1. ¿Ximod rasac tipnés herman órni raniʼyibu xtiitz Dios? (Láaca bibiʼ retrat).

 LÓONO ni nacno xpiin Jehová, rony predicarno portín nadxiʼno Bixiosno ni noʼ guibá né nainy lóono que stipnés buñ guimbu láabu. Xidal herman nigolú rioladxyibu guiniʼyibu xtiitz Dios, per noʼ stipnés ni rasac nagan guioladx láani. ¿Xigony? Tipnésyibu ratoyibu né diti rapyibu confianz láacayibu. Stipnés diti rasacyibu sacró órni rieeyibu ronoʼ buñ ni diti biruʼ layibu. Né noʼ tipnés ni radzuiby diti guicacuent buñ layibu. Né stipnés bisuidyibu que diti non tíilyibu. Guiráyibu nadxiʼyibu Jehová, per rasac naganyibu tzanéyibu diitz sacró ronoʼ buñ ni diti rimbuyibu. Rienyibu que nigolú rasac dxiinreʼ, por ngú rareʼyibu raniʼyibu xtiitz Dios. ¡Jehová nigolú rabaladx né layibu!

2. ¿Xigony diti non guireʼganlo pal rasac naganlo guisaclo sacró órni raniʼlo xtiitz Dios?

² ¿Né looyga? ¿Rasacnaganlo tzoʼlo sacró órni raniʼlo xtiitz Dios la? Pal rioʼ ór rasaclo scú, diti guireʼganlo. Pentzi ni rasaclo modcu, raslooy que naclo buñdxo. Sigory rasaclo modcu, portín diti nainy guibiʼ buñ looy né  diti nainy tzoʼlo ló galrradíil diitz. Né ni toib buñ rioladx que stipnés cueʼ láabu tiplad, né máspa pal ni raniiny láabu ngú gacnébu. Bixioslo ni noʼ guibá rientzaay galnagan ni racalólo, né nainy gacnébu looy (Is. 41:13). Ló artículo reʼ sabiʼno gáay sugerencias ni sacné looy par diti guisaclo modcu, né guioladxlo guiniʼlo xtiitz Dios.

CUAʼ FUERS DE XTIITZ DIOS

3. ¿Pú goleʼ Jeremías fuers?

³ Por xidalgoluʼ íz, mensaj xtuny Dios ma buny nadipni xpiin Dios, órni gopyibu toib dxiin nagan nislóyibu. Guibiʼno ni gosaclóo profeta Jeremías. Órni Jehová bixel láabu naniʼ xtiitzbu, bidzuibybu né goniʼbu: «Naʼ diti naana raniya. Toib mbioxhlasiensa naʼ» (Jer. 1:6). ¿Xí láani bunybu par ma diti nadzuibybu? Cuaʼbu fuers de xtiitz Dios. Goniʼbu: «Xtiitzbu gocni […] xomod toib guii ni cayalguiidit ni nayeg lainy xchita, né bidzaga bicañaya láani» (Jer. 20:8, 9). Nagan góc territorio ro gosaa Jeremías, per mensaj ni naniʼbu bidudyni fuers ni biquiimbu par buny cumplirbu dxiin ni cuaʼbu.

4. ¿Xí láani racaʼno órni rolno né ronyno pensary ló Xtiitz Dios? (Colosenses 1:9, 10).

⁴ Lóono ni nacno cristianos, láaca mensaj xtuny Dios rony nadipni lóono. Órni Apóstol Pablo bicaʼbu guiich ló cristianos de Colosas, gochbu biinreʼ que galnan ni nigolú labúu nachiin layibu nabanyibu «mod nabany xpiin Jehová» né ñonyibu xinésni (bíil Colosenses 1:9, 10). Toib dxiin sacró láani ngú, guiniʼ buñ diitz sacró. Mod ma bisuidyno, órni rolno Xtiitz Dios né ronyno pensary loni, rac nadip fe xtunyno lóo Jehová né rientzaayno xigony nigolú rasac guinino xtiitz Dios.

5. ¿Xí sacné lóono par gacné la Biblia lóono?

⁵ Par gacné Xtiitz Dios lóono, diti naguel golno, guisuidyno né gonyno pensary loni. ¿Xí labúu gonylo, pal radzelo toib texto ni diti rienlo? Xalagary guisianlo láani scásiʼ, biyopy ximod rarexa versículocu ló Índice de las publicaciones Watch Tower o Ni gacné a testigos xtuny Jehová guisuidyibu la Biblia. Pal xiroʼ órien rasuidylo, saniʼs confianz ni  naplo ló Xtiitz Dios (1 Tes. 5:21). Né, laʼga más confianz gaplo ló la Biblia, más sioladxlo gaibylo buñ ni casuidylo.

BISUIDYTZAY XI GUINIʼLO ÓRNI TZEELO PREDICACIÓN

6. ¿Xigony non guisuidytzayno ni guinino ló predicación?

