ARTÍCULO NI GUISUIDYNO 51
CANCIÓN 3 Tú me das fuerza, confianza y valor
Jehová rasetnaladx nís ni rareʼ bisalólo
«Goloʼ nís ni rareʼ bisalóya lainy odre xtunylo. ¿Xí diti caani ló xilibralo la?» (SAL. 56:8).
TEMA
Órni radudyno ló galrrioʼob, Jehová nan ximod rasacno, riembu lóono né rasialdóbu xcalnabanyno.
1, 2. ¿Xí labúu nascudxaʼ lóono?
¿CHÚ diti ma gorudxaʼ toibtica buelt? Ribdxaʼno portín noʼno nakit, portín cadudyno ló cós sacróyen, xomod órni rál xiin buñ. Sigory ribdxaʼno órni rasetnaladxno cós sacróyen ni godudyno ló o órni rabiʼno ximigno ni ma xidzúgolu tiemp diti ma bibiʼno.
2 Per casi guirá ór ribdxaʼno portín cayoʼob xcalnabanyno. Pentzi goyoʼ ni bisioʼob xcalnabanyno, o cadudyno ló galrrioʼob xtol toib galguitz o portín goity toibtica buñ ni ronladxno. Órni radudyno ló de clas galnagancu, labúu guisacno xomod Jeremías órni bibiʼbu que buñ babilonios binitlóyibu gudx Jerusalén. Profetacu goniʼ: «Bisalóya radaa nís [...]. Dzúna gueʼel sibdxaʼya» (Lam. 3:48, 49).
3. ¿Ximod rasac Jehová órni rabiʼbu xpiimbu cadudy ló galrrioʼob? (Isaías 63:9).
3 Jehová nan balaati ma gorudxaʼno ló xcalnabányno. La Biblia ná que láabu racáabu cuidad órni radudyno ló galrrioʼob né racadiagbu lóono órni ranabno xcalrracnébu (Sal. 34:15). Per diti nosi rabiʼbu né racadiagbu lóono, ronybu stoib cós. Láabu nacbu Bixiosno né ronladxgoluʼbu lóono, né nigolú rioʼ nabambu órni rabiʼbu que xiimbu ribdxaʼ. Por ngú nimaca noʼ ni ronybu par gacnébu lóono (bíil Isaías 63:9).
4. ¿Xí ejemplos ni sieed ló la Biblia guisuidyno, né xí sasuidyni lóono de Jehová?
4 Ló Xtiitzbu, rabiʼno xi láani buny Jehová órni bibiʼbu xpiimbu cayibdxaʼ. Gonyno pensary ló Ana, David né rey Ezequías. ¿Xí láani biscudxaʼ layibu? ¿Xí buny Jehová por layibu? Né ¿ximod rasialdó xcalnabanyno ejemplo xtunyibu órni ribdxaʼno portín goity toibtica buñ ni ronladxno, goyoʼ ni bisioʼob xcalnabanyno o radopy xcalnabanyno?
JEHOVÁ RABIʼ ÓRNI RIBDXAʼLO PORTÍN GOITY TOIBTICA BUÑ NI RONLADXLO
5. ¿Ximod gosac Ana?
5 Ana godudy ló xidal cós ni goloʼ nabann láabu né biscudxaʼ láabu. Tzeelbu diti nosi bitzña né láabu láaca bitzñabu né Peniná, buñgonaʼ reʼ bianladxbu Ana né bituʼdybu Ana ló galrrioʼob. Né diti ngúsi, diti labúu goyoʼ xiin Ana, né Peniná goyoʼ xidal xiin (1 Sam. 1:1, 2). Né por ngú Peniná nigolú bixiichbu Ana. ¿Ximod nasaclo pal ñacni looy? Ana nigolú bioʼob xcalnabanybu, por ngú gorudxaʼbu né diti godóbu (1 Sam. 1:6, 7, 10).
