ARTÍCULO NI GUISUIDYNO 49
CANCIÓN 147 Dios nos promete la vida eterna
¿Xí non gonyno par guibanyno tipzó?
«Guirá ni guicacuent né gap fe Xiimbu, sabany tipzó» (JUAN 6:40).
TEMA
¿Ximod racné xcalgoity Jesucristo tanli ungidos né stipnés xiil?
1. ¿Xí rony pensary tipnés buñ de galnabány tipzó?
XIDAL buñ racáyibu cuidad xi láani guáyibu né ronyibu ejersis par diti guixoʼyibu né par guibanyibu xidzú. Ná scú, diti rabésyibu guibanyibu tipzó, sigory portín ronyibu pensary que diti labúu sabany buñ tipzó, o portín diti nainy tudyibu ló galnagan ni radudy buñgol. Per, Jesús goniʼ que buñgudxlio labúu «guibany tipzó», né que nacni toib galnasác xomod ná Juan 3:16 né 5:24.
2. ¿Xí ná capítulo 6 xtuny Juan de galnabány tipzó? (Juan 6:39, 40).
2 Toibtica dzú, Jesús buny toib galrradziguiaʼ né biyaʼanbu xidalguixo buñ né páa né beelien. a Ni bunybu radziguiaʼ buñ láani, per ni goniʼbu stoib dzúcu más radziguiaʼ buñ láani. Guirá buñcu cuanal láabu dada Capernaúm, roʼ nisdaʼ Galilea, né cú gochbu guirá buñcu que buñgudxlio labúu guiás lad guet né guibany tipzó (bíil Juan 6:39, 40). Buny pensary ló guirá xfamilo né ximiglo ni ma goity. Ni goniʼ Jesús, rasuidyni lóono que xidal buñ ni ma goity siás né que looy né buñ ni ronladxlo labúu guibanyto tipzó. Per, ló capítulo 6 xtuny Juan, Jesús goniʼ stipnés cós ni rasac nagan tipnés buñ guieen. Nanoy guisuidyno láani.
3. Mod ná Juan 6:51, ¿xí láani bisuidy Jesús de láacabu?
3 Xidalguixo buñ ni bidxin Capernaúm bibiʼyibu que páa ni biduʼdy Jesús layibu bidzakni né maná ni biduʼdy Jehová xfamilyibu ni bibany ló dzú ni see. La Biblia rabeʼ laa maná «páa ni sieed guibá» (Sal. 105:40; Juan 6:31). Jesús goniʼ de tema xtuny maná par bisuidybu buñ stipnés cós. Ná maná gocni toib galrrascad ni biduʼdy Dios layibu, guirá ni godó láani bidxin midid goityibu (Juan 6:49). Per, Jesús láacabu goleʼbu laabu «páa ni sieed guibá», «páa xtuny Dios» né «páa xtuny galnabány» (Juan 6:32, 33, 35). Né después Jesús goniʼ que diti toibsi midid góc maná cu né láabu. Goniʼbu: «Naʼ ngú páa ni nabany ni bietj de guibá. Pal noʼ ni roo páa reʼ, sabanybu tipzó» (bíil Juan 6:51). Guirá ndeʼ bichelni xpensary judíos. ¿Ximod labúu naniʼ Jesús que bietjbu lainy guibá né que gócbu «páa» ni más galán que maná ni biduʼdy Dios xfamil buñ judíos ló dzú ni see? Jesús gocné layibu ñenyibu órni goniʼbu: «Páa ni gonycuenta […] nacni xpeʼela». ¿Xí láani biduʼdybu diitz? Nainy ganno xcalrracapyni, portín modcu labúu sanno xi láani rony que xfamilno né lóono labúu guibanyno tipzó. Guibiʼno xi goniʼ Jesús.
«PÁA NI NABANY» NÉ XPEʼELBU
4. ¿Xigony bidziguiaʼ tipnés buñ órni bicadiagyibu ni goniʼ Jesús?
4 Tipnés bidziguiaʼ órni Jesús goniʼ que gonycuentbu xpeʼelbu par guibany buñ. Sigory bunyibu pensary que non ñooyibu xpeʼelpa Jesús, né ñacyibu buñ ni roo buñ (Juan 6:52). Per Jesús goniʼ stoib cós ni más nadziguiaʼyibu: «Pal diti rooto xpeʼel Xiin Buñgudxlio né diti reʼto xirunybu, diti sabanyto» (Juan 6:53).
