1, 2. ¿Xigony guirá íz rioʼno Memorial?

 JESÚS goity por lóono ma de goló 2.000 íz, né por xcalgoitybu labúu guibanyno tipzó. Goxin ni ma gaitybu bunybu toib lanii senciy ro biquiimbu páa né vino. Gochbu xpiimbu ñonyra láani par nasetnaladxyibu galrronladx ni bislooy Jesús layibu (1 Cor. 11:23-26).

² Lóono ni nacno xpiin Jesús rasobdiitzno mandarycu portín ronladxgoluʼno láabu (Juan 14:15). Guirá íz ló xtzú Memorial, raslooyno que nigolú rasac xcalgoitybu por lóono. Por ejemplo, rabeʼno tiemp par gonyno oración né par gonyno pensary ló xcalgoitybu. Láaca, nigolú rabaladxno cueʼno tiemp par guininéno buñ né guiruʼno layibu par gony compañeryibu lóono ló Memorial. Gac nitisi gac, diti nainy lóono gony faltno ló Memorial.

3. ¿Xí guisuidyno ló artículo reʼ?

³ Lóono ni nacno xpiin Jehová ronyno xtem par guisetnaladxno xcalgoity Cristo. Ló artículo reʼ guisuidyno tzón cós ni raslooy láani: 1) ronyno Memorial xomodpa goniʼ Jesús láani, 2) raruʼno stipnés par guidxin  ló Memorial né 3) ronyno láani ná cacalóno galnagan.

4. a) ¿Xí láani rientzaayno ló Memorial guirá íz? (Lucas 22:19, 20). b) ¿Xigony nigolú rasac guientzaayno láani?

⁴ Guirá íz órni rioʼno Memorial, racadiagno toib discurs ni rareʼ ló la Biblia, ni racapy tipnés galrranabdiitz. Por ejemplo, xigony raquiin tzoʼ ni guilaa lóono né ximod por xcalgoity toibsi buñguieeu riax xcalkié xidal buñ. Rarexa chú roo páa né reʼ vino né xi radudyni diitz (bíil Lucas 22:19, 20). Discurscu racné lóono guisetnaladxno galnasác ni guicaʼno órni guibanyno por tipzó ló Gudxlio (Is. 35:5, 6; 65:17, 21-23). Nigolú rasac guientzaayno láani, diti guibixladxno láani. Noʼ xidalguixo millón de buñ ni diti rien láani, né par layibu diti rasac xcalgoity Jesús. Láaca diti rasetnaladxyibu xcalgoity Jesús xomod buny mandarybu láani. ¿Xigony racni scú?

5. Después ni goity casi guirá xpiin Jesús, ¿ximod gosaló buñ bisetnaladx xcalgoitybu?

⁵ Diti xidzú de goló goity xpiin Jesús, cristianos falz gosaló goyoʼyibu lainy congregación (Mat. 13:24-27, 37-39). Goniʼyibu «por galrrascú par guichelyibu xpiin Jesús» (Hech. 20:29, 30). Toibtica galrrascú ni bisuidyibu láani ngú que Jesús diti goity tipbueltsi par tudy xcalkié buñ scásiʼ. Bisuidyibu que Jesús non ñaity xidal buelt, per diti ngú ni rasuidy la Biblia (Heb. 9:27, 28). Ló naareʼ xidal buñ ni natzaay xcalnabany rony crer ló galrrasuidy falzcu. Rieeyibu guidaʼ guirá xomal né dada guirá dzú par gonyibu ni rimbu buñ xomod mix. b Noʼ stipnés religión ni diti tampa rasetnaladx xcalgoity Jesús, per guirá buñ ni racanal layibu diti rienyibu xi radudyni diitz. Sigory noʼ ni ranabdiitz ndeʼ: «¿Labúu tudy xcalkiéya scásiʼ por xcalgoity Jesús la?». Ranabdiitzyibu ndeʼ portín noʼ ni rasuidy layibu que xcalgoity Jesús diti satudy xcalkiéyibu scásiʼ. Né ni merpa nac xpiin Jesús, ¿xí láani ma bunyibu?

6. ¿Xí láani bieen tipnés buñ ni bisuidy la Biblia ló íz 1872?

⁶ Ló íz setenta xtuny siglo diecinueve, toib grupo ni bisuidy la Biblia, ro gosanir Charles Russell, nanoydiguieʼ gosaló bisuidyibu la Biblia. Goniiny ñanyibu xi radudy diitz xcalgoity Jesús né modreʼ ñanyibu ximod nasetnaladxyibu láani. Ló íz 1872 né xcalrracné la Biblia bienyibu que por xcalgoity Jesús labúu guilaa guiránac buñgudxlio. Né diti bicachyibu ni bisuidyibu. Xalagary ngú goleʼyibu láani ló libros, periódicos né revistas. Diti xidzú gosaló bunyibu Memorial toib buelt ló toib íz, xomodca buny cristianos ni bibany ló siglo primero.