6. ¿Xí láani buny Ana par nasacbu sacró?
6 ¿Xí láani buny Ana par nasacbu sacró? Primer, goyeebu tabernáculo, lagary ro buny adoraryibu Dios. Né órni goyoʼbu cú, sigory gaxca niis ro goyoʼ buñ ló láachluʼ xtuny tabernáculo, «goninébu Jehová né gorudxaʼdotbu». Gonabbu Dios nasetnaladx láabu né goniʼbu: «Bibiʼ balaati cadudi ló galrrioʼob» (1 Sam. 1:10b, 11). Gochbu Jehová guirá ni gosacbu. ¿Ronylo pensary balaati nabann gosac Jehová órni bibiʼbu xiindzapbu gorudxaʼ la?
7. ¿Ximod gosac Ana después ni gochbu Jehová guirá ni noʼ lainy xcalnabanybu?
7 ¿Ximod gosac Ana órni gochbu Jehová guirá ni noʼ lainy xcalnabanybu né ni bicadiagbu diitz ni góoch sumo sacerdote Elí láabu? Historia cu náni: «Seebu né godóbu, né ma diti goyoʼ nabambu» (1 Sam. 1:17, 18). Ná diti ma bidzaʼ mod bibanybu, bialdó xcalnabanybu. Bisiambu guirá ni gosacbu ladxña Jehová. Jehová bibiʼ xcalrrasaʼbu, bicadiagbu Ana né después biduʼdybu xcalnasácbu órni biduʼdybu lagary ñoʼ xiin Ana (1 Sam. 1:19, 20; 2:21).
8, 9. Mod ná Hebreos 10:24, 25, ¿xigony non gonyno rutirigaʼlni lóono par tzoʼno reunión? (Láaca bibiʼ retrat).
8 ¿Xí rasuidyno? ¿Cadudylo ló toib galnagandaʼ né ribdxaʼlo xtolni la? Pentzi goity toibtica xfamilo o ximiglo. Órni radudy buñ ló galnagancu, wal diti ná buñ tzoʼ né stipnés. Per bisetnaladx ni gosaclóo Ana. Láabu goyeebu tabernáculo né cú bisialdó Jehová xcalnabanybu. Jehová láaca labúu guisialdóbu xcalnabanylo pal rieelo reunión, ná pal noʼlo nabann né ma diti naplo fuers (bíil Hebreos 10:24, 25). Ló reunión racadiagno textos ni sieed ló la Biblia ni rony animar lóono. Modcu, Jehová labúu racné lóono par cueʼno guicno pensary ni diti noʼ pu raquiin né coʼno pensary tzaay lainyni. Modcu labúu guisacno sacró, ná diti nimaca radzaʼ mod cadudyno.
9 Ló reunión, xhermanno rasialdóyibu xcalnabanyno né raslooyibu balaati ronladxyibu lóono, né ngú labúu coʼni gan lóono (1 Tes. 5:11, 14). Guibiʼno ni gosaclóo toib precursor especial ni goity tzeʼel: «Ribdxaʼraya ni goitybu. Rioʼ ór rabuya squin yoʼ né rasaló ribdxaʼya... Per reunión rony animarni naʼ par diti guireʼgana. Comentarios ni raduʼdy herman né diitz sacróyen ni raibyibu naʼ rasialdóni xcalnabani. Órni radxinna lainy salón, rioʼ ór nigolú cayoʼob xcalnabani, per cú rasaca más sacró». Órni rioʼno reunión, Jehová labúu guiquiin xhermanno par gacné lóono.
Herman rasialdóyibu xcalnabanyno. (Bibiʼ párrafos 8 né 9).
10. ¿Ximod labúu guisuʼno ejemplo xtuny Ana órni nigolú noʼno nabann?
