1, 2. a) ¿Xí láani rasacno órni ronyno pensary ló xcalnabany né ló dxiin ni buny Jesús laʼga goyoʼbu ló Gudxlio? b) ¿Xí guisuidyno ló artículo reʼ?

 ÓRNI raity toib buñ ni nigolú ronladxno, rioʼno nabann. Pentzi chop tzón govitz antes de gaitybu nigolú rasac nabanno, máspa pal godudybu ló galrrioʼob. Pentzi después sasetnaladxno tipnés cós de láabu ni sagoʼ nakit lóono, por ejemplo cós ni bisuidybu lóono, o toib cós ni goniʼbu o bunybu par ñoʼno nakit.

² Scúca rasaclono né xcalrrioʼob né xcalgoity Jesús. Nigolú rioʼob xcalnabanyno órni rolno ló la Biblia ni gosaclobu, xomod ronyno ló xtzú Memorial órni rabeʼno más tiemp par gonyno pensary ló ni rasac xcalgoity Jesús (1 Cor. 11:24, 25). Órni ronyno pensary ló ni bunybu né ló ni goniʼbu laʼga goyoʼbu ló Gudxlio, ragoʼ nakitni xcalnabanyno. Láaca órni ronyno pensary ló ni cayonybu ló naareʼ né ni gonybu ló dzú ni sietra, radudyni balory lóono. Ló artículo reʼ sasuidyno que pal ronyno pensary ló guirá ndeʼ né ló galrronladx ni nap Jesús lóono, sachiinni lóono guidudyno guixquix láabu de xidal mod.

3. ¿Xí razón napno par guidudyno guixquix por ni goity Jesús por lóono?

³ Laʼga ronyno pensary ló xcalnabany né ló xcalgoity Jesús rachiinni lóono guidudyno guixquix. Laʼga goyoʼbu ló Gudxlio bisuidybu buñ guirá galnasác ni guitné Gobierno xtuny Dios. Guirá galnasác reʼ nigolú rasacni  par lóono. Radudyno guixquix por ni goitybu por lóono, portín modreʼ labúu guidxin gacno ximig Jehová né ximigbu. Lóono ni napno fe lóo Jesús labúu guibanyno por tipzó né guibiʼno guiás xfamilno ni ma goity (Juan 5:28, 29; Rom. 6:23). Diti ma bunyno xitcal par guicaʼno galnasác reʼ. Dipa labúu quiixno guirá ni ma buny Jehová por lóono (Rom. 5:8, 20, 21). Per ¿ximod labúu guidudyno guixquix por láani? Guibiʼno ximod.

4. ¿Xí láani buny María Magdalena par bislooybu que bidudybu guixquix por guirá ni buny Jesús por láabu? (Bibiʼ dibuj né retrat).

⁴ Gonyno pensary ló toib buñgonaʼ judía ni góc laa María Magdalena. Nigolú godudybu ló galrrioʼob, portín goyoʼ gatz demony laidybu ni bitudy láabu ló galrrioʼob. Sigory bunybu pensary que ma diti labúu sialbu. ¿Labúu gonyno pensary ximod gosacbu órni Jesús goleʼ guirá demonycu laidybu la? Nigolú bidudybu guixquix. Por ngú gócbu xpiin Jesús, biquiimbu xfuersbu, xtiempbu né xpidxiichbu par gocnébu Jesús ló xchiin (Luc. 8:1-3). Ná nigolú gosac ni buny Jesús por láabu, pentzi diti bientzaaybu galrrascad rodann ni ma yaaca nadudy Jesús. Jesús ñonycuent xcalnabany por guirá buñgudxlio, modreʼ nitisi buñ ni ñap fe lóbu labúu nabany tipzó (Juan 3:16). Nac mod nitisi nacni, por mod buny María raslooyni que nigolú bidudybu guixquix. Órni cuá Jesús ló yac nadop goyoʼbu gax, par labúu ñacnébu Jesús né stipnés ni goyoʼ lagarycu (Juan 19:25). Né órni Jesús goyoʼ lainy baʼ, María né xchop buñgonaʼ goynéyibu guix ni ralanax par goloʼyibu láani laidy Jesús (Mar. 16:1, 2). Jehová bisiab galnasác ló guirá ni buny María. ¡Bibaladxgoluʼbu órni bibiʼbu biás Jesús lad gueʼet né labúu goninébu Jesús! Goxeʼsi xpiin Jesús gop privilegiocu (Juan 20:11-18).

