1. ¿Xí láani ngú paraíso espiritual, né xí non coʼno guicno gonyno?

 LÓ NAAREʼ, ló guidopynac Gudxlio noʼ toib paraíso ro bidza galnabany né dxiin. Loni, rabés xidalgoluʼ buñ ni nabany sacró né ma goloʼyibu guicyibu diti guisianyibu láani. Láaca nainy layibu que stipnés buñ gony compañer layibu. ¿De xí canino? ¡De mod sacróyen ni nac paraíso espiritual! a

2. ¿Xigony radziguiaʼno ni noʼ toib paraíso espiritual?

² Nigolú radziguiaʼno ni Jehová bisaʼ paraíso espiritual sacróyen reʼ, ló toib Gudxlio ro bidza galrrianladx, cós mal né ronoʼgolu riesga (1 Juan 5:19; Apoc. 12:12). Nanbu guirá mal ni labúu gony xcudxliogox Buñdzab lóono. Ronladxgoluʼbu lóono, por ngú, rinébu lóono toib lagary ro labúu guialno ló sentido espiritual. Ló Xtiitzbu ritlaa que paraíso espiritual nacni xomod toib lagary ro labúu guilaa buñ né «toib lagary móz ni buñ raseʼ guirá ór» (Is. 4:6; 58:11). Né xcalnasác Jehová, guirá ni rabés ló paraíso espiritual, rioʼ nakityibu né rasacyibu que diti noʼ xi gacyibu, ná ló dzú ni guidubylagaʼ reʼ nagangoluʼni (Is. 54:14; 2 Tim. 3:1).

3. ¿Pu ór primerdiguieʼ buelt góc cumplir diitz ni sieed ló capítulo 65 xtuny Isaías?

³ Ló capítulo 65 xtuny Isaías, Jehová goniʼ ximod nabany buñ ló paraíso espiritual cu. Diitz ni bicaʼ profeta reʼ góc cumplirni ló íz 537 antes de xtzúno. Ló dzúcu, buñ  judíos ni góc arrepentir bireʼyibu de gudx Babilonia né bibiguetyibu xcudxyibu. Né xcalnasác né xcalrracné Jehová, bisaʼyibu gudx Jerusalén stoib, ni binitló, né bunyibu láani toib gudx móz stoib. Láaca bisaʼyibu templo stoib par labúu ñacni toib lagary ro ñony adorar gudx Israel Jehová (Is. 51:11; Zac. 8:3).

4. ¿Ximod cayac cumplir ló naareʼ diitz ni sieed ló capítulo 65 xtuny Isaías?

⁴ Ni rarop buelt ni góc cumplir xtiitz Isaías gocni ló naareʼ. Gosalóni íz 1919, órni xpiin Jehová, bireʼyibu de Babilonia la Grande. De goló dzúcu, paraíso espiritual cayoʼni ló guidopynac Gudxlio. Ni goniʼ de Gobierno xtuny Dios, bisaʼyibu xidal congregaciones né gan. Xidal buñguieeu né buñgonaʼ ni góc buñ nadox né buñyox bitzaʼyibu mod gocyibu né goniʼsyibu lainy xcudx Jehová né nabanyibu mod racladx Dios suusi ñocyibu toib lairy copy (Efes. 4:24). Riendxichni, xidal galnasác ni bisetlaa Isaías sac cumplirni ló Gudxlio copy. Per desde nigoreʼ ma napno xidal galnasác sacróyen. Guibiʼno ximod racné paraíso espiritual reʼ lóono, né xigony dipa non guisianno láani.

XCALNASÁC PARAÍSO ESPIRITUAL

5. Mod ná Isaías 65:13, ¿xí galnasác racaʼno ni noʼno ló paraíso espiritual?

⁵ Rasacno que nacno buñ nasac né que napno fuers. Radziguiaʼno mod bislooy Isaías que gadzé mod rabany buñ ni noʼ ló paraíso espiritual né buñ ni diti noʼ ló paraíso cu (bíil Isaías 65:13). Jehová radudy guirá ni raquiin xpiin ló sentido espiritual. Napno espíritu santo xtunybu, xtiitzbu né xiroʼ galrro espiritual par labúu gueeno, guáno né guibaladxno (bitzak láani né ni ná Apocalipsis 22:17). Gadzé mod racni né guirá ni diti noʼ ló paraíso espiritual reʼ, diti napyibu ni napno. Radudyibu ló «galrralán», «galrralán de nís» né ló «galnatoy». Né diti noʼ chú radudy ni raquiinyibu ló sentido espiritual (Amós 8:11).

