1. ¿Ximod bislooy toib mbioxien que napbu fe guiás gueʼet?

 TOIB mbioxhlasien ni laa Matthew nap toib galguitzsii, né ma góc operarbu xidal buelt. Órni gopbu gatz íz, góc toib cós ni radziguiaʼ buñ. Toibtica dzú, láabu né xfamilbu dxeeyibu cabiʼyibu JW Broadcasting^®. Órni ma yaaca lox programacu, bibiʼyibu toib video musical ro birecaa tipnés herman cacacuent xfamil ni ma goity. b Órni biloxni, Matthew bibigax né gonás ña bixios né xinaʼ né goniʼ: «Ma, pa, ¿bibiʼto que pal gati labúu siása stoib la? Labúu cuésto naʼ. Diti tzoʼto ló galrrasaʼ». ¿Ronyto pensary ximod gosacyibu órni bibiʼyibu fe ni nap xiimbu la? Matthew gop confianz que siás gueʼet.

2, 3. ¿Xigony galán gonyno pensary que siás gueʼet?

² Guirága ór non guisetnaladxno que Dios salís gueʼet (Juan 5:28, 29). ¿Xigony? Portín diti nanno xi guisaclono stoib dzú. Labúu guixoʼsiino o tisintiempsi gaity toib buñ ni ronladxno (Ecl. 9:11; Sant. 4:13, 14). Ni nanno que siás gueʼet labúu sacnéni lóono guicalóno galnagancu (1 Tes. 4:13). La Biblia ná que Bixiosno ni noʼ guibá rimbutzaay né ronladxgoluʼ lóono (Luc. 12:7). Rimbutzaaybu lóono, por ngú labúu salísbu lóono modpa gócno. Né ronladxgoluʼbu guiráno, por ngú radudybu oportunida  lóono guibanyno tipzó. Dada salísbu lóono pal raityno.

³ Ló artículo reʼ guisuidyno xigony raquiin gapno confianz que nigolú siás gueʼet. Láaca sac nadip fe xtunyno órni guisuidyno historia ro bireʼ texto temático reʼ: «Bisanlo siás» (Juan 11:23). Por último, guibiʼno xi raquiin gonyno par gapno más confianz que siás gueʼet.

4. ¿Xí raquiin ganno par gapno confianz ló ni ná Dios gony? Bisetlaa toib ejemplo.

⁴ Par labúu gapno confianz ló ni ma goniʼ Dios gony, non gapno confianz que ni raniʼ láani nainy gonybu láani né napbu galnadip par labúu gonybu láani. Gonyno pensary ló ndeʼ: Xtol toib guiérodann noʼ ni gosaclóo lidxno, né toib ximigno raiby lóono: «Gacnéya looy guiaʼ lidxlo stoib». Nanno que nigolú ni raniʼbu né nainy láabu gacnébu lóono. Láaca nanno que labúu sonybu láani portín rasaʼtzaybu yoʼ né napbu guirá ni raquiin toib buñ ni rasaʼ yoʼ. Por ngú rapno confianz ló guirá ni raibybu lóono. ¿Labúu gapno confianz que siás gueʼet la? ¿Nigolú nainy Dios guilís gueʼet né napbu galnadip par gonybu láani la?

5, 6. ¿Xigony nanno que Jehová nainy guilísbu buñ ni ma goity?

⁵ ¿Nainy Jehová guilís gueʼet la? Scú láani. Bisanésbu xidal buñ par nacaʼ ló la Biblia que siás gueʼet (Is. 26:19; Os. 13:14; Apoc. 20:11-13). Né Jehová rony cumplir guirá ni raniʼ (Jos. 23:14). Né ni máspa, Jehová raniiny guilísbu gueʼet. ¿Xigony ranino scú?

⁶ Gonyno pensary ni bisetlaa Job. Gondxichbu que pal ñaitybu, Jehová naniiny nabiʼ láabu stoib (Job 14:14, 15, nota). Ngúca rasac Jehová por guirá xpiin ni ma goity. Raniiny láabu guilísbu xpiimbu par guibany sacró né nasac. ¿Né xí rasac Jehová por guirá buñ ni ma goity ni diti labúu bimbu láabu? Bixiosno ni ronladx lóono láaca nainy guilís layibu (Hech. 24:15). Nainy láabu que guirá buñcu gac ximigbu né guibany tipzó ló Gudxlio (Juan 3:16). Riendxichni que Jehová nainy guilísbu buñ ni ma goity.

