ARTÍCULO NI GUISUIDYNO 48
CANCIÓN 97 Nuestra vida depende de la Palabra de Dios
Ni rasuidyno de galrradziguiaʼ ni buny Jesús né páa
«Naʼ naca páa xtuny galnabány. Ni guieed ronoʼya dipa salaʼn» (JUAN 6:35).
TEMA
¿Xí rasuidyno de historia ni sieed ló capítulo 6 xtuny Juan, órni Jesús buny galrradziguiaʼ né páa né beel par biyaʼanbu xidalguixo buñ?
1. ¿Balaati gosac páa par buñ ló dzú ni see?
LÓ DZÚ ni see, guirá buñ godó páa (Gén. 14:18; Luc. 4:4). Nigolú gosacni par buñ, por ngú la Biblia rioʼ ór raquiin láani par guiniʼni de galrro (Mat. 6:11; Hech. 20:7). Jesús biquiin páa par bunybu chop galrradziguiaʼ ni xidal buñ rimbu (Mat. 16:9, 10). Guisuidyno toibtica de historiascu ni sieed ló capítulo 6 xtuny Juan, né guibiʼno xi labúu guisuidyno de láani ló xtzúno.
2. ¿Pu ór biquiin galrro par xidal mil buñ?
2 Apóstoles bilox buny predicaryibu. Jesús biaʼpy né layibu lainy lanch né goynébu biinreʼ toib lagary gaxca gudx Betsaida ro labúu nasaladxyibu (Mar. 6:7, 30-32; Luc. 9:10). Per nimaca xidalguixo buñ bidxin ro goyoʼyibu par nabiʼyibu Jesús. Né láabu goloʼbu cuent buñ. Né galrronladx, goleʼbu tiemp par goninébu guirá buñcu de Gobierno xtuny Dios, né bisialbu buñguitz. Ma godzudaʼ láani, por ngú xpiin Jesús gonabdiitzyibu láacayibu ximod nadzel guirá buñcu ni ñoo. Tipnésyibu sigory goyné ni guá, per casi guiráyibu non ñeeyibu stipnés gudxyen par nasiʼyibu ni ñooyibu (Mat. 14:15; Juan 6:4, 5). ¿Xí ñony Jesús?
BUNYBU TOIB GALRRADZIGUIAʼ NÉ PÁA
3. ¿Ximod buny Jesús órni bibiʼbu cós ni caquiin buñ? (Láaca bibiʼ dibuj ni sieed laidy guiich).
3 Jesús gochbu apóstoles xtunybu: «Diti raquiin guieeyibu. Lóoto colguiduʼdy ni guáyibu» (Mat. 14:16). Ndeʼ gocni toib galnagan portín goyoʼ midid 5.000 buñguieeu, né pal nagabno buñgonaʼ né mbiox sigory gocyibu midid 15.000 buñ (Mat. 14:21). Andrés goniʼ: «Reʼ noʼ toib nidxiyen ni nap gáay páa né chop beel. Per, diti sigaʼlni par guirá buñ» (Juan 6:9). Casi guirá buñ godó páa ni góc né cebada né diti car bidoʼni, né beelien cu sigory gocni beelbich né nadxic. Mod nitisi gocni, midid cu diti nigaʼlni par nayaʼanbu xidalgoluʼ buñ.
Jesús biduʼdybu ni biquiin buñ ló sentido físico né espiritual. (Bibiʼ párrafo 3).
4. ¿Xí rasuidyno de Juan 6:11-13? (Láaca bibiʼ retrat).
4 Jesús goniiny nagobiobu buñ sacró, por ngú gonabbu buñ nabuu ló guixbataʼ (Mar. 6:39, 40; bíil Juan 6:11-13). La Biblia ná que Jesús biduʼdybu guixquix Bixiosbu por páa né por beelien ni gopyibu. Né galán ni bunybu láani, portín Dios ngú ni biduʼdy galrrocu. Ndeʼ rony que guisetnaladxno que non guisuʼno Jesús né gonyno oración antes ni guáno, ná pal noʼno toibno o noʼno né stipnés buñ. Después, Jesús buny que xpiimbu natzoo galrrocu, né buñ godó dada nadzá lainyibu. Ná scú, biaʼan galrro, né Jesús diti goniiny nasapyni. Por ngú gochbu xpiimbu natop láani, sigory par naquiinyibu láani después. Modreʼ, Jesús bisuidy lóono guiquintzayno cós ni napno. Ni ma noʼ xiin, labúu gonyibu repas historia reʼ né xiinyibu, par guisuidyibu xiinyibu gony oración, cobioo sacró stipnés né guiduʼdy ni nap.