6. ¿Xí galrro ritlaa ló Joel 2:21-24, xí radudyni diitz, né ximod racnéni lóono?

⁶ Ló toibtica profecía xtunybu, Joel bisetlaa que Jehová nadudy ni merpa caquiin xcudx, xomod ladx, vino né aceity ni goctzay né oliva (Joel 2:21-24). Ni bidudybu diitz, laani ngú, que Jehová nadudy guirá ni naquiin xcudx, ni raguiña galrro espiritual. ¿Ximod ronybu láani ló naareʼ? Radudybu lóono la Biblia, publicaciones xtunyno, página ni napno ló internet, reunión né samblia. Modcu labúu guáno guirá dzú né guisacno que nacno buñ nasac né napno fuers.

7. ¿Xigony rioʼ nakit xcalnabanyno? (Isaías 65:14).

⁷ Rioʼ nakitno né rasacno sacró. Cristianos radudyibu guixquix Dios né guidopy xcalnabanyibu, né por ngú racaʼyibu rudx de galrrabaladx (bíil Isaías 65:14). ¿Xigony rioʼ nakit xcalnabanyibu? Portín radzelyibu ló Xtiitz Dios galnigolú, né ni ma goniʼ Dios gony, ni rony animar layibu. Láaca, napyibu toib esperanza dxich, ni rareʼ ló xcalgoity Jesús. ¡Balaati rioʼ nakityibu órni raniʼyibu guirá cós reʼ né xhermanyibu! (Sal. 34:8; 133:1-3).

8. ¿Xí chop cós rareʼ loguiaʼ de paraíso espiritual?

⁸ Chop cós ni rareʼ loguiaʼ ló paraíso espiritual reʼ, nacni ni raguaʼ xcudx Jehová toibsi né ni nadxiʼyibu saʼyibu. Galnadxiʼ reʼ «racnéni buñ guiguaʼ toibsi» né racnéni lóono guibiʼno ximod gac ló  Gudxlio copy. Cu sabiʼno toib galnadxiʼ rodann né mod ni guiguaʼ buñ toibsi sácni más xiroʼ que ló naareʼ (Col. 3:14). Toib hermana rasetlaa ximod bidziguiaʼbu órni bimbubu testigos xtuny Jehová: «Naʼ diti goona ximod nabani nakit, nili né xfamila. Primerdiguieʼ buelt ni bibiʼya galnadxiʼ gocni lad Testigos». Guirá ni nainy guibany nakit né guisac sacró, non tzoʼ ló paraíso espiritual. Nac nitisi guiniʼ gudxliogoxreʼ de lóono, nisló Jehová né xfamilbu ni noʼ ló guidopynac Gudxlio, nayaa laano né nacno buñtzay (Is. 65:15).

9. ¿Xí sac né cós ni ratudy lóono ló galrrioʼob? (Isaías 65:16, 17).

⁹ Diti rioʼno ló galrrasaʼ. Isaías 65:14 rasetlani que ni diti ná tzoʼ ló paraíso espiritual sacaʼyibu rudx portín cayoʼob xcalnabanyibu né sibdxaʼyibu portín noʼyibu nabann. ¿Né xí labúu guinino de xpiin Dios? ¿Xí sac né guirá cós ni bitudy layibu ló galrrioʼob? Jehová radudy xtiitz: «Guirá galrrioʼob ni gosacto ló dzú ni see ma diti sasetnaladxto láani; bisalóto ma diti sabiʼ láani» (bíil Isaías 65:16, 17). Sonybu que guirá galnagan guinitlóni, né dxoga dxoga ma diti sasetnaladxyibu galrrioʼob ni godudyibu ló.

10. ¿Xigony labúu guiniʼlo que nacni toib galnasác ni rioʼno né xhermanno? (Láaca bibiʼ retrat).

¹⁰ Dada nigoreʼ rasacno sacró né diti rioʼno ló galrrasaʼ ló reunión. Órni noʼno loni, rasianno tiplad guirá xcalrrasaʼ gudxliogoxreʼ. ¿Xí labúu gonyno par labúu tzoʼno sacró ló paraíso espiritual? Guislooyno cualidades xtuny fruto del espíritu, ladni noʼ, galnadxiʼ, galnakit, guiguaʼ buñ sacró, cobioo buñ saʼ sacró, né gacno buñ nadaʼa (Gál. 5:22, 23). ¡Toib galnasác gac buñ xcudx Dios! Pal diti rasianno paraíso espiritual, labúu guibiʼno ximod rony cumplir Dios promesa xtuny de guisaʼbu toib «guibá copy né toib gudxlio copy».

