1. ¿Xí sacné lóono guioladxno guisuidyno profecías ni sieed ló la Biblia?

 TOIB hermano ni laa Ben ná: «Nigolú rioladxi guisudi profecías ni sieed ló la Biblia». ¿Rasaclo modcuca la? ¿O ronylo pensary que profecías nacni toib cós ni nagan guieen buñ né que raxacladx buñ láani la? Pal nacni scú, labúu guitzaʼlo mod ronylo pensary pal rientzaaylo xigony goniiny Jehová nacá profecía ló Xtiitzbu.

2. ¿Xí guisuidyno ló artículo reʼ?

² Ló artículo reʼ, guisuidyno xigony non guimbutzaayno profecías ni sieed ló la Biblia né láaca xi raquiin par guisuidyno láani. Después guisuidyno chop profecías ni sieed ló libro xtuny Daniel né guibiʼno ximod racnéni lóono nigoreʼ ni guienno ni radudyni diitz.

3. ¿Xí raquiin gonyno par guienno profecías ni sieed ló la Biblia?

³ Par guienno profecías ni sieed ló la Biblia, raquiin guinabno galrracné. Gonyno pensary ló toib ejemplo. Buny pensary que cayony visitarlo toib gudx ni diti rimbulo, per toibtica ximiglo ni rimbutzaay lagarycu rony compañer looy. Ximiglo nantzay púti noʼto né niis púti riné guirá nézcu. ¡Galán ngú ni gosaguel ximiglo ñony compañer looy! Modcuca, Jehová nantzay púti noʼno, né láaca xi gac né lóono después. Por ngú, par guienno profecías ni sieed ló la Biblia, non gacno buñdxo né guinabno xcalrracné Jehová (Dan. 2:28; 2 Ped. 1:19, 20).

4. ¿Xigony goniiny Jehová que nacá profecías ló Xtiitzbu? (Jeremías 29:11; láaca bibiʼ retrat).

⁴ Xomod bixios mbiox, Jehová nainy que tzeeni galán  xiimbu ló dzú ni sietra (bíil Jeremías 29:11). Per diti nacbu toibsi midid né bixios mbiox, portín Jehová labúu rabiʼ ni gac ló dzú ni sietra. Goniiny láabu que nacá profecías ló Xtiitzbu portín nainy láabu ganno nír ni gac (Is. 46:10). Labúu guinino que profecías nacni toib galrrascad ni Bixiosno ni noʼ lainy guibá radudy lóono né galrronladx. ¿Per xigony nandxichno que sac cumplirni?

5. ¿Xí labúu guisuidy mbioxhlas ni gosaclóo Max?

⁵ Lainy yolayscuel, mbioxhlas ni nac Testigo nagoo layibu buñ ni diti tampa rap respet la Biblia o ni diti nap respet. Ni rony o ni raniʼ guirá buñcu labúu gonyni que mbioxhlas ma diti gony crer ni rony crer. Ganno ni gosaclóo toib hermano ni laa Max. Láabu nábu: «Dzú góca mbioxhlas buni pensary pal religión ni casuidy bixiosa né xinaʼya naʼ nacni ni nigolú né pal la Biblia sieedni de Dios». ¿Xí láani buny bixiosbu né xinábu? Max ná: «Goona que goyoʼyibu ló galrrasaʼ per diti bireʼganyibu». Bixiosbu né xinaʼbu biquiinyibu la Biblia par cuapyibu guirá galrranabdiitz ni gopbu. Né láaca noʼ ni buny Max. Láabu nábu: «Bisudi guirá profecías ni sieed ló la Biblia, né goodxi ni bisudi a stipnés mbioxhlas de congregación xtuni». ¿Ximod goyeeni láabu? Max ná: «Después ni buni ngú, gondxichi que la Biblia sieedni de Dios».

6. ¿Xí láani non gonyno pal napno dudas, né xigony?

⁶ ¿Né pal modca Max, rasaló ronylo pensary pal la Biblia raniʼ ni nigolú ga? Diti guigotzlo dool looyca, per láaca noʼ ni non gonylo. Dudas nacni xomod tuny, pal toib cós ni rasac rastunyni né diti ronyno xitcal par cueʼno láani, saxinni. ¿Ximod labúu cueʼlo «tuny» ló fe xtunylo? Primer gonabdiitz ndeʼ looy: «¿Roni crer ni rasetlaa la Biblia xí láani gac ló dzú ni sietra la?». Pal diti ronylo crer láani, raquiin guisuidylo profecías ni ma góc cumplir. ¿Xí láani sacné looy?

