ARTÍCULO NI GUISUIDYNO 19
¿Ximod labúu gapno confianz que sadxin toib Gudxlio copy?
«Órni [Jehová] raniʼbu, ¿xí diti ronybu láani la?» (NÚM. 23:19).
CANCIÓN 142 Aferrémonos a nuestra esperanza
NI GUISUIDYNO a
1, 2. Laʼga cabésno guidxin Gudxlio copycu, ¿xí non gonyno?
RADUDYNO guixquix Jehová portín sony copybu Gudxlio reʼ (2 Ped. 3:13). Ná diti nanno xipa dzú gonybu láani, guirá ni cayac raslooyni lóono que mápa mer gony copybu Gudxlio reʼ (Mat. 24:32-34, 36; Hech. 1:7).
2 Guiráno non gapno confianz que Jehová sony cumplirbu ni ma goniʼbu ná ma xidzú tiemp de goló nacno Testigos. ¿Xigony? Portín ná pal nadip fe xtunyno, labúu guichichni. Né apóstol Pablo goniʼ que pal diti napno fe, galkié «naguel rachel lóono» (Heb. 12:1). Par diti guisaclono ngú non gonyno repas tipnés cós ni raslooy que Jehová mápa mer gonybu Gudxlio reʼ toib lagary móz (Heb. 11:1).
3. ¿Xí guisuidyno ló artículo reʼ?
3 Ló artículo reʼ sasuidyno tzón cós ni labúu gacné lóono gac nadip fe xtunyno né gapno confianz que Jehová sony copybu Gudxlio reʼ: 1) gonyno pensary ló xcalgoity Jesús, 2) gonyno pensary ló xcalnadip Jehová né 3) coʼno guicno ló xchiin Jehová. Después sasuidyno ximod guirá ni góoch Jehová a Habacuc rony nadipni fe xtunyno. Per primer guisuidyno xigony raquiin gapno confianz que Gudxlio reʼ sácni toib lagary móz.
¿XIGONY RAQUIIN GAC NADIP FE XTUNYNO?
4. ¿Xí cós ragoʼ prueby fe xtunyno?
4 Guirá dzú fe xtunyno rioʼni ló prueby. Por ejemplo, ragoʼno guicno chú layibu guidzakno, xi galnakit gonyno, pal tzoʼno scuel xirop, pal gonyno galtzeʼel, pal tzoʼ xiinno né xi dxiin gonyno. Labúu guinabdiitzno lóocano: «¿Xí raslooy ni ragoʼya guica goni? Por mod roni, ¿raslooya que gudxliogoxreʼ mápa mer guinitlóni né xalagaryni sioʼ toib Gudxlio copy la? ¿O nabani xomod buñ ni rony pensary que diti sadopy gudxliogoxreʼ la?» (Mat. 6:19, 20; Luc. 12:16-21). Pal napno confianz que Gudxlio copy ma noʼni gaxtiguié, sonyno xinésni.
5, 6. ¿Xigony raquiinno toib fe nadip órni cadudyno ló prueby? Bisetlaa toib ejemplo.
5 Láaca racalóno tipnés prueby ro raquiin gapno toib fe nadip, xomod persecución, galguitzsii o nitisi cós ni labúu cuegan lóono. Pentzi primer racalóno láani né gan. Per pal racalóno láani por xidal íz, raquiin gapno toib fe nadip par labúu gony guantaryno né guibaladxno gonyno xchiin Jehová (Rom. 12:12; 1 Ped. 1:6, 7).
6 Órni cacalóno toib prueby, labúu guisacno que Jehová dipa sony copybu Gudxlio reʼ. Pal ronyno pensary scú, ¿radudyni diitz que diti nadip fe xtunyno la? Diti ngúpa radudyni diitz. Por ejemplo, órni noʼno ló tiemp galnachich sigory ronyno pensary que dipa sadxin tiemp galnalaʼ, per guirá íz radxinni. Scúca órni ma bireʼganno, labúu guisacno que Gudxlio copy dipa sadxinni. Per pal nadip fe xtunyno, nanno que guirá ni ma goniʼ Jehová, sac cumplirni (Sal. 94:3, 14, 15; Heb. 6:17-19). Confianzcu sacnéni lóono coʼno xchiin Jehová primer lagary.