Gonabdiitz ndeʼ looy: «¿Rasuʼya Jesús né roni oración antes ni guáya la?». (Bibiʼ párrafo 4).
5. ¿Ximod buny guirá buñcu órni bibiʼyibu galrradziguiaʼ ni buny Jesús, per xí láani buny Jesús?
5 Guirá buñcu nigolú bidziguiaʼ mod bisuidy Jesús, né galrradziguiaʼ ni bunybu. Gonyibu que Moisés biduʼdy xtiitz que Dios nabú toib profeta especial, por ngú, sigory gonabdiitzyibu láacayibu pal profetacu gócbu Jesús (Deut. 18:15-18). Pal scú gocni, sigory bunyibu crer que Jesús galán ñony mandary layibu, né que labúu nayaʼanbu guidopy gudx. Sigory por ngú mersi ñony lafuersyibu Jesús par «gacbu rey» (Juan 6:14, 15). Pal Jesús nasaguel, ñoʼbu lad política xtuny buñ judíos, ni goyoʼ xan xomandary Roma. Per diti bunybu láani. Historiacu náni que Jesús diti buny pensary láani, né goyeebu «laidy dainy». Ná bikíil buñ láabu, diti goyoʼbu lad política. ¡Nigolú rasuidyno xiroʼ de láabu!
6. ¿Ximod labúu guisuʼno Jesús? (Láaca bibiʼ dibuj).
6 Nigolú, ni toib buñ sanab lóono gonyno galrradziguiaʼ né páa o guisialno buñguitz. Láaca diti sayopyibu mod gonyibu rey lóono. Per labúu guikíilyibu lóono par tzoʼno ló política, gony votarno o gacnéno buñ ni ronyibu crer que sabeʼ galnagan ni radudyno ló. Per, Jesús bisian toib ejemplo galán, diti gosaguelbu ñoʼbu ló política. Né después goniʼbu ndeʼ: «Gobierno xtuni diti nacni de gudxliogoxreʼ» (Juan 17:14; 18:36). Lóono ni nacno cristianos, galán guisuʼno mod buny Jesús né mod bunybu pensary. Lóono láaca racnéno Gobierno xtuny Dios, ranino de láani né stipnés buñ né ronyno oración par guieedni (Mat. 6:10). Guibiʼno xi más labúu guisuidyno de galrradziguiaʼ ni buny Jesús né páa.
Jesús bisiambu toib galán ejemplo par xpiimbu órni diti goyoʼbu ló política xtuny judíos né xtuny buñ romanos. (Bibiʼ párrafo 6).
«XI BIDUʼDY DIITZ GALRRADZIGUIAʼ NI BUNY JESÚS NÉ PÁA»
7. ¿Xí stoib galrradziguiaʼ buny Jesús, né ximod buny apóstoles? (Juan 6:16-20).
7 Después ni biyaʼanbu xidal buñ, Jesús gochbu xpiimbu nabiguet gudx Capernaúm lainy lanch, né láabu goyeebu laidy dainy, par diti ñony buñ judíos rey láabu (bíil Juan 6:16-20). Laʼga xpiimbu see lainy lanch, góc toib guiedaʼa né góc buroʼdant, né nigolú biás xcuann nís. Órcu, Jesús gosaa laidy nís, né goyeebu ronoʼ xpiimbu, né gochbu apóstol Pedro láaca nasaa laidy nís (Mat. 14:22-31). Órni Jesús biaʼpy lainy lanch, golés buroʼdantcu. Xpiimbu nigolú bidziguiaʼ né goniʼyibu: «Looy naclo Xiin Dios» (Mat. 14:33). a Ná scú diti bientzaayibu, ximod galrradziguiaʼ reʼ bidzakni né galrradziguiaʼ ni buny Jesús órni biyaʼanbu xidal buñ. Marcos goniʼ que apóstoles nigolú bidziguiaʼ, portín «diti bienyibu xi biduʼdy diitz galrradziguiaʼ ni buny Jesús né páa, né xcalnabanyibu diti bieen láani» (Mar. 6:50-52). Diti bienyibu balaati galnadip biduʼdy Jehová a Jesús par ñony galrradziguiaʼ. Diti xidzú después, Jesús goniʼ de galrradziguiaʼ ni bunybu né páa, né bisuidybu lóono stoib lesiony ni rasac.
8, 9. ¿Xigony biyopy xidal buñ Jesús? (Juan 6:26, 27).
