1. Mod ná Hebreos 12:1, ¿xí raquiin gonyno par guisloʼoxno carrera ni guidudy vida lóono?

 LA Biblia ná que cristianos noʼno ló toib carrera. Ni rony gan carrera cu racaʼ vida por tipzó (2 Tim. 4:7, 8). Non gonyno rutirigaʼlni lóono por guixonyno, portín ma noʼno gax de meta cú. Apóstol Pablo ni bislox carrera xtuny par guicaʼbu vida, raibybu lóono xi láani labúu gacné lóono par guisloxno láani, goniʼbu: «Cueʼno tiplad guirá guiʼx nanaʼ ni nooyno […], né diti guidzagno guixonyno ló carrera ni ma goloʼ Dios nislóno» (bíil Hebreos 12:1).

2. ¿Xí bidudy Pablo diitz órni goniʼbu «cueʼno tiplad guirá guiʼx nanaʼ ni nooyno»?

² ¿Xí radudy diitz «cueʼno tiplad guirá guiʼx nanaʼ ni nooyno»? Pablo diti goniʼ que cristianos diti non tzané ni toib guiʼx, goniʼbu que non cueʼno laidyno nitisi guiʼx ni diti raquiin. De clas guiʼx reʼ ronyni que saano más tzagaa né rastzagni lóono. Par labúu tzoʼno ló carrera reʼ, non guibiʼno pal nooyno toib guiʼx ni diti raquiin né nimaca cueʼno láani laidyno. Per noʼ stipnés guiʼx ni non tzanéno né diti non cueʼno láani tiplad. Pal ñonyno ngú ma diti labúu ñoʼno ló carrera cu (2 Tim. 2:5). Guibiʼno de xi canino.

3. a) Mod ná Gálatas 6:5, ¿xí cós non tzané tigaaga cristiano? b) ¿Xí cós guisuidyno ló artículo reʼ, né xigony?

³ (Bíil Gálatas 6:5). Ló versículo reʼ, Pablo goniʼ toib cós ni non tzané guirá cristiano: «responsabilidad xtuny». ¿Xí bidudybu diitz? Responsabilidades ni napno nisló Dios ni nosi lóono labúu tzanéno. Ló artículo reʼ guisuidyno tipnés cós ni raguiña ló responsabilidad ni napno tigaagano né xi láani sacné lóono par tzanéno láani. Láaca, sasuidyno de tipnés guiʼx ni diti raquiin ni sigory nooyno né xi labúu gonyno par labúu cueʼno láani laidyno. Nigolú  rasac que diti tudy midid gooyno né nosi gooyno ni raquiin. Portín modcu labúu gonyno gan carrera cu né guicaʼno vida.

4. ¿Xigony diti nacni toib guiʼx ni nanaʼ ni bidudyno xtiitzno gac dedicarno? (Láaca bibiʼ retrat).

⁴ Bidudyno xtiitzno gac dedicarno. Órni góc dedicarno, bidudyno xtiitzno Jehová que gony adorarno láabu né guisobno ni nábu. Non gony cumplirno ni ma gonino. Ná nacni toib responsabilidad xiroʼ, dedicación xtunyno diti nacni toib guiʼx ni nanaʼ. ¿Xigony? Portín Jehová bisaʼ lóono par gonyno xchiimbu (Apoc. 4:11). Godixbu lainy xcalnabanyno ni guiniiny lóono guimbuno né gony adorarno láabu, láaca bunybu lóono xomod láabu. Por ngú labúu rabigaxno ronoʼbu, né rabaladxno órni ronyno xchiimbu (Sal. 40:8). Né diti nosi ngú, órni ronyno ni ná Jehová né rasuʼno Xiimbu, rasialdóni lóono (Mat. 11:28-30).

5. ¿Xí láani sacné looy par gony cumplirlo né dedicación xtunylo? (1 Juan 5:3).

⁵ ¿Xí láani sacné looy par labúu tzanélo guiʼx cu? Primer, buny dxich galnadxiʼ  ni naplo Jehová. Pal ronylo pensary ló guirá ni ma buny Jehová por looy, né galnasác ni sadudybu looy ló dzú ni sietra, saniʼs galnadxiʼ ni rasaclo por láabu. Né laʼga más gandxiʼlo Dios, diti sasac naganlo guisoblo láabu. Sasaclo que ni rony mandarybu diti nacni toib guiʼx ni diti labúu tzanélo (bíil 1 Juan 5:3). Ni rarop, bisuʼ Jesús. Labúu bunybu xchiin Dios portín gonabbu xcalrracné Jehová né bisetnaladxbu galnasác ni nacaʼbu (Heb. 5:7; 12:2). Xomodca Jesús gonab Jehová guidudy fuers looy, né bisetnaladx esperanza ni guibanylo por tipzó. Pal ronydxichlo galnadxiʼ ni rasaclo por Jehová né rasuʼlo Xiimbu, labúu gony cumplirlo né dedicación ni bunylo.

