1. ¿Pu ór buny Jesús primer galrradziguiaʼ?

 GONYNO pensary que noʼno ló íz 29. Laʼra gosaló Jesús cayony xchiin Dios. Láabu, xinaʼbu né tipnés xpiimbu rieeyibu toib lanii galtzeʼel gudx Caná, toib gudx ni riaʼan niis lad norte de Nazaret ro goniʼsbu. Xfamil ximig María ngú ni bitzña né rolooyni cayony tenderbu guirá ni bidxin lagarycu. Per ló laniicu bibich vin né ngú labúu natudy ló galnatoy galtzeʼelcu né xfamil. b Sigory bidxin más buñ que ni cabésyibu. María góc naguel né goyee ronoʼ xiin né goniʼbu: «Ma diti napyibu vino» (Juan 2:1-3). ¿Xí láani rony Jesús? Ronybu toib galrradziguiaʼ, racaʼbu nís né ronybu láani «vino ni galán nac» (Juan 2:9, 10).

2, 3. a) ¿Ximod biquiin Jesús xcalnadip? b) ¿Xigony rasacgoluʼ guisuidyno galrradziguiaʼ ni buny Jesús?

² Jesús buny xidal galrradziguiaʼ laʼga bunybu xchiin Dios ló Gudxlio. c Biquiimbu xcalnadipbu par gocnébu xidalguixo buñ. Por ejemplo, toibtica buelt biyaʼanbu 5.000 buñguieeu né stoib buelt 4.000. Né chop galrradziguiaʼ  reʼ sigory biyaʼanbu más de 27.000 buñ, pal ragabno buñgonaʼ né mbioxien ni goyoʼ cú (Mat. 14:15-21; 15:32-38). Ló guiropca buelt reʼ, Jesús láaca bisialbu buñguitz (Mat. 14:14; 15:30, 31). Sigory guirá buñreʼ nigolú bidziguiaʼyibu órni bibiʼyibu Jesús biyaʼan né bisial layibu.

³ Labúu guisuidyno xiroʼgolu de galrradziguiaʼ ni buny Jesús. Ló artículo reʼ sasuidyno tipnés cós ni sony nadip fe xtunyno. Láaca sasuidyno ximod guisuʼno humildad né galrronladx ni bislooy Jesús órni bunybu galrradziguiaʼ reʼ.

4. ¿De chú layibu guisuidyno laʼga golno galrradziguiaʼ ni buny Jesús?

⁴ Galrradziguiaʼ ni buny Jesús diti nosi rasuidyni lóono mod nacbu, láaca rasuidyni lóono mod nac Bixiosbu. Jehová bidudy galnadip láabu par labúu bunybu guirá galrradziguiaʼ reʼ. Hechos 10:38 rasetlaa de Jesús ndeʼ: «Dios golú láabu né espíritu santo né galnadip, né ló guidopy gudxlio bunybu cós tzaay né bisialbu buñ ni goyoʼ xan xomandary Buñdzab, portín Dios goyoʼ né láabu». Láaca xomod nanno, Jesús bisuʼtzay mod nac né mod rony pensary Bixios. Bislooybu láani por mod goniʼbu né por mod bunybu, láaca raguiñani galrradziguiaʼ ni bunybu (Juan 14:9). Guibiʼno xi tzón cós labúu guisuidyno ló galrradziguiaʼ ni buny Jesús ni sony nadip fe xtunyno.

5. ¿Xí láani bichiin Jesús par bunybu galrradziguiaʼ? (Mateo 20:30-34).

⁵ Primer, Jesús né Bixios ronladxgoluʼyibu lóono. Laʼga goyoʼ Jesús ló Gudxlio, biquiimbu xcalnadipbu par bunybu xidal galrradziguiaʼ modreʼ bislooybu balaati ronladxbu buñ. Toibtica buelt, chop buñdxep gonabyibu nasial Jesús layibu (bíil Mateo 20:30-34). Historiacu náni que Jesús «nigolú binladx layibu» né bixal bisalóyibu. Órni náni que Jesús «nigolú binladx layibu» radudyni diitz que nigolú gosacbu láani. Galrronladxcuca bichiinni láabu nayaʼanbu buñ né nasialbu toib buñ ni gop lepra (Mat. 15:32; Mar. 1:41). Nandxichno que Jehová, Dios «ni nap xiroʼ galrronladx», né Xiimbu ronladxgoluʼyibu lóono, né rioʼobni layibu órni cadudyno ló galrrioʼob (Luc. 1:78; 1 Ped. 5:7). Raniiny guinitlóyibu guirá galnagan ni noʼ ló Gudxlio.

