Apóstol Pablo bicaʼ diitzreʼ lóo Timoteo, ni láaca góc anciano xomod láabu: «Nisló Dios, Cristo Jesús né ángeles ni ma golúbu roni mandary ndeʼ looy: guisoblo guirá instrucciones reʼ né diti gony juzgarlo buñ por mod rienyibu né cobioolo layibu toibsi midid» (1 Tim. 5:21). ¿Chú layibu ngú «ángeles ni ma golúbu»?

Par labúu ganno chú layibu nac ángeles reʼ, primer ganno chú layibu diti labúu gac ángeles ni bisetlaa Pablo. Riendxichni que Pablo diti goniʼ de 144.000 ungidos ni tzee guibá. Órni Pablo bicaʼbu guiich lóo Timoteo, yása guiás ni toib ungido lainy guibá. Apóstoles né stipnés ungidos nacsayibu buñgudxlio órcu. Por ngú diti labúu ñacyibu «ángeles ni ma golúbu» ni rasetlaa Pablo (1 Cor. 15:50-54; 1 Tes. 4:13-17; 1 Juan 3:2).

Láaca diti labúu ñacyibu ángeles ni góc nayaʼ ló xtzú Noé. Ángelescu goyoʼyibu xilad Buñdzab, né bidxin gocyibu demony né xi enemig Jesús (Gén. 6:2; Luc. 8:30, 31; 2 Ped. 2:4). Ló dzú ni sietra, Jesús sasieg layibu lainy toib abismo por 1.000 íz, né de ngú sanitlóyibu toibsi né Buñdzab (Jud. 6; Apoc. 20:1-3, 10).

Toibsi lagary ritlaa «ángeles ni ma golúbu» né Dios né Cristo Jesús ló 1 Timoteo 5:21, por ngú ángelescu nacyibu ángeles ni diti rasian Jehová, ni noʼ guibá né cayony dxiin toibsi né Dios né Jesús.

Noʼ xidalguixo ángeles ni diti rasian Jehová (Heb. 12:22, 23). Diti noʼ razón par gonyno pensary que tigaaga dxiin ni raduʼdy Jehová layibu, guiráyibu ronyibu láani toibsi ór (Apoc. 14:17, 18). Guisetnaladxno que toibtica buelt toibsi ángel bigaity 185.000 soldad asirios (2 Rey. 19:35). Láaca mod goniʼ Jesús, ralooyni tipnés ángeles sabeʼ «de Gobierno xtunybu guirá cós ni riné buñ gony galkié né buñ ni diti rasob ley» (Mat. 13:39-41). Pentzi stipnés ángeles «satopyibu guirá ni ma golúbu» par tzee guibá (Mat. 24:31). Né stipnés ángeles racaʼ instrucción par gapyibu lóono ló xinésno, mod ná Salmo 91:11 (Mat. 18:10; bitzak láani né Mateo 4:11 né Lucas 22:43).

Mod ma bibiʼno, «ángeles ni ma golúbu» ni ritlaa ló 1 Timoteo 5:21 nacyibu ángeles ni nap toib dxiin ni raguiña congregación. Ló contexto reʼ, Pablo caniʼ de ancianos né caduʼdybu consej herman par gap respet ancianos. Né láaca ancianos non ñony cumpliryibu né xchiinyibu galán, né diti non ñony juzgaryibu buñ por mod rien, nagobioyibu buñ toibsi midid, né dipa non ñac naguelyibu ñonyibu toib cós. ¿Xigony? Pablo goniʼ né xcalrracné Dios, toib razón ni nigolú rasac, órni goniʼbu que guirá ancianos cayonyibu dxiin por herman «nisló Dios, Cristo Jesús né ángeles ni ma golúbu». Ló stoib diitz, Jehová, Jesús né «ángeles ni ma golúbu» cabiʼ ximod ran ancianos congregación. Por ngú riendxichni que noʼ ángeles ni racaʼ tipnés dxiin ni raguiña congregación, xomod ni gapyibu xpiin Dios, guibiʼyibu ximod rac predicación, né gaibyibu Jehová ni rabiʼyibu (Mat. 18:10; Apoc. 14:6).