¿Bíilo guirá Guiich ni caniʼ ni bireʼ íz reʼ la? Gon pal labúu guicapylo guirá galrranabdiitz ni sieed reʼ:

¿Xí ejemplo raduʼdy Jehová buñguieeu mod cobioyibu buñgonaʼ?

Jehová ragobioo guirá buñgonaʼ né par láabu diti más rasac buñguieeu que buñgonaʼ. Racadiagbu né rioʼbu galrrasaʼ por mod rasac buñgonaʼ né galnagan ni radudyibu ló, né rapbu confianz que buñgonaʼ labúu gony dxiin ni raduʼdybu (w24.01, páginas 15 né 16).

¿Ximod labúu guisobno Efesios 5:7, ro ná: «Diti gacto toibsi né layibu»?

Apóstol Pablo gochbu lóono diti guidzakno buñ ni rony que guisac naganno guisobno ni rony mandary Jehová. Ndeʼ diti nosi raguiñani órni rabiʼno láabu, láaca raguiñani diti guidzakno layibu ló redes sociales (w24.03, páginas 22 né 23).

¿Xí historias diti non guicadiagno?

Non gapno cuidad né historias ni diti nanno pal nigolúpani, ni pentzi ximigno ni ná gacné lóono raxel lóno, o ni radxin ló correo electrónico ni diti rimbuno, né ni raniʼ buñ ni ralooyni ná gan más de la Biblia per nac apóstata (w24.04, página 12).

¿Xí láani nanno né xí láani diti nanno mod gony juzgar Jehová rey Salomón né buñ ni goity lainy gudx Sodoma né Gomorra né ló Diluvio?

Diti nanno pal Jehová binitló layibu por tipzó, ni nanno láani ngú, que láabu nanbu ximodpa gocyibu né que napbu galrronladx (w24.05, páginas 3 né 4).

¿Xí rasuidyni lóono ni Jehová nac «Guielaa»? (Deut. 32:4).

Labúu guilaano ronoʼ Jehová. Labúu gapno confianz lóbu, portín guirá ór rony cumplirbu ni raniʼbu. Né láaca diti radzaʼbu, Jehová diti satzaʼbu mod nacbu né ni nábu gonybu (w24.06, páginas 26 a 28).

¿Xí sacné lóono par guiaʼno lainy toib congregación copy?

Gapno confianz que Jehová sacné lóono modpa gocnébu xpiimbu ló dzú ni see, diti guitzakno ro bireʼno né ro bidxinno, gonyno dxiin par guibiʼno congregacioncu xomod congregación xtunyno, né gonyno rutirigaʼlni lóono par guidzelno ximigno (w24.07, páginas 26 a 28).

¿Xí lesiony rasuidyno de tzón parábolas ni sieed ló capítulo 25 xtuny Mateo?

Parábola xtuny xiil né chiv rabeʼ loguiaʼni que non guislooyno que diti rasianno Jehová, xtuny 10 vírgenes raniʼni que non tzoʼno puext né naní, né parábola xtuny talentos rasuidyni lóono que non guislooyno que ronyno dxiin (w24.09, páginas 20 a 24).

¿Balac midid góc nasoʼ pórtico ni gop templo xtuny Salomón?

Ló tipnés guiichgool, 2 Crónicas 3:4 ná que góc nasoʼni «120 codos», ni raduʼdy diitz que góc nasoʼni 53 metros (175 pies). Per stipnés guiich ni labúu gapno confianz, náni que góc nasoʼni «20 codos», ni raduʼdy diitz, 9 metros (30 pies). Cueʼ yoʼ niis ro goyoʼ buñ lainy templo, diti labúu nacalanyni toib pórtico de 120 codos, por ngú pórtico cu góc nasoʼni 20 codos (w24.10, página 31).

¿Xí raduʼdy diitz que siervos ministeriales gapyibu toibsi tzeʼelyibu? (1 Tim. 3:12).

Toib siervo ministerial ni ma cuaʼ buñ, nosi toib tzeelbu tzoʼ, né diti non gonybu galyoxh. Né láaca diti más coʼbu cuent stoib buñgonaʼ (w24.11, página 19).

¿Xigony nanno que ni ná Juan 6:53 diti raguiñani Cena del Señor?

Ló Juan 6:53, Jesús goniʼ que buñ raquiin guá xpeʼelbu né gueʼ xirunybu. Diitzreʼ goniʼbu láani lainy gudx Galilea ló íz 32, nisló xidal judíos ni diti ma gop fe láabu. Per órni bunybu Cena del Señor lainy gudx Jerusalén, tobiz después, goninébu buñ ni ñony mandary né láabu lainy guibá (w24.12, páginas 10 né 11).