7, 8. ¿Xigony nanno que Jehová nap galnadip par guilís buñ ni ma goity?

⁷ ¿Láaca nap Jehová galnadip par guilís buñ ni ma goity la? Scú láani. Láabu nacbu Dios «ni nap Xiroʼ galnadip» (Apoc. 1:8). Labúu guinitlóbu nitisi enemig, dada galgoity (1 Cor. 15:26). Ni nanno guirá ndeʼ radudyni balory lóono né rasialdóni xcalnabanyno. Guibiʼno ni gosaclóo Emma Arnold. Láabu né xfamilbu cualóbu xiroʼgolu prueby ló ni rarop Guerra Mundial. Par labúu nasialdóbu xcalnabany xiindzapbu órni goity xfamilbu ló campos de concentración nazis, gochbu xiindzapbu: «Pal ñaity buñ por tipzó, ¿galgoity ñacni más nadip que Dios ja?». Scú láani, diti noʼ stoib ni más nadip que Jehová. Láabu bisaʼbu guirá ni nabany, por ngú napbu galnadip par guilísbu buñ ni ma goity.

⁸ Láaca nanno que Dios labúu guilís buñ ni ma goity portín diti rialadxbu xitcal. La Biblia ná que nanbu guirá laa vitzón (Is. 40:26). Jehová rasetnaladx guirá buñ ni ma goity (Job 14:13; Luc. 20:37, 38). Labúu guisetnaladxbu ximodpa nac buñ ni guilísbu, por ejemplo rasetnaladxbu mod nac lóo buñcu, ni bunybu né guirá ni gosaclobu.

9. ¿Xigony ronylo crer que siás gueʼet?

 ⁹ Mod ma bisuidyno, labúu gapno confianz que salísbu buñ ni ma goity portín nanno que Jehová raniiny gony láani né napbu galnadip. Láaca nanno que labúu gony cumplirbu láani, portín ma golísbu tipnés buñ ló dzú ni see. Ló dzú ni cuá la Biblia, Jehová bidudy galnadip tanli Jesucristo né stipnés buñguieeu par nalísyibu buñ ni ma goity. Guisuidyno de toibtica buñ ni golís Jesús lad gueʼet. Sieedni ló capítulo 11 de Juan.

10. ¿Xí láani rac laʼga caniʼ Jesús xtiitz Dios lainy toib lagary ni riaʼan chop govitz de gudx Betania, né xí ragoʼbu guicbu gonybu? (Juan 11:1-3).

¹⁰ (Bíil Juan 11:1-3). Jesús gopbu tipnés ximigdxinbu ni bibany lainy gudx Betania: Lázaro né guiropca bisanbu, María né Marta (Luc. 10:38-42). Órni ma calox íz 32, Lázaro bixoʼ. Bisanbu riogoluʼ ló galrrasaʼ né raxelbu ni tzágudx láani Jesús, ni noʼ stiplad guʼuc Jordán, chop govitz par guidxin buñ lagarycu (Juan 10:40). Nabanni, portín órni radxinyibu ronoʼ Jesús Lázaro ma goity. Ná ma gon Jesús que ma goity ximigbu, riaʼanbu sa xchop govitz antes de tzeebu gudx Betania. Né por ngú órni radxinbu cú, Lázaro sané tap govitz de goló goity. Bunybu láani scú par ñacnébu ximigbu né gonyxiroʼbu Dios (Juan 11:4, 6, 11, 17).

11. ¿Xí láani rasuidyno mod bidzak Jesús ximig?

¹¹ ¿Xí rasuidyno mod bidzak Jesús ximig? Órni María né Marta bixel ni gooygudx a Jesús que Lázaro caxoʼ, diti gonabyibu Jesús ñeed gudx Betania. Nosi goniʼyibu que ximigdxin Jesús caxoʼ (Juan 11:3). Órni goity Lázaro, dipa fuerspa ñee Jesús dada ronoʼbu par nalís láabu. Per goniiny láabu ñeebu dada gudx Betania ronoʼ ximigbu María né Marta. ¿Naplo toibtica ximiglo ni raniiny gacné looy ná diti canablo galrracné láabu la? Pal scú láani, nanlo que labúu sacnébu looy ló «tiemp ni noʼ galnagan» (Prov. 17:17). Pal rasuʼno Jesús, sacnéno ximigno. Golno stidxo historia reʼ né ganno xi láani góc.