5. ¿Ximod labúu guislooyno que radudyno guixquix por guirá ni ma buny Jehová né Jesús por lóono?

 ⁵ Lóono láaca labúu guidudyno guixquix por guirá ni ma buny Jehová né Jesús por lóono. ¿Ximod? Guiquiinno xtiempno, xfuersno né xpidxiichno par gacnéno guirá ni cayony Gobierno xtuny Dios. Por ejemplo, labúu tzoʼno puext órni tzaʼ né gactzay lagary ro rienno Jehová.

6. ¿Xigony ranino que xcalgoity Jesús nacni toib galrrascad par tigaagano?

⁶ Órni ronyno pensary ló galnadxiʼ rodann ni nap Jehová né Jesús lóono, láaca raniiny gonladxno layibu (1 Juan 4:10, 19). Órni rienno que Jesús goity por tigaagano, más ronladxno láabu. Apóstol Pablo nigolú bidudybu guixquix por galrrascad reʼ. Por ngú ló Gálatas bicaʼbu: «Xiin Dios […] binladx naʼ né goity por naʼ» (Gál. 2:20). Por xcalgoity Jesús, Jehová bixelcaʼ looy par gaclo ximigbu (Juan 6:44). ¿Diti radxin lainy xcalnabanylo por ni bibiʼ Jehová cós tzaay ni naplo né bunycuentbu Xiimbu goity par labúu guidzaklo láabu la? ¿Diti rachiinni looy guislooylo galrronladx Jehová né Jesús la? Por ngú guirácano labúu guinabdiitzno lóocano: «¿Xí láani rachiin galrronladx reʼ naʼ goni?».

7. Xomod sieed ló retrat, ¿xí labúu gonyno guirácano par guislooyno que ronladxno Jehová né Jesús? (2 Corintios 5:14, 15; 6:1, 2).

⁷ Galnadxiʼ ni rasacno por Dios né por Cristo rachiinni lóono gonladxno stipnés (bíil 2 Corintios 5:14, 15; 6:1, 2). Toib mod ni labúu gonyno láani ngú gony predicarno guiránac buñ né gan.  Rony predicarno nitisi buñ na nacyibu de stoib gudx, de stoib color, ná napyibu bidxiich o yaca. Modreʼ racnéno Jehová, portín «ni raniiny láabu ngú que guirá clas buñ guilaa né guimbutzaay galnan ni nigolú» (1 Tim. 2:4).

8. ¿Ximod guislooyno que ronladxno xhermanno?

⁸ Stoib mod ni guislooyno que ronladxno Dios né Cristo ngú gonladxno xhermanno (1 Juan 4:21). Por ejemplo, rioʼno galrrasaʼ por layibu, né racnéno layibu órni cadudyibu ló galnagandaʼ. Rasialdóno xcalnabanyibu órni raity toibtica xhomilyibu, riguenno layibu órni caxoʼyibu, né ronyno rutirigaʼlni lóono par gacnéno layibu órni cayoʼob xcalnabanyibu (2 Cor. 1:3-7; 1 Tes. 5:11, 14). Láaca ronyno oración por layibu, portín «oración xtuny toib buñ ni rony xinésni nigolú nadipni» (Sant. 5:16).

9. ¿Xí stoib mod labúu guislooyno que ronladxno xhermanno?

⁹ Stoib mod ni guislooyno que ronladxno xhermanno ngú gonyno xtem por guidzakno layibu sacró. Ronyno por guitudyno scásiʼ ni ronyibu lóono xomod rony Jehová láani. Gonyno pensary ló ndeʼ pal Jehová bidudybu lagary ñaity Xiimbu por xcalkiéno, ¿xí diti nimaca non guitudyno ni rony xhermanno lóono la? Diti nainy lóono gacno xomod toib buñ mal ni bisetlaa Jesús ló toib parábola. Xpixuanbu bitudy scásiʼ diʼin rodann ni gopbu, per láabu diti bitudybu scásiʼ tidxómitien ni bisapy xomósbu láabu (Mat. 18:23-35). Por ngú pal looy diti tampa radzaklo sacró né toib herman, ¿xigony diti rayopylo mod gony reglarlo galnagancu antes de Memorial? (Mat. 5:23, 24). Pal ronylo láani, saslooylo que nigolú ronladxlo Jehová né Jesús.

