119:9). Ni tzoʼ xcalrrienlo nigolú raquiinni par gaclo toib cristiano ni nadip xfe (Prov. 2:11, 12; Heb. 5:14). Nigoreʼ guisuidyno ximod ni tzoʼ xcalrrienlo labúu sacnéni looy par 1) guidzaklo hermanas né 2) coʼlo guiclo ximod gactzaylo.

6. ¿Ximod guislooy toib mbioxhlas ni noʼ xcalrrien que napbu respet herman buñgonaʼ?

⁶ Ni tzoʼ xcalrrienlo sacnéni looy par gaplo respet buñgonaʼ. Por ejemplo, pentzi toib buñguieeu rioladxbu toib  hermana né nainy guimbutzaaybu hermanacu. Diti mal. Toib mbioxhlas diti sony, diti saniʼ o sacaʼ cós ni gony que hermanacu gony pensary que rioladxbu hermana reʼ pal diti ma goloʼbu guicbu guicaʼbu hermana reʼ (1 Tim. 5:1, 2). O, pal ma carenébu toib hermana sonybu que buñ diti guiniʼ mal de láabu pal diti rioʼyibu guiropsiyibu (1 Cor. 6:18).

7. ¿Xí láani coʼ guic toib mbioxhlas ni noʼ xcalrrien mod gactzay?

⁷ Stoib mod ni raslooy toib mbioxhlas que ma bisuidybu mod rony pensary Jehová, láani ngú mod nac xhapbu né mod ragoʼnybu guicbu. Casi guirá ór, buñ ni rony lairy diti napyibu respet Jehová né ronyibu galyoxh. Por ngú lairy ni rabeʼyibu nabédxichni né ronyni que buñguieeu guieen xomod buñgonaʼ. Toib mbioxhlas ni cayony rutirigaʼlni par gacbu toib cristiano ni nadip xfe sagoʼbu cuent principios ni sieed ló la Biblia né ejemplos galán ni noʼ lainy congregación órni guiniʼbu ximod gac xhapbu né ximod gactzaybu. Gonabdiitz looy: «¿Raslooy ni ragoʼya guica goni que noʼ xcalrriena né raapa respet mod rasac stipnés la? ¿Rien por mod ractzaya que naʼca xpiin Dios la?» (1 Cor. 10:31-33; Tito 2:6). Mbioxhlas ni noʼ xcalrrien diti nosi ronyibu que stipnés herman gap respet láayibu láaca Bixiosbu ni noʼ guibá.

8. ¿Ximod labúu guisuidy toib herman mbioxhlas par labúu gonybu que stipnés gap confianz láabu?

⁸ Buny que stipnés gap confianz looy. Ngú raguiña gony cumplirlo guirá responsabilidad ni naplo (Luc. 16:10). Buny pensary ló ejemplo galán ni buny Jesús. Láabu dipa bitzatzñabu dxiin ni gopbu. Xalagary ngú, bunybu guirá ni gonab Jehová láabu dada órni góc naganni par láabu. Gondxiʼbu buñ né máspa la, xpiimbu né goyoʼbu puext ñaitybu por láayibu (Juan 13:1). Xomodca Jesús buny rutirigaʼlni looy por gony cumplirlo né nitisi dxiin ni guidudy buñ looy. Pal diti nanlo ximod gonylo láani góc buñdxo né gonab xcalrracné toib hermano ni nadip xfe. Dipa tzoʼlo conforme né tidxosi dxiin ni ronylo (Rom. 12:11). Xalagary ngú bisloʼox guirá dxiin ni guidudy buñ looy; buny láani «par Jehová né diti par buñgudxlio» (Col. 3:23). Naclo buñ galkié por ngú góc modesto né bidudy cuent pu rachélo (Prov. 11:2).

9. ¿Xigony raquiin guisuidy toib herman mbioxhlas tipnés dxiinien ni labúu gacné láabu?

⁹ Par labúu gaclo toib cristiano ni nadip xfe, raquiin guisuidylo tipnés dxiin ni gacné looy. Ndeʼ sacné looy par  gaplo responsabilidad lainy congregación, guidzelo toib dxiin par labúu gacnélo xfamilo. Guisuidyno tipnésni.

10, 11. ¿Xigony galán láani par toib herman mbioxhlas né par congregación que guisuidybu goʼoltzaybu né guicaʼtzaaybu? (Salmo 1:1-3; láaca bibiʼ retrat).