11. ¿Ximod non guisacno ni noʼno ló paraíso espiritual? (Isaías 65:18, 19).

¹¹ Radudyno guixquix né napno gan. Isaías rabexabu xigony xpiin Dios, napno razón par guibaladxno né tzoʼno nakit. Jehová bisaʼ paraíso espiritual ro rabésno (bíil Isaías 65:18, 19). Por ngú, raquiimbu lóono, par gony animarno buñ guireʼ lad organización ni noʼ ló gudxliogoxreʼ, ni nac xomod yoovich ló sentido espiritual né tzoʼyibu lainy congregación cristiana. ¡Balaati nakit rasacno  ni noʼno ló galnigolú! Né por ngú nainy guinino de guirá galnasác cu né stipnés buñ (Jer. 31:12).

12. ¿Ximod rasaclo órni roʼol lo ni goniʼ Jehová gony ni sieed ló Isaías 65:20-24, né xigony?

¹² Guiráno ni nabanyno ló paraíso espiritual, radudyno guixquix né rabaladxno por esperanza xtunyno. ¡Bunysi pensary ló guirá ni labúu guibiʼlo né gonylo ló Gudxlio copy! La Biblia radudy xtiitz: «Cú ma diti sioʼ badaʼ ni guibany chop tzón govitz nili buñgol ni diti guisaʼ xíz de galbuñgol». Né rasetlani que buñgudxlio «sasaʼyibu yoʼ né sabésyibu lainyni; sasagaʼyibu labaa balach né sooyibu xcaani». Né láaca, «diti sonyibu dxiin xilaʼsi» portín Jehová sasiab xcalnasác loguiaʼyibu. Dios radudy xtiitz que ma diti nac nacsi guibanyibu, diti sioʼ xi sacyibu né sioʼ nakityibu. «Antes de guicarudxyibu», Dios san xi ni caquiinyibu né sadudybu ni raniiny «xcalnabany guirá ni nabany» (Is. 65:20-24; Sal. 145:16).

13. ¿Ximod raslooy Isaías 65:25 ni non guitzaʼ buñ par gony xchiin Jehová?

¹³ Raguaʼno sacró né saʼno né diti radzuibyno tzoʼ ni gacno. Né xcalrracné espíritu santo, xidal buñ ni góc buñ mal, ma bitzaʼyibu mod gocyibu (bíil Isaías 65:25). Labúu guinino que, ma rony mandaryibu láacayibu (Rom. 12:2; Efes. 4:22-24). Nigolú, lóono ni nacno xpiin Dios, nacsano buñ galkié né por ngú rachéno. Ná scú, toib galrradziguiaʼ láani ni Jehová buny que «guirá clas buñ» guiguaʼ toibsi né gandxiʼ né guibany sacró né saʼ (Tito 2:11). ¡Nosi Dios ni nap xiroʼ galnadip labúu gony láani!

14. ¿Ximod góc cumplir ni ná Isaías 65:25 né toib hermano?

¹⁴ ¿Per nigolú labúu ratzaʼ buñ mod nac la? Ejemplo ni sieed raslooyni que scú nacni. Toib buñguieeu de 20 íz, ni góc buñ nadox né buñyox, goyoʼ lainy lachquiip por xidal cós mal ni bunybu, golanbu camión né stipnés cós. Láaca, guirá ór biyopybu galrradíil. Órni bicadiagbu primerdiguieʼ buelt ni rasuidy la Biblia né gosaló goyeebu reunión né testigos xtuny Jehová, bunybu crer que bidzelbu toib cós por ni rasac guibanybu: paraíso espiritual. Después ni goyonisbu, xidal buelt bunybu pensary ximod góc cumplir ló xcalnabanybu ni ná Isaías 65:25. Ma diti gócbu xomod toib betz, né gócbu nadaʼa xomod toib xiil.

15. ¿Xigony nainy gacnéno stipnés buñ par tzoʼ ló paraíso espiritual, né ximod ronyno láani?