10 Ana gosacbu sacró órni gochbu Jehová ni noʼ lainy xcalnabanybu. Looy láaca labúu gonylo ni ná 1 Pedro 5:7 né guisianlo ladxña Jehová guirá ni ragoʼ looy ló galrrasaʼ né gaplo confianz que sacadiagbu looy. Toib hermana rabexa ximod gosacbu órni toib buñ gobáan bigaity tzeelbu: «Gosaca que xcalnabani bioynoyni né buni pensary que diti labúu ñalni». ¿Xí láani gocné láabu? Láabu nábu: «Biyobi xcalrracné Bixiosa ni noʼ guibá né gosaca que bisialdóbu naʼ órni buni oración. Goyoʼ ór diti goona ximod ñaabi láabu ni rasaca, per láabu bientzaaybu naʼ. Órni nigolú goyoʼya nabann né bidopy xcalnabani, gonaba láabu que ñonybu que nasaca sacró. Nimaca gosaca que bialdó xcalnabani né xpensari né gopa fuers par diti nareʼgana». Órni raibylo Jehová guirá ni noʼ lainy xcalnabanylo láabu rasacbu galrrioʼob ni cadudylo ló, né rientzaaybu mod rasaclo. Ná galnagan ni cadudylo ló diti rareʼni, Jehová labúu guisialdóbu xcalnabanylo né labúu gonybu que guisaclo sacró (Sal. 94:19; Filip. 4:6, 7). Né láaca saduʼdybu xcalnasácbu looy por ni cayony guantarylo (Heb. 11:6).
JEHOVÁ RABIʼ ÓRNI RIBDXAʼLO PORTÍN GOYOʼ NI BISIOʼOB XCALNABANYLO
11. ¿Ximod gosac David órni stipnés buñ buny mal láabu?
11 Ló xcalnabánybu, David cualó xidal galnagan ni bisioʼob xcalnabanybu né ni biscudxaʼ láabu. Xidal buñ bianladx láabu né tipnés xfamilbu né ximigbu bisioʼob xcalnabanybu, né biyopy mod ñony mal láabu (1 Sam. 19:10, 11; 2 Sam. 15:10-14, 30). Toibtica ór bicaʼbu: «Ma bidzaga cagobladxi; guidopynac gueʼel ribdxaʼya né raats xiloʼona; né nís ni rareʼ bisalóya riaʼpy gueel ro raata». ¿Xigony gosacbu modcu? Láabu nábu: «Xtol xienemiga» (Sal. 6:6, 7). Buñ bisioʼob xcalnabany David né por ngú gorudxaʼbu.
12. Mod ná Salmo 56:8, ¿xí láani gop confianz David?
12 Ná nagan mod bibany David, láabu gopbu confianz que Jehová gondxiʼ láabu. Bicaʼbu: «Jehová sacadiag ni cayibdxaʼya» (Sal. 6:8). Stoib ór bicaʼbu diitz sacróyen ni radzelno ló Salmo 56:8 (bíil láani). Diitzreʼ raslooyni lóono balaati ronladx «Jehová lóono né balaati rioʼbu galrrasaʼ por mod rasacno». David goniʼ que gocni suusi natop Jehová tigaaga nís ni bireʼ bisalóbu né nagoʼbu láani lainy toib odre o nacaʼbu láani ló toib libro. Gopbu confianz que Bixiosbu ni ronladxgoluʼ láabu né noʼ guibá cuá cuidad guirá galrrioʼob ni godudybu ló, né diti nosi bimbubu galnagan ni godudybu ló, láaca ximod gosacbu.
13. ¿Xí labúu guisialdó lóono órni toib buñ rasioʼob xcalnabanyno? (Láaca bibiʼ retrat).