7. ¿Xí láani diti guidudyno lagary?
7 Láaca raquiin gapno toib fe nadip par gony predicarno. Órni ranino que Dios mápa mer gony copybu Gudxlio reʼ, xidal buñ diti raluladx láani (Mat. 24:14; Ezeq. 33:32). Per diti guidudyno lagary guicá mod nacyibu lóono. Par diti guisaclono ngú, non gony nadipno fe xtunyno. Guibiʼno tzón cós ni labúu gonyno.
GONYNO PENSARY LÓ XCALGOITY JESÚS
8, 9. ¿Ximod rac nadip fe xtunyno órni ronyno pensary ló xcalnadip Jesús?
8 Toib mod ni labúu gony nadipno fe xtunyno, láani ngú gonyno pensary ló xcalgoity Jesús. Láani radudyni confianz lóono que sac cumplir ni ná Dios. Nigolú rasac gonyno pensary xi guirá raguiña xcalgoity Jesús, né xigony bidudy Jehová galrrascadcu. Modcu, sapno más confianz que Jehová sonybu Gudxlio reʼ toib lagary móz ro labúu guibanyno tipzó. ¿Xigony ranino ngú?
9 Gonyno pensary xi guirá raguiña xcalgoity Jesús. Jehová bixel toibguielot Xiin ni goyoʼ lainy guibá, ni nac ximigdxinbu par ñal ló Gudxlio xomod toib ni diti nap galkié. Órni Jesús goyoʼ ló Gudxlio godudybu ló xiroʼ galrrioʼob, cualóbu xiroʼ galnagan né nadzuʼpy mod goitybu. Nanno que nigolú car birecaani Jehová. Napbu xiroʼ galrronladx, por ngú nanno que dipa nadudybu lagary nadudy Xiimbu ló galrrioʼob declascu nosi par nabanyno sacró chop tzón íz (Juan 3:16; 1 Ped. 1:18, 19). Nigolú car birecaani Jehová, por ngú raniiny láabu guibanyno tipzó ló Gudxlio copy.
GONYNO PENSARY LÓ XCALNADIP JEHOVÁ
10. Mod ná Efesios 3:20, ¿xí labúu gony Jehová?
10 Toib mod ni labúu gony nadipno fe xtunyno ngú gonyno pensary ló xcalnadip Jehová. Napbu galnadip par gony cumplirbu ni ma goniʼbu. Par toib buñgudxlio la, buñ diti labúu sabany tipzó. Per Jehová guirá ór raniʼbu gonybu cós ni diti labúu ronyno. Láabu sonybu láani portín napbu Xiroʼgolu galnadip (Job 42:2; Mar. 10:27). Por ngú raniʼbu gonybu cós ni diti labúu gony buñgudxlio (Bíil Efesios 3:20).
11. Bisetlaa toib galrradziguiaʼ ni ma goniʼ Jehová gac (bibiʼ cuadriyen « Tipnés galrradziguiaʼ ni buny cumplir Jehová»).
11 Gonyno pensary tipnés cós ni góoch Jehová xpiin ló dzú ni see, ni rolooyni nagan ñac cumplir. Gochbu Abrahán né Sara que sioʼ toib xiinyibu ná ma nacyibu buñgol (Gén. 17:15-17). Láaca gochbu Abrahán que xfamilbu nacaʼ gudx Canaán. Per xidal íz xfamil Abrahán, ni bireʼ laa israelitas, goyoʼ xan xomandary gudx Egipto. Por ngú, sigory bunyibu pensary que dipa narebuʼ ni goniʼ Dios. Per birebuʼni. Láaca xidal íz después, Jehová gochbu Elisabet, que sioʼ xiimbu ná ma nacbu buñgol. Láaca gochbu María, toib mbioxhlasien ni diti ma goyoné buñguieeu, que sioʼ toib xiimbu né badaʼ reʼ sac Xiin Dios. Ndeʼ ñony cumplir ni goniʼ Jehová xidal mil íz lainy lagary móz ni góc laa Edén (Gén. 3:15).