⁶ Pal rasuidytzaylo xi guiniʼlo ló predicación, sasaclo más sacró órni guininélo buñ. Jesús bisuidy xpiin antes ni nabeʼbu guirá biinreʼ naniʼ xtiitz Dios (Luc. 10:1-11). Né xpiimbu buny ni Jesús bisuidy layibu, por ngú goyoʼ nakityibu por guirá ni bunyibu (Luc. 10:17).

7. ¿Ximod labúu guisuidytzayno ni guinino ló predicación? (Láaca bibiʼ dibuj).

⁷ ¿Ximod labúu guisuidyno xí guinino órni tzoʼno predicación? Non gonyno pensary ximod guinino xtiitz Dios ló xtiitzcano. Láaca galán láani gonyno pensary tzón mod ni racapy o rony buñ de territorio xtunyno, né xi labúu nacapyno ló tigaagani. Modcu, órni guininéno buñ, diti sioʼno ló galrrasaʼ né saxiichno né sagobiono buñ sacró.

8. ¿Ximod nac cristianos xomod bás yoo?

⁸ Apóstol Pablo biquiin toib comparación ni raslooy xi dxiin napno ló predicación. Goniʼbu: «Napno tesoro reʼ lainy bás yoo» (2 Cor. 4:7). Per ¿xí láani tesoro reʼ? Nacni predicación de mensaj de Gobierno xtuny Dios, toib dxiin ni ralaa buñ (2 Cor. 4:1). ¿Né xí láani ngú bás yoo? Lóono ni nacno xpiin Dios, ni sanéno diitz sacró. Ló xtzú Pablo, buñ ni bitoʼ, bitudyibu cós ni rasac lainy bás yoo, xomod galrro, vino o bidxiich. Ló naareʼ, Jehová láaca ma bidudy toib cós ni nigolú rasac lóono, láani ngú: diitz sacró. Né xcalrracnébu, sapno fuers ni raquiinno par gony cumplirno né dxiin ni ma cuaʼno.

GONAB DIOS GUIDUDY BALORY LOOY

9. ¿Xí labúu gonyno par ma diti guidzuibyno órni buñ diti guicacuent lóono? (Láaca bibiʼ retrat).

⁹ Rioʼ ór pentzi guidzuibyno diti guicacuent buñ lóono, o guidzuibyno buñgudxlio. ¿Ximod labúu gonyno gan láani? Gonyno pensary ló oración ni buny apóstoles órni goyoʼ ni buny mandary  layibu ma diti naniʼyibu xtiitz Dios. Xalagary nadudyibu lagary que galdzuiby cu nacaa lóoyibu, gonabyibu Jehová ñacné layibu par naniʼrayibu xtiitz Dios «né balory». Né Jehová nimaca cuapy layibu (Hech. 4:18, 29, 31). Órni guidzuibyno buñgudxlio, guinabno xcalrracné Jehová. Scú láani, guinabno Jehová gacné lóono gonyno gan galdzuiby a buñgudxlio né galnadxiʼ ni napno saʼno.

10. ¿Xí galrracné napno par gony cumplirno dxiin ni napno xomod testigos xtuny Jehová? (Isaías 43:10-12).

¹⁰ Jehová golú lóono par gacno Testigos xtunybu (bíil Isaías 43:10-12). Né radudybu xtiitzbu gacnébu lóono par gapno balory. Guibiʼno tap mod ni racnébu lóono. Primer, Jesús rioʼ né lóono órni ranino diitz sacró (Mat. 28:18-20). Ni rarop, Jehová ma gochbu ángeles gacné lóono (Apoc. 14:6). Ni rion, Jehová radudy espíritu santo xtuny lóono, ni racné lóono guisetnaladxno ni ma bisuidyno (Juan 14:25, 26). Né ni rasaʼ tap, Jehová radudy herman ni rony compañer lóono. Né xcalrracné Jehová né de xhermanno, napno guirá ni raquiinno par gonyno gan galdzuiby.

BIYOPY MOD GUININÉLO BUÑ NÉ BUNY PENSARY LÓ CÓS SACRÓ

11. ¿Xí labúu gonylo par guiniʼlo xtiitz Dios né más buñ? (Láaca bibiʼ retrat).

¹¹ ¿Rareʼganlo órni diti tampa radzelo buñ lidx la? Pal scú nacni, gonabdiitz ndeʼ looy: «¿Pú noʼyibu ór reʼ? ¿Cayonyibu dxiin o casiʼyibu xcósyibu la?» (Hech. 16:13). Órcu, buny pensary guiniʼlo xtiitz Dios locay. Toib hermano ni laa Joshua rabexa: «Ni racné naʼ láani ngú ni rayobi oportunida par guiniʼya xtiitz Dios laʼga rasaaya lainy mercad, lainy tiend né ro rasagaʼ guirá buñ xcamión. Tanli láabu né tzeelbu, Bridget, ma bidzelyibu más buñ lidx, órni rieeyibu lidx buñ godzu o doming después de galaʼ dzú» (Efes. 5:15, 16).

12. ¿Ximod labúu ganno ni rony crer buñ né xí temas rioladxyibu guicadiagyibu?

