1. ¿Xigony rony comentarno ló reunión?

 ¿XIGONY rioʼno reunión? Ronyno láani portín nainy lóono gonyxiroʼno laa Jehová (Sal. 26:12; 111:1). Ló reunión láaca rony animarno saʼno ló tiemp nagan reʼ (1 Tes. 5:11). Órni rony comentarno ronyno guiropca cós ni bisetlano.

2. ¿Xí oportunida napno par gony comentarno ló reunión?

² Guirá xomal napno oportunida par gony comentarno ló reunión. Por ejemplo, ló reunión ni rac guic xomal labúu gony comentarno ló Guiich ni caniʼ. Né ló reunión ni rac lainy xomal labúu gony comentarno ro ná «Guiyopyno cós ni rasac ni sieed de Dios», láaca labúu gony comentarno ló «Reunión ro rasuidyno ni ná la Biblia» o ló stipnés lagary ro ranabyibu comentarios.

3. a) ¿Xí tipnés galnagan labúu guicalóno órni gony comentarno? b) ¿Ximod racné Hebreos 10:24, 25 lóono?

³ Guirácano nainy gonyxiroʼno Jehová né gony animarno saʼno né comentario xtunyno. Per noʼ tipnés galnagan: rioʼ ór radzuibyno gony comentarno, o ralísno ñano xidal buelt né diti radudyibu guirá comentarios ni naniiny lóono. Ló guiich ni bicaʼ apóstol Pablo par buñ hebreos, radzelno toib cós ni labúu gacné lóono. Órni goniʼbu balaati rasac reunión, Pablo goleʼ loguiaʼbu ndeʼ: «Gony animarno saʼno» (bíil Hebreos 10:24, 25). Non guisetnaladxno que labúu gony animarno stipnés né toib comentario dopien ni raslooy que napno  fe, modreʼ diti tampa sadzuibyno guilísno ñano. Né pal diti labúu rony comentarno xidal buelt xomod naniiny lóono, guibaladxno portín stipnés nap oportunida par gony láani (1 Ped. 3:8).

4. ¿Xí tzón cós guisuidyno ló artículo reʼ?

⁴ Ló artículo reʼ, primer guisuidyno ximod gony animarno saʼno lainy toib congregación mitien, ronoʼ goxeʼsi herman noʼ xidal oportunida par guilísno ñano. Después sasuidyno ximod labúu gonyno láani lainy toib congregación xiroʼ, ronoʼ xidal herman ni nainy gony comentar. Né por último, guisuidyno ximod gac comentario xtunyno par gacnéni stipnés.

5. ¿Xí labúu gonyno par gony animarno saʼno pal goxeʼsi herman radop ló reunión?

⁵ Ló toib grupo o toib congregación mitien noʼ goxeʼsi ni rony comentar ló reunión. Rioʼ ór ni catudy asignacióncu rabésbu tiprat par tzoʼ ni guilís ña. Né por ngú reunión raclani más. Né diti tampa galán gacni scú. ¿Xí labúu gonyno pal racalóno de clas galnagan reʼ? Tzoʼno puext gony comentarno xidal buelt. Modreʼ sacnéno stipnés gony scúca.

6, 7. ¿Xí labúu gonylo par diti tampa guidzuibylo?

⁶ Tipnés herman radzuibyibu gony comentaryibu ló reunión. Pal scúca rasaclo, ¿xí labúu gonylo? ¿Xigony diti rayopylo stipnés galrracné par diti tampa guidzuibylo gony comentarlo ló reunión né modcu gony animarlo stipnés?

⁷ Tipnés cós ni labúu gacné looy láani ngú guisuidylo tipnés sugerencias ni ritlaa ló Guiich ni caniʼ ni ma godudy. b Toibtica de láani ngú guisuidytzaylo xquiichlo (Prov. 21:5). Laʼga más rasuidylo xquiichlo, más diti sadzuibylo guilíslo ñalo. Stoib ni labúu gacné looy láani ngú guiniʼlo chop tzón roʼ (Prov. 15:23; 17:27). Pal dopien nac comentario xtunylo diti sadzuibylo. Láaca más siaʼanni guic herman, xalagary gacni sioʼol. Pal rony comentarlo ló xtiitzcalo né nacni dopien stipnés sadudy cuent que bisuidytzaylo xquiichlo né que bienlo ni bisuidylo.

8. ¿Xí rasac Jehová órni rabiʼbu ronyno dada rutirigaʼlni lóono?

