1. ¿Xigony bioladx buñ babilonios mod góc Daniel?

 DZÚ nacsa Daniel mbioxhlas, buñ babilonios gonásyibu Daniel órni bunyibu gan ló guerr né goynéyibu Daniel sit de lidx né de xcudx. Per ná gócbu mbioxhlas buñ bibiʼ láabu. Buñ babilonios bioladx ni bibiʼ: «toib mbioxhlas nasac né móz» ni sieed de toib famil xirop (1 Sam. 16:7). Por ngú, bisuidybu Daniel par ñoʼbu lad buñxirop ni noʼ Babilonia (Dan. 1:3, 4, 6).

2. ¿Xí buny pensary Jehová de Daniel? (Ezequiel 14:14).

² Jehová gondxiʼ Daniel, per diti por ni gócbu móz o por ni gócbu buñxirop, gondxiʼbu Daniel por clas buñ ni goniiny láabu ñacbu. Nanno que gocni scú, portín órni Daniel gop midid 20 íz, Jehová bisetlaa láabu né stipnés xpiimbu ni diti bisian láabu xomod Noé né Job, ni buny xchiimbu xidal íz (Gén. 5:32; 6:9, 10; Job 42:16, 17; bíil Ezequiel 14:14). Né Jehová dipa bisiambu de gondxiʼbu Daniel, ni bibany xidzú tiemp né bibany xidal cós ni radziguiaʼ buñ (Dan. 10:11, 19).

3. ¿Xí guisuidyno ló artículo reʼ?

³ Ló artículo reʼ guisuidyno chop cualidades xtuny Daniel ni buny que nasacbu nisló Jehová. Primer cuéxano cualidades reʼ né guibiʼno ximod bislooy Daniel láani. Después guisuidyno xi cós buny Daniel par labúu gopbu cualidades reʼ. Né láaca guibiʼno ximod labúu guisuʼno láabu. Ná artículo reʼ goyaʼni par mbioxhlas guirácano labúu guisuidyno de Daniel.

4. ¿Pu ór bislooy Daniel que gop balory?

⁴ Buñ ni nap balory labúu guidzuibyibu, per diti radudyibu lagary que ngú guicaa layibu par gonyibu xinésni. Daniel góc toib mbioxhlas ni nigolú gop balory. Guibiʼno chop buelt ni bislooybu cualidad reʼ. Toibni gocni sigory chop íz después órni guirá babilonios binitló Jerusalén. Rey Nabucodonosor gop toib bacaʼal ni goloʼ láabu ló galrrasaʼ ro bibiʼbu toib estatua nasoʼdii. Después buny mandarybu guirá buñnan de Babilonia dada Daniel, par naniʼyibu xi goniʼ xcaʼalbu né xi radudyni diitz. Né pal diti ñonyibu láani ñaityibu guirácayibu (Dan. 2:3-5). Daniel non ñac naguel portín xidal buñ labúu ñaity. Por ngú «gonabbu rey nadudy tiemp láabu par nabexabu bacaʼalcu» (Dan. 2:16). Par labúu ñonybu ndeʼ biquiin ñapbu fe né balory. ¿Xigony? Portín la Biblia diti raniʼ que Daniel ma golexabu bacaʼal antes. Daniel goniné tzón ximig, Sadrac, Mesac né Abednego, b né «gonabbu biinreʼ nanabyibu xcalrronladx Dios ni noʼ guibá par nabeʼxilatbu cós ni noʼ nagach» (Dan. 2:18). Jehová cuapy oración ni bunyibu, né xcalrracnébu Daniel labúu golexa xpacaʼal rey. ¡Láabu né ximigbu diti goityibu!

5. ¿Pu stoib ór bislooy Daniel que gop balory?

⁵ Después ni golexabu bacaʼal de estatua ni nasoʼdii, Daniel cualóbu stoib galnagan ro biquiin ñapbu balory. Nabucodonosor gop toib bacaʼal nigolú nadzuiby; bibiʼbu toib yac nasoʼdii. Daniel gopbu balory né gochbu Nabucodonosor xi radudy diitz xpacaʼalbu. Goniʼbu que sanit xcalrrien Nabucodonosor né que ma diti ñacbu rey por chop tzón íz (Dan. 4:25). Nabucodonosor labúu ñony pensary que Daniel cacaló láabu né labúu ñony mandarybu ñaity Daniel, per Daniel gop balory diti bicach xitcal láabu.

6. ¿Xí láani labúu ñacnéni Daniel par labúu ñapbu balory?