12. ¿Ximod raslooy Josué 23:14 né Isaías 55:10, 11 galnadip ni nap Jehová?
12 Órni ronyno pensary ló guirá ni goniʼ Jehová gony né mod birebuʼni, radudyno cuent que napbu xiroʼ galnadip. Láani rony nadipni fe xtunyno portín napno confianz que labúu sony copybu Gudxlio reʼ (bíil Josué 23:14; Isaías 55:10, 11). Modcu sioʼno puext gacnéno stipnés guieen que nigolúpa sioʼ toib Gudxlio copy, que diti nacni toib bacaʼal nili toib cuent. Jehová láaca goniʼbu ndeʼ órni bisetlabu toib guibá copy né toib gudxlio copy: «Bicaʼ diitzreʼ, portín labúu gapno confianz láani né nigolúni» (Apoc. 21:1, 5).
TZODIEʼNO LÓ XCHIIN JEHOVÁ
REUNIÓN
¿Ximod tigaaga ndeʼ rony nadip fe xtunyno? (Bibiʼ párrafo 13)
13. ¿Ximod rony nadip reunión fe xtunyno?
13 Ni rion mod ni labúu gony nadipno fe xtunyno láani ngú tzodieʼno ló xchiin Jehová. Por ejemplo, gonyno pensary balaati racné reunión lóono. Anna, b ni buny xidal clas xchiin Jehová ná: «Reunión nacni xomod toib ancla ni rony nadip fe xtuni. Ná ni catudycu discurs diti nacbu toib galán mextra o raniʼbu ni ma naana, guirá ór rasudi toib cós ni labúu gacné naʼ guienna más la Biblia, né modreʼ fe xtuni raniʼsni más». Ló reunión láaca racadiagno comentarios ni rony nadip fe xtunyno (Rom. 1:11, 12; 10:17).
PREDICACIÓN
¿Ximod tigaaga ndeʼ rony nadip fe xtunyno? (Bibiʼ párrafo 14)
14. ¿Ximod rony nadip predicación fe xtunyno?
14 Láaca predicación rony nadip fe xtunyno (Heb. 10:23). Barbara, ni ma más de 70 íz nac Testigo, ná: «Predicación guirá ór rony nadip fe xtuni. Radudi cuent que laʼga más raniya de Jehová né guirá cós sacróyen ni gonybu, más raniʼs fe xtuni».
GUISUIDYNO XQUIICHNO
¿Ximod tigaaga ndeʼ rony nadip fe xtunyno? (Bibiʼ párrafo 15)
15. ¿Ximod rac nadip fe xtunyno órni rasuidyno xquiichno? (Láaca bibiʼ retrat).
15 Láaca rac nadip fe xtunyno órni rasuidyno xquiichno. Susan ná que nap toib programa ni racné láabu. Láabu nábu: «Guirá doming rasudi Guiich ni caniʼ ni guioʼol stoib xomal; lonys né marty rasudi ni tudy ló reunión lainy xomal, né stipnés dzú ni riaʼan ma naʼ rayobi ni guisudi». Rony cumplirbu né programa ni ma bunybu por ngú fe xtunybu rac nadipni más. Irene, toib hermana ni ma xidzú íz noʼ lainy central mundial, nábu que profecías xtuny la Biblia rony nadipni fe xtunybu. Rabexabu láani scareʼ: «Radziguiaʼya órni rabiʼya ximod rarebuʼtzay profecías ni sieed ló la Biblia». c
«NIGOLÚ SAC CUMPLIRNI»
16. ¿Xigony nanno que ni góoch Jehová a Habacuc láaca raguiñani lóono? (Hebreos 10:36, 37).