¹² Pal buñ diti tampa nainy guicadiagyibu lóono, guiyopyno mod ganno xi  ronyibu crer né xi cós ragoʼ layibu ló galrrasaʼ. Joshua né Bridget raquiinyibu introducción xtuny galrranabdiitz ni sieed laidy tratad. Por ejemplo, órni raslooyibu tratad ¿Ximod rabiʼlo la Biblia?, raniʼyibu: «Tipnés buñ rony pensary que la Biblia sieedni de Dios, né stipnés yaca. Looyga, ¿xí ronylo pensary?». Modreʼ, labúu raninéyibu buñ.

13. ¿Ximod labúu rarebuʼ ni ranino xtiitz Dios, ná ni toib buñ racadiag lóono? (Proverbios 27:11).

¹³ Midid buñ ni guicadiag lóono ló predicación, diti ngú ni más rasac. ¿Xigony? Portín ni más rasac láani ngú, gonyno ni ranab Jehová né Xiimbu lóono: guinino xtiitz Dios (Hech. 10:42). Por ngú, diti tzogoluʼno ló galrrasaʼ pal diti raninéno ni toib buñ o diti racacuent buñ diitz sacró ni sanéno. Guirá ór labúu guisacno sacró portín ragoʼ nakitno Bixiosno ni noʼ guibá (bíil Proverbios 27:11).

14. ¿Ximod rasacno órni toib publicador radzel toib buñ ni ná gan ni ná la Biblia, né xigony?

¹⁴ Láaca labúu guibaladxno né stipnés publicadores ni radzel buñ ni racacuent xtiitz Dios. Guiich ni Caniʼ ratzakni dxiin ni ronyno, né ni rac galrrayopy toib mbiox ni ma binit. Xidal buñ rayopy nidxiyencu, né xidal lagary rasaayibu. Órni noʼ ni radzel nidxiyencu, diti nosi rabaladx buñ ni radzel láabu, guirá buñ rabaladx. Modcuca, ni gacnéno buñ gac xpiin Jehová, nacni toib dxiin de xidal buñ. Guiráno raquiinno par saano ló toib territorio, né guiráno rabaladxno órni toib buñ rasaló riee reunión.

GOLOʼ GUICLO LÓ GALNADXIʼ

15. ¿Xí sacné lóono par gapno más gan guinino xtiitz Dios? (Mateo 22:37-39; láaca bibiʼ retrat).

¹⁵ Gan ni napno guinino xtiitz Dios saniʼsni, pal ragoʼno guicno ló galnadxiʼ ni napno Jehová né saʼno (bíil Mateo 22:37-39). ¡Buny pensary balaati nakit rasac Jehová órni rabiʼbu lóono canino xtiitz Dios, né balaati nakit sioʼ buñ ni guisaló guisuidy ni ná la Biblia! Né diti guialadxlo que buñ ni guicacuent mensaj ni sanéno, salaayibu (Juan 6:40; 1 Tim. 4:16).

16. ¿Ximod labúu guioladxno guinino xtiitz Dios, ná diti labúu rareʼno lidxno? Bisetlaa toib ejemplo.

 ¹⁶ ¿Né pal looy diti labúu rareʼlo yoʼ ga? Goloʼ guiclo ló cós ni labúu gonylo par guislooylo xcalnadxiʼlo Jehová né saʼlo. Ló pandemia de COVID-19, Samuel né Dania diti labúu bireʼyibu lidxyibu. Ló tiemp nagancu, goniʼyibu xtiitz Dios por teléfono, bicaʼyibu guiich né bisuidyibu buñ por Zoom. Láaca, Samuel goniʼ xtiitz Dios lainy clínica ro goyeebu ló doctor xtol cáncer. Nábu: «Galnagan, rastzagni buñ ló sentido físico, mental né espiritual. Por ngú, raquiinno galnakit ni racaʼno por ni ronyno xchiin Jehová». Órni góc guirá ndeʼ, Dania biab né diti labúu bunybu xitcal tzón beʼo. Después biquiimbu toib silla de ruedas xhoop beʼo. Láabu rabexabu: «Buni niti labúu buni. Labúu goniya xtiitz Dios né enfermera ni goyguen naʼ né goninéya buñ ni goysan cós lidxi. Láaca sacró biiy diitz né toib buñgonaʼ ni bitoʼ cós ni raquiin doctor». Nigolú, Samuel né Dania diti labúu bunyibu midid goniiny layibu, per bunyibu ruti labúuni layibu, por ngú goyoʼ nakityibu.

17. ¿Ximod labúu sacné guirá sugerencias reʼ lóono?

¹⁷ Sugerencias ni sieed ló artículo reʼ, sacnéni lóono pal ronyno guiráni. Tigaagani nacni xomod toib ingrediente de toib receta. Órni riótz guirá ni rinéni, naníx rareʼ galrrocu. Pal ronyno guirá ni bisuidyno, ma diti sadzuibyno né sioladxno guinino xtiitz Dios.