6. ¿Xigony non gony cumplirno né responsabilidades ni napno lainy xfamilno? (Láaca bibiʼ retrat).

⁶ Responsabilidades ni napno lainy xfamilno. Ló carrera par guicaʼno vida, non gandxiʼno más a Jehová né a Jesús que xfamilno. Per nga diti radudyni diitz que diti gony cumplirno né responsabilidades ni napno lainy xfamilno, né guibiʼno láani xomod toib cós ni racaa lóono par gonyno xchiin Jehová. Pal nainy coʼ nakitno xcalnabany Jehová né Jesús, non gony cumplirno né responsabilidades ni napno lainy xfamilno (1 Tim. 5:4, 8). Pal ronyno láani sioʼ nakitno. Jehová nan que famil labúu sieeni galán layibu pal galtzeʼel nadxiʼyibu né rapyibu respet saʼyibu, pal bixios mbiox rasuidy né nadxiʼ xiin né pal mbiox rasob bixios né xinaʼ (Efes. 5:33; 6:1, 4).

7. ¿Xí láani sacné looy par gony cumplirlo né dxiin ni naplo lainy xfamilo?

⁷ ¿Xí láani sacné looy par tzanélo guiʼx cu? Nac nitisi dxiin ni naplo lainy xfamilo gop confianz ló consej ni sieed ló la Biblia. Diti gonylo cós ni ronylo pensary que nac más galán, por mod nac ro rabéslo o por guirá ni raniʼ buñnan de gudxliogoxreʼ (Prov. 24:3, 4). Biquiintzay publicaciones ni napno, portín cu sadzelo tipnés consej ni saquiinlo, ni rasetlaa ximod labúu guisoblo ni ná la Biblia. Por ejemplo, ló sección ni ná, «Ayuda para las familias», cu noʼ información ni sacné galtzeʼel, bixios mbiox, mbioxhlas par ganyibu xi láani gonyibu órni guicalóyibu tipnés galnagan. b Goló guiclo guisoblo ni ná la Biblia, ná looysi de xfamilo rony láani. Sabiʼlo ximod sacnéni guirá xfamilo, né Jehová sadudy galnasác looy (1 Ped. 3:1, 2).

8. ¿Ximod raguiñani lóono ni ragoʼno guicno gonyno?

⁸ Mod rarecaa ni ragoʼno guicno gonyno. Ni labúu rabúno nacni toib galrrascad ni Jehová ma bidudy lóono, raniiny láabu que guicaʼno galnasác por ni ragoʼno guicno gonyno. Per diti ralaabu lóono de cós mal ni racno por ni diti rabúno galán ni ronyno (Gál. 6:7, 8). Por ngú, pal diti rabutzaayno ni ronyno, né diti ronyno pensary antes de guinino o nimaca ronyno toib cós, non guicacuentno galnagan ni racaʼno. Né sioʼ ór labúu guisacno que napno dool, né xcalrrienno sonynudyni lóono. Ni nanno que lóono napno dool de cós ni ragoʼno guicno gonyno, sachiinni lóono par guisetno cós mal ni ma bunyno. Guitzaʼno mod nacno né gonyno rutirigaʼlni lóono par diti tzaguiabno ló  galkiécu stoib. Modcu labúu tzoʼrano ló carrera par guicaʼno vida.

9. ¿Xí láani sacné looy pal diti galán ngú ni goloʼlo guiclo gonylo? (Láaca bibiʼ retrat).

