1. ¿Xí láani napno confianz?

 TIGAAGANO ni nacno xpiin Jehová nanno que ronladxbu lóono né nainy láabu guibanyno sacró (Rom. 8:35-39). Láaca nanno que pal rasobno ni sieed ló la Biblia sarecaano galán (Is. 48:17, 18). Per ¿pal racalóno toib galnagan ni diti cabésno ga?

2. ¿Xí galnagan pentzi cacalóno, né xí labúu guinabdiitzno lóocano?

² Guiráno ni nacno xpiin Jehová racalóno galnagan. Por ejemplo, sigory toibtica xfamilno labúu guiniʼ o gony cós ni guisioʼob xcalnabanyno. Pentzi caxoʼno né ma diti tampa cayonyno xchiin Jehová. Pentzi cadudyno ló galnagan xtol toib desgrasy. O pentzi cacalóno persecución por ni nacno xpiin Jehová. Órni racalóno galnagan, sigory ranabdiitzno lóono ndeʼ: «¿Xigony casacloya ndeʼ? ¿Buni toib cós mal la? ¿Radudy ndeʼ diitz que diti casiab Jehová xcalnasác ronoʼya la?». Pal ma gosaclolo ndeʼ toibtica buelt, diti guireʼganlo. Xidal xpiin Jehová ma gosacloyibu ngúca (Sal. 22:1, 2; Hab. 1:2, 3).

3. ¿Xí rasuidy lóono Salmo 34:19?

³ (Bíil Salmo 34:19). Ló versículo reʼ ritlaa chop cós ni rasacgoluʼ: 1) buñtzay radudy ló galnagan né 2) Jehová  rabeʼ layibu ló galnagancu. Toibtica cós ni rony Jehová par labúu cueʼbu lóono ló galnagancu láani ngú, ganno xigony cacalóno galnagan ló gudxliogoxreʼ. Ná nanno que Jehová ma bidudy xtiitz que sabanyno sacró pal ronyno xchiimbu, ndeʼ diti radudy diitz que dipa sacalóno galnagan laʼga cayonyno xchiimbu (Is. 66:14). Dios raniiny gonyno pensary ló galnasác ni guicaʼno ló dzú ni sietra; né nainy láabu guicaʼno láani (2 Cor. 4:16-18). Laʼga guidxin dzúcu racnébu lóono guicalóno galnagan dzúna dzú (Lam. 3:22-24).

4. ¿Xí guisuidyno ló artículo reʼ?

⁴ Ló artículo reʼ, sasuidyno de tipnés xpiin Jehová ni bibany ló dzú ni see né ni nabany ló naareʼ. Sasuidyno que tisintiempsi labúu guicalóno galnagan ni diti cabésno. Per pal napno confianz lóo Jehová, dipa sasiambu lóono (Sal. 55:22). Órni guisuidyno tigaaga ejemplos reʼ gonabdiitz looy: «¿Xí labúu ñoni pal nacalóya galnagan declascu? ¿Ximod racné ejemplo reʼ naʼ par labúu gapa más confianz lóo Jehová? ¿Xí labúu guisudi de láani?».

5. ¿Xí galnagan cualó Jacob xtol Labán? (Bibiʼ dibuj ni sieed laidy guiich reʼ).

⁵ Goyoʼ xpiin Jehová ni bibany ló dzú ni see ni cualó galnagan ni diti golésyibu. Gonyno pensary ló Jacob. Bixiosbu buny mandary láabu ñonybu galtzeʼel né toibtica xiindzap Labán, toibtica xfamilbu ni bieen Jehová. Né gochbu Jacob que Jehová sadudy xiroʼ galnasác láabu (Gén. 28:1-4). Jacob bisob láabu: bireʼbu gudx Canaán né goyeebu dada ro rabés Labán, ni gop chop xiindzap, Lea né Raquel. Jacob bioladxbu Raquel ni más lahuin. Par labúu ñonybu galtzeʼel né Raquel, gosaguelbu ñonybu xchiin Labán sa gatz íz (Gén. 29:18). Per diti birecaani xomod goniiny láabu. Labán biscú láabu né bunycuent láabu Lea xiindzap lagolbu. Tixomal después Labán bidudy lagary ñonybu galtzeʼel né Raquel, par labúu ñacni scú non ñonybu xchiin Labán sa gatz íz (Gén. 29:25-27). Per diti nosi ngú gosaclóo Jacob. Labán láaca cuaʼ ni nac xtunybu. ¡Gocni scú por gaal íz! (Gén. 31:41, 42).

6. ¿Xí stipnés galnagan cualó Jacob?