¹⁵ Isaías 65:13 rasalóni né diitzreʼ: «Ndeʼ ni ná Jehová ni rony mandary guidopynac guibá né gudxlio». Né versículo 25 raloxni scareʼ: «Ná Jehová». Guirá ni raniʼ Jehová rac cumplirni (Is. 55:10, 11). Nigolú noʼ paraíso espiritual; ni Jehová goniʼ de láani, ma góc cumplirni. Bisaʼbu toib gudx ni nac toib lagary sacróyen, ro diti radzuibyno né raguaʼno sacró né saʼno, ná nabanyno ló toib Gudxlio ronoʼgolu cós mal (Sal. 72:7). Por guirá razón reʼ, nainy gacnéno xidal buñ par tzoʼ lainy xcudx Jehová. ¿Ximod ronyno láani? Ragoʼno guicno gacnéno buñ guidxin gac xpiin Jesús (Mat. 28:19, 20).

¿XIMOD LABÚU GUIXELCAʼNO BUÑ LÓ PARAÍSO ESPIRITUAL?

16. ¿Xí láani rony que buñ guioladx tzoʼ ló paraíso espiritual?

¹⁶ Guiráno labúu gacnéno né gonyno que paraíso espiritual gacni toib lagary sacró ro guiniiny más buñ tzoʼ. ¿Ximod?  Guisuʼno Jehová. Láabu diti rony lafuersbu buñ, xalagary ngú, raxelcaʼbu buñ né galrronladx par guidxin ronoʼbu (Jer. 31:3; Juan 6:44). Guirá buñ ni rasuidy de Jehová, né natzaay xcalnabany, rioladxyibu mod nac Jehová. ¿Xí cós labúu gonyno par láaca labúu guixelcaʼ mod nacno buñ lainy paraíso espiritual?

17. ¿Xí labúu gonyno par guixelcaʼno buñ tzoʼ ló paraíso espiritual?

¹⁷ Toib mod ni guixelcaʼno buñ ló paraíso espiritual láani ngú, cobiono né galnadxiʼ né galrronladx xhermanno. Raniiny lóono que buñ ni tzee xireunionno guiniʼyibu ni goni buñ goyee reunión ni goyoʼ Corinto ló dzú ni see: «Dios nigolú noʼ ladto» (1 Cor. 14:24, 25; Zac. 8:23). Por ngú nigolú rasac guisobno consej reʼ: «Colguibany goxt né saʼto» (1 Tes. 5:13).

18. ¿Xí láani labúu gacné buñ par guidxin lainy xcudx Jehová?

¹⁸ Láaca guirá ór non gonyno rutirigaʼlni lóono par guibiʼno xhermanno mod rabiʼ Jehová layibu. Por ngú rabiʼno cualidades sacróyen ni napyibu né diti ro rachéyibu, ni ló dzú ni sietra ma diti sioʼ. Galnadxiʼ sacnéni lóono, par gony reglarno galrradíil né saʼno pal rasobno consej reʼ: «Colgac buñtzay né saʼto, colcobioo né colgonladx saʼto, né puextca colguitudy scásiʼ xcalkié saʼto» (Efes. 4:32). Guirá buñ ni guiniiny cobioo stipnés layibu sioladxyibu tzoʼyibu ló paraíso espiritual. b

 DITI GUISIANNO PARAÍSO ESPIRITUAL

19. a) ¿Xí láani ma goniʼ tipnés ni bibiguet ló paraíso espiritual? (Bibiʼ cuadriyen « Bireʼyibu, per bibiguetyibu»). b) ¿Xí láani non coʼno guicno gonyno? (Láaca bibiʼ retrat).

¹⁹ ¡Sacróyen ngú ni noʼno ló paraíso espiritual! Nigoreʼ más mózni né dipa ma goyoʼ xidal buñ loni xomod nigoreʼ. Guirá ór radudyno guixquix Dios pór paraíso ni bisaʼbu par lóono. Guirá ni guiniiny gap fuers, guibany nakit, diti tzoʼ ló galrrasaʼ, non tzoʼyibu ló paraíso espiritual né dipa guisianyibu láani. Per non gapno xiroʼ cuidad, portín Buñdzab, rayopy mod guiscú lóono né galsitno de lagary sacróyen reʼ (1 Ped. 5:8; Apoc. 12:9). Dipa guidudyno lagary gonybu gan. Gonyno rutirigaʼlni lóono par gapno mod sacró ni nac paraíso espiritual, mod nayaani né mod raguaʼ buñ sacró loni.