⁹ ¿Xí láani sacné looy par goʼoylo guiʼx cu? Bisetnaladx que ni ma bunylo ma bunylo láani né ma diti labúu guitzaʼlo láani. Diti tudy midid gonylo pensary loni, diti tzoʼlo galrrasaʼ por ni bunylo, diti guigotzlo dool stipnés nili guiyopylo cós ni guicaʼlo diitz. Ni labúu gonylo láani ngú, guisetnaladxlo que looy ngú ni biché né buny rutirigaʼlni looy par gonylo láani más galán. Pal rasaclo mal por ni bunylo góc buñdxo né goniné Jehová, goniʼ que looy ngú ni biché né gonab láabu guitudybu láani scásiʼ (Sal. 25:11; 51:3, 4). Pal bunynalo stoib buñ, gonab láabu guitudybu scásiʼ ni bunylo. Né pal raquiinlo láani biyopy ancianos par gacné looy (Sant. 5:14, 15). Bisuidy de galkié ni bunylo né buny rutirigaʼlni looy par diti tzaguiablo loni stoib. Labúu gandxichlo que Jehová sacné né sonladx looy (Sal. 103:8-13).

10. ¿Xigony nacni toib guiʼx ni nanaʼ ni rabésno cós ni diti labúu gac? (Gálatas 6:4).

¹⁰ Órni rabésno cós ni diti labúu gac. Toib mod ni labúu gooyno cós ni diti labúu gac, láani ngú gac compararno né stipnés buñ (bíil Gálatas 6:4). Pal riaʼno ronyno modcu labúu gony competirno né stipnés né gapno envidy layibu (Gál. 5:26). Órni rayopyno mod gonyno ni rony stipnés, labúu cuésno xiroʼgolu de lóocano. Buny pensary ló ndeʼ: la Biblia ná que «órni diti nimaca rac cumplir ni cabés buñ, ngú rony que galnabany guixoʼ» (Prov. 13:12). Por ngú, saxacladxno más pal rabésno cós ni diti labúu gonyno, ngú labúu nabeʼ fuers xtunyno né labúu ñonyni que natzatzñano carrera xtunyno (Prov. 24:10).

11. ¿Xí sacné lóono par diti cuésno cós ni diti labúu gac?

¹¹ ¿Xí sacné looy par cueʼlo guiʼx nanaʼ cu laidylo? Diti cuéslo más de looyca, portín Jehová dipa sanab cós ni diti naplo (2 Cor. 8:12). Diti tzoʼlo ló galrrasaʼ, Jehová diti rony comparar looy né stipnés (Mat. 25:20-23). Par láabu rasac ni ronylo: dxiin ni ronylo né guidopy xcalnabanylo, ni diti rasianlo láabu, né ni rony guantarylo. Modestia sacnéni looy guisetnaladxlo que xislo, xcalguitzlo o stipnés cós labúu gonyni que diti labúu gonylo ni diti nainy looy. Góc xomod Barzilái né diti guicacuentlo dxiin pal rabiʼlo que diti labúu gonylo láani portín caxoʼlo (2 Sam. 19:35, 36). O góc xomod Moisés, cuacuent xcalrracné stipnés, né bidudy dxiin a stipnés órni caquiinni (Éx. 18:21, 22). Pal naclo modesto, diti sabéslo cós ni diti labúu gac ni gony que ma diti gaplo fuers par guixonylo.

12. ¿Napno dool ni ragoʼ stipnés buñ guic gony la?

¹² Órni rasacno que napno dool por ni rony stipnés. Diti labúu cuuno xi láani gony stipnés nili labúu gapno layibu de guirá ni guisacloyibu por cós mal ni ma bunyibu. Pentzi toibtica xiin buñ ragoʼ guic guisian a Jehová, né labúu guisioʼobni xcalnabany ni nac bixiosbu né xinaʼbu. Per bixios mbiox ni ragotzyibu dool layibu por cós mal ni rony xiinyibu rasalyibu laidyibu guiʼx nanaʼ, toib guiʼx ni Jehová diti rabés gap bixios mbiox (Rom. 14:12).

13. ¿Xí labúu gony bixios mbiox pal xiinyibu diti rabútzay ni gony?

¹³ ¿Xí láani sacné looy par cueʼlo guiʼx  nanaʼ cu laidylo? Bisetnaladx que Jehová rasian cuuno xi láani gonyno, né radudybu lagary que tigaaga buñ cuu xi láani gony, ndeʼ raguiña pal gonyno ni nábu o yaca. Jehová nan que naclo toib buñ galkié. Né nosi ni raniiny láabu, láani ngú guisniʼslo sacró xiinlo. Pal xiinlo rasian galnigolú, nacni xtolbu diti xtunylo (Prov. 20:11). Ná scú, sigory ronylo pensary xi láani diti bunylo sacró. Góoch Jehová ximod rasaclo né gonab láabu guitudybu láani scásiʼ. Láabu nanbu que diti labúu guitzaʼlo cós ni ma góc. Né Jehová diti rabés que looy guilaalo xiinlo de cós mal ni tudybu ló por ni bunybu. Per bisetnaladx pal xiinlo rony rutirigaʼlni láabu par guibiguetbu ronoʼ Jehová, Jehová sacacuent láabu (Luc. 15:18-20).

