¿Nanlo láani la?
¿Xigony buñ de stipnés gudx góc soldad xtuny David?
LAD SOLDAD xtuny David goyoʼ buñ ni diti góc israelitas, por ejemplo, Zélec ni góc buñ ammonita, Urías ni góc hitita né Itmá ni góc buñ moabita (1 Crón. 11:39, 41, 46). a Láaca goyoʼ «keretitas, peletitas né guititas» (2 Sam. 15:18). Ralooyni que keretitas né peletitas gocyibu xfamil filisteos (Ezeq. 25:16). Né guititas gocyibu de gudx xtuny filistea de Gat (Jos. 13:2, 3; 1 Sam. 6:17, 18).
¿Xigony bidudy David lagary que soldad xtunyibu ñacyibu de stipnés gudx? Portín gonbu que diti nosi láasibu ñacbu leal, láaca ñacyibu leal Jehová. Por ejemplo, ni canino de keretitas né peletitas, The New Interpreterʼs Dictionary of the Bible náni: «Layibu dipa bisianyibu David órni cualó galnagan dzú buny mandarybu». ¿Ximod nanno láani? Órni «guirá xpiin Israel» bisianyibu rey David par nacanalyibu a «toib buñguieeu benjaminita ni góc laa Seba xiingaʼn Bicrí ni bikíil buñ par diti nasob David», keretitas né peletitas buny apoyaryibu David né gocnéyibu par ñaity Seba (2 Sam. 20:1, 2, 7). Toibtica buelt, toib xiingaʼn rey David ni góc laa Adonías biyopy mod nacaʼ trono xtunybu. Per keretitas né peletitas dipa bisianyibu David né gocnéyibu Salomón par ñac rey, portín gonyibu que Jehová golú láabu (1 Rey. 1:24-27, 38, 39).
Stoib bioʼos ni dipa bisian David góc Ittái ni góc buñ guitita. Láabu né 600 soldad xtunybu gocnéyibu David órni stoib xiingaʼnbu ni laa Absalón, cualó rey né biyopybu mod par ñony apoyar stipnés buñ láabu par ñacbu rey. David gochbu Ittái, portín nacbu bioʼos diti noʼ xi portín ñacné láabu. Per Ittái cuapy láabu: «¡Xomodca nabany Jehová né rey, señor xtuni, rotísi tzoʼ rey, señor xtuni, cú sioʼ xpiinlo, ná pal guibanybu o gaitybu!» (2 Sam. 15:6, 18-21).
Ittái dipa bisian David, rey ni golú Jehová.
Ná keretitas, peletitas né guititas gocyibu bioʼos, bunyibu crer que Jehová nac Dios ni nigolú né gopyibu respet David xomod buñ ni Jehová ma golú. David nigolú bidudy guixquix portín guirá biinreʼ dipa bisian láabu.
a Ley xtuny Dios ni radzelno ló Deuteronomio 23:3-6 goniʼni que ni toib ammonita ni moabita labúu ñoʼ lainy congregación xtuny Israel. Ralooyni que ngú bidudy diitz que diti labúu ñacyibu de gudxcu, né que diti labúu ñapyibu derech ni gop israel. Per labúu nadzakyibu xcudx Dios né nabanyibu cu. Ló Perspicacia para comprender las Escrituras, goyee ro ná «Ammonitas» né de ngú ló subtítulo ro ná «Se casan con israelitas».
