1. ¿Xí raniiny Jehová?

 JEHOVÁ bisaʼ buñgudxlio par cúyibu xi láani gonyibu. Guirá dzú raquiinno galrrascadcu órni ragoʼno guicno gonyno toib cós. Toibtica cós ni más rasac ni non coʼ buñ guic gony, láani ngú gac dedicarbu Jehová, né tzoʼbu lad xfamilbu. Né, Jehová raniiny que guiránac buñ coʼ guic gony ngú. ¿Xigony? Portín nadxiʼbu buñ né nainy láabu tzoʼ buñ sacró. Nainy láabu gac buñ ximigbu né guibany tipzó (Deut. 30:19, 20; Gál. 6:7, 8).

 2. ¿Xí nainy Jehová gony ni ma buny galkié rodann né yása gac arrepentir? (1 Juan 2:1).

² Jehová diti rony lafuersbu buñ par gony xchiimbu, xalagary ngú, raduʼdybu lagary que tigaaga buñ gan xi láani gony. Per, ¿xí rac pal toib cristiano ni ma goyonis rony toib galkié rodann? Pal diti rac arrepentirbu la, non guireʼbu lainy congregación (1 Cor. 5:13). Per, ná gacni scú, Jehová raniiny né guidopy xcalnabany que buñcu guibiguet ronoʼbu. Toibtica razón por ni bixelbu Xiimbu goity por buñ, láani ngú par labúu natuʼdybu scásiʼ xcalkié buñ ni rac arrepentir (bíil 1 Juan 2:1). Dios xtunyno nigolú ronladxbu buñ, por ngú, racnébu né rony animarbu buñ gac arrepentir de xcalkié (Zac. 1:3; Rom. 2:4; Sant. 4:8).

 3. ¿Xí guisuidyno ló artículo reʼ?

³ Jehová nainy guisuʼno mod rabiʼbu galkié, né mod rabiʼbu buñ ni rony toib galkié rodann. Artículo reʼ sacnéni  lóono par labúu gonyno láani. Primer, guibiʼno ximod góc reglar toib galkié rodann ni goyoʼ lainy congregación xtuny Corinto ló siglo primero. Después sasuidyno instrucciones ni biduʼdy apóstol Pablo órni buñguieeu ni buny galkié rodann cu góc arrepentir. Né, último, sanino ximod rabiʼ Jehová buñ ni rony toib galkié rodann.

¿XIMOD GÓC REGLAR TOIB GALKIÉ RODANN NI GOYOʼ LÓ SIGLO PRIMERO?

 4. ¿Xí góc lainy congregación xtuny Corinto? (1 Corintios 5:1, 2).

⁴ (Bíil 1 Corintios 5:1, 2). Ló ni rion viaj ni buny apóstol Pablo, gonbu de toib galkié rodann ni cayac lainy toib congregación ni pénsa goyaʼ lainy gudx Corinto: toib cristiano gotnébu buñgonaʼ ni rabesné bixiosbu. Pablo goniʼ que ngú góc «toib galyoxh ni nili buñ ni diti rony crer lóo Dios rony». Congregación diti nosi cuacuent mod bunybu, láaca gosacxiroʼyibu por galkiécu. Pentzi tipnés buny pensary que ngú bislooyni balaati ronladx né rien Jehová buñ ni rony toib galkié rodann. Per Jehová diti raduʼdy lagary tzoʼ galkié lainy xcudxbu. Buñguieeu reʼ buny buidybu laa congregación por mod ni bunybu. Né láaca labúu ñonybu que stipnés cristianos ni noʼ lainy congregación ñony xomod láabu. Por ngú, ¿xí instrucciones biduʼdy Pablo a guirá herman de gudx Corinto?

 5. ¿Xí bicaʼ Pablo par congregación, né xí goniiny naduʼdybu diitz? (1 Corintios 5:13; láaca bibiʼ dibuj).

⁵ (Bíil 1 Corintios 5:13). Pablo bicaʼ né xcalrracné Dios que non nabeʼyibu lainy congregación buñguieeucu ni diti góc arrepentir. ¿Ximod non ñony congregación né láabu? Pablo góoch layibu que ma diti nadzakyibu nili ñooyibu toibsi né buñguieeucu (1 Cor. 5:11). Órni roono né toib buñ, ngú riné lóono par gooyno diitz né tudyno tiemp né láabu. Por ngú Pablo biduʼdybu diitz que guirá herman diti non nadzakyibu buñguieeucu. Modcu, diti nacá cós mal ni bunybu stipnés herman ni noʼ lainy congregación (1 Cor. 5:5-7). Né láaca, ngú labúu ñony que buñguieeucu naduʼdy cuent que bisioʼobbu Jehová, natoybu por ni bunybu né ngú nachiin láabu par ñac arrepentirbu.

 6. ¿Ximod gocné guiich ni bicaʼ Pablo congregación né buñguieeu ni bunyca galkié?