10, 11. ¿Ximod guislooy ancianos que ronladxyibu Jehová né Jesús? (1 Pedro 5:1, 2).

¹⁰ Ancianos labúu guislooyibu que ronladxyibu Jehová né Jesús: órni ranyibu né galrronladx xilieen xtuny Jesús (bíil 1 Pedro 5:1, 2). Xiin Dios nayadit bislooybu láani apóstol Pedro. Pedro tzón buelt goniʼbu que diti rimbubu Jesús, por ngú Jesús goniiny ñan pal Pedro ronladx láabu. Después ni biás Jesús lad gueʼet gonabdiitzbu Pedro: «Simón xiingaʼn Juan, ¿ronladxlo naʼ la?». Nandxichno que Pedro labúu ñony nitisi cós par naslooybu que nigolú ronladxbu Jesús. Né Jesús cuapy láabu modreʼ: «Gon xilieen xtuni» (Juan 21:15-17). De goló dzúcu Pedro gon né galrronladx xilieen xtuny Jesús.

¹¹ ¿Ximod labúu guislooy ancianos ló xtzú Memorial que nigolú rasac diitz ni góoch Jesús a Pedro? Labúu guislooyibu balaati ronladxyibu Jehová né Jesús pal racnéyibu herman né ronyibu xtem gacnéyibu inactivos (Ezeq. 34:11, 12). Láaca labúu gacnéyibu buñ ni casuidy la Biblia né ni laʼra cadxin ló Memorial. Rabiʼyibu guirá buñreʼ xomod toib ni labúu guidxin gac toibtica xpiin Jesús né nainy layibu que guirá buñreʼ guisac sacró.

12. ¿Xigony órni ronyno pensary ló ni goniʼ Jesús dzú ni ma gaity radudyni balory lóono? (Juan 16:32, 33).

¹² Goxin ni ma gaity Jesús, gochbu xpiimbu: «Ló gudxliogoxreʼ sadudyto ló galnagan» (bíil Juan 16:32, 33). ¿Xí  láani bidudy balory Jesús órni xi enemigbu biyopy mod nagaity láabu né labúu ñacbu fiel dada dzú ñaitybu? Confianz ni gopbu lóo Jehová. Jesús gonbu que xpiimbu nadudy ló prueby ni godudycabu ló, por ngú gonabbu lóo Jehová ñan layibu (Juan 17:11). ¿Xigony ngú racné lóono gapno balory? Portín Jehová más nap galnadip que nitisi enemig ni guicaló lóono (1 Juan 4:4). Né nanbu xi guirá casaclono. Nandxichno que pal rayopyno xcalrracné Jehová ma diti sadzuibyno né sapno balory.

13. ¿Ximod bislooy balory José de Arimatea?

¹³ Gonyno pensary ló José de Arimatea, toib buñguieeu ni gop xiroʼ galmandary ló xtzú Jesús. Goyoʼbu lad tribunal supremo xtuny buñ judíos, láani ngú Sanedrín. Per laʼga buny Jesús xchiin ló Gudxlio, buñguieeu reʼ diti gopbu balory. Juan goniʼ que buñguieeu reʼ «nagachca góc xpiin Jesús, portín bidzuibybu buñ judíos» (Juan 19:38). Ná goniiny ñanbu de Gobierno xtuny Dios, diti bislooybu ló guirá buñ que gopbu fe lóo Xiin Dios. Sigory bidzuibybu ma diti ñap buñ respet láabu. Nac mod nitisi gocni, la Biblia raibyni lóono que después ni goity Jesús, José «cuaʼbu balory, goyeebu nisló Pilato né gonabbu cuerpo xtuny Jesús» (Mar. 15:42, 43). Ma guirá buñ gon que gopbu fe lóo Jesús.