6. ¿Xí galnadip bidudy Jehová a Jesús?

⁶ Ni rarop, Dios ma bidudy galnadip Jesús par guinitlóbu guirá galnagan ni noʼ ló Gudxlio. Noʼ galnagan ni dipa labúu gony reglarno. Per galrradziguiaʼ ni buny Jesús, bislooy que labúu gonybu láani. Por ejemplo, napbu galnadip par guinitlóbu galkié ni bisiané Adán lóono né guirá ni raguiñani, xomod galguitz né galgoity (Mat. 9:1-6; Rom. 5:12, 18, 19). Galrradziguiaʼ ni bunybu raslooyni que labúu guisialbu «bisaʼ clas galguitz» né dada guilísbu gueʼet (Mat. 4:23; Juan 11:43, 44). Láaca napbu galnadip par guiscueʼsbu buroʼdant né gonybu gan demony (Mar. 4:37-39; Luc. 8:2). ¿Rasacno sacró ni nanno que Jehová bidudy xiroʼgolu galnadip Xiin ja?

7, 8. a) ¿Xí confianz napno por galrradziguiaʼ ni buny Jesús? b) ¿Xí galrradziguiaʼ más raniiny looy guibiʼlo?

⁷ Ni rion, nandxichno que guirá galnasác ni guitné Gobierno xtuny Dios sac  cumplirni. Galrradziguiaʼ ni buny Jesús ló Gudxlio bislooyni que ngúca sonybu órni gony mandarybu ló Gobierno xtuny Dios ló guidopynac Gudxlio. Buny pensary ximod sac ló Gudxlio reʼ órni gony mandary Cristo. Sabeʼbu guirá galnagan né galguitz ni racaló guirá buñ, guiráno sacno buñ nasac (Is. 33:24; 35:5, 6; Apoc. 21:3, 4). Dipa sadudyno ló galrralán nili sadudyno ló galrrioʼob xtol desgrasy (Is. 25:6; Mar. 4:41). Sabaladxno órni guicacuentno xhomilno ni ma goity (Juan 5:28, 29). Órni ronylo pensary ló Gudxlio copy, ¿xí galrradziguiaʼ más raniiny looy guibiʼlo?

⁸ Órni buny Jesús galrradziguiaʼ bislooybu chop cualidad ni non gapno guiráno: gacno buñdxo né guislooyno galrronladx. Guisuidyno chop historia. Salóno né lanii ni góc gudx Caná.

9. ¿Xigony buny Jesús toib galrradziguiaʼ ló lanii galtzeʼel gudx Caná? (Juan 2:6-10).

⁹ (Bíil Juan 2:6-10). Órni bibich vin lainy toib lanii galtzeʼel, ¿fuerspa ñony Jesús toib galrradziguiaʼ la? Yaca. Ni toib profecía bisetlaa que Jesús ñony galrradziguiaʼ declascu. Per buny pensary ximod nasaclo pal nasaclolo láani ló xilanii xcaltzeelo. Jesús sigory bunybu pensary ló galnatoy rodann ni nadudy familcu, né máspa ni cayonycu galtzeʼel. Por ngú gocné Jesús layibu né  bunybu galrradziguiaʼ ni bitlaa ro rasaló artículo reʼ. Cuaʼbu midid 390 litros de nís né bunybu vin ni más galán nac. ¿Né xigony bunybu siil? Sigory ni ñaʼan sobra labúu naquiinni stoib ór o dada labúu natoʼyibu láani par labúu ñacnéni galtzeʼel copycu. ¡Nigolú bidudyibu guixquix!