5. ¿Xigony nanno que Jesús diti gonabbu buñ ñeʼ xirunypábu?
5 Ló xtzú Noé, Dios gochbu buñgudxlio diti ñoo runy (Gén. 9:3, 4). Né después gochbu ngúca Israel ló Ley ni cuaʼyibu. Guirá ni ñoo runy «non gaitybu» (Lev. 7:27). Né Jesús bisetlaa Ley ni cuaʼ Moisés (Mat. 5:17-19). Por ngú diti labúu gonyno pensary que Jesús gonab xidalguixo judíos ñoo xpeʼelpabu o ñeʼ xirunypabu. Né guirá diitzreʼ, Jesús bisuidybu buñcu xi láani ñonyibu par nabanyibu tipzó (Juan 6:54).
6. ¿Xí más racné lóono guienno que órni goniʼ Jesús que guá buñ xpeʼelbu né gueʼ buñ xirunybu bislooybu láani xomod toib ejemplo?
6 Riendxichni que Jesús biquiin láani xomod toib ejemplo. Diti laʼra ndeʼ ni buny Jesús láani, guisetnaladxno ni gochbu samaritana: «Ni gueʼ nís ni guiduʼdi láabu dipa salaʼnbu nís más. Xalagary ngú, nís ni guiduʼdi láabu sadxin sácni toib dxilany ni guiduʼdy galnabány tipzó» (Juan 4:7, 14). b Jesús diti goniʼ que samaritana cu nabany nosi pal ñeʼbu nís de toib pós. Láaca diti gochbu xidalguixo buñcu de gudx Capernaúm que nabanyibu tipzó pal nigolúpa ñooyibu xpeʼelpabu né ñeʼyibu xirunypabu.
¿NGÚCA GONIʼ JESÚS LA?
7. ¿Xí rony pensary tipnés buñ ni goniʼ Jesús ló Juan 6:53?
7 Tipnés buñ ni nap xireligión ná que ni goniʼ Jesús ló Juan 6:53 de guá buñ xpeʼelbu né gueʼ buñ xirunybu gocni cós ni non ñony buñ ló Cena del Señor. Né raniʼyibu ngú portín después moda ngúca goniʼ Jesús (Mat. 26:26-28). Layibu raniʼyibu que guirá ni riee ló Cena del Señor non guá páa né gueʼ vino ni radudy ladxñayibu. ¿Per, scú non gacni la? Nigolú rasac ganno xcalrracapyni portín guirá íz xidal millón buñ radop né lóono par guisetnaladxno xcalgoity Jesús. Guibiʼno ximod diti toibsi midid ni goniʼ Jesús ló Juan 6:53 né ni goniʼbu ló Cena del Señor.
8. ¿Ximod diti toibsi midid ni goniʼ Jesús órni goniʼbu de xpeʼelbu né xirunybu? (Láaca bibiʼ dibuj).
8 Guisuidyno ximod diti toibsi midid gocni. Primer, ¿pú dzú né púti goniʼ Jesús ni sieed ló Juan 6:53-56? Goniʼbu láani nisló xidal judíos lainy gudx Galilea ló íz 32 ló xtzúno. Gocni tobiz antes ni ñonybu Cena del Señor lainy gudx Jerusalén. Ni rarop, ¿chú layibu gochbu láani? Lainy gudx Galilea, casi guirá buñ ni bicadiag Jesús más goyoʼyibu ló galrrasaʼ por cós ni caquiinyibu ló sentido físico xalagary ñoʼyibu galrrasaʼ por nayopyibu Dios (Juan 6:26). Né órni Jesús góoch layibu tipnés cós ni gosac naganyibu ñenyibu, nimaca bisnityibu fe ló Jesús. Dada tipnés xpiimbu ma diti cuanal láabu (Juan 6:14, 36, 42, 60, 64, 66). Ni góc dzúcu gadzé mod gocni né ni buny Jesús tobiz después, ló íz 33, órni bunybu Cena del Señor. Órcu goyoʼ né láabu 11 apóstoles xtunybu, ná guirá biincu diti bientzaayibu xi láani casuidyibu. Diti gocyibu xomod casi guirá buñ ni goyoʼ gudx Galilea. Apóstoles xtuny Jesús gondxichyibu que láabu nacbu Xiin Dios ni bietj de guibá (Mat. 16:16). Por ngú, Jesús buny felicitar layibu: «Lóoto ngú ni diti bisian naʼ órni godudi ló prueby» (Luc. 22:28). Guirá ndeʼ raslooyni que ló Juan 6:53 Jesús diti goniʼbu xi láani ñac después ló Cena del Señor. Per noʼ más prueby.