⁶ ¿Xí láani labúu gocné Daniel par labúu ñapbu balory laʼga nabanybu? Desde dzú góc Daniel mbioxhlas,  bisuidybu xidal cós de ejemplo xtuny bixiosbu né xinaʼbu. Layibu bisobyibu guirá instrucciones ni bidudy Jehová guirá bixios mbiox ni goyoʼ lainy gudx Israel, né bisuidyibu Daniel Xiley Dios (Deut. 6:6-9). Daniel diti nosi bimbubu Chii Mandamientos, láaca gonbu xi clas galrro ñoo israelitas né xi yaca (Lev. 11:4-8; Dan. 1:8, 11-13). c Láaca bisuidybu guirá ni godudy xcudx Dios né gonbu xi gocyibu órni diti bisobyibu ni ná Dios (Dan. 9:10, 11). Guirá ni godudybu ló bunyni que ñanbu que guirási ór Jehová né guirá ángeles xtunybu noʼyibu cu par gacnéyibu Daniel (Dan. 2:19-24; 10:12, 18, 19).

7. ¿Xí más gocné Daniel par gopbu balory? (Láaca bibiʼ dibuj).

⁷ Daniel biaʼbu bisuidybu guirá ni bicaʼ profetas xtuny Dios, xomod Jeremías. Por ngú, bidudybu cuent que mápa mer nabiguet buñ judíos xcudx stoib (Dan. 9:2). Órni bibiʼbu ximod carebuʼ profecías, gopbu más confianz lóo Jehová. Né órni toib buñ nap xiroʼgolu confianz lóo Jehová napbu más balory (bibiʼ ni ná Romanos 8:31, 32, 37-39). Ni gocné Daniel láani ngú ni bunybu oración Bixiosbu ni noʼ guibá (Dan. 6:10). Bisetbu xcalkiébu, gochbu Jehová guirá ni gosacbu né gonabbu xcalrracnébu (Dan. 9:4, 5, 19). Xomod guiránac buñ, Daniel diti golbu né balory. Bunybu dxiin loguiaʼni par gapbu cualidad reʼ, bisuidybu, bunybu oración né gopbu confianz lóo Jehová.

8. ¿Xí láani sacné lóono par gapno balory?

⁸ Ná bixiosno né xinaʼno napyibu balory né rony animaryibu lóono par gapno láani, balory cu diti radudyni buñ; láaca noʼ ni raquiin gonyno. Balory nacni xomod toib cós ni nan buñ rony; non guisuidy buñ láani. Par labúu gantzaylo gonylo toib cós, non guicaalo cuidad mextra ni rony láani par labúu gonylo modcuca. Láaca scúca par gapno balory raquiin guicaano cuidad buñ ni nap balory né gonyno modcuca. ¿Xí ma bisuidy Daniel lóono? Que non guisuidytzayno ni ná la Biblia, gacno ximig Jehová, gonyno oración desde lainy xcalnabanyno, né gapno confianz que Jehová guirási ór sacné lóono. Pal ronyno guirá ndeʼ sapno balory órni fe xtunyno tzoʼni ló prueby.

9. ¿Xí galnasác racaʼno órni napno balory?

⁹ Ni napno balory radudyni galnasác lóono. Gonyno pensary ni gosaclóo Ben, d ni rabés Alemania. Lainy yolayscuel guirá xcompañerbu buny crer que sieelno de evolución né bunyibu pensary que guirá ni rasetlaa la Biblia mod goyaʼ guirá ni noʼ nacni toib cuent. Toibtica dzú gopbu oportunida par guiniʼbu nisló guirá xcompañerbu xigony gondxichbu que ni bisaʼ lóono ngú Dios, né goniʼbu ni ronybu crer né balory. ¿Ximod goyeeni láabu? Láabu nábu: «Xomextriya bicadiagtzaybu naʼ né bidudybu guirá xcompañera toib copia de guiich ni biquiinna par nabexaya guirá ni roni crer». ¿Xí láani buny guirá xcompañer Ben? Nábu: «Xidalyibu bicadiagyibu naʼ né goniʼyibu que radziguiaʼyibu naʼ». Ni gosaclóo Ben raslooyni que buñ ni nap balory labúu  ronyibu que stipnés gap respet layibu né ronyibu que stipnés guiniiny gan más de Jehová. Nigolú raquiin gony buñ rutirigaʼlni par gap balory.

10. ¿Xí láani ngú lealtad?

¹⁰ Ló la Biblia diitz hebreo ni rac traducir «lealtad» o «amor leal» radudyni diitz buñ ni ronladxgoluʼ saʼ. Xidal buelt diitzreʼ raquiinni órni ranino de galnadxiʼ ni nap Jehová guirá xpiin. Diitzreʼ láaca raquiinni par guidudyni diitz galnadxiʼ ni nap xpiin Dios (2 Sam. 9:6, 7). Jehová rabés que lóono láaca gacno leal láabu. Conforma dzú lealtad cu labúu gac nadipni más. Ndeʼ riendxichni ló ni godudy profeta Daniel.