12. ¿Xí góoch Jesús Marta, né xigony gopbu confianz que narebuʼ ni goniʼ Jesús? (Juan 11:23-26).

¹² (Bíil Juan 11:23-26). Órni ran Marta que Jesús ma noʼ gaxca gudx Betania, órcuca rieebu radzaglóobu Jesús. Né raniʼbu: «Señor, pal ñoʼlo reʼ bisana diti ñaity» (Juan 11:21). Jesús labúu nasialbu Lázaro, per nainy láabu gonybu toib galrradziguiaʼ. Raibybu Marta: «Bisanlo siás». Láaca rony nadipbu fe xtuny Marta órni raniʼbu ndeʼ: «Naʼ ngú ni ralís gueʼet né naʼ ngú galnabany». Scú láani, Dios ma bidudy galnadip Jesús par guilísbu buñ ni ma goity. Dada órcu, Jesús ma golísbu toib mbioxgonaʼyen ni laʼra goity né toib mbioxhlas ni rolooyni goity dzú golísca Jesús láabu (Luc. 7:11-15; 8:49-55). Per ¿labúu nalísbu toib buñ ni  ma sané tap govitz de goló goity né ma calaʼnic la?

13. Mod ná Juan 11:32-35, ¿ximod gosac Jesús órni bibiʼbu María né stipnés buñ cayibdxaʼ? (Láaca bibiʼ dibuj).

¹³ (Bíil Juan 11:32-35). Gonyno pensary ló ni góc. María, stoib bisan Lázaro, rabigaxbu Jesús né raniʼbu ni goniʼca Marta: «Señor, pal ñoʼlo reʼ bisana diti ñaity». Tanli láabu né guirá buñ ni cayony compañer layibu, rioʼob xcalnabany. Órni Jesús bibiʼ cayibdxaʼyibu, láaca gosac nabambu. Jesús binladxgoluʼ layibu, por ngú dada gorudxaʼbu. Nanbu balaati galrrioʼob rodann láani órni raity toibtica ni ronladxno né nainy láabu cueʼbu galrrioʼob rodancu.

14. ¿Xí rasuidyno mod nac Jehová órni Jesús bibiʼbu cayibdxaʼ María?

¹⁴ Bioʼob xcalnabany Jesús órni bibiʼbu María cayibdxaʼ, né ngú rasuidy lóono que Dios láaca ronladxgoluʼ lóono. ¿Xigony ranino ndeʼ? Portín mod ma bisuidyno ló artículo ni ma godudy, Jesús rasuʼtzay mod rony pensary né mod rasac Bixios (Juan 12:45). Por ngú, órni rolno que Jesús gorudxaʼbu órni bibiʼbu ximigbu cayoʼob xcalnabany, nanno que Jehová láaca rioʼob xcalnabanybu órni rabiʼbu lóono radudyno ló galrrioʼob (Sal. 56:8). ¿Guirá ndeʼ ronyni que guibigaxno más Jehová Dios ni ronladx lóono ja?

15. Mod ná Juan 11:41-44, ¿xí rac ro bigach Lázaro? (Láaca bibiʼ dibuj).

¹⁵ (Bíil Juan 11:41-44). Jesús goyee ro bigach Lázaro né gonabbu nabeʼyibu guieecu. Per Marta goniʼ que ma calaʼnicbu. Jesús cuapy láabu: «¿Xí diti goodxi looy que sabiʼlo xcalnadip Dios pal raluladxlo la?» (Juan 11:39, 40). Órcu Jesús rabiʼ lainy guibá né ronybu toib oración nisló guirá buñcu. Nainy láabu gonyxiroʼbu Jehová por galrradziguiaʼ ni ma gonybu. De ngú racaʼbu rudx: «¡Lázaro, bireʼ!». Né Lázaro rareʼ. Jesús buny toib galrradziguiaʼ ni diti cabés buñ (bibiʼ nota de estudio xtuny Juan 11:17).

16. ¿Ximod racné historia ni ritlaa ló Juan capítulo 11 par gapno más confianz que siás gueʼet?