⁸ ¿Xí labúu gonylo pal después ni ma bunylo guirá ndeʼ, nosi rony comentarlo toib o chop buelt portín radzuibylo? Bisetnaladx par Jehová nigolú rasac xtem ni ronylo (Luc. 21:1-4). Per Jehová diti rabésbu gonylo más ni diti labúu gonylo (Filip. 4:5). Por ngú gon balaati labúu guiniʼlo, né gonab xcalrracné Jehová par diti guidzuibylo. Par labúu gonylo láani, primer gosaló né toib comentario dopien.

9. ¿Xí galnagan labúu guicaló herman lainy toib congregación xiroʼ?

⁹ Pal lainy congregación xtunylo noʼ xidal publicador, pentzi diti racalólo galnagan ni bisetlano. Sigory diti labúu rony comentarlo midid naniiny looy portín noʼ xidal herman ni nainy gony comentar. Gonyno pensary ló Danielle,  toib hermana ni guirá ór nainy gony comentar ló reunión. c Nigolú rasac gony comentarbu portín nanbu que modreʼ ronyxiroʼbu Jehová, rony animarbu stipnés né racnéni láabu par guisetnaladxbu ni bisuidybu. Per órni goyeebu lainy toib congregación xiroʼ ma diti tampa bidudy herman comentario láabu, rioʼ ór ni toib comentario cuaʼbu. Láabu nábu: «Bidopy xcalnabani. Gocni suusi nasnita toib privilegio. Órni ralíslo ñalo xidal buelt né diti radudybu comentario looy, ronylo pensary que nompa ronybu».

10. ¿Xí labúu gonylo par labúu gony comentarlo más?

¹⁰ ¿Ma gosaclolo xomod Danielle la? Pal scú láani, pentzi ronylo pensary más galán diti guilíslo ñalo né nosi guicadiaglo. Per diti guireʼganlo. ¿Xí labúu gonylo par labúu guidudybu más comentarios looy? Diti nosi guilíslo ñalo tipbueltsi. Modreʼ pal diti radudybu comentario looy ló párrafos ro casalóni labúu gonylo láani ló guidopy artículocu. Órni guisuidylo Guiich ni caniʼ, buny pensary ximod tigaaga párrafo radzakni né tema xtuny artículocu. Modcu guirá ór sanlo xi guiniʼlo. Stoib mod ni labúu gonylo láani ngú guisuidylo xquiichlo ló párrafos ni más nagan (1 Cor. 2:10). Ló párrafos reʼ diti tampa rioʼ ni ralís ña portín más naganni. Per ¿pal ma bunylo guirá ni ma bisetlano né diti tampa labúu rony comentarlo xidal buelt ló reunión ga? Antes de saló reunión labúu guininélo herman ni ratudy asignacióncu né gaibylo láabu que nainy looy guilíslo ñalo ló toib párrafo.

11. Mod ná Filipenses 2:4, ¿xí labúu gonyno?

¹¹ (Bíil Filipenses 2:4). Pablo buny animar herman tzoʼ galrrasaʼ por stipnés. ¿Ximod labúu guisobno consej reʼ ló reunión? Guisetnaladxno que stipnés láaca nainy gony comentar.

12. ¿Xí toibtica mod labúu gony animarno xhermanno ló reunión? (Láaca bibiʼ retrat).

¹² Par labúu guienno guislooyno láani  né toib ejemplo. ¿Órni raninéno ximigno diti nosi lóono ranino ja? Láaca radudyno lagary guiniʼyibu. Ngúca ni rasaclono ló xireunionno. Nainy lóono que stipnés gony comentar. Toibtica mod ni labúu gacnéno xhermanno láani ngú guidudyno oportunida guiniʼyibu fe ni napyibu (1 Cor. 10:24). Guibiʼno xi labúu gonyno par labúu gony comentar xidal herman.

13. ¿Xí labúu gonyno par labúu gap stipnés oportunida gony comentar?

¹³ Gony comentarno dopien. Modreʼ sioʼ tiemp par gony comentar más herman. Ancianos né stipnés Testigos ni ma xidzú íz noʼ lainy xcudx Jehová labúu guislooyibu ximod non gacni. Comentarios xtunyno non gacni dopien, né láaca diti guisetlano xidal cós. Pal raniʼlo guirá ni sieed ló párrafocu ma diti sioʼ ni guiniʼ stipnés. Por ejemplo, ló párrafo reʼ noʼ chop sugerencias: comentarios xtunyno gacni dop né diti guinino xidal cós. Pal nír looy racapylo ló párrafo reʼ, nosi bisetlaa toib sugerencia ni sieed reʼ.