11. ¿Ximod goyoʼ prueby lealtad xtuny Daniel dzú ma napbu más de 90 íz? (Bibiʼ dibuj ni rarecaa xitz guiich reʼ).

¹¹ Laʼga bibany Daniel, xidal buelt bislooybu lealtad xtunybu Jehová. Per órni ma napbu más de 90 íz, godudybu ló toib galnagandaʼ. Par ló dzúcu Babilonia goyoʼni xan xomandary medos né persas, né Darío nac rey dzúcu. Tipnés buñnan bianladxyibu Daniel né diti gopyibu respet Jehová. Biyopyibu mod par nagaityibu Daniel. Bunyibu gan que Darío ñony firma toib guiich né goloʼyibu Daniel ló toib galnagan, non nabúbu xi láani ñonybu: ñacbu leal a Dios o ñacbu leal a rey. Par naslooybu leatad xtunybu rey né par diti ñan buñ láani, nosi ni ñonybu láani ngú diti ñonybu oración ló 30 govitz. Daniel diti bisobbu ngú, por ngú buñ bisal láabu lad betz ons. Per Jehová bilaa láabu. Por ni gócbu leal cuaʼbu xcalnasác Jehová (Dan. 6:12-15, 20-22). ¿Xí sacné lóono par gacno leal xomod Daniel?

12. ¿Xí láani buny Daniel par diti ñalsitbu de Jehová?

¹² Par diti guisianno Jehová non gandxiʼno láabu né guidopy xcalnabanyno. Daniel gócbu leal Bixiosbu ni noʼ guibá, portín gondxigoluʼbu Jehová. Sigory gopbu galnadxiʼ reʼ portín bunybu pensary ló cualidades ni nap Jehová né mod bislooybu láani (Dan. 9:4). Daniel né guidopy xcalnabany bidudybu guixquix Jehová por guirá cós tzaay ni buny Jehová por láabu né por xcudxbu (Dan. 2:20-23; 9:15, 16).

13. a) ¿Xí galnagan racaló mbioxhlas ni nac cristianos? Bisetlaa toib ejemplo. (Láaca bibiʼ retrat). b) ¿Xí labúu ñaibyno toib buñ ni nanabdiitz lóono pal testigos xtuny Jehová rony apoyar mod rony buñ moxh? (Bibiʼ ló jw.org video ni laa, «El resultado de la verdadera rectitud será paz»).

 ¹³ Xomodca Daniel, mbioxhlas ni noʼ ló naareʼ, nagoo buñ layibu ni diti nap respet né ni diti rasob xcalmandary Jehová. Sigory guirá buñreʼ rabixladxyibu buñ ni nadxiʼ a Dios né dada tipnés buñreʼ labúu guikíilyibu tipnés mbioxhlas par guisianyibu Jehová. Ngú ni gosaclo Gabriel, ni rabés Australia. Dzú nacsabu mbioxhlasien cualóbu toib galnagandaʼ lainy yolayscuel. Mextra gonabdiitzbu lainy yolayscuel xi láani ñonyibu, pal toibtica de ximigbu naniʼ que nac moxh. Mextra góoch layibu que ni ñony apoyar galmox nasagaʼyibu tiplad né ni yaca nasagaʼyibu stiplad. Gabriel ná: «Nosi toib Testigo né naʼ diti gosagaʼdo niis ro gosagaʼ ni rony apoyar láani». Ni góc después nigolú goloʼni prueby lealtad ni nap Gabriel. Láabu rasetnaladxbu: «Cayatz xiroʼ ór par nalox scuel, né xcompañerdo dada xomextrado bunyibu borla né bitzaldaʼyibu lóodo. Buni dada rutigoygaʼlni naʼ par diti nacalóya layibu, né ñaabi layibu xi láani roni crer. Per diti goniiny layibu nacadiagyibu naʼ». ¿Ximod gosac Gabriel? Rabexabu láani modreʼ: «Diti bioladxi ni bitzaldaʼyibu naʼ, per goyoʼya nakit portín diti bisiana Jehová né buny defender fe xtuni».

14. ¿Xí labúu gonyno par diti guisianno Jehová?