16 Tipnés xpiin Jehová ma sanéyibu xidal íz cabésyibu guidxin xfin gudxliogoxreʼ. Buñgudxlio labúu gony pensary que nigolú cayaclani. Per Jehová rien mod rasac xpiin. Por ngú gochbu profeta Habacuc: «Yása guidxin dzú ni gac cumplir visión, né naguel radudy dzú par gac cumplirni, né diti sachéni. ¡Ná pal ñaclani, goyoʼ naní dzú guidxinni! Portín nigolú sac cumplirni. ¡Sadxinni órni non guidxinni!» (Hab. 2:3). ¿Diitzreʼ nosi gocni par Habacuc la? ¿O láaca racnéni lóono ló naareʼ? Jehová gochbu apóstol Pablo ñaibybu láani cristianos ni cabés guidxin toib Gudxlio copy (bíil Hebreos 10:36, 37). Ná pal rasacno que Jehová cayacla, guisetnaladxno que ni ma goniʼbu «nigolú sac cumplirni. ¡Sadxinni órni non guidxinni!».
17. ¿Ximod bisob toib hermana consej ni bidudy Jehová a Habacuc?
17 Xidal cristianos rasobyibu consej xtuny Jehová né rioʼyibu naní por xidal íz. Guibiʼno ni gosaclóo toib hermana ni laa Louise, ni gosaló buny xchiin Jehová ló íz 1939. Láabu nábu: «Dipa buni pensary pal ñapa 18 íz né noʼsaya ló gudxliogoxreʼ. Xpensari nadxin Armagedón antes, per diti gocni scú. Biila historias xtuny buñ ni bibany ló dzú ni see ni gop xiroʼ paseins xomod Noé, Abrahán, José né stipnés xpiin Jehová, layibu golésyibu ñony cumplir Jehová guirá ni ma goniʼ. Guirá ngú gocné naʼ par diti ñaladxi que mápa mer guidxin Gudxlio copy. Né naana que láaca racnéni stipnés». Nanno que xidal ni ma buny xchiin Jehová por xidal íz láaca rony pensary scúca.
18. ¿Ximod racné lóono guirá ni ma goyaʼ par gapno confianz que Jehová sony copybu Gudxlio reʼ?
18 Nanno que Gudxlio copy diti ma noʼni reʼ, per guicaano cuidad cós ni noʼ reʼ: xomod vitzón, yac, nimal né buñgudxlio. Ná guiráni diti goyoʼni nírcu, ni toib labúu guiniʼ que diti noʼni. Noʼni portín Jehová bisaʼ guiráni (Gén. 1:1, 26, 27). Dios xtunyno ma goniʼ que sonybu Gudxlio reʼ toib lagary móz, né sony cumplirbu láani. Sabanyno tipzó né ma diti saxoʼno. Órni guidxin dzú ni ma goniʼ Jehová, Gudxlio copycu sabiʼno láani xomod guirá ni nagoo lóono nigoreʼ (Is. 65:17; Apoc. 21:3, 4).
19. ¿Ximod gony nadipno fe xtunyno?
19 Laʼga guidxin toib Gudxlio copy, gonyno rutirigaʼlni lóono par gony nadipno fe xtunyno. Guidudyno guixquix órni gonyno pensary ló xcalgoity Jesús, gonyno pensary ló xcalnadip Jehová né tzodieʼno ló xchiimbu. Pal ronyno modreʼ, sioʼno lad «buñ ni cuaʼ xcalnasác Dios portín gopyibu fe né paseins» (Heb. 6:11, 12; Rom. 5:5).
CANCIÓN 139 ¿Te ves en el nuevo mundo?
a Ló naareʼ, xidal buñ diti rony crer que Jehová sony copy Gudxlio reʼ. Náyibu que diti nigolú sácni o que nosi nacni toib cuent sacróyen. Per lóono napno confianz que guirá ni ma goniʼ Jehová sarebuʼni. Par diti guioʼy fe xtunyno non gony nadipno láani. Ló artículo reʼ sasuidyno ximod labúu gonyno láani.
b Tipnésyibu bidzaʼ laa.
c Ló Índice de las publicaciones Watch Tower, sieed toib lagary ni ná «Profecía» lagarycu labúu sadzelo xidal artículos ni rabexa profecías xtuny la Biblia. Por ejemplo, bibiʼ artículo «Lo que Jehová predice se cumple sin falta», ni bireʼ ló Guiich ni caniʼ 1 de enero íz 2008.