7. ¿Xí láani gocné Daniel par bisuidybu profecías? (Daniel 12:10; láaca bibiʼ retrat).

⁷ Par guisuidyno profecías, galán láani guibinoʼ ejemplo xtuny Daniel. Láabu bisuidybu láani por toib razón tzaay: goniiny láabu ñanbu ni nigolú. Láaca gocnéni láabu ni gócbu buñdxo. Gonbu que Jehová radudy galnan buñ ni rimbu né rasob ni nábu (Dan. 2:27, 28; bíil Daniel 12:10). Daniel bislooy que gócbu buñdxo, órni biyopybu xcalrracné Jehová (Dan. 2:18). Láaca nanoy bisuidybu la Biblia. Bisuidytzaybu guirá guiich ni goyoʼ ló xtzúbu (Jer. 25:11, 12; Dan. 9:2). ¿Ximod labúu guisuʼno mod buny Daniel?

8. ¿Xigony tipnés buñ rasuidy profecías ni sieed ló la Biblia, per xí láani non gonyno lóono?

⁸ Buny pensary xigony ronylo láani. ¿Xigony rasuidylo profecías ni sieed ló la Biblia? ¿Nacni portín nainy looy guimbulo ni nigolú la? Pal nacni scú, Jehová sacné looy (Juan 4:23, 24; 14:16, 17). Per noʼ  tipnés buñ ni rasuidy la Biblia por stipnés razón. Nainy guidzelyibu prueby ni guislooy que diti sieedni de Dios. Rayopyibu mod guidzelyibu cós ni guicaʼyibu diitz par cuuyibu xi láani ngú cós tzaay né xi láani ngú cós mal né modcu gonyibu ni nainy xcalnabanyibu. Per órni guisuidyno profecías ni sieed ló la Biblia, non gonyno láani por toib razón tzaay. Né láaca par guienno láani, raquiinno toib cualidad ni rasac.

9. ¿Xí cualidad raquiinno par guienno profecías ni sieed ló la Biblia, né xigony?

⁹ Góc buñdxo. Jehová radudybu xtiitzbu gacnébu buñdxo (Sant. 4:6). Por ngú, pal nainy lóono guienno profecías xtuny la Biblia, non guinabno xcalrracné Jehová. Pal nacno buñdxo láaca sacacuentno xcalrracné mós ni rony xinésni, portín Jehová raquiin layibu par guidudyibu galrro espiritual xorpani (Luc. 12:42). Jehová diti cuensósi ronybu xchiimbu, por ngú raquiimbu toibsi mod par gacnébu lóono guienno profecías ni sieed ló la Biblia (1 Cor. 14:33; Efes. 4:4-6).

10. ¿Xí rasuidyni looy ni gosaclóo Esther?

¹⁰ Nanoy bisuidy ni ná la Biblia. Buny pensary ló toib profecía ni rioladxlo né bisuidy láani. Ngú ni buny toib hermana ni laa Esther. Láabu bioladxbu profecías ro ritlaa pu dzú nadxin Mesías. Nábu: «Dzú gopa 15 íz, goniiny naʼ ñaana stipnaʼca pal profecíascu cuáni antes ni ñeed Jesús ló Gudxlio». ¿Xí láani bunybu? Bíilbu Rollos xtuny mar Muerto, né ni gonbu bunyni que ma diti ñonybu pensary pal nigolú ni ná la Biblia o yaca. Esther ná: «Tipnés rollos cu cuáni antes de xtzú Jesús. Por ngú, profecías ni sieed loni, non ñeedni de Dios». Láabu nábu: «Goyoʼ tipnés cós ni biila chop tzón buelt par bienna láani». Ná scú, rasacbu que ni bunybu rutigoygaʼlni láabu birebuʼni. Láabu rasetlabu ximod gosacbu después ni nanoy bisuidybu profecías: «Bientzaaya que ni ná la Biblia nacni nigolú, né goona láani por stipnaʼca».