 ¹⁶ Historia ni ritlaa ló Juan capítulo 11 racnéni lóono gapno más confianz que siás gueʼet. Guisetnaladxno xi láani góoch Jesús Marta: «Bisanlo siás» (Juan 11:23). Jesús, xomodca Bixiosbu nainy láabu guilísbu buñ ni ma goity né labúu gony cumplirbu láani. Mod gorudxaʼbu raslooyni que nainy láabu guinitlóbu galgoity né galnabann ni ragoʼ galgoity. Órni golísbu Lázaro, Jesús bislooybu stoib que napbu galnadip par guilísbu buñ ni ma goity. Gonyno pensary ni gochbu Marta: «¿Xí diti goodxi looy que sabiʼlo xcalnadip Dios pal raluladxlo la?» (Juan 11:40). Napno xidal razón par guiluladxno que Dios labúu salísbu buñ ni ma goity. Per ¿xí labúu gonyno par gapno confianz que nigolú sácni?

17. ¿Xí non gonyno órni golno ló la Biblia mod biás buñ ni ma goity?

¹⁷ Golno ximod golísyibu buñ ló dzú ni see né gonyno pensary loni. Ló la Biblia radzelno xhoon historias de buñ ni biás lad gueʼet. c ¿Labúu guisuidyno nanoydiguieʼ tigaaga historias reʼ la? Laʼga guisuidyno láani, coʼno ló xpensaryno que guirá buñ ni ritlaa reʼ nigolúpa bibanyibu: gocyibu buñguieeu, buñgonaʼ né mbiox. Guibiʼno xi rasuidyni lóono, né ganno ximod tigaaga ejemplos reʼ raslooyni lóono que Dios nainy láabu né napbu galnadip par guilísbu buñ ni ma goity. Né ni máspa, gonyno pensary mod biás Jesús lad gueʼet, portín láani ngú ni más rasac. Xidalguixo buñ bibiʼ que ma nabany Jesús stoib, ndeʼ ni más rony nadip fe xtunyno (1 Cor. 15:3-6, 20-22).

18. ¿Ximod guiquiinno canción ro ritlaa que siás gueʼet? (Láaca bibiʼ nota).

 ¹⁸ Guiquiinno «canción» ro ritlaa que siás gueʼet (Efes. 5:19). d Guirá canción reʼ rony nadipni fe xtunyno, né napno confianz que siás gueʼet. Por ngú nigolú rasac guicadiagno láani, gony cantarno né guinino xi rasuidyni lóono órni guienno Dios toibsi né xfamilno. Guisuidyno láani de memory né tzaʼisni lainy xcalnabanyno. Por ngú, órni guicalóno toib prueby ni coʼ riesga xcalnabanyno o gaity toibtica buñ ni ronladxno, espíritu xtuny Jehová sacné lóono par guisetnaladxno guirá canción reʼ. Ndeʼ sadudy balory lóono né sasialdóni xcalnabanyno.

19. ¿Xí labúu gonyno par gonyno pensary mod guiás buñ lad gueʼet? (Bibiʼ cuadriyen ni laa, « ¿Xí nanabdiitzlo layibu?»).

¹⁹ Guiquiinno xpensaryno. Jehová bisaʼ lóono par labúu gonyno pensary mod labúu guibanyno ló Gudxlio copy. Toib hermana ná: «Nigolú roni pensary ximod guibani ló Gudxlio copy. Por ngú rolooyni ma noʼya cú né dada rolooyni radxin xpuxiin guirá guieʼcu ronoʼya». Gonyno pensary ximod guisacno órni guimbuno xpiin Jehová ni bibany ló dzú ni see. ¿Chú más nainy looy guimbulo? ¿Xí nainy looy guinabdiitzlo láabu? Gonyno pensary ximod guisacno órni guibiʼno buñ ni ronladxno guiás lad gueʼet. Buny pensary xi labúu gaibylo layibu, mod cuʼdxlo layibu né ximod guibaladxlo órni guibiʼlo layibu stoib.

20. ¿Xí raquiin gonyrano?

²⁰ Radudyno guixquix Jehová ni guilísbu buñ ni ma goity. Napno confianz que labúu sonybu láani portín nainy láabu né napbu galnadip par gonybu láani. Nacni suusi ñaibybu tigaagano: «Buñ ni ronladxlo siásyibu». Gony nadipno fe xtunyno que siás buñ ni ma goity. Pal ronyno láani, sabigaxno más Jehová, Dios ni ma góoch lóono que salís gueʼet.