1. ¿Ximod ronylo pensary que nac Jehová?

 ¿MA GOYOʼ ór bunylo pensary ximod nac Jehová la? Órni ronylo oración Jehová, ¿xí láani ritzanló ló xpensarylo? Ná diti labúu rabiʼno láabu, la Biblia rasetlaa láabu de xidal mod. Por ejemplo, rabeʼni laa Dios «govitz né toib escudo», né «guii ni naguel ranitló cós» (Sal. 84:11; Heb. 12:29). Ló toib visión, profeta Ezequiel goniʼ que Jehová nac xomod toib guiee de zafiro, toib guip ni racaptzaʼ né mod racaptzaʼ toib arcoíris (Ezeq. 1:26-28). Ni ronyno pensary que nacbu scú labúu guidziguiaʼno né dada labúu guitzuibyni lóono.

2. ¿Xigony rasac nagan tipnés guibigax ronoʼ Dios?

² Diti rabiʼno Jehová, por ngú labúu guisac naganno gonyno crer que ronladxbu lóono. O sigory guirá cós ni radudyno ló, xomod ni diti gopno bixiosno ni ñonladx lóono, ngú labúu ñony que ñonyno pensary que Dios dipa ronladx lóono. Galán láani que Jehová rien mod rasacno né mod rioʼobni lóono guirá ni godudyno ló. Par labúu guienno que ronladxbu lóono, ló Xtiitzbu sieed xipa mod nacbu.

3. ¿Xigony guinino xipa mod nac Jehová né xcalnadxiʼ?

³ Diitz ni raslooy ximod nac Jehová láani ngú galnadxiʼ (1 Juan 4:8). Cualidad reʼ raniʼ ximod nacbu; ronybu guiráni por galnadxiʼ. Xcalnadxiʼbu nigolú xiroʼni, né nadipni  né dada rigaʼlni buñ ni diti ronladx láabu (Mat. 5:44, 45). Ló artículo reʼ, sasuidyno ximod nac Jehová né xcalnadxiʼbu. Laʼga más guimbuno láabu, más sonladxno láabu.

JEHOVÁ NIGOLÚ RONLADX LÓONO

4. ¿Ximod rasaclo ni ronylo pensary que Jehová nap galrronladx? (Láaca bibiʼ retrat).

⁴ «Jehová ragobiobu buñ» (Sant. 5:11). La Biblia, ratzak Jehová xomod toib xinaʼ mbiox ni nap galrronladx (Is. 66:12, 13). Buny pensary ló toib xinaʼ mbiox ni ran xiinien né galrronladx. Né galrronladx radxiʼpñebu xiinienbu, né raninébu xiinienbu né diitz nadaʼa. Órni badaʼ reʼ ribdxaʼ, raxonybu né radudybu ni caquiin xpadaʼbu. Scúca, Jehová sioʼ cueʼno órni tzoʼno nabann. Por ngú salmista bicaʼ: «Órni godudy midid goyoʼya ló galrrasaʼ, looy gocnélo naʼ né bisialdólo xcalnabani» (Sal. 94:19).

5. ¿Par looy xí láani ngú xcalnadxiʼ Jehová ni diti radzaʼ?

⁵ Jehová dipa rasiambu buñ (Sal. 103:8). Guirá ór ronladxbu lóono ná rachéno. Xidal ór, israelitas bisiobyibu xcalnabany Jehová; per órni góc arrepentiryibu, Jehová bislooy que binladxra layibu. Toibtica buelt gochbu xcudxbu: «Bidxinlo gosaclo par naʼ, bunyxiroʼ buñ looy, né naʼ nadxiʼya looy» (Is. 43:4, 5). Né Jehová diti ma bitzaʼbu. Labúu gapno confianz que Jehová ronladx lóono susica binladxbu guirá israelitas. Ná pal gonyno toib galkié rodann, láabu dipa sasiambu lóono. Pal rac arrepentirno né rayopyno xcalrracnébu, sonladxrabu lóono. Radudybu xtiitzbu que satudybu scásiʼ xcalkiéno (Is. 55:7). La Biblia ná que, órni Jehová ratudybu scásiʼ ni ronyno sasacno sacró (Hech. 3:19).

6. ¿Xí láani rasuidy Zacarías 2:8 lóono de Jehová?

