• «Gocni xomod guirási ór nascú tzeʼela naʼ».

• «Bitudy natoybu naʼ, gosaca que feo naʼca, né diti noʼ pu rasaca».

• «Nigolú bioʼobni naʼ. Diti labúu goodxi buñ ni casacloya».

• «Dada buni pensary que Jehová diti rioʼ galrrasaʼ por naʼ».

Guirá diitzreʼ raslooytzayni balaati rioʼob xcalnabany toib buñgonaʼ órni tzeelbu rabiʼ pornografía. Né, pal tzeelbu rony láani nagach, pentzi por xidal beʼo o dada xidal íz, buñgonaʼ labúu guisacbu que ma dipa labúu gapbu confianz ló tzeelbu stoib. Toib buñgonaʼ goniʼ: «Tiptisi bisaca que diti rimbuya tzeʼela. Gonabdiidza naʼca xi más cacachbu».

¿Ma biab tzeʼelo ló tramp xtuny pornografía la? a Ártículo reʼ goyaʼni par herman buñgonaʼ xomod looy. Reʼ guisuidyno tipnés principios ni sieed ló la Biblia ni sasialdó looy, saibyni looy que Jehová noʼ né looy né sacnéni looy par tzoʼlo sacró tanli ló sentido emocional né espiritual. b

Nigolú láani, looy diti labúu guicaalo ló guirá ni rony tzeʼelo, per noʼ ni labúu gonylo par guisaclo sacró né looyca. Reʼ noʼ tipnés cós ni labúu gonylo.

Diti guigotzlo dool looyca. Toib buñgonaʼ labúu guisac que láabu láaca napbu dool por ni tzeelbu rabiʼ pornografía. Por ejemplo, Alice c buny pensary que láabu diti raquiimbu xomod buñgonaʼ né gonabdiitzbu láacabu: «¿Xigony tzeʼela más rioladxbu guibiʼbu stipnés buñgonaʼ xalagary guibiʼbu naʼ?». Tipnés buñgonaʼ ragotzyibu dool láacayibu por mod ronyibu, ronyibu pensary que cayonyxiroʼyibu láani. Daniela ná: «Nigolú godó xian naʼ, por ni tzeʼela bibiʼ pornografía. Goyoʼya nabann né bidzutzi, né gosaca que xtola goyoʼ galnagan lainy xcaltzeela por mod ni roni».

Pal rasaclo modcuca, bisetnaladx que Jehová diti ragotz dool looy por ni cayony tzeʼelo. Santiago 1:14 ná: «Tigaaga buñ radudy ló prueby, órni  raniiny gonybu ni raniiny beʼel laidybu» (Rom. 14:12; Filip. 2:12). Por ngú, Jehová diti ragotz dool looy. Xalagary ngú, rasaclo par Jehová portín diti rasianlo láabu (2 Crón. 16:9).

Ni tzeʼelo rabiʼ pornografía diti radudyni diitz que diti raquiinlo xomod buñgonaʼ. Ni guienlo ndeʼ, nigolú sacnéni looy. Buñnan ná que pornografía ronyni que buñ ni rabiʼ láani guiniiny né gap fantasías sexuales que ni toib buñgonaʼ labúu gony que tzoʼ nakityibu.

Buny por diti tudy midid gonylo pensary loni. Catherine ná que dzúna gueʼel bunybu pensary ló galnagan ni gop tzeelbu né pornografía. Diti labúu goleʼxiguicbu láani. Frances ná: «Guirá ór ni diti naana púti noʼ tzeʼela, nigolú ragoʼni naʼ ló galrrasaʼ. Diti rasaca sacró ló guidopynac dzú». Stipnés buñgonaʼ ni nap tzeʼel náyibu que radudyibu ló galnatoy órni noʼyibu né stipnés herman ni sigory nan galnagan ni cadudy tzeelbu ni nac buñguieeu. Né stipnésyibu ná que rasacyibu que noʼyibu toibyibu portín ronyibu pensary que diti noʼ chú rien ni cadudyibu ló.