7. ¿Ximod racné lóono ló naareʼ guirá ni bisuidytzay xpiin Jehová ló dzú ni see?

⁷ ¿Ximod racné lóono ló naareʼ guirá ni bisuidytzay xpiin Jehová ló dzú ni see? Jehová bisiab xcalnasác ló xtem ni bunyibu né por láani rientzaayno xi láani radudy diitz xcalgoity Jesús né guirá galnasác ni guitnéni (1 Juan 2: 1, 2). Láaca ma bisuidyno chop galnasác ni guicaʼ buñ ni guisob ni ná Dios: tipnésyibu sabanyibu por tipzó lainy guibá né xidalguixo sabany por tipzó ló Gudxlio. Né más rabigaxno Jehová órni ronyno pensary balaati ronladxbu lóono né balaati racné xcalgoity Jesús lóono (1 Ped. 3:18; 1 Juan 4:9). Por ngú, xomodca cristianos ni bibany ló dzú ni see, raruʼno stipnés buñ gony compañer lóono ló Memorial, xomodpa goniʼ Jesús gacni.

8. ¿Xí láani ma buny xpiin Jehová par guiruʼyibu stipnés buñ ló Memorial? (Bibiʼ retrat).

⁸ Xpiin Jehová ma sanéyibu xidal íz caruʼyibu buñ par tzee Memorial. Ló íz 1881, revista reʼ biruʼni herman de Estados Unidos par nadopyibu lainy toib yoʼ ni goyoʼ Allegheny (Pensilvania) par ñonyibu láani. Después tigaaga congregación gosaló buny Memorial. Per ma ló beʼo marz íz 1940 gochyibu publicadores naruʼyibu nitisi buñ ni naniiny ñee. Né ló íz 1960, primerdiguieʼ buelt bixel Betel invitación ni bireʼ ló guiich par guirá congregación. Desde dzúcu, testigos xtuny Jehová ma bikiʼsno xidal mil de millón de invitación. ¿Xigony nigolú rabeʼno xiroʼ tiemp né ronyno xtem par gac dxiinreʼ?

9, 10. ¿Chú layibu raruʼno par guidxin ló Memorial? (Juan 3:16).

⁹ Toibtica razón por ni raruʼno stipnés buñ ló Memorial, láani ngú portín nainy lóono ganyibu xi láani ma buny  Jehová né Jesús por layibu (bíil Juan 3:16). Nainy lóono que ni guibiʼyibu né ni guicadiagyibu goxincu guichiin layibu guimbutzaayibu Jehová né gacyibu xpiin Jehová. Per diti nosi layibu raruʼno.

¹⁰ Láaca raruʼno ni nac inactivos. Raruʼno layibu ló Memorial par guisetnadxyibu que Jehová ronladxsa layibu. Rabaladxgoluʼno órni radxin xidal buñ ló Memorial. Goxincu rasetnaladxyibu que nigolú nakit goyoʼyibu órni bunyibu xchiin Jehová. Guibiʼno ni gosaclóo Mónica. c Ló pandemia xtuny COVID-19 gosaló goniʼbu xtiitz Dios stoib. Después ni goyeebu Memorial íz 2021, goniʼbu: «Memorial reʼ nigolú gosacni par naʼ. Ndeʼ nac primer buelt después de 20 íz ni caruʼya buñ guidxin ló Memorial. Buni láani né guidopy xcalnabani, portín diti noʼ stoib mod ni guidudy guixquix Jehová né Jesús por ni bunyibu por naʼ» (Sal. 103:1-4). Ná pal guicacuent buñ invitación xtunyno o yaca, ronyno rutirigaʼlni lóono guiruʼno layibu portín nanno que par Jehová nigolú rasac xtem ni ronyno.

11. ¿Ximod ma bisiab Jehová xcalnasác por ni raruʼno buñ guidxin ló Memorial? (Ageo 2:7).

¹¹ Jehová ma bidudy galnasác lóono por ni raruʼno buñ guidxin ló Memorial. Por ejemplo ló íz 2021, ná goyoʼ COVID-19 más bidop buñ, bidop midid 21.367.603 buñ. Más xidal buñ ni diti nac testigo xtuny Jehová bidop ló Memorial. Ná nanno que par Jehová más rasac buñ que cantidad ni bidop (Luc. 15:7; 1 Tim. 2:3, 4). Nandxichno que Jehová raquiin campaña xtuny Memorial par guidzelno buñ ni natzaay xcalnabany (bíil Ageo 2:7).    