Ló capítulo 6 xtuny Juan ritlaa ni góoch Jesús xidalguixo buñ judíos lainy gudx Galilea (lad revers). Tobiz después goninébu xpiimbu lainy gudx Jerusalén (ladbuʼ). (Bibiʼ párrafo 8).
¿XIMOD RAGUIÑA NI GONIʼ JESÚS LOOY?
9. ¿Chú layibu raguiña ni goniʼ Jesús ló Cena del Señor?
9 Ló Cena del Señor, Jesús biduʼdybu xpiimbu páa ni diti nap levadur né gochbu guirá biinreʼ que rony representarni xpeʼelbu. De ngú biduʼdybu vino né gochbu xpiimbu que rony representarni «runy xtuny acuerdo» (Mar. 14:22-25; Luc. 22:20; 1 Cor. 11:24). Né ndeʼ nigolú rasacni. Acuerdo reʼ diti racni né guirá buñgudxlio, xalagary ngú né «gudx Israel», ni raduʼdy diitz ni gony mandary né Cristo ló Gobierno xtuny Dios (Heb. 8:6, 10; 9:15). Órcu, apóstoles diti bienyibu xi láani biduʼdybu diitz. Per mápa mer ñac ungiryibu né espíritu santo né ñoʼyibu lad acuerdo copy par nacaʼyibu toib lagary cueʼ Jesús lainy guibá (Juan 14:2, 3).
10. ¿Xigony diti toibsi midid ni goniʼ Jesús lainy gudx Galilea né ni goniʼbu ló Cena del Señor? (Láaca bibiʼ retrat).
10 Non cueʼ loguiaʼno que ló Cena del Señor, ni goniʼ Jesús godiñani «tidxó xiil». Lad tidxó buñreʼ goyoʼ apóstoles ni goyoʼ né Jesús ló Cena del Señor (Luc. 12:32). Tanli layibu né stipnés buñ ni ñoʼ lad tidxó buñreʼ non ñooyibu páa né ñeʼyibu vino. Guiráyibu sacaʼyibu toib lagary cueʼ Jesús lainy guibá. Ni gochbu apóstoles xtunybu diti toibsi midid gocni né ni gochbu xidalguixo buñ lainy gudx Galilea. Órcu Jesús bunybu pensary ló más buñ, ni goniʼbu gaxca Capernaúm raguiñani xidalguixo buñ.
Goxeʼsi buñ roo páa né reʼ vino ló Memorial, per «guirá» buñ ni raslooy fe ló Jesús labúu sabany tipzó. (Bibiʼ párrafo 10).
11. ¿Ximod nanno que galnasác ni goniʼ Jesús lainy gudx Galilea diti godiñani tidxósi buñ?
11 Órni Jesús goyoʼ gudx Galilea ló íz 32, goninébu buñ judíos ni goniiny que Jesús naduʼdy páa layibu. Per, Jesús góoch layibu toib cós ni más labúu ñacné layibu que páa: toib cós ni naduʼdy galnabány tipzó layibu. Né Jesús goniʼ que buñ ni ñaity labúu ñás lad gueʼet né nabany tipzó. Láabu diti goniʼbu de galnasác ni nacaʼ tidxósi buñ, xomod ni goniʼbu ló Cena del Señor. Xalagary ngú, lainy gudx Galilea goniʼbu de toib cós ni labúu nacaʼ xidal buñ. Por ngú, goniʼbu: «Pal noʼ ni roo páa reʼ, sabanybu tipzó. [...] Páa ni gonycuenta par guibany buñgudxlio nacni xpeʼela» (Juan 6:51). c
12. ¿Xí raquiin gonyno par guibanyno tipzó xomod goniʼ Jesús lainy gudx Galilea?