Wal rasac buñ modcu, per pal nigolú ronylo pensary ló galnagancu, nosi sastopyni looy. Más galán, goloʼ guiclo mod radzaklo Jehová, portín ngú sadudy fuers looy par diti guireʼganlo (Sal. 62:2; Efes. 6:10).

¿Ximod labúu gacnéni looy ni goʼolo la Biblia né gonylo pensary loni? Ló la Biblia sieed historias xtuny buñgonaʼ ni godudy ló galrrioʼob rodann né gosac más sacró órni gochyibu Jehová ni noʼ lainy xcalnabanyibu. Ná diti guirá ór goleʼ Jehová xcalnaganyibu, bunybu que gosacyibu sacró né láacayibu. Buny pensary ni gosaclóo Ana, órni «nigolú cayoʼob xcalnabanybu». Láabu «xiroʼ ór goninébu Jehová» né gosacbu sacró, ná diti gonbu ximod narecaabu (1 Sam. 1:10, 12, 18; 2 Cor. 1:3, 4).

Gonab xcalrracné ancianos de congregación xtunylo. Layibu sacyibu «xomod toib ni racaa buroʼ né ni racaa guieebu» (Is. 32:2). Labúu gony recomendaryibu looy toib hermana ni guisialdó looy, ni labúu gaplo confianz né gaibylo ni cadudylo ló (Prov. 17:17).

Pentzi ranabdiitzlo looyca pal labúu gacnélo tzeʼelo guisian de guibiʼbu pornografía. Labúu gonylo láani. La Biblia ná, que órni gony reglar buñ toib galnagan o par gonybu gan toib enemig,  «más galán ngú chop buñ que toib» (Ecl. 4:9-12). Noʼ estudios ni raslooy que diti tampa nagan guisian buñ de guibiʼ pornografía né gapyibu confianz lainy xcaltzeelyibu stoib pal guiropcayibu ronyibu dxiin loguiaʼni.

Toib cós ni rasac ganlo, láani ngú pal tzeʼelo nigolú nainy guisian de guibiʼ pornografía, né pal ma goloʼbu guicbu gonybu rutirigaʼlni láabu par gonybu láani. ¿Nanlo pal ma gonabbu Jehová guidudy fuers láabu, né pal ma biyopybu xcalrracné ancianos la? (2 Cor. 4:7; Sant. 5:14, 15). ¿Ma buny tzeʼelo alga par guixonybu de riesga cu la? Por ejemplo, ¿ma diti tampa raquiimbu teléfono o tableta, né rabeʼbu tiplad cós ni labúu gony que tzaguiabbu loni stoib la? (Prov. 27:12). ¿Rasaguelbu guicacuentbu xcalrracnélo né gaibybu looy ni nigolú la? Pal scú nacni, sigory labúu gacnélo láabu.

¿Per ximod gonylo láani? Bibiʼ ni rony Felicia. Láabu bitzñabu né Ethan, ni bibiʼ pornografía desde dzú góc mbiox. Felicia rony rutirigaʼlni láabu par diti gac nagan par tzeelbu guininé láabu órni gapbu gan guibiʼbu pornografía stoib. Ethan rabexa láani modreʼ: «Labúu raabi tzeʼela guiráxadit cós ni rasacloya. Láabu ronladxbu naʼ, né racnébu naʼ par diti tzaguiaba ló tentación. Né racaabu cuidad naʼ par guibiʼbu ximod seeni naʼ. Láaca racnébu naʼ órni raquiinna internet». Rioʼobni Felicia órni rabiʼbu que tzeelbu rioladx guibiʼ pornografía. Per láabu nábu: «Ná cadzutzi né rioʼobni naʼ, naana que ni rasaca modreʼ diti sacnéni láabu par guisiambu de guibiʼbu pornografía. Por ngú, primer rooydo diitz ni rasaclobu, de ngú rooydo diitz mod rasaca».