⁶ Jacob cualórabu más galnagan. Gopbu toib famil xiroʼ, per xiimbu diti bidzak saʼ sacró. Dada bitoʼyibu José. Láaca chop xiingaʼn Jacob —Simeón né Leví— buny buidyibu laa xfamilyibu né laa Jehová. Né láaca, tzeelbu ni más binladxbu ni góc laa Raquel, goity órni gosanbu ni rarop xiimbu. Né xtol toib galrralán ni gocla xidal íz, Jacob goylés gudx Egipto dzú ma nac buñgol (Gén. 34:30; 35:16-19; 37:28; 45:9-11, 28).

7. ¿Ximod bislooy Jehová que bioladxbu ni buny Jacob?

⁷ Jacob goprabu fe lóo Jehová né ló xtiitzbu, ná cualóbu xiroʼ galnagan. Jehová bidudy galnasác láabu. Por ejemplo, ná nigolú biscú Labán láabu, Jehová gocné láabu ñapbu xidal cós. Né nandxichno que Jacob bidudybu guixquix Dios órni bibiʼbu José después de xidal íz, portín bunybu pensary que  José ma goity. Jacob labúu buny guantarybu guirá galnagancu portín bidzaktzaybu Jehová (Gén. 30:43; 32:9, 10; 46:28-30). Lóono láaca labúu sony guantaryno guirá galnagan ni diti cabésno pal radzaktzayno Jehová.

8. ¿Xí láani goniiny rey David ñony?

⁸ Rey David diti labúu bunybu ni goniiny láabu ló xchiin Jehová. Por ejemplo, goniiny láabu né guidopy xcalnabanybu nasaʼbu toib templo par Dios. Órni gochbu láani profeta Natán, Natán goniʼ ndeʼ: «Buny ni ná xcalnabanylo, portín Dios ni nigolú noʼ né looy» (1 Crón. 17:1, 2). ¿Ronyno pensary balaati bibaladx David órni bicadiagbu ngú la? Sigory órcuca goloʼbu guicbu xi láani ñonybu.

9. ¿Ximod gosac David órni diti birebuʼ ni goloʼbu guicbu gonybu?

⁹ Per diti xidzú profeta xtuny Jehová ma goniʼ stoib cós. Goxincuca Jehová gochbu Natán que diti David non guisaʼ templocu, xalagary ngú xiimbu non guisaʼ láani (1 Crón. 17:3, 4, 11, 12). ¿Ximod gosac David órni bicadiag láani? Bitzaʼbu ni goloʼbu guicbu. Goloʼbu guicbu natopbu bidxiich né guirá cós ni naquiin xiimbu Salomón par nasaʼ templocu (1 Crón. 29:1-5).

10. ¿Ximod bisiab Jehová xcalnasác ronoʼ David?

¹⁰ Después ni góoch Jehová láabu diti nasaʼbu templo, bunybu toib acuerdo né David: gochbu David que toibtica xfamilbu sony mandary por tipzó (2 Sam. 7:16). Ló Gudxlio móz, órni gony Mandary Jesús por Tipmil Íz, David sabaladxgoluʼ órni gan que ni cayony mandary nac toibtica xfamilbu. Historia reʼ rasuidyni lóono que ná diti labúu ronyno guirá xchiin Jehová mod racladxno, Dios xtunyno labúu guisiab galnasác ni diti cabésno.

11. ¿Xí galnasác cuaʼ cristianos ni bibany ló siglo primero ná diti bidxin Gobierno xtuny Dios órni cabésyibu láani? (Hechos 6:7).

¹¹ Cristianos ni bibany ló siglo primero cualóyibu galnagan ni diti cabésyibu. Por ejemplo, golésyibu nadxin Gobierno xtuny Dios, per diti gonyibu pu dzú ñacni (Hech. 1:6, 7). Por ngú, ¿xí bunyibu? Goyodieʼyibu ló predicación. Órni bibiʼyibu que xtiitz Dios cadxinni xidal lagary ló Gudxlio, bidudyibu cuent que Jehová casiab galnasác ló xchiinyibu (bíil Hechos 6:7).

12. ¿Xí buny cristianos ni bibany ló siglo primero órni cualóyibu galrralán?

¹² Ló siglo primero goyoʼ toib galrralán «ló guidopynac gudxlio» (Hech. 11:28). Dada cristianos cualó galnagan reʼ. Buñ ni goyoʼ xiin goyoʼyibu galrrasaʼ ximod nayaʼanyibu xfamilyibu. Né mbioxhlas ni goloʼ guic ñony más xchiin Jehová pentzi gonabdiitzyibu láacayibu pal labúu nasianyibu láani par stoib ór. Góc nitisi góc, diti bireʼganyibu. Bunyibu dada rutigoygaʼlni layibu ló predicación né bidudyibu ni gopyibu herman ni golés gudx Judea (Hech. 11:29, 30).