⁶ Después ni apóstol Pablo bixel guiich  lóo congregación xtuny Corinto, Pablo gosaló gonabdiitzbu láacabu, ximod nacacuent herman láani. Diti xidzú después, Tito biduʼdybu toib notísy sacróyen Pablo: herman de Corinto, sacró cuacuent xquiich Pablo né bisobyibu instrucciones ni biduʼdy apóstol reʼ layibu (2 Cor. 7:6, 7). Né láaca, después ni bixel Pablo xquiich, buñguieeucu góc arrepentir. Bitzaʼbu mod bunybu né xpensarybu né gosaló bisobbu ni rony mandary Jehová (2 Cor. 7:8-11). ¿Xí instrucciones naduʼdy Pablo congregación nigoreʼ?

¿XIMOD NON ÑONY CONGREGACIÓN NÉ TOIB BUÑ NI MA GÓC ARREPENTIR DE XCALKIÉ?

 7. ¿Xí láani labúu góc por ni bireʼ buñguieeucu lainy congregación? (2 Corintios 2:5-8).

⁷ (Bíil 2 Corintios 2:5-8). Pablo goniʼ: «Buñguieeucu ma cuaʼbu disciplina ni biduʼdyto láabu». Ló stoib diitz,  disciplina ni cuaʼ buñreʼ bunyni xchiinni: goynéni buñguieeu reʼ ñac arrepentir (Heb. 12:11).

 8. ¿Xí láani góoch Pablo congregación después?

⁸ Nigoreʼ, Pablo góoch layibu xi láani non ñonyibu né hermano ni buny galkiécu: «Né galrronladx colguitudy scásiʼ ni bunybu né colguisialdó xcalnabanybu». Láaca goniʼbu: «Raduʼdi consej reʼ lóoto: colguislooy que nadxiʼto láabu». Mod rabiʼno, Pablo diti nosi gochbu herman, naduʼdyibu lagary nabiguet buñguieeucu lainy congregación, láaca non naslooyibu né xtiitzyibu né mod ronyibu que nigolúpa bituʼdyibu scásiʼ ni bunybu né que ronladxyibu buñguieeu reʼ. Modcu, buñguieeucu ni ma góc arrepentir nasac que herman bibaladx ni bibiguetbu lainy congregación.

 9. ¿Xigony tipnés cristianos gosac naganyibu natuʼdyibu scásiʼ ni buny buñguieeucu ni ma góc arrepentir?

⁹ ¿Gosac nagan tipnés herman nacacuent buñguieeucu ni ma góc arrepentir la? La Biblia diti raniʼ láani, per sigory gosac naganyibu láani. Portín, ni bunybu, buny buidyni laa congregación, né pentzi bunynaani tipnés herman. Sigory tipnés buny pensary que diti xinésni nacacuent herman né xiroʼ galrronladx buñguieeucu ni buny galkié rodann, órni layibu bunyibu rutigoygaʼlni layibu par nasobyibu ni ná Jehová (bitzak láani né Lucas 15:28-30). Per ¿xigony nigolú gosac que naslooyibu galnadxiʼ hermano reʼ ni ma bibiguet lainy congregación?

10, 11. Pal ancianos diti nasaguel natuʼdy scásiʼ ni buny buñguieeucu ni ma góc arrepentir, ¿xí labúu ñac?

¹⁰ ¿Xí labúu ñac pal ancianos diti naduʼdyibu lagary nabiguetbu lainy congregación stoib después ni ma góc arrepentirbu o pal herman diti nagobioo láabu né galrronladx? Buñguieeu ni buny galkié rodann reʼ ni ma góc arrepentir labúu nagaiby «galnabann láabu». Labúu ñonybu pensary que ma diti noʼ pu raquiimbu o ma diti ñonybu rutirigaʼlni láabu par ñacbu ximig Jehová stoib.

¹¹ Né diti ngúsi. Pal herman ni noʼ lainy congregación diti nasaguel natuʼdy scásiʼ xcalkié buñcu ni ma góc arrepentir, mod radzakyibu Dios, ñoʼni ló riesga. ¿Xigony? Portín diti naslooyibu mod nac Jehová —láabu rioʼbu puext guituʼdybu scásiʼ xcalkié buñ ni rac arrepentir— xalagary nasuʼyibu Jehová, naslooyibu mod nac Buñdzab, ni diti ronladx stipnés né nac mal. Buñdzab labúu naquiin layibu par nachich fe xtuny buñguieeu reʼ (2 Cor. 2:10, 11; Efes. 4:27).

12. ¿Ximod labúu nasuʼ congregación mod nac Jehová?

