ARTÍCULO NI GUISUIDYNO 50
CANCIÓN 135 Jehová te pide: «Sé sabio, hijo mío»
¿Ximod labúu gacnéto xiinto par gac nadip fe xtunyibu?
«Stiplóocato ganto xí láani ngú cós tzaay, xí láani ngú ni racacuent né ni raniiny Dios gonyto» (ROM. 12:2).
TEMA
Ni labúu gony bixios mbiox par gooyibu diitz sacró né xiinyibu né gacnéyibu xiinyibu gony nadip fe ni napyibu lóo Dios né ló la Biblia.
1, 2. ¿Ximod non guisac bixios mbiox órni xiinyibu guinabdiitzyibu layibu ni ronyno crer?
XIDAL buñ naniʼ que ni gac buñ bixios mbiox, nacni toib dxiin ni rac guirási ór. Por ngú, pal noʼ xiinlo ni nac mbioxsa né cayonylo rutirigaʼlni looy par gacnélo layibu gapyibu toib fe dxich, rony felicitardo looy (Deut. 6:6, 7). Conforma guiniʼsyibu, sigory sonyibu tipnés galrranabdiitz ni rasac de cós ni ronyno crer ni sieed ló la Biblia, ni raguiña ni Jehová ná que nac cós tzaay né nac cós mal.
2 Órni gac ngú, sigory primer sonyto pensary que xiinto casnit fe ni nap né por ngú tzoʼto ló galrrasaʼ. Per xiinto non gonyibu galrranabdiitz par gac nadip fe xtunyibu (1 Cor. 13:11). Por ngú diti non guidzuibyto gonyibu galrranabdiitz de cós ni ronyno crer. Non guibiʼto láani xomod oportunida par guisuidyto layibu gonyibu pensary por stipláacayibu.
3. ¿Xí guisuidyno ló artículo reʼ?
3 Ló artículo reʼ, sasuidyno ximod lóoto ni ma noʼ xiin, labúu gacnéto xiinto par 1) gac nadip fe xtunyibu, 2) guientzaayibu balaati rasac ni rony mandary Jehová ló la Biblia né 3) gony defenderyibu ni ronyibu crer. Né láaca sasuidyno tipnés cós sacróyen de galrranabdiitz ni rony mbiox né tipnés cós ni labúu gonyto xomod famil par gooyto diitz de cós ni ronyno crer.
COLGACNÉ XIINTO PAR GAC NADIP FE XTUNYIBU
4. ¿Xí galrranabdiitz labúu gap toib mbiox, né xigony?
4 Guirá cristianos ni noʼ xiin, nanyibu que ni gap buñ fe lóo Dios, diti rálneca buñ láani. Lóoto diti ma gopto fe lóo Jehová, órni golto, né scúca xiinto. Por ngú, conforma radudy tiemp, wal guinabdiitzyibu guirá ndeʼ: «¿Ximod naana que nigolúpa noʼ Dios? ¿Labúu gapa confianz ló ni ná la Biblia la?». Né la Biblia rony animarni cristianos guiquiin xpensary né gantzay «pal nigolú guirá cós» (Rom. 12:1; 1 Tes. 5:21). ¿Ximod labúu gacnéto xiinto par gac nadip fe xtunyibu?
5. ¿Xí labúu gony ni ma noʼ xiin par gacnéyibu xiinyibu gap fe ló la Biblia? (Romanos 12:2).
5 Colgony animar layibu par stipláacayibu gantzayibu pal nigolú guirá ni ronyno crer (bíil Romanos 12:2). Órni tzoʼ ni guinabdiitzyibu lóoto, colguisuidy layibu par stipláacayibu guiyopyibu xcalrracapyni né guiquiinyibu Índice de las publicaciones Watch Tower né Ni gacné a testigos xtuny Jehová guisuidyibu la Biblia. Ló Ni gacné a testigos, labúu tzeeyibu ro ná «Biblia» né guiyopyibu ro ná «Sieedni de Dios», né sadzelyibu prueby ni raslooy que la Biblia diti nosi nacni toib libro ni bicaʼ buñgudxlio, nacni «Xtiitz Dios» (1 Tes. 2:13). Por ejemplo, labúu guiyopyto información ni raniʼ de gudx asiria ni goyoʼ ló dzú ni see, ni góc laa Nínive. Ló dzú ni see, tipnés biblistas goniʼ que gudx reʼ diti nigolú goyoʼni. Per ló íz 1850 buñ bidzel yoʼ balaʼ xtuny gudx reʼ, ni bislooy que la Biblia diti rachéni (Sof. 2:13-15). Láaca labúu guisuidyto profecías ni sieed ló la Biblia ni goniʼ que Nínive nanitló, ro ná «¿Lo sabía?» ni bireʼ ló La Atalaya beʼo noviembre íz 2021. Órni xiinto guitzak ni rasuidy publicaciones xtunyno né ni rabexa tipnés libros né guiich ni rabeʼ buñnan né ni rap buñ respet, sapyibu más fe ló ni ná la Biblia.