14. ¿Xí láani gonyno pal rioʼno galrrasaʼ xí guiniʼ buñ?

¹⁴ ¿Rioʼlo galrrasaʼ xí guiniʼ buñ, xomod gosaclóo José de Arimatea la? ¿Rioʼ ór ratoylo guiniʼlo lainy yolayscuel o ló dxiin que naclo testigo xtuny Jehová la? ¿Casianlo par toib ór gaclo publicador né tzonislo la? Diti guidudylo lagary que stipnés, guicaa looy par gonylo xinésni. Guirá ór gonab lóo Jehová gacné looy né guidudy balory looy par gonylo xchiimbu. Órni rabiʼlo ximod racapy Jehová oración xtunylo, saplo más fuers né balory (Is. 41:10, 13).

15. ¿Ximod gocnéni xpiin Jesús órni gonyibu que Jesús biás lad gueʼet? (Lucas 24:52, 53).

¹⁵ Órni Jesús goity guirá xpiimbu goyoʼ nabann. ¿Ximod nasaclo pal ñoʼlo xalagaryibu? Bisnityibu toib ximigdxinyibu né láaca esperanza ni gopyibu (Luc. 24:17-21). Per después Jesús bireʼ  lóoyibu, né goleʼ tiemp par góoch layibu que cayony cumplirbu profecía xtuny la Biblia. Láaca, Jesús bidudy toib dxiin ni nigolú rasac layibu (Luc. 24:26, 27, 45-48). Né órni Jesús see guibá 40 dzú después, galnabann ni gosac xpiimbu ma gocni galrrabaladx. Goyoʼyibu nakit portín gonyibu que Jesús ma nabany né que Jesús sacné layibu gonyibu dxiincu. Galrrabaladxcu bichiinni layibu ñonyxiroʼyibu Jehová né gan (bíil Lucas 24:52, 53; Hech. 5:42).

16. ¿Ximod labúu guisuʼno mod buny xpiin Jesús?

¹⁶ Né lóono gaʼ, ¿ximod guisuʼno mod buny xpiin Jesús? Gonyno xchiin Dios né galrrabaladx diti nosi ló xtzú Memorial. Par labúu gonyno láani, non coʼno xchiin Dios primer lagary. Por ejemplo, tipnés herman bitzaʼyibu ór ni bunyibu dxiin par guiniʼyibu xtiitz Dios, par tzeeyibu guirá reunión né guienyibu Jehová toibsi né xfamilyibu. Noʼ tipnés dada diti ronyibu cós ni raniiny layibu gonyibu par gacnéyibu más lainy congregación o tzeeyibu stipnés lagary ro caquiinni xcalrracné herman. Raquiin gonyno xtem par gonyno xchiin Jehová, per láabu radudybu xtiitzbu que sadudybu xiroʼ galnasác lóono pal ragoʼno Gobierno xtunybu primer lagary (Prov. 10:22; Mat. 6:32, 33).

17. ¿Xí raquiin gonyno ló xtzú Memorial? (Bibiʼ retrat).

¹⁷ Ma nainy lóono guidxin marty 4 de abril par gonyno Memorial. Per diti fuerspa guidxin dzúcu par gonyno pensary ló xcalnabany né ló xcalgoity Jesús, né ló galrronladx ni ma bislooybu né ni ma bislooy Jehová. Goleʼ tiemp ló xtzú Memorial par gonylo láani. Por ejemplo, goleʼ tiemp guisuidylo follet ni laa, Guientzaayno Xtiitz Dios ro ná 16-A né 16-B «Último xomal ni goyoʼ Jesús ló Gudxlio». Biyopy historias ni sieed ló la Biblia ni guichiin looy guidudylo guixquix, guislooylo galrronladx, gaplo balory, né guibaladxlo. Né buny pensary ximod guislooylo que nigolú radudylo guixquix de guidopy xcalnabanylo. Napno confianz que par Jesús nigolú rasac guirá ni gonyno par guisetnaladxno láabu ló xtzú memorial (Apoc. 2:19).