10. Bisetlaa tipnés cós ni rareʼ loguiaʼ de historia reʼ ni ritlaa ló capítulo 2 xtuny Juan (láaca bibiʼ dibuj).

¹⁰ Guibiʼno tipnés cós ni rareʼ loguiaʼ ló capítulo 2 xtuny Juan. ¿Cuálo cuidad chú bistzaa guirá gustaʼcu la? Diti Jesús buny láani. Diti goniiny láabu nadziguiaʼ buñ láabu, por ngú bixelbu tipnés móz buny láani (versículos 6 né 7). Né después ni góc galrradziguiaʼcu, ¿chú láabu goyné vin par ñony prueby directorcu láani? Diti Jesús buny láani. Gochbu guirá mózcu niné tidxóni (versículo 8). Né Jesús diti goliskiaʼbu toib cop de vin né goniʼbu: «¡Colgony prueby balaati naníx vin ni bunytzaaya!».

11. ¿Xí rasuidyno de galrradziguiaʼ ni buny Jesús?

¹¹ ¿Xí rasuidyno de galrradziguiaʼ ni buny Jesús? Rasuidyni lóono gacno buñdxo. Jesús diti biatz por ni cuaʼbu niis né bunybu láani vin. Dipa biatzbu por guirá ni bunybu. Xalagary ngú, gócbu buñdxo né guirá ór goniʼbu que por Bixiosbu labúu bunybu ngú (Juan 5:19, 30; 8:28). Pal rasuʼno Jesús, sacno buñdxo né diti siatzno por ni ronyno. Nitisi xchiin Jehová ni gonyno, diti guiatzno, xalagary ngú guisetnaladxno que racni né xcalrracné Dios nirodandiguieʼ ni cayenno (Jer. 9:23, 24). Láasibu non gonyxiroʼno. Portín pal diti ñapno xcalrracné Jehová diti labúu ñonyno xitcal (1 Cor. 1:26-31).

12. ¿Xí stoib mod labúu guisuʼno mod góc Jesús buñdxo? Bisetlaa toib ejemplo.

¹² Gonyno pensary ló stoib mod ni labúu guisuʼno mod góc Jesús buñdxo. Gonyno pensary ló toib anciano ni rabeʼ tiemp né racné toib siervo ministerial par guisuidytzay primer discurs ni guitudy. Por galrracné reʼ, mbioxhlas reʼ ratudy toib galán discurs, né congregación nigolú rioladx láani. Después de reunión rioʼ ni raiby a anciano reʼ: «¿Sacróyen bitudy mbioxhlasca xtiscurs ja?». Ronylo pensary que ancianocu naniʼ: «Aja, portín naʼ gocnéya láabu». O ñacbu buñdxo né naniʼbu: «Aja, sacróyen bitudybu láani». Toib buñdxo diti riatzbu por ni racnébu stipnés. Rioʼbu conforme que Jehová rabiʼ né rabaladx por dxiin ni ronybu (láaca bibiʼ ni ná Mateo 6:2-4; Heb. 13:16). Jehová rabaladxgoluʼ órni rabiʼbu que nainy lóono gacno xomod Jesús (1 Ped. 5:6).

13. ¿Xí radzaglóo Jesús ló néz laʼga seebu gudx Naín, né xí ronybu? (Lucas 7:11-15).

¹³ (Bíil Lucas 7:11-15). Yaaca tobiz gorol ni cayony Jesús xchiin Dios ló Gudxlio, goyeebu gudx Naín. Gudx reʼ biaʼanni gaxca Sunem, 900 íz antes Eliseo golís xiin toib buñgonaʼ lagarycu (2 Rey. 4:32-37). Órni bibigaxbu roʼ xpuert gudxcu, Jesús radzaglóobu tipnés buñ ni see roʼ baʼ. Nigolú nabanni. Portín goity toibguielot xiin toib buñgonaʼ viod. Per diti toibbu seebu; xidalguixo buñ sané láabu. Jesús rascueʼs guirá buñcu né ralísbu xiin buñgonaʼcu ni cayoʼob xcalnabany. Ló Evangelios ritlaa tzón buelt ni golís Jesús gueʼet, per ndeʼ nac primerdiguieʼ buelt ni bunybu láani.