Órni galtzeʼel rooy de clas diitzreʼ racnéni ni nac buñguieeu par diti guibiʼ pornografía. Per láaca racnéni buñgonaʼ gap confianz ló tzeelbu stoib. Órni toib buñguieeu diti racachbu tzeelbu xi debilidad napbu, xi ronybu o púti goyoʼbu, tzeelbu ma diti rony pensary stoib cós.

¿Labúu gonylo modcuca par gacnélo tzeʼelo la? Pal rabiʼlo que labúu gonylo láani, toib mod ni labúu gonylo láani, labúu goʼolto né guisuidyto toibsi artículo reʼ. ¿Xí non guiniiny tzeʼelo gony? Guisiambu de guibiʼbu pornografía né gonybu que gaplo confianz láabu stoib. Xalagary guidzuitzbu portín nainy guiniʼlo de tema reʼ, non gonybu rutirigaʼlni láabu par guiembu ximod ni ronybu raguiñani looy. ¿Né looy ga? ¿Xí cós non guiniiny gonylo? Gacnélo láabu ló xcalnaganbu né guidudylo oportunida láabu par gonybu que gaplo confianz lóbu stoib. Nigolú rasac que guiropcato ganto xi láani rony que buñ guibiʼ pornografía né xi labúu gac par guisian buñ vis cu. d

 Pal ronylo crer que sac naganni par lóoto guiniʼto de tema reʼ sin guidzuitzto, buny pensary que labúu tzoʼ toib anciano né lóoto chop tzón buelt órni gooyto xtiitzni. Pal gonyto láani, golú toib anciano ni guiropcato radzakto sacró. Bisetnaladx, ná tzeʼelo labúu rasian de guibiʼ pornografía, sigory looy saquiinlo más tiemp par labúu gaplo confianz láabu stoib. Diti guireʼganlo. Bibiʼ xi cós ma galán cayonybu lainy xcaltzeelto. Diti guisnitlo esperanza que né tiemp né paseins xcaltzeelo labúu gac dxichni stoib (Ecl. 7:8; 1 Cor. 13:4).

Pal tzeʼelo riabbu loni stoib, ¿radudyni diitz que diti rac arrepentirbu o que dipa labúu sonybu gan galnagancu la? Yaca. Né máspa pal ma nacni toib vis, sigory sacalóbu galnagan reʼ laʼga nabanybu. Labúu guiabbu loni stoib ná ma xidzú tiemp diti rabiʼbu pornografía. Par diti tzaguiabbu loni stoib, saquiin gonybu stipnés cós né gonyrabu láani ná ralooyni ma bunybu gan galnagancu (Prov. 28:14; Mat. 5:29; 1 Cor. 10:12). Non guitzaʼbu mod ronybu pensary né guisuidybu guianladxbu «cós mal»; ladni noʼ pornografía né nitisi cós buidy xomod ni kit buñ ro nac buñgonaʼ o ro nac buñguieeu (Efes. 4:23; Sal. 97:10; Rom. 12:9). ¿Sasaguelo gonylo guirá ndeʼ la? Pal scú láani, noʼra esperanza. e

¿Né pal tzeʼelo diti nainy gony xitcal par guisiambu de guibiʼbu pornografía ga? Pal scú nacni, labúu guioʼobni looy né guisaclo que cascúbu looy né guidzuitzlo. Góoch Jehová guirá galrrasaʼ ni noʼlo ló, né ndeʼ sacné looy par guisaclo sacró né looyca. (1 Ped. 5:7). Bisuidyra Xtiitz Dios, buny pensary loni né bunyra oración par guibigaxlo más ronoʼ Jehová, né sabiʼlo que láabu sabigaxbu más ro noʼlo. «Jehová noʼ gaxtiguié de buñ ni cayoʼob xcalnabany» né nainy láabu que buñ guibaladx stoib (Sal. 34:18). Buny rutirigaʼlni looy par gaclo toib galán xpiin Dios, biyopy xcalrracné ancianos né diti guisnitlo esperanza que tzeʼelo labúu guitzaʼ mod nac ló dzú ni sietra (Rom. 2:4; 2 Ped. 3:9).