⁶ (Bíil Zacarías 2:8). Jehová raslooy lóono xomod nidxiyen xtuny bisalóbu, ni radudy diitz bisaʼ yaʼasien ni noʼ lainy bisaló Jehová. Bisaló buñ nigolú nadaani né nigolú rasacni. Por ngú, nacni suusi naniʼ Jehová «Órni toib buñ rony mal lóoto, cayonybu mal ni rasac par naʼ». Jehová  ronladx lóono, por ngú rasioʼobni láabu ni radudyno ló, né nainy ganbu lóono. Órni radudyno ló galrrioʼob, láaca rioʼobni láabu. Por ngú labúu gaibyno láabu: «Gon naʼ xomod nidxiyen xtuny bisalólo» (Sal. 17:8).

7. ¿Xigony labúu gapno confianz que Jehová nadxiʼ lóono?

⁷ Jehová nainy que gonylo crer que ronladxbu looy. Riembu que mod bibanylo o galnagan ni cacalólo nigoreʼ sigory ngú labúu gony que diti gonylo crer que ronladxbu looy. Por ngú, nigolú rasac ganlo que láabu nadxiʼbu looy. ¿Xí láani labúu gacné looy? Guisuidylo ximod raslooy Jehová que nadxiʼbu Jesús, ungidos né guiráno. Ngú ni guisuidyno nigoreʼ.

JEHOVÁ RASLOOY XCALNADXIʼ

8. ¿Xigony gop Jesús confianz que Bixiosbu binladx láabu?

⁸ Jehová né Xiimbu ni ronladxbu ma por xidal íz noʼyibu toibsi. Por ngú, noʼyibu toibsi né nigolú ronladxyibu saʼyibu. Diti noʼ stoib ni radzak saʼ xomod layibu. Ló Mateo 17:5 Jehová goniʼ que nigolú ronladxbu Jesús. Diti nosi goniʼbu: «Ndeʼ Xiinna ni [...] nma cuacuenta», goniiny láabu que ñanno balaati ronladxbu né que nigolú nakit noʼbu né Jesús né ni mápa mer ñonybu. Né goniʼbu: «Ndeʼ Xiinna ni nadxiʼya» (Efes. 1:7). Jesús gopbu confianz ni gosac Jehová por láabu. Gopbu confianz que Bixiosbu binladx láabu guirá ór (Juan 3:35; 10:17; 17:24).

9. ¿Xí diitz raslooy galnadxiʼ ni nap Jehová ungidos? (Romanos 5:5).

⁹ Jehová láaca raslooy xcalrronladx a ungidos (bíil Romanos 5:5). Toib diccionario rasetlaa que diitzreʼ «bixúni» radudyni diitz toib guʼuc ni sieed laidyno. ¡Sacró mod raslooyni balaati nadxiʼ Jehová ungidos! Ungidos nanyibu que Dios nadxiʼ layibu (Jud. 1). Guiráyibu rasetlayibu que nacyibu xomod ni goniʼ apóstol Juan: «¡Colguibiʼ balaati xiroʼ galrronladx nap Bixiosno lóono, ni rareʼ laano xiin Dios! (1 Juan 3:1). ¿Nosi ungidos ronladx Jehová la? Yaca, mod guisuidyno, ma bislooybu que nadxiʼbu guirá xpiimbu.

10. ¿Xí prueby más xiroʼ noʼ que Jehová nadxiʼ looy?

¹⁰ ¿Xí prueby xiroʼ napno que Jehová ronladx lóono? Xcalgoity Jesús. Ngú raslooy que diti noʼ stoib ni ronladx lóono xomod láabu (Juan 3:16; Rom. 5:8). Jehová bunycuentbu Xiimbu ni ronladxbu né bidudybu lagary que ñaitybu par labúu nadudy xcalkiéno scásiʼ né ñacno ximigbu (1 Juan 4:10). Laʼga más ronyno pensary ló ni godix Jehová né Jesús, sienno balaati ronladxyibu tigaagano (Gál. 2:20). Jehová diti bunycuentbu Xiimbu par ñaity par ñony cumplirbu toib ley, xalagary ngú bunybu láani portín nadxiʼbu lóono. Bislooybu xcalrronladxbu lóono órni bunycuentbu Xiimbu goity, ni más rasac ni napbu, né bidudybu lagary que Xiimbu nadudy ló galrrioʼob né ñaity por lóono.

11. ¿Xí láani rasuidyno ni ná Jeremías 31:3?