8 Buñ ni Jesús biyaʼan más goyoʼ galrrasaʼ por cós ni nainy layibu né ni caquiinyibu ló sentido físico. Nigolú, stoib dzúcu, órni bibiʼyibu que Jesús né xpiin ma diti noʼ cú, biaʼpyibu lainy stipnés lanch ni sieed de Tiberíades né gonásyibu niis Capernaúm par biyopyibu Jesús (Juan 6:22-24). Per ¿bunyibu láani par nacadiagyibu más de Gobierno xtuny Dios la? Riendxichni que diti por ngú biyopyibu Jesús. Goniiny layibu que Jesús nayaʼan layibu. ¿Ximod nanno láani?
9 Guicáano cuidad xi góc órni guirá buñcu bidxin ronoʼ Jesús gaxca Capernaúm. Jesús nayadit góoch layibu que más goyoʼyibu galrrasaʼ por nacaʼyibu cós ni caquiinyibu ló sentido físico. Goniʼbu que layibu «godóyibu dada bidza lainyibu» né «galrro ni raxin». Né buny animarbu guirá buñcu ñony dxiin por «galrro ni diti raxin ni radudy galnabany tipzó» (bíil Juan 6:26, 27). Láaca gochbu guirá buñcu que Bixiosbu ngú ni naduʼdy galrrocu layibu. Sigory bidziguiaʼyibu ni gonyibu que toib galrro labúu naduʼdy galnabány tipzó. Per ¿xí galrrocu né ximod labúu nacaʼyibu láani?
10. ¿Xí «xchiin Dios» non ñony buñ par ñapyibu galnabány tipzó?
10 Ralooyni judíos cu bunyibu crer que non ñonyibu tipnés dxiinien par nacaʼyibu galrrocu. Sigory bunyibu pensary ló «dxiin» ni gonab Ley ni cuaʼ Moisés. Per, Jesús góoch layibu: «Ndeʼ nac xchiin Dios: guislooyto que napto fe ló ni bixelbu» (Juan 6:28, 29). Par labúu guibanyno tipzó, raquiin guislooyno fe ló Xiin Dios. Né, Jesús maca goniʼ láani (Juan 3:16-18, 36). Né después goniʼbu de láani stoib, goniʼbu xi non gonyno par guibanyno tipzó (Juan 17:3).
11. ¿Ximod bislooy buñ judíos que bunyrayibu pensary que Jesús nayaʼan layibu? (Salmo 78:24, 25).
11 Judíos cu diti cuacuentyibu ni bisuidy Jesús layibu de «xchiin Dios». Por ngú, gonabdiitzyibu Jesús: «¿Xí galrradziguiaʼ gonylo par guibiʼdo né gonydo crer looy?» (Juan 6:30). Órcu bisetlayibu que xfamilyibu ni bibany ló xtzú Moisés cuaʼ Maná, ni labúu nadzak né páa (Neh. 9:15; bíil Salmo 78:24, 25). Riendxichni que bunyrayibu pensary ló páa. Por ngú diti gonabyibu Jesús nabexa xi láani biduʼdybu diitz órni goniʼbu de «páa ni sieed guibá», ni góc xomod maná ni sieed guibá ni raduʼdy galnabány (Juan 6:32). Más goyoʼyibu galrrasaʼ por cós ni caquiinyibu, né diti goloʼyibu cuent galnigolú ni Jesús cayopy mod guisuidy layibu. ¿Xí labúu guisuidyno de historia reʼ?
NI MÁS GUISAC PAR LÓONO
12. ¿Ximod nayadit goniʼ Jesús xí láani ni más rasac?
12 Ló capítulo 6 xtuny Juan radzelno toib lesiony ni nigolú rasac: ni más guisac par lóono ngú, guiyopyno Dios. Jesús maca goleʼ loguiaʼ láani órni goleʼbu tiplad toibtica tentación ni goloʼ Buñdzab nislóbu (Mat. 4:3, 4). Ló Discurs ni goloʼ Jesús laidy dainy, láaca goleʼ loguiaʼbu que non ganno que non guiyopyno Dios (Mat. 5:3). Por ngú, guinabdiitzno lóocano: «¿Raslooya por mod nabani que más rioʼya galrrasaʼ por guiyobi Dios, que por gapa cós ni nainy naʼ la?».
13. a) ¿Xigony diti mal láani guibaladxno né galrro? b) ¿Xí abís diti non guicaʼno xomod galrraguit? (1 Corintios 10:6, 7, 11).
