ARTÍCULO NI GUISUIDYNO 31
CANCIÓN 12 Jehová, nuestro gran Dios
Ni ma buny Jehová par guilaabu buñ de galkié né galgoity
«Nigolú gondxiʼ Dios buñgudxlio por ngú bidudybu toibguielot Xiimbu» (JUAN 3:16).
TEMA
¿Xí ma buny Jehová par gacnébu lóono gonyno gan galkié, guireʼno loni né guibanyno tipzó?
1, 2. a) ¿Xí láani ngú galkié, né ximod gonyno gan láani? (Láaca bibiʼ «Ni rareloguiaʼ»). b) ¿Xí láani guisuidyno ló artículo reʼ, né ló stipnés artículos ni guisuidyno de número reʼ Guiich ni caniʼ? (Láaca bibiʼ «Nota par buñ ni cayoʼol» ni sieed ló Revista reʼ).
¿ÑOLADXLO ganlo balaati nadxiʼ Jehová looy la? Toib mod ni labúu ganlo láani ngú, guisuidylo xi ma bunybu par guilaabu looy de galkié né galgoity. Galkié a nacni toib enemig ni diti labúu gonyno gan stiplóocano. Guirácano ni nacno buñgudxlio rachéno guirá dzú, nacno buñ galkié, né por ngú raityno (Rom. 5:12). Per noʼ diitz sacró: nantzayno que né xcalrracné Jehová labúu sonyno gan galkié.
2 Jehová ma sané midid 6.000 íz cayacnébu buñ par gony gan galkié. ¿Xigony? Portín ronladxgoluʼbu lóono. Desde dzú bisaʼbu lóono ronladxgoluʼbu lóono, né por ngú noʼbu puext par gonybu cós ni radziguiaʼ buñ par gacné lóono gonyno gan galkié. Dios nan que xtol galkié raityno né diti raniiny láabu gaityno, xalagary ngú guibanyno tipzó (Rom. 6:23). ¡Ngúca nainy láabu par looy! Ló artículo reʼ guicapyno tzón galrranabdiitz: 1) ¿xí ma buny Jehová par gapno toib esperanza?, 2) ¿xí láani buny buñgudxlio ló dzú ni see par labúu nagoʼ nakityibu Dios ná gocyibu buñ galkié? né 3) ¿xí buny Jesús par nalaabu buñ de galkié né galgoity?
¿XÍ MA BUNY JEHOVÁ PAR GAPNO TOIB ESPERANZA?
3. ¿Ximod bidxin Adán né Eva gocyibu buñ galkié?
3 Órni Jehová bisaʼbu Adán né Eva, goniiny láabu que biinreʼ nabany nakit. Por ngú biscadbu toib lagary sacróyen biinreʼ ro nabés, láaca biduʼdybu stoib galrrascad, láani ngú galtzeʼel, né láaca biduʼdybu stoib dxiin biinreʼ de naxtzayibu buñ ló Gudxlio né ñonyibu guidopynac Gudxlio reʼ toib lagary móz xomod Lagary móz ni góc laa Edén. Nosi biaabu toib cós né gochbu biinreʼ pal diti nasobyibu la, ñaityibu. Má nanno ni góc: toib espíritu mal ni diti gondxiʼ Jehová nili layibu, bidxin né bikíil Adán né Eva par naché. Xalagary ñapyibu confianz Bixiosyibu, bunyibu crer Buñdzab né bichéyibu. Né gosacloyibu mod ná Jehová. Desde ló dzúcu gosaló cualóyibu galnagan xtol xcalnayaʼyibu: bioʼxyibu né goityibu (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Xigony rianladx Jehová galkié, né xigony racnébu lóono guicalóno láani? (Romanos 8:20, 21).