11. ¿Ximod racnéni lóono que ni raniʼ la Biblia nacni ni nigolú?

¹¹ Órni randxichno ximod ma góc cumplir tipnés profecías ni sieed ló la Biblia, confianz ni napno lóo Jehová né guirá instrucciones ni radudybu lóono diti ranitlóni. Láaca profecías ni sieed ló la Biblia racnéni lóono par diti guisnitno esperanza né tzoʼno sacró gac nitisi gac. Nigoreʼ guisuidyno chop profecías ni sieed ló libro xtuny Daniel ni cayac cumplir ló naareʼ. Ni guienno xi radudyni diitz sacnéni lóono par cutzayno xi láani gonyno.

12. ¿Xí radudy diitz ñeʼ estatua ni nac de «hierro ni biotz né been»? (Daniel 2:41-43).

¹² (Bíil Daniel 2:41-43). Rey Nabucodonosor goniʼ xcaʼal de toib estatua ni nac de «hierro né ni notz ben». Órni rony compararno profecías reʼ né stipnés profecias xtuny Daniel né libro xtuny Apocalipsis,  ranno que ñeʼ estatua reʼ radudyni diitz gobierno xtuny Estados Unidos né Reino Unido, ni nac toib potencia ni nap xiroʼ galnadip ló xtzúno. Órni Daniel gochbu Nabucodonosor xi radudy diitz xcaʼalbu, goniʼbu ndeʼ de potencia mundial: «Sioʼ ór gobierno reʼ sac nadipni né sioʼ ór yaca». ¿Xigony sioʼ ór diti sac nadipni? Portín gudx de potencia reʼ ni nac xomod been diti radudy lagary layibu gonyibu ni racladxyibu. b

13. ¿Xí galnigolú ni rasac racné lóono guienno profecía reʼ?

¹³ Ni rasetlaa Daniel de estatua de bacaʼalcu né máspa de ñeʼbu racnéni lóono guienno xidal galnigolú ni rasac. Primer, potencia mundial de Estados Unidos né Reino Unido ma bislooyni que nadipni. Por ejemplo, bunyibu gan ló Primera né Segunda Guerra Mundial. Per potencia reʼ casnityibu xcalnadipyibu né sasnitrayibu láani por guirá galrradíil ni noʼ lad xpiinyibu. Ni rarop, ndeʼ sac última potencia mundial ni sioʼ antes que Gobierno xtuny Dios guinitló guirá gobierno ni noʼ ló Gudxlio. Ná sioʼ ór stipnés gudx sacaló láani, diti labúu tzoʼyibu xalagaryni. Nanno láani portín mod ná profecía «guiee», ni radudy diitz Gobierno xtuny Dios, sanitlóni ñeʼ estatua cu (Dan. 2:34, 35, 44, 45).

14. ¿Xigony ni guienno profecía ni rasetlaa de ñeʼ estatua cu ni nac de hierro né ni notz been racné lóono cuuno galán xí láani gonyno?

¹⁴ ¿Nandxichlo que ni goniʼ Daniel de ñeʼ estatua cu nigolúni la? Pal nacni scú sienni mod nabanylo. Por ejemplo, diti sayopylo bidxiich ló toib gudxliogox ni mápa mer guinitló (Luc. 12:16-21; 1 Juan 2:15-17). Láaca ni guienlo profecía reʼ, sacnéni looy par gony predicarlo né guisuidylo buñ ni ná Dios (Mat. 6:33; 28:18-20). Por ngú, nigoreʼ ni ma bisuidyno profecía reʼ, galán láani guinabdiitzlo looyca: «¿Raslooy ni ragoʼya guica que nandxichi que Gobierno xtuny Dios mápa mer guinitló guirá gobiernos ni noʼ ló Gudxlio la?».

15. ¿Chú layibu nac ló naareʼ «rey del norte» né «rey del sur»? (Daniel 11:40).

¹⁵ (Bíil Daniel 11:40). Capítulo 11 de libro xtuny Daniel rasetlaa de chop reyes o gobiernos ni racalsaʼ par gony mandary ló buñgudxlio. Órni rony compararno profecía reʼ né stipnés profecías ni sieed ló la Biblia, ranno que ló naareʼ «rey del norte» nacni Rusia né stipnés gudx ni noʼ né láabu, né «rey del sur» nac potencia mundial de Estados Unidos né Reino Unido. c

16. ¿Xí galnagan racaló xpiin Dios ni nabany lagary ro rony mandary «rey del norte»?