¹⁴ Xomodca Daniel, labúu gacno leal pal ronyno rutirigaʼlni lóono par gandxiʼno Jehová né guidopy xcalnabanyno. Par diti guiañ niʼs galnadxiʼcu más, non guimbutzaayno ximod nac Jehová né toib mod ni gonyno láani, láani ngú guimbuno guirá cós ni ma bisaʼbu (Rom. 1:20). Mbioxhlas, ¿xí galrracné naplo par niʼs galnadxiʼ né respet ni rasaclo por Jehová? Ló sección ni ná, «¿Chú bisaʼ láani?» noʼ videos né artículos dop ni labúu guibiʼlo. Láaca labúu goʼolo follet ni laa, ¿Es la vida obra de un Creador? né El origen de la vida. Bibiʼ xi goniʼ toib mbioxhlas de Dinamarca ni laa Esther de guirá follet reʼ: «Rioladxi guirá ni rasetlaa follet reʼ. Diti raibyni looy ni gonylo crer, xalagary ngú radudyni prueby buñ né ma buñ gan xi láani gony crer». Ben, ni bisetlano ló párrafo gaʼ ná: «Artículos reʼ né folletos reʼ buny nadipni fe xtuni. Bislooyni naʼ que Jehová bisaʼ galnabany». Después ni guisuidylo chop follet reʼ, sioʼlo de acuerdo né ni ná Apocalipsis 4:11: «Jehová Dios xtunydo, looy ngú non gonyxiroʼdo, guisanadxdo né guicaʼlo galnadip, portín looy bisaʼlo guirá cós». e

15. ¿Xí más labúu gonyno par guidzaktzayno Jehová?

¹⁵ Stoib cós ni sacné lóono par gandxiʼno más Jehová, láani ngú guisuidyno mod bibany Xiingaʼnbu Jesús. Ndeʼ ni buny toib hermana mbioxhlas ni rabés Alemania ni laa Samira. Láabu nábu: «Bidxin bimbutzaya Jehová por mod góc Jesús». Dzú gócbu mbioxien, gosac naganbu ñembu que noʼ ni rasac Jehová, per diti gosacbu modcu né Jesús. Láabu nábu: «Bioladxi mod góc Jesús portín binladxbu mbiox né diti góc nagan ñac buñ ximigbu». Laʼga más bimbubu Jesús más bidzakbu Jehová. ¿Xigony? Samira rabexa: «Dxoga dxoga bisudi que Jesús  nac xomod Bixiosbu, portín rasuʼtzaybu Jehová. Né bidudi cuent que toibtica razón por ni bixel Jehová Xiin ló Gudxlio gocni par nimbutzaay buñ láabu» (Juan 14:9). Mbioxhlas, pal nainy looy guidzaktzaylo Jehová, ¿xigony diti ragoʼlo guiclo guimbutzaaylo Jesús? Pal ronylo láani, galnadxiʼ ni rasaclo por Jehová, né lealtad xtunylo sac nadipni.

16. ¿Xigony galán láani gac buñ leal? (Salmo 18:25; Miqueas 6:8).

¹⁶ Casi guirá ór buñ ni nac leal, radzaktzaybu más galán buñ né diti rasianyibu saʼyibu (Rut 1:14-17). Né láaca, pal dipa rasianno Jehová, sasacno sacró né lóocano. ¿Xigony? Portín rialdó xcalnabanyno ni radudybu xtiitzbu que diti sasiambu ximigbu ni diti rasian láabu (bíil Salmo 18:25; Miqueas 6:8). Ni Bisaʼ guiráxadit cós né ni nap xiroʼgolu galnadip nainy gac ximigno tipzó, ná diti rasacno. ¿Sacróyenni ja? Ni toib prueby nili xi enemigno labúu gony que ma diti labúu gacno ximigbu, nili galgoity (Dan. 12:13; Luc. 20:37, 38; Rom. 8:38, 39). Nigolú rasac guisuʼno Daniel né diti guisianno Jehová.

17, 18. ¿Xí más labúu guisuidyno de Daniel?

¹⁷ Ló artículo reʼ nosi bisuidyno de chop cualidades xtuny Daniel. Per labúu guisuidyno xidal cós mod bibanybu. Por ejemplo, Jehová buny que naniʼ xcaʼal Daniel né cuaʼbu visiones, né láaca labúu golexabu profecías. Xidal profecíascu ma góc cumplirni, né stipnésni raibyni lóono xi gac ló dzú ni sietra né saguiñani guirá buñ ni rabés ló Gudxlio.

¹⁸ Ló artículo ni sieed guisuidyno chop profecías ni sieed ló libro xtuny Daniel. Ni guientzaayno láani sacnéni lóono tanli mbioxhlas né buñgol, par cutzayno xi láani gonyno nigoreʼ. Profecías reʼ láaca sacnéni lóono gapno más balory né dipa guisianno Jehová, né modcu tzoʼno puext par guirá prueby ni mápa mer guidxin.