¹⁰ Bisuidy goʼoltzaaylo né guicaʼtzaaylo. La Biblia ná que buñ ni rioʼ nakit né rarebuʼ ni ronybu roʼolbu Xtiitz Dios guirá dzú né ronybu pensary loni (bíil Salmo 1:1-3). Modcu radxin rimbubu mod rony pensary Jehová né racnéni láabu par gonybu pensary nayaa (Prov. 1:3, 4). Lainy congregación raquiin tzoʼ de clas buñguieeu reʼ. ¿Xigony?

¹¹ Hermanos né hermanas raquiinyibu xcalrracné buñguieeu ni guisuidy láayibu né ni guidudy consej ni sieed ló la Biblia láayibu (Tito 1:9). Pal rooltzaaylo né racaʼtzaaylo labúu sony comentarlo né sagoʼlo discurs ni guioladx herman né ni gony nadip láayibu. Láaca órni guisuidylo né guicadiaglo discurs ló reunión o ló samblia labúu sacaʼlo láani ló guiich par gony nadipni fe xtunylo né gacnélo stipnés herman.

12. ¿Xí sacné looy par gooylo diitz sacró né stipnés?

¹² Bisuidy gooylo diitz né stipnés. Ndeʼ raquiin gony guirá buñguieeu cristianos. Raguiñani guicadiagtzay buñ né guieen buñ ni rasac stipnés (Prov. 20:5). Labúu ganlo xi raniiny buñ guidudy diitz por mod rac lóbu, mod rasisbu o mod raniʼbu. Ndeʼ rasuidyno láani nosi órni radudyno tiemp né buñ. Pal guirá ór raninélo buñ por mensaj o por correo sasac naganlo guininélo buñ órni guibiʼlo láabu. Por ngú biyopy mod gooylo diitz né laʼpabu (2 Juan 12).

13. ¿Xí más raquiin guisuidy toib herman mbioxhlas? (1 Timoteo 5:8; láaca bibiʼ retrat).

¹³ Bisuidy toib dxiin par guidxinaʼlo ni guálo. Toib cristiano ni nadip xfe non guidxinaʼbu ni guábu né xfamilbu (bíil 1 Timoteo 5:8). Lainy tipnés gudxrop, mbioxhlas labúu guisuidyibu gonyibu dxiin ni rony bixiosbu o ni rony xfamilbu, ló stipnés lagary mbioxhlas riee scuel par guisuidy gony toib dxiin. Mod nitisi nacni. Galán láani guisuidylo toib dxiin ni labúu guitudy looy dzú (Hech. 18:2, 3; 20:34; Efes. 4:28). Buny dxiin nadip né diti guisianbalaʼlo xchiinlo. Modcu labúu saplo xchiinlo né diti sasnitlo láani. Cualidad né tipnés dxiinien  ni bisuidyno láaca sacnéni looy par gony cumplirlo né responsabilidad ni gaplo después. Guisuidyno tipnésni.

14. ¿Xí láani sacné toib mbioxhlas par tzoʼbu puext tzodieʼbu ló xchiin Jehová?

¹⁴ Labúu tzodieʼlo ló xchiin Jehová. Xidal herman ni nadip xfe gosalóyibu ló galprecursor dzú nacsayibu mbioxhlasien. Pal naclo precursor, sasuidylo gonylo dxiin né stipnés buñ, sasuidylo ximod guiquintzaylo xpidxiichlo (Filip. 4:11-13). ¿Xigony diti raclo precursor auxiliar? Ndeʼ ma gocnéni xidal herman par gacyibu precursor regular. Né galprecursor regular labúu sacnéni looy par gonylo más xchiin Jehová, por ejemplo gonylo dxiin ló construcción o gaclo betelita.

15, 16. ¿Xí láani non gony toib herman mbioxhlas ni ná gac siervo ministerial o anciano?

¹⁵ Labúu gaclo siervo ministerial o anciano. Guirá herman non gonyibu rutirigaʼlni láayibu par labúu gacyibu ancianos de congregación. La Biblia ná que buñ ni ná gacné xherman «xinésni ngú caa guicbu gonybu» (1 Tim. 3:1). Par labúu guidxinlo gaclo anciano, primer non gaclo siervo ministerial. Siervos ministeriales racnéyibu ancianos de xidal mod. Tanli siervos ministeriales né ancianos racyibu buñdxo né rony predicaryibu né gan. Toib mbioxhlas labúu gacbu siervo ministerial ná nacsabu mbioxhlasien. Né toib siervo ministerial ni rony dxiin galán labúu guidxinbu gacbu anciano después ni ma bisaʼbu 20 íz.