12 Lainy gudx Galilea Jesús diti gochbu buñ judíos que guiránac buñ ni bibany ló dzú ni see né ni ñal después nacaʼ galnasác reʼ. Nosi ni roo páa, sacaʼ láani, ni raduʼdy diitz ni raslooy fe. Xidal buñ ni ná que nac cristianos ronyibu pensary que labúu guilaayibu nosi pal ronyibu crer ló Jesús né rabiʼyibu Jesús xomod ni Guilaa tigaagayibu (Juan 6:29, Nueva Versión Internacional). Per tipnés buñ ni bicadiag Jesús, primer bunyibu crer lóbu né después bisianyibu Jesús. ¿Xigony góc ngú?
13. ¿Xí láani biquiin ñony toib buñ par ñacbu xpiin Jesús?
13 Casi guirá buñ ni cuanal Jesús goyoʼyibu puext nacanalyibu Jesús pal naduʼdy Jesús layibu cós ni caquiinyibu. Ni goniiny layibu ngú nasial Jesús layibu, ñooyibu scásiʼ né nacadiagyibu galrrasuidy ni ñoʼ de acuerdo né ni nainy guicadiagyibu. Per Jesús bislooy que par ñacyibu xpiimbu goyoʼra más cós ni non ñonyibu. Jesús diti bieed ló Gudxlio par naduʼdybu ni caquiin buñ. Layibu ngú ni non ñeeyibu ronoʼ Jesús, ni raduʼdy diitz que nacacuentyibu né nasobyibu guirá ni nasuidy Jesús layibu (Juan 5:40; 6:44).
14. ¿Xí non gonyno par guicaʼno xcalnasác de xpeʼel né xiruny Jesús?
14 Jesús goleʼ loguiaʼ que guirá buñcu non naslooy fe. Per... ¿ló xí non ñapyibu fe? Non ñapyibu fe que beʼel né runy ni naduʼdy Jesús ñony que labúu nabanyibu tipzó. Nigolú gosac que guirá judíos cu ñapyibu fe, né lóono láaca scúca (Juan 6:40). Scú láani, par labúu guicaʼno galnasác ni raduʼdy xiruny né xpeʼel Jesús ni ritlaa ló Juan 6:53, non guislooyno que napno fe ló xcalgoitybu. Né xidal buñ labúu gony láani (Efes. 1:7).
15, 16. ¿Xí galnasác raniʼ capítulo 6 xtuny Juan guicaʼno?
15 Capítulo 6 xtuny Juan nigolú rasacni par lóono né par buñ ni ronladxno. Raslooyni balaati ronladx Jesús buñgudxlio. Lainy gudx Galilea bisialbu buñguitz gochbu buñ de Gobierno xtuny Dios né biyaʼanbu xidalguixo buñ ni calaʼn (Luc. 9:11; Juan 6:2, 11, 12). Né diti ngúsi, bisuidybu buñ que láabu ngú «páa xtuny galnabány» (Juan 6:35, 48).
16 Buñ ni goleʼ Jesús laa «stipnés xiil» diti labúu guáyibu páa né gueʼyibu vino ló Memorial (Juan 10:16). Per racaʼyibu xcalnasác xpeʼel né xiruny Jesús. Ronyibu láani órni raslooyibu fe ló xcalgoity Jesús (Juan 6:53). Per, ni non guá páa né gueʼ vino nacyibu buñ ni rioʼ ló acuerdo copy né layibu ngú ni guiané Gobierno xtuny Dios. Por ngú, capítulo 6 xtuny Juan nigolú rasacni par guiráno, ná nacno ungidos o nacno stipnés xiil. Rabeʼ loguiaʼni que nigolú rasac gapno fe par labúu guibanyno tipzó.
CANCIÓN 150 ¡Jehová será tu Salvador!
a Ló artículo ni ma bisuidyno, bisuidytzayno Juan 6:5-35.
b Nís ni bisetlaa Jesús rony representarni guirá ni ma buny Jehová par guicaʼ buñgudxlio galnabány tipzó.
c Capítulo 6 xtuny Juan raniʼni que galnabány tipzó labúu guicaʼ nitisi buñ láani, portín raquiinni diitz xomod «ni guieed» né «guirá ni» (Juan 6:35, 40, 47, 54, 56-58).