13. ¿Xí galnasác cuaʼ guirá cristianos órni goyoʼ galrralán?

¹³ ¿Xí galnasác cuaʼ cristianos ló tiemp nagancu? Ni cuaʼ galrracné, láacayibu bibiʼyibu ximod gocné Jehová layibu (Mat. 6:31-33). Né sigory más bidzakyibu herman ni gocné layibu.  Né guirá ni bidudy bidxiich bibaladxyibu (Hech. 20:35). Jehová bisiab xcalnasác ronoʼyibu portín diti bireʼganyibu.

14. ¿Xí láani gosaclóo Bernabé né Pablo, né xí galnasác cuaʼyibu? (Hechos 14:21, 22).

¹⁴ Cristianos ni bibany ló siglo primero cualóyibu persecución xidal buelt, rioʼ ór órni diti cabésyibu láani. Ganno xi gosaclóo Bernabé né Pablo laʼga caniʼyibu xtiitz Dios gudx Listra. Primer la, buñ cuacuent né bicadiag layibu. Per después tipnés buñ ni bianladx layibu bikíil stipnés buñ par nacaló layibu, né tipnésyibu dada bigasguieeyibu Pablo né par layibu ma goity Pablo (Hech. 14:19). Per Bernabé né Pablo goyeeyibu stoib lagary né goniʼrayibu xtiitz Dios. ¿Xí galnasác cuaʼyibu? Gocnéyibu «xidal buñ góc xpiin Jesús» né buny nadipyibu fe xhermanyibu por mod goniʼyibu né por mod bunyibu (bíil Hechos 14:21, 22). Bernabé né Pablo diti bireʼganyibu ná cualóyibu persecución, né ngú gocnégoluʼ xidal buñ. Scúca, pal diti rareʼganno né ronyrano dxiin ni ma bisiané Jehová lóono, sacaʼno xidal galnasác.

15. ¿Xí rasuidylo de herman ni góc laa, Alexander Macmillan?

¹⁵ Chop tzón íz antes de 1914, xpiin Jehová golésyibu ñeeyibu guibá. Toibticayibu góc laa Alexander Macmillan. Láabu xomodca stipnés ni bibany dzúcu, bunyibu pensary que mápa mer tzeeyibu guibá. Ló toib discurs ni goloʼbu beʼo septiembre íz 1914, goniʼbu: «Sigory ndeʼ nac último discurs ni guitudi». Per diti gocni scú. Después bicaʼbu ndeʼ: «Sigory tipnésdo góc nagueldo órni gonido que mápa mer tzoʼdo guibá». Né goniʼbu: «Ni non ñonydo ngú ñodieʼrado ló xchiin Señor». Né ngú ni bunybu. Goniʼbu xtiitz Dios né gan, gocnébu xhermanbu ni goyoʼ press portín gosagaʼ galayibu né diti buny faltbu ló reunión ná ma nacbu buñgol. Biquiintzaybu xtiempbu laʼga cabésbu tzeebu guibá. ¿Ximod gocnéni láabu? Bicaʼbu ndeʼ ló íz 1966, antes ni ñaitybu: «Fe xtuni nadipni xomodca nírcu». Bisiambu toib galán ejemplo par guiráno, máspa par lóono ni ma xidzú tiemp cabésno guidxin fin (Heb. 13:7).

16. ¿Xí galnagan ni diti cabés Jennings né tzeʼel bidxin ronoʼyibu? (Santiago 4:14).

¹⁶ Xidal xpiin Jehová racalóyibu galguitz ni diti cabésyibu. Por ejemplo, hermano Herbert Jennings goniʼbu ló biografía xtunybu que láabu né tzeelbu nigolú nakit bunyibu xchiin Jehová lainy gudx Ghana xomod misioneros. b Per después goniʼ doctor que caxoʼbu portín ma canit xcalrriembu. Hermano Jennings goniʼ que galnagancu gocni xomod «toib dzú ni diti cabésyibu», mod rasetlaa Santiago 4:14 (bíil láani). Bicaʼbu ndeʼ: «Cuacuentdo galnagancu né goyoʼdo puext par nareʼdo de Ghana né nasiando ximigdxindo, né bibiguetdo Canadá [par ñaca remeidy]». Jehová gocnébu hermano Jennings né tzeʼel par ñonyrayibu xchiin Jehová ló galnagandaʼ reʼ.

17. ¿Ximod ma gocné ejemplo xtuny hermano Jennings a stipnés cristianos?