¹¹ Mod ma bisuidyno Jehová diti nosi ronladxbu lóono, láaca raslooybu láani (bíil Jeremías 31:3). Bunybu que nadxinno ronoʼbu portín ronladxbu lóono (bitzak láani né ni naʼ Deuteronomio 7:7, 8). Diti noʼ stoib ni labúu cuestzoo  lóono de galnadxiʼ ni napbu lóono (Rom. 8:38, 39). ¿Ximod rasaclo ni ronylo pensary ló ndeʼ? Nigoreʼ golno ni ná Salmo 23. Laʼga golno láani, cuá cuidad ximod gocné galnadxiʼ ni gop Jehová a David né ximod labúu gacnéni looy.

¿XIMOD RASACLO NI RONYLO PENSARY BALAATI RONLADX JEHOVÁ LOOY?

12. ¿Ximod labúu naniʼlo ló chop tzónsi diitz ni ná Salmo 23?

¹² (Bíil Salmo 23:1-6). Ló Salmo 23, David goniʼ né confianz que Jehová gondxiʼ né gon láabu né galrronladx. Cu goniʼbu que Jehová góc Pastor xtunybu, né goniʼbu ximod bidzak Jehová né láabu. David sacró gosacbu portín Jehová golonés láabu. Né nigolú biyopybu xcalrracné Jehová. Gonbu que xcalrronladx Jehová ñan láabu guirá ór. Ganno xi láani gocné láabu par gopbu xiroʼ confianz lóo Dios.

13. ¿Xigony gon David que Jehová gon láabu?

¹³ «Diti siatz xitcal naʼ». David gosac que Jehová nigolú gontzay láabu portín guirá ór bidudybu ni biquiin David. Láaca gosacbu que Jehová bidzak né cuacuent láabu. Por ngú, David gosac que ñac nitisi ñac, Jehová nadudy ni naquiimbu. Gopbu confianz que xcalrronladx Jehová más xiroʼni que guirá ni godudybu ló, né ngú buny que nabaladxbu né nasacbu sacró (Sal. 16:11).

14. ¿Ximod raslooy Jehová xcalrronladx lóono?

¹⁴ Jehová ran lóono né galrrabaladx, né máspa órni radudyno ló cós mal.  Guibiʼno ni gosaclóo Claire, a ni sané más de 20 íz lainy Betel. Láabu nábu que diti gonbu xi ñonybu órni xfamilbu godudy ló galrrioʼob xitzca saʼ: bixiosbu gonás yoʼob yoobguic, toibtica beelbu góc expulsar, bisnityibu xinegosyibu né lidxyibu. ¿Ximod bislooy Jehová que cayan layibu? Claire ná: «Xcuent Jehová goyoʼ que xfamila ñap ni naquiin guirá dzú. Xitzca saʼ bidudybu ni diti godudy ló xpensari. Ragoʼtzaya lainy xcalnabani órni bislooybu xcalrronladxbu naʼ, guirá ór roni pensary lóoyibu. Racnéyibu naʼ par diti guireʼgana órni cacalóya galnagan».

15. ¿Ximod cuaʼ David fuers stoib? (Láaca bibiʼ retrat).

¹⁵ «Rony copybu fuers xtuni». David godudybu ló xidal galnagan ni goyoʼ ór bitudyni láabu ló galrrasaʼ (Sal. 18:4-6). Per ni bibiʼbu xcalnadxiʼ Jehová gocnéni láabu par nacaʼbu fuers stoib. Gosacbu que ximigbu Jehová goyné láabu ronoʼ «guixbataʼ» né «ro radaa nís». Modcu labúu gopbu fuers stoib né bunyrabu xchiin Jehová né galrrabaladx (Sal. 18:28-32).

16. ¿Ximod ma gosaclo que Jehová ma bidudy fuers looy stoib?

¹⁶ Órni racalóno galnagan, láaca labúu guinino: «Por ni ronladx Jehová lóono yása gaityno» (Lam. 3:22; Col. 1:11). Ganno xi gosaclóo Rachel. Bioʼob xcalnabanybu órni tzeelbu bisian láabu né bisian a Jehová ló pandemia de COVID-19. ¿Xí buny Jehová par gocné láabu? Láabu nábu: «Xcuentbu goyoʼ que nasaca que noʼ ni ronladx naʼ. Bidudybu xidal ximiga ni godudy tiemp né naʼ, goyné galrro ronoʼya, bixel mensaj sacróyen, né tipnés textos ni buny animar naʼ, bixiichnéyibu naʼ né bunyibu que nasetnaladxi que Jehová cayan naʼ. Xitzca saʼ radudi guixquix Jehová por guirá famil reʼ ni ronladx naʼ».