6. ¿Ximod labúu gacné bixios mbiox xiin gony pensary? Bisetlaa toib ejemplo. (Láaca bibiʼ retrat).
6 Colgacné layibu par gonyibu pensary. Bixios mbiox napyibu xidal oportunida par guiniʼyibu né xiinyibu de la Biblia né fe ni gap buñ Dios. Labúu gooyto diitz né xiinto órni tzeeto toib museo, toib lagary ronoʼ yaguien né guieʼyen, o tzeeto museo ni noʼ lainy Betel. Por ejemplo, órni tzeeto toib museo o guibiʼto láani ló internet, labúu cueʼ loguiaʼto tipnés cós ni góc ló dzú ni see, par gacnéto xiinto gap confianz que la Biblia diti rachéni. ¿Nanyibu que laa Dios rarecaani laidy toib guiee ni nap más de 3.000 íz ni rimbu buñ xomod guiee moabita la? Guieecupa noʼni lainy Museo del Louvre, lainy gudx París (Francia). Láaca labúu guibiʼ buñ toib guiee xomodca láani ló exposición ni laa «La Biblia y el nombre divino» ni noʼ lainy Betel ni noʼ Warwick (Nueva York). Guiee moabita rasetlani que rey Mesá xtuny gudx Moab cualó gudx Israel. Né ngú noʼ de acuerdo né ni ná la Biblia (2 Rey. 3:4, 5). Fe xtuny xiinto, sac nadipni órni láapayibu guibiʼyibu prueby ni raslooy que la Biblia diti rachéni né nigolú ni náni (bitzak láani né 2 Crónicas 9:6).
Colgacné xiinto par gony nadipyibu fe ni napyibu lóo Dios né ló la Biblia órni guibiʼto tipnés cós ni goyoʼ ló dzú ni see, ni raslooy que la Biblia diti rachéni. (Bibiʼ párrafo 6).
7, 8. a) ¿Xí raslooyni lóono mod goyaʼ guirá cós sacróyen ni noʼ? Bisetlaa toib ejemplo. (Láaca bibiʼ retrat). b) ¿Xí clas galrranabdiitz labúu gacnéni xiinto par gonyibu crer que noʼ ni Bisaʼ lóono?
7 Colgony animar xiinto guibiʼ guirá ni goyaʼ. Órni tzeeto pasiary laidy dainy o gonyto dxiin ló layoo, colguislooy layibu ximod goyaʼ tipnés yaguien, guieʼ, né nimal. Guirá ndeʼ raslooyni que noʼ toib ni naní guic né nap sabiduría ni bisaʼ láani. Por ejemplo tipnés buñnan por xidal íz casuidyibu ximod tipnés yaguien, nimal, né stipnés cós ni goyaʼ nac xomod bixóny. Toib biofísico ni laa Nicola Fameli, ná que órni ragab buñ balac bixóny napni. Radzel buñ tipnés números. Números reʼ laani la sucesión de Fibonacci. Noʼ xidal cós ni nac xomod bixóny, xomod xpichóc mainygúchbee, xquix tipnés yaguien, guieʼ girasol, né tipnés vitzón ni raguaʼ montón toibsi lagary ni ló dixtil laa galaxia, láaca racni bixóny. a
8 Lainy yolayscuel, xiinto sasuidy que noʼ tipnés leyes ni raniʼ ximod gac xidal cós. Por ejemplo, guirá yac rabeʼni sosni, tpnésni primer rabeʼni sos nadxoʼni, de ngú maca rabeʼni sos lasni né de ngú rabeʼni sos miʼtni. Né ndeʼ ni raniʼ buñ fractal. Ndeʼ láaca radzelni ló stipnés cós ni ma goyaʼ. Per ¿chú goloʼ guirá leyes reʼ ni raniʼ ximod gacni? ¿Chú láabu rony que guirá ni goyaʼ diti soosi gacni? Pal xiinto casi guirá ór ranabdiitzyibu ndeʼ lóoto, sapyibu confianz que Dios bisaʼ guirá cós ni noʼ (Heb. 3:4). Né órni guidxin ór, labúu guinabdiitzto layibu: «Pal Dios bisaʼ lóono, ¿diti láani ngú gonyno crer que láaca raibybu lóono ximod gonyno par guibanyno nakit la?». De ngú labúu guislooyto layibu ni raiby Dios lóono ló la Biblia.