12. ¿Xí galnagan labúu nacaa lóono par ma diti ñonyno Memorial? (Bibiʼ retrat).

¹² Jesús goniʼ que ló dzú ni ma guidubylagaʼ sacalóno xidal clas galnagan: xfamilno sacaló lóono, sioʼ persecución, guerr, salatgoluʼ galguitz… (Mat. 10:36; Mar. 13:9; Luc. 21:10, 11). Guirá galnagan reʼ labúu nacaani lóono par nadopno ló Memorial. ¿Xí láani ma buny xhermanno ló galnagan reʼ, né ximod ma gocné Jehová layibu?

13. ¿Ximod bisiab Jehová xcalnasác ló balory ni gop Artiom órni bunybu Memorial lainy press?

¹³ Press. Herman ni noʼ press ronyibu rutirigaʼlni layibu par guisetnaladxyibu xcalgoity Jesús. Guisuidyno ni gosaclóo Artiom. Ló xtzú Memorial íz 2020, goyoʼbu lainy toib press ni góc midid 17 metros cuadrados, dada 5 buñ bisiegyibu lagarycu. Ná scú, labúu bidzelbu tipnés cós ni naquiimbu ló Memorial né goyoʼbu puext par láacabu natudybu discurscu. Per goyoʼ toib galnagan: buñ ni bieg né láabu godob né goniʼ diitznaa. ¿Xí láani buny Artiom? Gochbu guirá buñreʼ que ló tib ór diti naniʼyibu diitznaa nili nagobyibu. Nigolú bidziguiaʼbu órni guirá buñreʼ gosaguel. Láabu nábu: «Goodxi layibu que nabexaya xi radudy diitz Memorial». Ná biincu góoch láabu que diti nainy ganyibu láani,  después ni bunybu Memorial goniiny ñanyibu más.

14. ¿Xí láani buny xcudx Jehová par labúu ñapyibu Memorial ná gosaló pandemia xtuny COVID-19?

¹⁴ Pandemia xtuny COVID-19. Xtol pandemia, xcudx Jehová ma diti bidopyibu lainy salón par ñapyibu Memorial. Per diti bicaani lóono par ñonyno láani. d Guirá congregaciones ni gop internet labúu buny láani por videoconferencia. Per ¿xí noʼ de xidal millón de xhermanno ni diti gop internet? Lainy tipnés gudxrop discurs xtuny Memorial godudyni por televisión o por radio. Láaca sucursal buny grabar láani ló 500 diitz, modreʼ buñ ni rabés nigolú sit labúu ñony Memorial. Né goyoʼ tipnés herman ni bilit láani ló internet né goysan láani ronoʼyibu.

15. ¿Xí rasuidyno ni gosaclóo Sue?

¹⁵ Órni xfamilno racaló lóono. Noʼ tipnés ni rasac nagan gony Memorial portín xfamilyibu racaló layibu. Ngú  ni gosaclóo toib buñ ni casuidy la Biblia ni laa Sue. Ló íz 2021, tipdzú antes de Memorial, Sue gochbu buñ ni casuidy láabu que diti labúu sonybu Memorial portín xfamilbu radzuitz. Ni rasuidy láabu bilné láabu ni ná Lucas 22:44. Gochbu Sue que órni cacalóno galnagan, más galán guisuʼno mod buny Jesús né órni guininéno Jehová gapno confianz que sacnébu lóono. Stoib dzúcu, Sue bunytzaay páa né vino par Memorial, né bibiʼbu ló jw.org adoración matutina. Después biegbu lainy xcuartbu né bicadiagbu Memorial por teléfono. Después gochbu hermana ni casuidy láabu ndeʼ: «Neg nigolú buny animarlo naʼ, buni rutigoygaʼlni naʼ par gopa Memorial, né Jehová gocné naʼ. Nigolú rabaladxi né radudi guixquix Jehová por láani». Pal cacalólo galnagan de clascu, ¿xpensarylo labúu gacné Jehová looy la?

16. ¿Xigony napno confianz que Jehová sasiab xcalnasác ronoʼno pal ronyno rutirigaʼlni lóono par tzoʼno Memorial? (Romanos 8:31, 32).

¹⁶ Par Jehová nigolú rasac ni rasetnaladxno xcalgoity Xiimbu. Napno confianz que Jehová sasiab xcalnasác ronoʼno pal radudyno guixquix por guirá ni ma bunybu por lóono (bíil Romanos 8:31, 32). Gac nitisi gac diti nainy gony faltno ló Memorial íz reʼ. Gonyno más por Jehová ló xtzú Memorial íz reʼ.