17. ¿Xigony labúu goniʼ David: «Diti sadzubi cós mal»?

¹⁷ «Diti sadzubi cós mal, portín looy noʼlo né naʼ». Xi enemig David góc buñ mal né xidal buelt mer ñaitybu. Per, xcalrronladx Jehová buny que nasacbu sacró. Gosacbu suusi ñoʼ Jehová cueʼbu. Por ngú labúu buny cantarbu:  «Gocnébu naʼ par diti nadzubi» (Sal. 34:4). David nigolú goyoʼ ló riesga, per xcalnadxiʼ Jehová gocni más nadip que guirá ni godudybu ló.

18. Órni racalóno galnagan ni ratzuiby lóono, ¿ximod racnéni lóono ni nanno que Jehová nadxiʼ lóono?

¹⁸ Órni radudyno ló galnagan ni ratzuiby lóono, ¿ximod racnéni lóono ni nanno que Jehová nadxiʼ lóono? Toib precursora ni laa Susi rabexa ximod gosacbu né ximod gosac tzeelbu órni xiingaʼnbu bigaitybu láacabu: «Órni radudylo ló toib cós nadzuiby, nigolú rioʼobni looy né ronylo pensary que diti labúu gonylo xitcal. Per xcalrronladx Jehová rap looy. Rachel, ni bisetlano ló párrafo 16, ná: «Toibtica goxin ni goyoʼya nabann né nigolú cadzubi, né gosaca que diti labúu ñoni xitcal, buni oración a Jehová né gorudxaʼya. Órcuca gosaca suusi Jehová nagudx naʼ né nasialdó xcalnabani, xomod rony toib xinaʼ mbiox né xpadaʼ. Né después ma labúu gotiasi. Dipa sialadxi ndeʼ». Toib anciano ni laa Tasos goyoʼbu tap íz press portín diti gosaguelbu ñeebu ló galsoldad. Láabu rabexabu que Jehová gon láabu né galrronladx: «Bidudybu más que ni caquiinna né ngú buny nadip confianz ni náapa lóbu. Láaca, bidudybu espíritu xtunybu naʼ par ñoʼya nakit ná cacalóya galnagan. Ngú bislooy naʼ que laʼga más ñapa confianz lóbu más nasaca xcalnadxiʼbu. Ngú buny que ná noʼya press goloʼya guica ñaca precursor regular».

GUIBIGAXNO RONOʼ DIOS XTUNYNO NI RONLADX LÓONO

19. a) ¿Ximod sac oración xtunyno ni nanno que Jehová nadxiʼ lóono? b) ¿Xí textos de galnadxiʼ xtuny Jehová radxin más lainy xcalnabanylo? (Bibiʼ cuadriyen ni laa, « Versículos ni racné lóono guisacno que ronladx Jehová lóono»).

¹⁹ Experiencias ni bisetlano raslooyni que Jehová nacbu «Dios ni nap galrronladx» (2 Cor. 13:11). Rioʼbu galrrasaʼ por tigaagano. Napno confianz que nagoo xcalrronladxbu lóono (Sal. 32:10). Laʼga más ronyno pensary ximod ma bislooybu que nadxiʼbu lóono, simbuno né sabigaxno más ronoʼbu. Por ngú labúu gonyno oración láabu né guixalno xcalnabanyno par gaibyno láabu que nigolú raquiinno xcalnadxiʼbu. Labúu gaibyno láabu guirá ni ragoʼ lóono ló galrrasaʼ né gapno confianz que riembu né que raniiny gacnébu lóono (Sal. 145:18, 19).

20. ¿Xigony rabigax xcalnadxiʼ Jehová lóono ronoʼbu?

²⁰ Xcalnadxiʼ Jehová nigolú sacróyenni, nacni xomod xcalnalaʼ toib guii órni rac nachich goxin. Guirá ór nainy tzoʼno gax de láabu. Xcalnadxiʼbu napni xiroʼ galnadip, per láaca sacróyenni. ¡Nigolú rabaladxno ni ronladx Jehová lóono! Guiráno nainy guinino: «Nadxiʼya Jehová» (Sal. 116:1).