14. Bisetlaa tipnés cós ni rareʼ loguiaʼ ló capítulo 7 xtuny Lucas (láaca bibiʼ dibuj).

 ¹⁴ Guibiʼno tipnés cós ni rareʼ loguiaʼ ló capítulo 7 xtuny Lucas. ¿Bibiʼlo ximod góc guirá cós reʼ la? Primer, Jesús «bibiʼ láabu» né después «nigolú bioʼob xcalnabanybu» (versículo 13). Sigory bibiʼbu buñgonaʼcu cayibdxaʼdoot nisló gueʼetcu. Ni bibiʼbu bisioʼobni xcalnabanybu. Jesús diti nosi binladxbu buñgonaʼcu, láaca bislooybu láani por cós ni bunybu. Sigory nadaʼdot goniʼbu: «Ma diti cudxaʼlo». Per diti nosi goninébu buñgonaʼcu; golísbu gueʼetcu né bunycuentbu xiin buñgonaʼcu (versículos 14 né 15).

15. ¿Xí rasuidyno de galrradziguiaʼ ni buny Jesús?

¹⁵ ¿Xí rasuidyno de galrradziguiaʼ ni buny Jesús? Rasuidyni lóono ximod gacnéno buñ ni noʼ nabann. Diti labúu guilísno gueʼet, mod buny Jesús né xiin buñgonaʼ viodcu. Per noʼ ni labúu gonyno par gacnéno buñ ni noʼ nabann por ni goity toibtica buñ ni ronladxbu. Primer la, guibiʼtzayno né de ngú guinino o guiyopyno mod gacnéno par guisialdóno xcalnabanybu (Prov. 17:17; 2 Cor. 1:3, 4; 1 Ped. 3:8). d Ná nosi guinino chop tzón roʼ o gonyno alga por layibu, nigolú sacnéni layibu.

16. ¿Xí rasuidyno de experiencia ni bitlaa ló párrafo reʼ? (Bibiʼ retrat ni raslooy ximod góc experiencia reʼ).

¹⁶ Gonyno pensary ni góc ló toib reunión ma xidzú. Órni cayoʼolyibu toib canción ro ritlaa que guiás gueʼet, toib hermana bibiʼbu a stoib hermana cayibdxaʼ. Ribdxaʼbu portín diti xidzú de goló goity xiindzapbu. Hermana reʼ gon ni cadudybu lóo, por ngú goyeebu goduʼuchbu hermanacu né bíilyibu toibsi dada ro radopy cancioncu. Hermana reʼ rasetnaladx que órcu nigolú binladxbu herman. Bibaladxbu portín goyeebu reunión dzúcu. Láabu goniʼbu: «Gondxichi que ló reunión labúu nacaʼya galrracné».  Nandxichno que Jehová rabiʼ né rasacgoluʼni par láabu órni noʼ ni ronyno por buñ ni cayoʼob xcalnabany né «ni nogoluʼ nabann» (Sal. 34:18).

17. ¿Xí bisuidyno ló artículo reʼ?

¹⁷ Órni rasuidyno galrradziguiaʼ ni buny Jesús nigolú rony nadipni fe xtunyno. Guirá ni rasetlaa Evangelios raslooyni lóono que Jehová né Jesús ronladxgoluʼyibu lóono, Jesús nap galnadip par cueʼbu guirá cós mal ni racaló buñgudxlio né nantzayno que mápa mer gac cumplir guirá galnasác ni guitné Gobierno xtuny Dios. Láaca, radudyni oportunida lóono gonyno pensary ximod guisuʼno cualidad ni gop Jesús. ¿Labúu guisuidylo stipnés galrradziguiaʼ ni buny Jesús órni guisuidylo toiblo o órni guisuidylo né xfamilo la? Buny pensary xi rasuidyni looy né góoch láani stipnés. Ngú sacné looy par guininélo buñ sacró (Rom. 1:11, 12).

18. ¿Xí sasuidyno ló stoib artículo?

¹⁸ Órni ma yaaca lox gony Jesús xchiin Dios ló Gudxlio, bunybu ni rion né último galrradziguiaʼ ni rasetlaa la Biblia. Per galrradziguiaʼ reʼ gadzé mod gocni que stipnés ni bunybu: golísbu ximigdxinbu ni ma sané tap govitz de goló goity. ¿Xí rasuidy galrradziguiaʼ reʼ lóono? ¿Né xí labúu gonyno par gapno confianz que nigolú siás gueʼet? Sasuidyno láani ló stoib artículo.