 ¹⁷ Mod goniʼ hermano Jennings ló biografía xtuny, gocnéni stipnés. Toib hermana bicaʼ: «Diti ma goyoʼ toib experiencia ni nigolú bidxin lainy xcalnabani […]. Órni goona que hermano Jennings bisian privilegio xtuny par ñee ló doctor gocnéni naʼ par nabiʼya né midid galnagan ni cacalóya». Stoib hermano bicaʼ: «Por chii íz góca anciano de congregación, per xtol toib galguitz bisiana privilegiocu. Gosaca que ma diti noʼ pu raquiinna né por ngú ma diti bioladxi ñoola biografías […]. Per mod cualó hermano Jennings xcalguitz gocnéni naʼ». Ndeʼ rony que guisetnaladxno que labúu gacnéno stipnés órni rony guantaryno galnagan ni diti cabésno. Ná diti rabésno mod raniiny lóono, fe xtunyno né mod rony guantaryno labúu gacnéni stipnés (1 Ped. 5:9).

18. ¿Xí láani rasuidyno de toib hermana viod de gudx Nigeria? (Bibiʼ retrat ni raslooy mod góc experiencia reʼ).

¹⁸ Galnagan xomod pandemia xtuny COVID-19 ma bidxinni dada ronoʼ xpiin Jehová. Por ejemplo, toib hermana viod de gudx Nigeria gopbu goxeʼsi bidxiich né galrro. Toib rosil, dzú gopbu tip taz rros, xiinienbu gonabdiitz láabu xi láani ñooyibu después. Hermana reʼ góoch láabu que ma birá galrro né bidxiich, per non guisuʼyibu gonaʼ viod de gudx Sarepta. Ñonytzaayibu último galrro ni gopyibu né ñapyibu confianz lóo Jehová (1 Rey. 17:8-16). Órni yása gonyibu pensary xi guáyibu galadzúcu, herman goysan tip paquet galrro ronoʼyibu. ¡Lainy paquetcu goyoʼ galrro par ñooyibu más de chop  xomal! Hermana reʼ bidudy cuent que Jehová bicadiagtzay ni gochbu xiinienbu. Riendxichni que pal rapno confianz lóo Jehová, guirá galnagan ni racalóno ni diti cabésno sacnéni lóono guibigaxno más láabu (1 Ped. 5:6, 7).

19. ¿Xí galnagan cualó Alexéi Yershov?

¹⁹ De goló chop tzón íz xidal herman diti godudy ló xpensaryibu nacalóyibu persecución. Guibiʼno ni gosaclóo toib hermano de Rusia, Alexéi Yershov. Órni goyonisbu ló íz 1994, testigos xtuny Jehová gopyibu permís ñonyibu xchiin Dios. Per después ma diti gocni scú lainy gudx Rusia. Ló íz 2020, tipnés policia goyoʼ lafuersyibu lidx hermano Yershov, bidxiñayibu lad xcós hermano reʼ né cuaʼyibu xidalni. Chop tzón beʼo después, buñchiin goniʼ que non tzeebu press. Né gocni scú portín toib buñguieeu ni rolooyni goniiny nasuidy la Biblia por más de tobiz, buny grabar tipnés videos. ¡Buny traicionarbu hermano reʼ!

20. ¿Xí láani buny hermano Yershov par nadzakbu Jehová más sacró?

²⁰ ¿Noʼ pu gocnéni hermano Yershov la? Scú. Nigoreʼ ma más sacró radzakbu Jehová. Láabu nábu: «Tzeʼela né naʼ guirá ór ronydo oración. Diti labúu nacalóya galnagan reʼ pal Jehová diti ñacné naʼ». Láabu nábu: «Ni rasudi la Biblia racnéni naʼ par diti guireʼgana. Noʼ xidal historias ló la Biblia ni raslooy que nigolú rasac diti guidzuibyno né gapno confianz lóo Jehová».

21. ¿Xí bisuidyno ló artículo reʼ?

²¹ ¿Xí bisuidyno ló artículo reʼ? Ná diti nanno xi guisaclono guixí, pal rapno confianz lóo Jehová, guirá ór sioʼbu puext gacnébu lóono. Xomod ná texto temático reʼ, «xidal galnagan racaló buñ ni rony xinésni, per Jehová ralaa láabu de guiráni» (Sal. 34:19). Por ngú, diti gonyno pensary ló galnagan, xalagary ngú, gonyno pensary ló galnadip ni nap Jehová par gacné lóono. Modreʼ labúu guinino mod goniʼ apóstol Pablo: «Náapa fuers par goni nitisi cós portín Dios radudy galnadip naʼ» (Filip. 4:13).