13 ¿Xí rasuidyno? ¿Ma goyoʼ toib buñ ni ronladxlo ni bisioʼob xcalnabanylo la? ¿Golaʼ xcalnabanylo portín bibíl xcaltzeelo o portín bisian xinobylo looy la? ¿Noʼlo nabann portín toib buñ ni ronladxlo ma diti nac testigo xtuny Jehová la? Guibiʼno ni gosaclóo toib hermano. Toib hermano raniʼ ximod gosacbu órni tzeelbu goyoné stoib buñ né bisian láabu: «Diti labúu buni crer láani, diti goona xi láani ñoni. Gosaca que ma diti noʼ pu raquiinna, goyoʼya nabann né bidzutzi». ¿Xí labúu guisialdó looy pal toib buñ rasioʼob xcalnabanylo? Guisetnaladxlo que Jehová dipa sasiambu looy. Hermanocu goniʼ: «Biduʼdi cuent que buñ labúu guisian lóono per Jehová yaca. Láabu nacbu Guielaa xtunyno: guirá ór sioʼbu né lóono gac nitisi gac. Dipa sasiambu ni diti rasian láabu» (Sal. 37:28). Bisetnaladx que diti noʼ ni ronladx looy xomod ronladx Jehová looy. Pentzi nigolú bisiobyibu xcalnabanylo, per diti guiduʼdylo lagary que ngú guicaa looy par guibiʼlo balaati rasaclo par Jehová (Rom. 8:38, 39). Ná rioʼ ni ronynaa looy, labúu gaplo confianz toib cós: ¡Jehová ronladx looy!
Libro xtuny Salmos raibyni lóono que Jehová noʼ gax de buñ ni cayoʼob xcalnabany. (Bibiʼ párrafo 13).
14. ¿Xí raiby Salmo 34:18 lóono?
14 Pal goyoʼ ni bisioʼob xcalnabanylo, ni láaca labúu guisialdó xcalnabanylo láani ngú ni bicaʼ David ló Salmo 34:18 (bíil láani). Toib obra de consulta náni que diitz «ni nogoluʼ nabann» labúu gac traducirni xomod «ni diti rabés guicaʼ cós tzaay». ¿Ximod racné Jehová buñ ni rasac modcu? Texto cuca náni que Jehová «noʼ gaxtiguié» de buñ ni cayoʼob xcalnabany, sigory portín goyoʼ ni bisioʼob xcalnabany buñcu. Nacbu xomod bixios mbiox, órni rabiʼbu xiimbu cayibdxaʼ racalainybu né rasialdóbu xcalnabany xiimbu. Órni rioʼob xcalnabanyno láaca rioʼob xcalnabany Jehová né nimaca racnébu lóono. Nainy guisialdóbu xcalnabanyno né guiscueʼsbu ló xcalrrioʼobno. Láaca, raduʼdybu xiroʼ cós tzaay ni labúu guicaʼno, né modcu racnébu lóono gony guantaryno galnagan ni napno nigoreʼ (Is. 65:17).
JEHOVÁ RABIʼ ÓRNI RIBDXAʼLO PORTÍN RADOPY XCALNABANYLO
15. ¿Xí láani biscudxaʼ rey Ezequías?
15 Órni rey Ezequías de gudx Judá gop 39 íz, bixoʼsiibu. Né xcalrracné profeta Isaías, Jehová góoch láabu que saitybu (2 Rey. 20:1). Ralooyni diti goyoʼ esperanza par Ezequías. Órni gonbu láani nigolú gorudxaʼbu, né gonabbu Jehová ñacné láabu (2 Rey. 20:2, 3).
16. Órni Jehová bicadiag oración ni buny Ezequías né bibiʼbu rey reʼ gorudxaʼ, ¿ximod gosacbu, né xí láani bunybu por Ezequías?
16 Órni Jehová bicadiag oración ni buny Ezequías né bibiʼbu Ezequías gorudxaʼ, ngú bidxin lainy xcalnabanybu né xcalrracné Isaías gochbu Ezequías: «Ma bicadiaga oración xtunylo. Ma bibiʼya nís ni rareʼ bisalólo. Sasiala looy». Bislooybu xcalrronladxbu Ezequías órni biduʼdybu xtiitzbu que rey reʼ nabany más tiemp né que Jehová nalaa gudx Jerusalén ladxña buñ asirios (2 Rey. 20:4-6).