13 Nigolú, diti mal guinabno Dios cós ni raquiinno né guibaladxno né láani (Luc. 11:3). La Biblia ná que dxiin nadip ni raduʼdy ni guáno né gueeno, ragoʼ nakitni lóono né «sieedni de Dios ni nigolú» (Ecl. 2:24; 8:15; Sant. 1:17). Ná scú, non coʼno láani xalagaryni. Ngú ni góoch apóstol Pablo a cristianos ni bibany ló dzú ni ma mer nanitló gudx Jerusalén. Bicaʼbu cós ni godudy gudx Israel ló, xomod cós ni góc órni goyoʼyibu gaxca dainy Sinaí. Né gochbu guirá cristianos que diti non nasobladxyibu «cós mal», xomod buny israelitas (bíil 1 Corintios 10:6, 7, 11). Israelitas biduʼdyibu lagary que ni goniiny ñooyibu ñonyni que cós ni biduʼdy Jehová layibu né galrradziguiaʼ ñacni «cós mal» (Núm. 11:4-6, 31-34). Né ngúca bunyibu órni godóyibu, goʼyibu né bienyibu torlas de or (Éx. 32:4-6). Pablo goniʼ de láani xomod toib abís par guirá cristianos ni bibany ló dzú ni mápa mer nanitló gudx Jerusalén, ni ñac ló íz 70 ló xtzúno. Lóono láaca rabésno ló toib tiemp ro mápa mer guinitló gudxliogoxreʼ né por ngú, galán diti galrraguitsi guicaʼno consej ni biduʼdy Pablo.
14. ¿Xí ná la Biblia de galrro ni tzoʼ ló gudxlio copy?
14 Órni Jesús bisuidy lóono guinabno ló Dios ndeʼ: «bidudy páa ni guádo dzureʼ», láaca goniʼbu de tiemp ro ñac ni ná Jehová «xomod lainy guibá, láaca ló gudxlio» (Mat. 6:9-11). ¿Ximod ronylo pensary gac dzúcu? La Biblia ná que ni ná Jehová raguiñani tzoʼ galrro ló Gudxlio. Ló Isaías 25:6-8 raduʼdybu xtiitzbu que ló Gobierno xtunybu sioʼ xiroʼ galrro tzaay. Né Salmo 72:16 ná que «sioʼgolu ni guá buñ ló gudxlio, laidy dainy sioʼgoluni». ¿Ronylo pensary que ma noʼlo cú, né rabeʼlo páa ni rioladxlo o ronylo prueby cueʼlo toib páa ni diti ma goleʼlo la? ¿Né rabiʼlo looy ma noʼlo cú né cayólo balach ni bisagaʼlo la? (Is. 65:21, 22). Né láaca, diti looysi sacaʼlo guirá galnasác cu.
15. ¿Xí láani non guieen guirá ni guiás lad gueʼet? (Juan 6:35).
15 (Bíil Juan 6:35). ¿Xí gac né buñ ni godó páa né beel ni biduʼdy Jesús layibu? Órni guiás buñ lad gueʼet, sigory simbuno tipnésyibu. Pentzi guiásyibu ná ló dzú ni see diti bislooyibu fe (Juan 5:28, 29). Non guienyibu xi biduʼdy diitz Jesús órni goniʼ ndeʼ: «Naʼ naca páa xtuny galnabány. Ni guieed ronoʼya dipa salaʼn». Non gapyibu fe ló xcalgoity Jesús, ni raduʼdy diitz, gapyibu fe que Jesús goity por layibu. Ló gudxlio copy, sasuidyno buñ ni guiás lad gueʼet né badaʼ ni gaal. ¡Nigolú sioʼ nakitno órni guisuidyno buñ ló gudxlio copy! Más sagoʼ nakitni lóono que ni guáno páa. Ni más guisac par lóono láani ngú cós espiritual.
16. ¿Xí guisuidyno ló artículo ni sieed?
16 Dada nigoreʼ nosi bisuidyno tidxó capítulo 6 xtuny Juan. Per goyoʼ más cós ni goniʼ Jesús de «galnabány tipzó». Gocni toib tema ni biquiin ñan buñ judíos, né ni láaca raquiin ganno lóono. Ló artículo ni sieed, sasuidyrano capítulo 6 xtuny Juan.
CANCIÓN 20 Enviaste a Jesús, tu Hijo amado
a Pal nainy ganlo más de historia reʼ, bibiʼ libros ni laa Jesús: el camino, la verdad y la vida, página 131, né Ejemplos de fe, página 185.