4 Nabann guirá ni godudyibu ló, per Jehová buny que nacáni ló la Biblia par ñenno toib cós ni nigolú rasac: xigony nigolú rianladxbu galkié. Galkié ronyni que galsitno de Bixiosno né xtolni raityno (Is. 59:2). Por ngúpa ángel ni nayaʼ, Buñdzab, nadxiʼbu galkié por ngú bikíilbu Adán né Eva ñonyibu galkié né láaca rayopybu mod guikíilbu lóono. Sigory bunybu pensary que ma bunybu gan lainy Edén. Per diti biembu balaati midid nac xcalnadxiʼ Jehová. Dios dipa ma bitzaʼbu ni goniiny láabu ñac né xfamil Adán né Eva. Láabu nadxiʼbu buñgudxlio por ngú nimaca biduʼdybu toib esperanza (bíil Romanos 8:20, 21). Jehová gondxichbu que tipnés xfamil Adán ñonladx láabu né nayopyibu xcalrracné Dios par nacalóyibu galkié. Né Jehová ni Bisaʼ layibu né ni nac Bixiosyibu ñacné layibu par nalaayibu de galkié né galgoity, né modreʼ nabigaxyibu ronoʼbu. ¿Ximod ñonyibu láani?
5. ¿Pu dzú né ximod biduʼdy Jehová toib esperanza buñgudxlio? (Génesis 3:15).
5 (Bíil Génesis 3:15). Primerdiguieʼ buelt ni bicadiagyibu de esperanza reʼ gocni órni Jehová goniʼ xi ñac né Buñdzab. Dios goniʼ de toib «descendencia» ni nigolú rasac portín nadxin dzú descendencia reʼ nanitlóbu Buñdzab né ñony reglarbu guirá galnagan ni goloʼbu lainy Edén (1 Juan 3:8). Per Descendencia reʼ, nadudy ló galrrioʼob portín Buñdzab ñonynaa né nagaity láabu. Né ndeʼ nigolú nasioʼob xcalnabany Jehová. Per Jehová gondxichbu que guirá galrrioʼobcu la, nigolú nasacni portín por láani xidal millón de buñ nalaayibu de galkié né galgoity.
¿XÍ LÁANI BUNY BUÑGUDXLIO LÓ DZÚ NI SEE PAR LABÚU NAGOʼ NAKITYIBU DIOS NÁ GOCYIBU BUÑ GALKIÉ?
6. ¿Xí buny tipnés buñguieeu xomod Abel né Noé par nabigaxyibu Jehová?
6 ¿Ximod labúu nabigax buñ galkié Jehová? Conforma godudy íz golexabu láani dxoga dxoga. Después de xcalnayaʼ Adán né Eva, primer buñgudxlio ni gop fe lóo Jehová ngú ni rarop xiimbu ni góc laa Abel. Láabu gondxiʼbu Jehová né goniiny nagoʼ nakitbu né nabigaxbu Jehová. Né por ngú biduʼdybu toib galrrascad Jehová. Gopbu xilieen por ngú cuaʼbu «xiil ni primerdiguieʼ ni gop xinimalbu» né biscadbu layimu Jehová. ¿Né xí buny Dios? Cuacuentbu «Abel né galrrascad ni biduʼdybu» (Gén. 4:4). Después, láaca cuacuentbu galrrascad ni buny tipnés buñ ni gondxiʼ né gop confianz láabu, xomod Noé (Gén. 8:20, 21). Ndeʼ bislooy que buñgudxlio ná nacyibu buñ galkié, labúu ñonyibu xchiin Dios né nabigaxyibu ronoʼbu. b
7. ¿Xí rasuidyno por ni goyoʼ Abrahán puext nagaitybu xiimbu?
7 Jehová gonabbu a toib buñ ni gop xiroʼ fe, Abrahán, que ñonybu toib cós ni nigolú nagan: nagaitybu Isaac né nascadbu xiimbu Dios. Sigory ni gonab Dios nigolú bisioʼobni Abrahán. Ná scú, bisobbu Jehová. Órni mápa mer ñonybu láani, Jehová bicaa láabu. Ejemplo reʼ, rasuidyni toib cós ni nigolú rasac a guirá buñ ni nap fe: Jehová goyoʼbu puext ñaity Xiimbu ni ronladxgoluʼbu portín nigolú nadxiʼbu buñgudxlio (Gén. 22:1-18).
8. ¿Xí láani bislooy galrrascad ni gonab Ley ni cuaʼ Moisés? (Levítico 4:27-29; 17:11).