¹⁶ «Rey del norte» nigolú canalbu xpiin Dios ni rabés ro rony mandarybu. Raguinyibu o ragoʼyibu tipnés Testigos lachquiip por ni ronyibu crer lóo Dios. Per xhermanno diti radudyibu lagary que «rey del norte» guitzuiby layibu. Xalagary ngú, nigoreʼ fe xtunyibu nacni más nadip. ¿Xigony? Portín nanyibu que ni cacanal gobierno reʼ layibu nacni toib profecía ni bicaʼ Daniel (Dan. 11:41). d Ni ganno ximod cayac cumplir profecía reʼ  láaca sacnéni lóono par diti guisnitno esperanza né dipa guisianno Jehová.

17. ¿Xí galnagan ma cualó xpiin Dios lagary ro rony mandary «rey del sur»?

¹⁷ Ló dzú ni see rey del sur láaca cualó xcudx Jehová. Por ejemplo, ló siglo veinte goloʼyibu xidal Testigos né goleʼyibu de scuel xidal mbiox portín gosagaʼ galayibu. Per ló ndeʼga, lealtad ni nap xpiin Jehová a Gobierno xtuny Dios rioʼni ló prueby de stipnés mod. Por ejemplo, órni rioʼ votación, toib Testigo labúu guiniiny láabu gony apoyarbu toib partido político o toib candidato. Ná diti tzeebu tzaguny votarbu, labúu gonybu pensary o guiniiny lainy xcalnabanybu chú láabu gony gan. Per par labúu guisagaʼ galayno, diti nosi non gapno cuidad né ni ronyno, láaca rasac gapno cuidad né ni ronyno pensary o né ni rasacno (Juan 15:18, 19; 18:36).

18. ¿Xí rasacno órni rabiʼno ximod racalsaʼ gobiernos reʼ? (Láaca bibiʼ retrat).

¹⁸ Buñ ni diti nap fe ló profecías ni  sieed ló la Biblia, labúu tzogoluʼyibu ló galrrasaʼ órni rabiʼyibu que «rey del sur» caguin «dxitguic» né «rey del norte» (Dan. 11:40, nota). Né guirá guip né bombas ni nap reyes reʼ labúu nanitlóyibu guidopynac Gudxlio. Per nanno que Jehová diti sadudy lagary que gacni modcu (Is. 45:18). Por ngú, diti rioʼno ló galrrasaʼ nili radzuibyno. Xalagary ngú, órni rabiʼno galrradíil ni napyibu, fe xtunyno racni más nadip, portín ngú raslooy que mápa mer guinitló gudxliogoxreʼ.

19. ¿Xí láani non ganno de profecías ni sieed ló la Biblia?

¹⁹ Diti nanno ximod gac cumplir tipnés profecías ni sieed ló la Biblia. Nili Daniel gonbu xi bidudy diitz guirá profecías ni bicaʼbu (Dan. 12:8, 9). Per ni diti rienno ximod gac cumplir toib profecía diti radudyni diitz que diti sac cumplirni. Nandxichno que Jehová saibybu lóono ni non ganno xorpani, xomodca bunybu láani ló dzú ni see (Amós 3:7).

20. ¿Xí profecías ni radziguiaʼ buñ mápa mer gac cumplir, né xí raquiin gonyrano?

²⁰ Gudxrop saniʼ que ma noʼ «¡Paz né seguridad!» (1 Tes. 5:3). Órcu gobiernos xtuny gudxliogoxreʼ sacalóyibu né sanitlóyibu guirá religión falz (Apoc. 17:16, 17). Después sacalóyibu xcudx Dios (Ezeq. 38:18, 19). Né órcu guisaló Armagedón (Apoc. 16:14, 16). Nandxichno que guirá ndeʼ mápa mer sac cumplir. Laʼga gac guirá ndeʼ, guislooyno que radudyno guixquix a Bixiosno Jehová ni noʼ guibá né guibiʼno ximod rac cumplir guirá profecías reʼ, né gacnéno stipnés par gony modcuca.