NASA, ESA, and the Hubble Heritage (STScl/AURA)-ESA/Hubble Collaboration
¿Chú bisaʼ guirá cós sacróyen ni noʼ? (Bibiʼ párrafos 7 né 8).
COLGACNÉ LAYIBU PAR GUIENYIBU BALAATI RASAC NI RONY MANDARY JEHOVÁ LÓ LA BIBLIA
9. ¿Xí labúu ñony que toib mbiox nanabdiitz pal racnéni lóono ni guisobno ni rony mandary Jehová ló la Biblia?
9 Pal xiinto moda diti rony crer balaati rasac ni rony mandary Jehová ló la Biblia, colguiyopy mod guiento xigony ronybu láani. ¿Nacni portín diti noʼyibu de acuerdo né ni ná la Biblia la? ¿O portín diti nanyibu ximod cuéxayibu principios ni sieed ló la Biblia órni rioʼ ni ranabdiitz layibu? Mod nitisi nacni, toib cós ni sacné layibu par guisac par layibu principios ni sieed ló la Biblia, láani ngú guisuidyibu libro ni laa Bibany goxtiguie. b
10. ¿Ximod labúu gacnéto xiinto par guidzaktzayibu Jehová?
10 Colgony animar layibu guidzaktzayibu Jehová. Órni guisuidyto né xiinto, colguiquiin galrranabdiitz né ejemplos ni sieed ló libro Bibany goxtiguie par guiyopyto mod guiniʼyibu ni noʼ lainy xcalnabanyibu né ni ronyibu pensary (Prov. 20:5). Por ejemplo, lesiony 8 ratzakni Jehová né toib amig ni racné lóono ganno xi láani gonyno par tzeeni galán lóono né diti guisaclono cós mal. Después ni guisuidyto ni ná 1 Juan 5:3, labúu guinabdiitzto xiinto ndeʼ: «Mod ma bienno, Jehová nac ximigno, por ngú ¿ximod non guibiʼno cós ni ranabbu lóono gonyno?». Ralooyni toib galrranabdiitz senciysi láani, per labúu ñacnéni xiinto par nabiʼyibu leyes xtuny Jehová, xomod toib mod ni raslooybu que nadxiʼbu lóono (Is. 48:17, 18).
11. ¿Xí labúu gonyto par guisac más par xiinto principios ni sieed ló la Biblia? (Proverbios 2:10, 11).
11 Colguiniʼ ximod racnéni lóono ni rasobno ni ná la Biblia. Órni goʼolto la Biblia toibsi, o texto ni rolno guirá dzú, colguiniʼ ximod ma gocné principios ni sieed ló la Biblia xfamilto. Por ejemplo, ¿rienyibu ximod racnéni lóono ni gonyno dxiin né diti cuanno la? (Heb. 13:18). Láaca labúu cueʼ loguiaʼto ximod rap principios ni sieed ló la Biblia lóono ló sentido físico né emocional (Prov. 14:29, 30). Ni gooyto diitz de guirá principios ni sieed ló la Biblia, sigory sacnéni xiinto par guisac más par layibu consej ni sieed ló la Biblia (Bíil Proverbios 2:10, 11).
12. ¿Xí rony toib galtzeʼel par gacnéyibu xiingaʼnyibu guieen balaati rasac principios ni sieed ló la Biblia?