14. ¿Xigony diti tudy midid guigotzno dool lóocano?

¹⁴ Órni radudy midid ragotzno dool lóocano. Órni rachéno wal ragotzno dool lóocano. Per ni radudy midid ragotzno dool lóocano nacni toib guiʼx ni Jehová diti ná gooyno, nacni toib guiʼx ni non cueʼno laidyno. ¿Ximod labúu ganno que cadudy midid cagotzno dool lóocano? Pal ma bisetno galkié ni bunyno, ma góc arrepentirno né cayonyno rutirigaʼlni lóono par diti tzaguiabno loni stoib, labúu gandxichno que Jehová ma bitudy láani scásiʼ (Hech. 3:19). Órni ma bunyno guirá ndeʼ, Jehová raniiny que ma diti guigotzno dool lóocano portín nanbu que pal rasacno scá xiroʼ tiemp, labúu sonyni mal lóono (Sal. 31:10). Pal radudyno lagary que galnabann guistoʼbyni lóono, sigory sareʼganno né sasianno carrera ni guidudy vida lóono (2 Cor. 2:7).

15. ¿Xí láani sacné looy pal radudy midid ragotzlo dool looyca? (1 Juan 3:19, 20; láaca bibiʼ retrat).

¹⁵ ¿Xí láani sacné looy par cueʼlo guiʼx nanaʼ cu laidylo? Pal rasioʼobni looy ni radudy midid ragotzlo dool looyca, goloʼ guiclo que Dios «ratudy scásiʼ» guirá ni  rony buñ (Sal. 130:4). Órni buñ rac arrepentir né guidopy xcalnabany, Jehová rony cumplir ni ma goniʼ: «Diti sasetnaladxi xcalkiébu» (Jer. 31:34). Ndeʼ radudy diitz que órni Jehová ratudy scásiʼ galkié ni bunylo, diti rasetlabu láani lólo stoib. Órni buñ rony toib galkié, radudy ló galnagan, per diti radudyni diitz que Jehová diti ma bitudy scásiʼ galkié ni rony buñ. Né pal nigoreʼ diti labúu raplo tipnés privilegios lainy congregación, diti tzoʼlo ló galrrasaʼ. Jehová ma bialadx galkié ni ma bunylo…, ¿xigony diti ronylo ngúca? (Bíil 1 Juan 3:19, 20).

16. Xomod buñ ni raxony ló toib carrera, ¿xí láani non guicaano cuidad?

¹⁶ Par gonyno gan vida non guisobno consej reʼ: «Colguixony par gonyto gan» (1 Cor. 9:24). Toib cós ni sacné lóono par labúu gonyno gan, láani ngú ganno xi cós gooyno né xi láani yaca. Ló artículo reʼ ma bisuidyno chop tzón ejemplos, per diti nosi ejemplos reʼ noʼ. Jesús goniʼ que xcalnabanyno labúu tudy midid tzoʼni ló galrrasaʼ por ni guagolúno né guegolúno né por guirá cós ni ragoʼ buñ ló galrrasaʼ (Luc. 21:34). Texto reʼ né stipnés textos ni sieed ló la Biblia sacnéni lóono par guibiʼno xi cós non guitzaʼno par guixonyno carrera ni guidudy vida lóono.

17. ¿Xigony nandxichno que sonyno gan carrera ni guidudy vida lóono?

¹⁷ Nandxichno que sonyno gan carrera ni guidudy vida lóono portín Jehová sadudy fuers lóono par gonyno láani (Is. 40:29-31). Por ngú diti guitzatzñalo láani. Góc xomod apóstol Pablo ni buny rutigoygaʼlni, par nacaʼbu premio cu (Filip. 3:13, 14). Nigolú, diti labúu guixony stipnés buñ por looy, per Jehová noʼbu puext par gacnébu looy. Sacnébu looy par sanélo guiʼx né par cueʼlo laidylo guiʼx ni diti raquiin (Sal. 68:19). Labúu guixonylo né gonylo gan carrera reʼ portín Jehová noʼ né looy.