8 Xidal íz después, órni Jehová biduʼdy Ley a buñ israelitas, gochbu biinreʼ que nascadyibu nimal né modcu ñaa xcalkiéyibu (bíil Levítico 4:27-29; 17:11). Galrrascad ni gonab Jehová layibu, bislooyni que después Jehová naduʼdy toib galrrascad ni más galán portín nalaani guiránac buñ galkié. Dios bunybu que profetas nabexa que Descendencia ni goniʼbu guieed, ni góc Xiimbu non nadudy ló galrrioʼob né ñaity. Ñaitybu suusi toib xiil ni rascad buñ Jehová (Is. 53:1-12). Bunysi xpensarylo: Jehová naduʼdy Xiimbu ni ronladxgoluʼbu par nalaabu guiráxadit buñ de galkié né galgoity, dada looy.
¿XÍ BUNY JESÚS PAR NALAABU BUÑ?
9. ¿Xí golexa Juan ni Ragonis? (Hebreos 9:22; 10:1-4, 12).
9 Ló íz 29, Juan ni Ragonis bibiʼbu Jesús ni nac de Nazaret né goniʼbu: «¡Colguibiʼ, Xilieen xtuny Dios ni rabeʼ galkié ló gudxlio!» (Juan 1:29). Modcu bislooybu que Jesús nac Descendencia ni goniʼ Dios guieed. Jesús ñaity por lóono. Ndeʼra buñ galkié ñap esperanza par labúu gonyibu gan galkié né galgoity (bíil Hebreos 9:22; 10:1-4, 12).
10. ¿Ximod bislooy Jesús que biyopybu buñ galkié?
10 Jesús goyoʼ galrrasaʼ por guirá buñ ni gosac mal portín nacyibu buñ galkié né biruʼbu guirá buñreʼ par nacanal láabu. Gonbu que xtol galkié guiránac buñ radudy ló galrrioʼob. Por ngú bibigaxbu buñguieeu né buñgonaʼ ni tipnés buñ bimbu que nac buñ galkié. Láacabu bisetlabu ejemplo reʼ: «Buñ nasac diti raquiin tzee ló doctor, per buñguitz la scú». Né goniʼbu: «Diti bieela par guiyobi buñtzay, xalagary ngú bieela par guiyobi buñ galkié» (Mat. 9:12, 13). Né bislooybu láani mod bunybu. Por ejemplo, né galrronladx bituʼdybu scásiʼ xcalkié buñgonaʼ ni godiʼp ñeʼbu né nís ni bireʼ bisaló buñgonaʼ reʼ (Luc. 7:37-50). Né ná gontzaybu que samaritana ni bibiʼbu roʼ pós gócbu toib buñgonaʼ yox, bisuidybu buñgonaʼ reʼ cós ni rasac ni sieed de Dios (Juan 4:7, 17-19, 25, 26). Jehová dada biduʼdy galnadip láabu par nalísbu buñguieeu, buñgonaʼ né mbiox lad gueʼet né modreʼ bunybu gan galgoity ni rac xtol galkié (Mat. 11:5).
11. ¿Xigony gosac buñ galkié sacró né Jesús?
11 Dada buñ ni buny galkié rodann gosacyibu sacró né Jesús. Né diti radziguiaʼno ni goniiny layibu nabigaxyibu Jesús, portín goyoʼbu xalagary buñ né binladxbu guirá buñreʼ (Luc. 15:1, 2). Láaca buny felicitarbu né biduʼdybu galnasác buñ ni gop fe lóbu (Luc. 19:1-10). Jesús bislooytzaybu galrronladx ni nap Bixiosbu (Juan 14:9). Mod goniʼbu né mod bunybu, bislooybu lóono que Jehová nadxiʼ né raslooy galrronladx, né nainy gacnébu lóono gonyno gan galkié. Jesús bunybu que buñ naniiny natzaʼ mod nac né naniiny nacanal láabu (Luc. 5:27, 28).
12. ¿Xí láani bisuidy Jesús de xcalgoity?