¹⁶ Ni raquiin gony buñ par gac siervos ministeriales né ancianos sieedni ló la Biblia né rareʼni mod nadxiʼlo Jehová, xfamilo né congregación (1 Tim. 3:1-13; Tito 1:6-9; 1 Ped. 5:2, 3). Toib ni labúu gacné looy láani ngú, gonylo rutirigaʼlni looy por guienlo xi radudy diitz guirá cós ni non gonylo né guinablo Jehová gacné looy par gony cumplirlo láani. c

17. ¿Ximod labúu gony puext toib mbioxhlas par gantzaybu tzeelbu né par guisanirbu lainy xfamilbu? (Láaca bibiʼ retrat).

¹⁷ Labúu gonylo galtzeʼel né guisanirlo lainy xfamilo. Modpa goniʼ Jesús, noʼ tipnés herman ni nadip xfe ni goloʼ guic diti gony galtzeʼel (Mat. 19:12). Per, pal nainy gonylo galtzeʼel, ma saplo responsabilidad  par ganlo tzeʼelo né guisanirlo lainy xfamilo (1 Cor. 11:3). Jehová rabés que buñguieeu gandxiʼ tzeʼel tanli ló sentido físico, emocional né espiritual (Efes. 5:28, 29). Cualidades né dxiinien ni bisuidyno ló artículo reʼ xomod ni tzoʼ xcalrrienlo, gaplo respet buñgonaʼ né gonylo que stipnés gap confianz looy sacnéni looy par gantzaylo tzeʼelo né guisanirlo lainy xfamilo.

18. ¿Ximod labúu tzoʼ puext toib mbioxhlas par gantzaybu xiimbu?

¹⁸ Labúu tzoʼ xiinlo. Pal ronylo galtzeʼel, labúu tzoʼ xiinlo. Ejemplo xtuny Jehová labúu guisuidyni looy ni radudy diitz gac buñ toib galán bixios mbiox (Efes. 6:4). Jehová gochbu Xiimbu, Jesús, que gondxiʼbu né que cuacuentbu Jesús (Mat. 1:11). Pal rioʼ xiinlo, galán láani guiaʼlo gaibylo láabu que ronladxlo láabu né que galán cayonybu láani. Bixios mbiox ni rasuʼ Jehová racnéyibu xiinyibu par gacyibu cristianos ni nadip xfe. ¿Ximod labúu gonylo puext dada nigoreʼ par gantzaylo xiinlo? Gonladxlo xfamilo, congregación, né guisuidylo gaibylo láayibu que nadxiʼlo láayibu né rasacyibu par looy (Juan 15:9). Ndeʼ diti nosi sacnéni looy pal ronylo galtzeʼel né rioʼ xiinlo, láaca sacnéni looy par guisaclo par xfamilo par Jehová né par congregación.

19, 20. ¿Xí raquiin gony toib mbioxhlas par guidxin gacbu toib cristiano ni nadip xfe? (Bibiʼ dibuj ni sieed laidy guiich reʼ).

¹⁹ Pal naclo toib herman mbioxhlas, bisetnaladx que diti sadxinlo gaclo toib herman ni nadip xfe sin gonylo xitcal. Non cutzaylo ejemplos galán ni guisuʼlo, non tzoʼ xcalrrienlo, non gonylo que stipnés gap confianz looy, guisuidylo dxiin ni labúu gacné looy né gonylo puext par después.

²⁰ Órni gonylo pensary ló guirá dxiin ni non gonylo, labúu guisaclo que xiroʼni par looy. Per diti guireʼganlo ¡looy labúu gonylo láani! Diti guialadxlo que Jehová ná gacné looy (Is. 41:10, 13). Né hermanos né hermanas de congregación xtunylo láaca noʼyibu puext par gacnéyibu looy. Órni gaclo toib buñguieeu ni nainy Jehová gaclo, labúu sabanylo sacró né sioʼ nakitlo. Ronladxgoluʼdo looy né rabésdo que Jehová guisiab galnasác ronoʼlo por ni ronylo rutirigaʼlni looy por gaclo toib cristiano ni nadip xfe (Prov. 22:4).