12 Steve, ni rabés lainy gudx Francia, rasetlabu ximod láabu né tzeelbu racnéyibu xiingaʼnyibu ni nac mbioxhlasiensa ni laa Ethan, guibiʼ ximod raslooy Jehová xcalnadxiʼ ló guirá ni rony mandarybu, láabu nábu: «Ranabdiitzdo láabu cós xomod ndeʼ: ¿Xigony ranab Jehová lóono gapno respet principio reʼ? ¿Ximod raslooy principio reʼ que Jehová nadxiʼ lóono? ¿Né xí ñac pal diti nasoblo láani?». Guirá ndeʼ ma gocnéni Ethan par guiniiny láabu guisobbu ni rony mandary Jehová lóono. Steve ná: «Ni nainy lóodo láani ngú que Ethan guieen que sabiduría xtuny la Biblia más galán láani que sabiduría xtuny buñgudxlio».
13. ¿Ximod labúu guisuidyto xiinto par guisobyibu principios ni sieed ló la Biblia? Bisetlaa toib ejemplo.
13 Colguisuidy xiinto guisob principios ni sieed ló la Biblia. Toib oportunida par gonyto láani, ngú órni xomextra xiinto ranab layibu goʼolyibu toib libro. Pentzi libro ni goʼolyibu, raslooyni que galán gony buñ xomod guirá buñ ni sieed loni, ni rony galyoxh né ronynaa stipnés. Labúu gony animarto xiinto par guitzakyibu mod nac guirá buñreʼ, né principios ni sieed ló la Biblia (Prov. 22:24, 25; 1 Cor. 15:33; Filip. 4:8). Ndeʼ labúu sacnéni layibu par guiniʼyibu de la Biblia né xomextrayibu né xcompañeryibu órni guiniʼyibu ni bíilyibu.
COLGUISUIDY LAYIBU GONY DEFENDERYIBU NI RONYIBU CRER
14. ¿Xí tema labúu nadzuiby xiinto, né xigony?
14 Rioʼ ór tipnés mbioxhlasien riatz confianz layibu par gony defenderyibu ni ronyibu crer. Pentzi diti rapyibu confianz láacayibu órni lainy yolayscuel, xomextrayibu raniʼ que sieelno de mig. Portín xidal mextra raniʼ de láani, suusi ma ñoʼ prueby ni raslooy que nigolú sieelno de mig. ¿Ximod labúu gacnéto xiinto par gapyibu confianz ni raquiinyibu par gony defenderyibu ni ronyibu crer?
15. ¿Xí láani labúu sacné xiinto par gapyibu confianz ló ni ronyibu crer?
15 Colgacné xiinto par gapyibu más confianz ló ni ronyibu crer. Diti noʼ xi portín guitoyibu por ni ronyibu crer que noʼ toib ni Bisaʼ lóono (2 Tim. 1:8). Noʼ xidal científicos ni rien que galnabány diti stipláacani bidxinni. Órni rabiʼyibu mod goyaʼtzay guirá ni noʼ, rabiʼyibu que noʼ toib ni naní guic ni bisaʼ láani. Por ngú, diti ronyibu crer que sieelno de mig, xomod rasuidy buñ lainy yolayscuel ni noʼ ló guidopynac Gudxlio. Labúu gac nadip fe xtuny xiinto, órni guisuidyibu xi láani buny que stipnés hermanos né hermanas ñap confianz que noʼ toib ni bisaʼ galnabány. c
16. ¿Ximod labúu gacnéto xiinto par gony defenderyibu ni ronyibu crer que noʼ ni Bisaʼ lóono? (1 Pedro 3:15; láaca bibiʼ retrat).
16 Colguisuidy xiinto par gony defenderyibu fe ni napyibu ló ni Bisaʼ lóono (bíil 1 Pedro 3:15). Pentzi sacné lóoto goʼolto toibsi serie de artículos ni laa «¿Creación o evolución?» ni sieed ló jw.org, ro ná «Los jóvenes preguntan». De ngú colguinabdiitz layibu xi labúu naquiinyibu par ñacnéyibu buñ naduʼdy cuent que noʼ toib ni Bisaʼ lóono, né colguisuidy ximod nabexato láani. Colgaiby layibu que diti noʼ xi portín tíildiitzyibu né xcompañeryibu. Per pal noʼ ni rasaguel gooy diitz né layibu, labúu guiquiinyibu tipnés cós senciy par cuéxayibu láani. Por ejemplo, toibtica xcompañeryibu labúu gaiby layibu: «Naʼ nosi roni crer ló ni rabiʼya, né dipa ma bibiʼya Dios». Xiinto labúu nacapy layibu: «Buny pensary que noʼlo lainy toib guixdaʼ, ro yadi buñ, né nadzelo toib yoʼ. ¿Ñonylo pensary que goyoʼ toib ni bisaʼ láani ja? Pal yoʼcu, goyoʼ ni bisaʼ láani, láaca noʼ toib ni naní guic ni bisaʼ guirá ni noʼ lainy guibá né ló Gudxlio».