14. ¿Xí guisetnaladxno órni ganno balaati buelt guilísno ñano? (Láaca bibiʼ retrat).

¹⁴ Gon balaati buelt guilíslo ñalo par gony comentarlo. Pal guirága ór ralísno ñano, pentzi hermano ni catudy asignacióncu guidudy comentariocu lóono par diti guisacno mal, ná noʼ stipnés ni labúu ñony comentar ló párrafocu. Láaca stipnés labúu ñony pensary que diti noʼ xi laa guilísyibu ñayibu (Ecl. 3:7).

15. a) ¿Ximod labúu guisacno pal diti labúu buny comentarno ló reunión? b) ¿Xí non guisetnaladx herman ni cayony galrranabdiitz? (Bibiʼ cuadriyen ni laa, « ¿Ximod guitudyno asignación ro labúu guiniʼ herman chop tzón roʼ?»).

¹⁵ Órni noʼ xidal herman ni calís ña par gony comentar, pentzi diti labúu sadudyibu comentario lóono xomod  naniiny lóono. O dada labúu guilox reunión né diti labúu gony comentarno ni toib buelt. Ngú labúu gony que guisacno mal, per diti non guidzuitzno (Ecl. 7:9).

16. ¿Xí labúu gonyno par gony animarno stipnés ni buny comentar?

¹⁶ Ná pal diti labúu rony comentarlo xidal buelt xomod naniiny looy, labúu guicadiaglo ximod rony comentar stipnés né gony felicitarlo láabu después de reunión. Sigory ni gaibylo herman sony animarni layibu xomodca ñacné comentarios ni nadudylo (Prov. 10:21). Órni rony felicitarno stipnés, láaca rony animarno layibu.

17. a) ¿Xí labúu gony buñ ni ma noʼ xiin? b) Mod ná video, ¿xí tap cós labúu gonyno par guisuidytzayno xquiichno par gony comentarno? (Láaca bibiʼ nota).

¹⁷ ¿Xí más labúu gonyno par gony animarno saʼno ló reunión? Pal naplo mbioxien, gocné layibu gony comentaryibu nica chop tzón roʼ (Mat. 21:16). Ló tipnés reunión rasuidyno tipnés cós nadaa, xomod galnagan ni rioʼ lainy toib galtzeʼel, o stipnés temas nadaa. Ná scú, noʼ toib o chop párrafos ro labúu gony comentar mbiox. Láaca labúu gacnéto xiinto gan xigony diti labúu guicaʼyibu comentarios ni nainy layibu.  Pal raibyto guirá ndeʼ xiinto diti sioʼyibu nabann órni stoib guicaʼ comentario ni naniiny layibu nacaʼyibu (1 Tim. 6:18). d

18. ¿Xí raquiin gonyno par diti nosi guinino de lóono órni gony comentarno? (Proverbios 27:2).

¹⁸ Guirácano labúu gony comentarno par gonyxiroʼno Jehová né gony animarni xhermanno (Prov. 25:11). Ná rioʼ ór labúu gony comentarno cós ni gosaclono, diti non guiniʼgoluno de lóono (bíil Proverbios 27:2; 2 Cor. 10:18). Xalagary ngú guinino de Jehová, Xtiitzbu né xcudxbu (Apoc. 4:11). Pal galrranabdiitz ni sitné toib párrafo ranabni lóono guinino ni gosaclono, labúu gonyno láani. Ló párrafo ni sieed sadzelno toib ejemplo.

19. a) ¿Xí galnasác sacaʼno pal ló reunión ronyno pensary ló stipnés? (Romanos 1:11, 12). b) ¿Xigony rioladxlo gony comentarlo ló reunión?

¹⁹ Ná diti caa toib lagary xipa mod gony comentarno ló reunión, guirácano labúu gonyno rutirigaʼlni lóono par gony animarno saʼno né comentario xtunyno. Rioʼ ór tipnés herman labúu gony comentar más. Né rioʼ ór stipnés non tzoʼbu conforme né comentario ni cuaʼbu, né guibaladxbu que stipnés labúu buny comentar. Pal ló reunión ronyno pensary ló stipnés, guirácano sony animarno saʼno (bíil Romanos 1:11, 12).