17. ¿Ximod ranás Jehová lóono órni caxoʼno? (Salmo 41:3; láaca bibiʼ retrat).
17 ¿Xí rasuidyno? ¿Xí labúu gonylo pal caxoʼlo né ralooyni sagaityni looy? Góoch Jehová ni noʼ lainy xcalnabanylo, ná cudxaʼlo órni gonylo láani. La Biblia raibyni lóono que «Bixiosno ni ronladx lóono» sasialdóbu xcalnabanyno órni tudyno ló prueby (2 Cor. 1:3, 4). Nigolú, diti labúu cuésno que Jehová cueʼ guirá xcalnaganno nigoreʼ. Per labúu gapno confianz que láabu sanásbu lóono (bíil Salmo 41:3). Por ejemplo, raduʼdybu espíritu santo xtunybu, ni racné lóono gapno fuers, gapno sabiduría né guisacno sacró né lóocano (Prov. 18:14; Filip. 4:13). Láaca raduʼdybu esperanza lóono que sabeʼbu guirá galguitz ni noʼ (Is. 33:24).
Jehová racapybu oración ni ronyno órni raduʼdybu fuers né sabiduría lóono, né racnébu lóono guisacno sacró. (Bibiʼ párrafo 17).
18. ¿Xí texto ni sieed ló la Biblia ma gocné looy órni godudylo ló galnagandaʼ? (Bibiʼ cuadriyen ni laa, « Diitz ni raquiin Jehová par guispiichbu nís ni rareʼ bisalóno»).
18 Ni goniʼ Jehová bisialdóni xcalnabany Ezequías. Ni raiby Dios lóono né xcalrracné la Biblia láaca labúu guisialdóni xcalnabanyno. Xcuent Jehová goyoʼ que ló Xtiitzbu nacá tipnés diitz ni rony animar lóono órni radudyno ló galnagandaʼ (Rom. 15:4). Guibiʼno ni gosaclóo toib hermana ni rabés África Occidental ni casi guirá ór gorudxaʼ portín doctor góoch láabu que napbu cáncer. Láabu nábu: «Toib texto ni rony animar naʼ láani ngú Isaías 26:3. Ná dipa labúu rony mandaryno ni rasaclono, versículo reʼ raslooyni que Jehová labúu gony que guisacno sacró né lóocano par diti cuenunysi gonyno órni guicalóno galnagan». ¿Ritzanló ló xpensarylo toib texto ni sieed ló la Biblia ni ma buny animar looy órni godudylo ló galnagandaʼ, o órni bidopy xcalnabanylo la?
19. ¿Xí galnasác sacaʼno?
19 Nabanyno ló tiemp ni ma guidubylagaʼ, por ngú, nanno que sacalóno galnagan ni sascudxaʼ lóono. Per, mod bibiʼno ló ni gosaclóo Ana, David né rey Ezequías, Jehová rabiʼbu nís ni rareʼ bisalóno né láaca rioʼobni láabu. Láabu rasetnaladxbu guirá né tigaaga nís ni rareʼ bisalóno. Por ngú, órni tudylo ló galnagan ni rasioʼob xcalnabanylo, góoch Jehová guirá ni noʼ lainy xcalnabanylo. Diti galsitlo de herman de congregación xtunylo, ni ronladxgoluʼ looy. Né biyopyra Jehová par guisialdóbu xcalnabanylo né xcalrracné la Biblia. Labúu gaplo confianz que, pal rony guantarylo láabu saduʼdybu xcalnasácbu looy. Mápa mer guibiʼno dzú ni saspiich Jehová nís ni rareʼ bisalóno xtol galrrioʼob (Apoc. 21:4). ¡Ló gudxlio copy nosi sibdxaʼno portín noʼno nakit!
CANCIÓN 4 «Jehová es mi Pastor»