¹² Por ngú, ¿ximod nasuʼ congregación xtuny Corinto mod nac Jehová né diti mod nac Buñdzab? Nacacuentyibu sacró toib buñ ni rac arrepentir, mod racacuent Jehová láabu. Guibiʼno xi goniʼ tipnés ni bicaʼ la Biblia de Dios. David góoch láabu: «Natzaaylo né puext noʼlo par guitudylo galkié scásiʼ» (Sal. 86:5). Miqueas bicaʼ: «¿Chú nac toib Dios xomod looy, ni ratuʼdy scásiʼ xcalkié buñ [...]?» (Miq. 7:18). Né láaca Isaías goniʼ: «Buñ ni diti rony xinésni guisiambu cós mal ni ronybu né buñ mal guisiambu ni ronybu pensary; guibiguetbu ronoʼ Jehová, ni sonladx láabu, guibiguetbu ronoʼ Dios xtunyno, ni satudy scásiʼ galkié ni bunybu» (Is. 55:7).

13. ¿Xigony láani ngú ni góc readmitir buñguieuucu? (Bibiʼ cuadriyen ni laa « ¿Pu dzú góc readmitir buñguieeu de Corinto?»).

 ¹³ Par nasuʼyibu Jehová, congregación xtuny Corinto non nacacuent né guidopy xcalnabany buñguieeu ni góc arrepentir né naslooy balaati nadxiʼyibu buñguieeucu. Pablo goniʼ que pal natuʼdyibu scásiʼ xcalkié buñguieeucu ni ma góc arrepentir, naslooyibu que rasobyibu guirá cós (2 Cor. 2:9). Nigolú, chop tzónsi beʼo godudy de goló goleʼyibu buñguieeu reʼ lainy congregación, per disciplina ni cuaʼbu, bichiinni láabu par góc arrepentirbu. Por ngú, diti goyoʼ ni toib razón par naclá ñony readmitir ancianos láabu.

¿XÍ RASUIDYNO DE JUSTICIA NÉ XCALRRONLADX JEHOVÁ?

14, 15. ¿Xí rasuidyno mod góc reglar galkié rodann ni goyoʼ lainy congregación xtuny Corinto? (2 Pedro 3:9; láaca bibiʼ dibuj).

¹⁴ Jehová buny que nacá ló Xtiitzbu «par guisuidyni lóono», mod góc reglar galkié reʼ lainy congregación xtuny Corinto (Rom. 15:4). Ndeʼ rasuidy lóono que Dios diti raduʼdybu lagary tzoʼ galkié rodann lainy xcudxbu. Tipnés rony pensary que por ni ronladxgoluʼbu buñ, raduʼdybu lagary que toib buñ ni diti rac arrepentir tzoʼra lainy congregación. Per ngú diti nigolú. Jehová ronladxgoluʼbu buñ, per diti raduʼdybu lagary cuenunysi gac lainy xcudxbu (Jud. 4). Diti naslooybu  galrronladx pal naduʼdybu lagary que toib buñ ni buny toib galkié rodann né diti rac arrepentir ñoʼsa lainy xcudxbu, portín ngú nagoʼ ló riesga guidopyca congregación (Prov. 13:20; 1 Cor. 15:33).

¹⁵ Ndeʼ láaca rasuidyni lóono que Jehová diti nainy láabu que ni toib guinitló. Raniiny láabu guilaa guirá buñ. Raslooybu galrronladx buñ ni ratzaʼ mod nac né rony rutirigaʼlni par guidzak láabu stoib (Ezeq. 33:11; bíil 2 Pedro 3:9). Por ngú, órni buñguieeu de Corinto góc arrepentir né bisiambu cós mal ni bunybu, Jehová góoch congregación né xcalrracné Pablo que non natuʼdyibu scásiʼ galkié ni buny buñguieeu reʼ, né nacacuentyibu láabu stoib.

16. ¿Xí rasaclo por Jehová órni ronylo pensary ximod góc reglar galkié rodann ni goyoʼ lainy congregación xtuny Corinto?

¹⁶ Ni bisuidyno ni gosaclóo congregación xtuny Corinto, racnéni lóono guibiʼno xcalnadxiʼ né justicia xtuny Jehová (Sal. 33:5). ¿Cualidades sacróyen ni nap Jehová rachiinni lóono gonyxiroʼno láabu ja? Portín guirácano nacno buñ galkié né raquiinno guituʼdy Jehová scásiʼ xcalkiéno. Raxquixno Jehová por ni bixelbu Xiimbu goity por lóono, modreʼ labúu ratuʼdybu xcalkiéno scásiʼ. Nigolú rialdó xcalnabanyno ni nanno que Jehová ronladxgoluʼ xpiin né nainy láabu tzoʼyibu sacró.

17. ¿Xí guisuidyno ló stipnés artículos ni sieed?

¹⁷ ¿Né xí rac ló naareʼ? Pal toib buñ rony toib galkié rodann, ¿ximod labúu guisuʼ ancianos xcalrronladx Jehová né gacnéyibu buñ gac arrepentir? ¿Né ximod non gonyno pal ancianos ragoʼyibu guicyibu cueʼyibu o gony readmitiryibu toib buñ lainy congregación? Guisuidyno guirá galrranabdiitz reʼ ló stipnés artículos ni sieed.