Diitz sacró de Gobierno xtuny Dios cayac predicarni ló guidopynac Gudxlio, xomod goniʼ Jesús gacni (Mateo 24:14). Libro xtuny Daniel rabexani que Gobierno reʼ sieedni de Dios. Ló capítulo 2 de librocu raniʼni de tipnés Gobiernos ni goyoʼ desde xtzú Babilonia né radxinni dada ló xtzúno, ló versículo 44, raibyni lóono xi tzagac después:

«Ló xtzú guirá reyescu, Dios ni noʼ guibá sagoʼbu toib gobierno ni dipa sanitló nili sadudyni ladxña stoib gudx. Gobierno reʼ sonynoyni né sanitlóni guirá gobiernoscu, né nosi láani sioʼni por tipzó».

Profecía reʼ né stipnés profecías ni sieed ló la Biblia raniʼni que Gobiernos xtuny Dios sioʼni xalagary guirá Gobiernos ni noʼ ló Gudxlio reʼ, né sonyni que buñ guiguaʼ sacró ló Gudxlio. ¿Ximod sabany buñ xan xomandary Gobierno reʼ? Nigoreʼ guisuidyno tipnés cós sacróyen ni mápa mer gony gobierno reʼ.

• DITI SIOʼ GUERR

  Salmo 46:9. Dios: «ranitlóbu guerr ló guidopynac gudxlio. Raxoʼoxbu arco né rabeʼ balaʼbu lanz, rasaʼijbu camión de guerr».

  ¿Ximod ronylo pensary ñac Gudxlio reʼ pal guirá bidxiich né galnan naquiinyibu láani par ñacnéyibu buñ ló Gudxlio? Xan xomandary Gobierno xtuny Dios, sarebuʼ diitz ni ná que ma diti sioʼ guerr.

• DITI SIOʼ GALGUITZ

  Isaías 33:24. «Ni toib buñ saniʼ: Caxoʼya».

  Bunysi pensary que noʼlo ló toib Gudxlio ro yadi galguitz, ro diti raxoʼ xcalnabany buñ, ro yadi cáncer, diabetes nili stipnés galguitz. Pal nabanyno ló toib Gudxlio xomod ma bisetlano, diti naquiin buñ hospital nili remeidy. Né scú ná Dios guibanyno ló Gudxlio: ma sacno buñ nasac.

• DITI SIOʼ GALRRALÁN

  Salmo 72:16. «Sioʼgolu ni guá buñ ló gudxlio, laidy dainy sioʼgoluni».

  Gudxlio reʼ sadudyni xiroʼ galrro par guiránac buñ, né sagaisyni sacró. Ma diti sioʼ galrralán nili saity buñ xtolni.

• MA DITI SIOʼ GALRRIOʼOB NILI GALGOITY

  Apocalipsis 21:4. Dios «saspiichbu nís ni rareʼ bisalóyibu, né ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob. Cós ni góc nírcu ma diti noʼni».

   Buñ ma diti sap galkié né sabany por tipzó ló toib Gudxlio móz. Ngúpa ni ma goniʼ Bixiosno Jehová gony.

¿Ronylo crer que guirá ndeʼ nigolú sacróyenni, per nagan par gac cumplirni la? Ná xidal buñ rioladx guibany mod rasetlaa la Biblia, xidal buñ rasac nagan guieen xi láani ngú galnabany tipzó. Né napyibu razón, portín ni toib buñ ma bibany tipzó.

Ma por xidal íz buñ noʼ xan xomandary galkié né galgoity, por ngú ma biaʼyibu nabanyibu ló galrrioʼob. Per diti scú goniiny Dios nabany buñgudxlio.

Par gac nadip confianz xtunyno ló xtiitz Dios, láabu nayadit goniʼbu diitzreʼ: «Diti sabiguetni sin gac cumplirni; sonyni ni nainy naʼ né sonyni dxiin ni bixela láani gonyni» (Isaías 55:11).

La Biblia ná que Dios «diti labúu rascú» (Tito 1:2). Né láabu goniʼbu guirá diitz sacróyen reʼ, nigolú rasac gonyno pensary ló tipnés galrranabdiitz reʼ: «¿Xí nigolú sabanyno ló toib Gudxlio móz la? ¿Xí raquiin gonyno par guicaʼno guirá galnasác ni ma goniʼ Dios?». Stipnés artículos ni sieed sacnéni looy ganlo ximod rarexa galrranabdiitz reʼ.