Órni guininé buñ xcompañer, más galán guiquiin buñ tipnés cós senciysi. (Bibiʼ párrafos 16 né 17). d
17. ¿Ximod labúu gony animarto xiinto par guiyopyibu oportunida guiniʼyibu de la Biblia? Bisetlaa toib ejemplo ni labúu nanabdiitzyibu xcompañeryibu.
17 Colgony animar xiinto par guiyopyibu oportunida guiniʼyibu de la Biblia (Rom. 10:10). Ni guiniʼ buñ de la Biblia, nacni xomod órni rascoʼol buñ toib instrumento. Primer naganni, né nosi rabeʼ buñ tón ni diti tampa nagan, per conforma radudy tiemp né rasuidy buñ ma diti tampa naganni. Ngúca rac órni ranino de fe xtunyno: más galán senciysi salóno guininéno buñ. Por ejemplo, xiinto labúu guinabdiitzyibu toibtica xcompañeryibu: «¿Nanlo que xidal ingenier rasuʼ mod goyaʼ guirá ni noʼ la? Bibiʼ video sacróyen reʼ». De ngú labúu coʼyibu toib video de serie ni laa «¿Chú bisaʼ láani?» né guinabdiitzyibu: «Pal buñ raliskiaʼ científicos ni rasuʼ mod goyaʼ guirá ni maca noʼ, ¿chú láabu non guiliskiaʼno por ni bisaʼpa guirá ni noʼ?». Modreʼ labúu gonyibu que xcompañeryibu guiniiny gan más.
COLGACNÉ XIINTO PAR GONY NADIPYIBU FE XTUNYIBU
18. ¿Ximod labúu gacnéto xiinto par gony nadipyibu fe xtunyibu lóo Dios?
18 Rabésno ló toib gudxlio ro xidal buñ diti rony crer lóo Jehová (2 Ped. 3:3). Por ngú, órni guisuidyto la Biblia né xiinto, colgony animar layibu par guisuidyibu temas ni gacné layibu par gapyibu más respet Xtiitz Dios né ló ni ronybu mandary. Colgacné layibu par guibiʼyibu mod sacróyen ni bisaʼ Jehová guirá cós, né modcu gonyibu pensary. Colgacné layibu par guientzaayibu profecías ni sieed ló la Biblia ni ma góc cumplir. Né ni máspa, colgony oración né xiinto né colguinab lóo Dios por layibu. Labúu gapto confianz que Jehová saduʼdybu galnasác lóoto por ni cayonyto rutirigaʼlni lóoto, por gacnéto layibu gac nadip fe xtunyibu (2 Crón. 15:7).
CANCIÓN 133 Sirvamos a Jehová en nuestra juventud
a Pal nainy ganlo más, bibiʼ ló jw.org video ni laa Las maravillas de la creación revelan la gloria de Dios.
b Pal xiinto ma biloxyibu bisuidyibu libro ni laa Bibany goxtiguie, labúu gonyto toib repas tipnés lesiony ni sieed ló midid 3 né 4, ni rasetlaa ni rony mandary Jehová ló la Biblia.
c Bibiʼ artículo ni laa «Por qué creemos que hay un Creador», ni bireʼ ló ¡Despertad! beʼo septiembre íz 2006, né follet ni laa El origen de la vida. Cinco cuestiones dignas de análisis. Par ganlo más ejemplos bibiʼ ló jw.org serie de videos ni laa «Buñnan raniʼ xigony rony crer lóo Dios».
d MOD RAREXA DIBUJ NÉ RETRAT: Toib mbioxhlas ni nac Testigo raslooybu xcompañerbu ni rioladx aparatien ni rasapy né rabeʼ video né retrat, toib video ni sieed ló serie «¿Chú bisaʼ láani?».