12 Jesús gondxichbu xi nasaclobu. Xidal buelt gochbu xpiimbu que ñoʼ ni ñonycuent láabu ladxña xi enemigbu né ñaitybu ló toib yac nadop (Mat. 17:22; 20:18, 19). Láaca gonbu que xcalgoitybu nabeʼni galkié ló gudxlio, xomodpa goniʼ Juan né profetas láani. Láaca goniʼbu que después ni ñaitybu naxelcaʼbu ronoʼbu «guirá clas buñ» (Juan 12:32). Ni ñap fe lóo Jesús né ñony mod bunybu, labúu ñonyibu ni ná Jehová né orcúra nareʼyibu «xan xomandary galkié» (Rom. 6:14, 18, 22; Juan 8:32). Jesús bislooybu balory né goyoʼbu puext nadudybu ló guirá galrrioʼob reʼ né ñaitybu par labúu ñonybu láani (Juan 10:17, 18).
13. ¿Ximod goity Jesús, né xí rasuidy xcalgoitybu lóono de Jehová? (Láaca bibiʼ dibuj).
13 Buñ bunycuent, gonás, bitzaldaʼ, né bigotz falz Jesús, láaca goyoʼ ni goniʼ gaitybu né nigolú bunynaa buñ láabu. Último, tipnés soldad bicaʼ láabu ló yac nadop par ñaitybu. Jesús diti bisiambu Jehová né buny guantarybu guirá galrrioʼob, né nigolú bioʼobni Jehová órni bibiʼbu xi guirá cadudy Xiimbu ló. Ná nadxiʼgolubu Xiimbu né napbu xiroʼ galnadip, diti bunybu xitcal. ¿Xigony? Por galnadxiʼ. Jesús goniʼ: «Portín nigolú gondxiʼ Dios buñgudxlio por ngú biduʼdybu toibguielot Xiimbu, modreʼ guirá ni gap fe láabu diti guinitló né labúu guibany tipzó» (Juan 3:16).
Par labúu nalaabu lóono de galkié né galgoity, Jehová goyoʼbu puext nadudybu ló galrrioʼob ni diti bitzanló ló xpensary buñ né naduʼdybu lagary ñaity Xiimbu. (Bíil párrafo 13).
14. ¿Xí rasuidy xcalgoity Jesús looy?
14 Xcalgoity Jesús nacni toib prueby ni raslooy balaati nadxiʼ Jehová guiránac xfamil Adán né Eva. Né láaca raslooyni balaati nadxiʼbu looy. ¿Diti radziguiaʼlo órni ronylo pensary ló guirá ni buny Dios né ni biscadbu Xiimbu né nadudybu ló galrrioʼob par nalaabu looy de galkié né galgoity la? (1 Juan 4:9, 10). Láabu nábu gacnébu tigaagano par gonyno gan galkié.
15. ¿Xí raquiin gonyno par guicaʼno xcalnasác xcalgoity Jesús?
15 Ni biscad Dios toibguielot Xiimbu nacni toib galrrascad ni rony que labúu tudy xcalkiéno scásiʼ. Per, noʼ ni raquiin gonyno. Juan ni Ragonis né Jesucristo golexayibu xi láani non gonyno: «Colgac arrepentir, portín Gobierno ni noʼ guibá ma cabigaxni» (Mat. 3:1, 2; 4:17). Pal nigolú nainy lóono gonyno gan galkié né guibigaxno Bixiosno ni ronladxgoluʼ lóono, nigolú rasac gac arrepentirno. Per, ¿xí raduʼdy diitz gac arrepentir buñ, né ximod racnéni lóono gonyno ni ná Jehová ná nacno buñ galkié? Ló artículo ni sieed ni guisuidyno sabexa láani.
CANCIÓN 18 Gracias por el rescate
a NI RARELOGUIAʼ: Ló la Biblia diitz galkié diti guirá ór raduʼdyni diitz toibsi cós. Por ejemplo, ni gonyno toib galkié raduʼdyni diitz gonyno toib cós ni ná Jehová malni, o diti gonyno toib cós ni ranab Jehová gonyno. Per, diitz galkié raduʼdyni diitz galkié ni bisiané Adán lóono. Guiráno raityno, por galkié ni bianéno.
