1, 2. ¿Xí galnagan labúu guicalóno ni nacno xpiin Jehová?

 TIPTISI toib desgrasy labúu guitzaʼni mod nabanyno por tipzó. Guibiʼno tipnés ejemplos. Toibtica dzú, doctor gochbu toib hermano ni góc laa Luis a, que láabu napbu cáncer né que ma chop tzón beʼosi nabanybu. Monika nigolú goyodieʼbu ló xchiin Jehová né tzeelbu ni góc anciano. Per toibtica dzú gonbu que tzeelbu ma xidzú cayony galkié. Olivia, ni diti noʼ tzeʼel, bixony de lidx portín gonbu que gac toib guiérodann. Órni bibiguetbu, bibiʼbu lidxbu ma biab. Tiptisi bidzaʼ mod bibanyibu. ¿Ma godudylo modreʼ la?

² Xomodca guirá buñ, xpiin Jehová láaca radudyno ló galnagan né raxoʼno. Diti nosi ngú, láaca rony guantaryno oposición né persecución xtol buñ ni rianladx xcudx Dios. Nigolú, Jehová diti racaa ló cós mal par diti tudyno láani, per ma bidudybu xtiitzbu que sacnébu lóono (Is. 41:10). Pal noʼ Jehová cueʼno, labúu guibaladxno, labúu cutzayno xi gonyno né diti sasianno láabu ná tudyno ló galnagandaʼ. Ló artículo reʼ guisuidyno tap cós ni rony Jehová par gacnébu lóono gony guantaryno galnagan ni tudyno ló. Láaca sasuidyno xi labúu gonyno par gacné galrracné ni radudy Jehová lóono.

 JEHOVÁ SAN LÓONO

3. ¿Xí láani labúu guisac naganno gonyno órni radudyno ló galnagandaʼ?

³ Pal cadudyno ló toib galnagandaʼ, labúu guisac naganno gonyno pensary sacró né gonyno pensary xi gonyno. ¿Xigony? Portín galrrioʼobcu labúu guisioʼobni xcalnabanyno, né galrrasaʼ ni noʼno ló labúu guisiegni ló xpensaryno né diti ganno xi gonyno. Modcu gosac chop hermanas ni bisetlano ló párrafo toib. Olivia ná: «Órni binitló lidxi xtol guiérodann, goyoʼya ló galrrasaʼ né diti bidzel xcalrriena xi goni». Monika rasetlaa ximod gosacbu órni biscú tzeelbu láabu: «Diti noʼ diitz ni guislooy ximod gosaca. Gosaca suusi natzaʼisbu toib gudxil lainy xcalnabani. Diti goyoʼ gan ñoni mandad ni roni guirá ór. Diti godudy ló xpensari pal nasacloya ngú». ¿Ximod ma bidudy Jehová xtiitz que sacnébu lóono órni guisacno que ma diti labúuni lóono?

4. ¿Xí radudy Jehová xtiitz gony né lóono ló Filipenses 4:6, 7?

⁴ Ni rony Jehová. Láabu radudybu xtiitzbu que sadudybu ni la Biblia rabeʼ laa «paz xtuny Dios» (bíil Filipenses 4:6, 7). Paz reʼ nacni, mod rasacno sacró né rialdó xcalnabanyno portín radzakno sacró Jehová. Nigolú sacróyenni, buñgudxlio diti rien láani. ¿Ma goyoʼ ór bunylo oración Jehová né guidopy xcalnabanylo né órni biloxlo bidziguiaʼlo portín bidudylo cuent que bialdó xcalnabanylo la? Mod gosaclo ngú nac «paz xtuny Dios».

5. ¿Ximod ran «paz xtuny Dios» xpensaryno né xcalnabanyno?

⁵ Ni canino de «paz xtuny Dios», Filipenses 4:7 láaca ná que paz xtuny Dios «san xcalnabanyto né xpensaryto». Diitz ni rac traducir «san» biquiinni par naniʼ buñ de soldad ni gon gudx par diti nacaló stipnés buñ láani. Buñ ni golés lainy gudxcu, labúu gotiasyibu portín gonyibu que guirá soldadcu cayan gudxcu. Modcuca, órni «paz xtuny Dios» ran xpensaryno né xcalnabanyno, rasacno que diti sioʼ xi sacno né rasacno sacró (Sal. 4:8). Ná diti nimaca rac reglar galnagan ni cadudyno ló, labúu guisacno sacró, xomod gosac Ana (1 Sam. 1:16-18). Né, órcu diti sasac naganno gonyno pensary sacró né cutzayno xi gonyno.

6. ¿Xí labúu gonyno par guisacno paz xtuny Dios? (Láaca bibiʼ retrat).

⁶ Ni non gonyno. Modpa guirá buñ ni bibany lainy gudxcu labúu nanabyibu soldad ñan layibu, lóono láaca labúu  guinabno Jehová gan lóono. Gonyno oración dada órni guisacno «paz xtuny Dios» (Luc. 11:9; 1 Tes. 5:17). Ngú ni buny Luis né tzeʼel, órni doctor góoch láabu que ma chop tzón beʼosi nabanybu. Láabu nábu: «Nili radudy ló xpensary buñ balaati nagan gan buñ ximod gac remeidy o stipnés cós órni radudy ló galnagan xomod ndeʼ. Per oración nigolú rasacni par guisaca sacró ló galnagan reʼ». Guiropcayibu goniʼyibu que goninéyibu Jehová guirá ór né guidopy xcalnabanyibu né gonabyibu Jehová ñacné layibu par nasacyibu sacró, ñan xcalnabanyibu né nadudy sabiduría layibu par nabútzayibu xi láani ñonyibu. Né gosacyibu que Jehová bidudy ni biquiinyibu. Pal cacalólo toib galnagandaʼ, goniné Jehová guirá ór. Sabiʼlo ximod Jehová radudy paz xtunybu looy, né ranbu xcalnabanylo né xpensarylo. (Rom. 12:12).

JEHOVÁ SACNÉ LÓONO PAR GUISACNO SACRÓ

7. ¿Ximod labúu guisacno órni cadudyno ló galnagandaʼ?

⁷ Pal cadudyno ló toib galnagandaʼ, labúu guisac naganno gonyno pensary né midid né gonyno pensary o gonyno xomod ronyno guirá ór. Labúu guisacno que mod rasacno nacni xomod toib nisdaʼ dox, ni nac xomod xcuann nisdaʼ ni rachupiaʼ bark guirá ór. Órni goity Luis ngú ni gosaclo tzeelbu. Tzeelbu goniʼ: «Goyoʼ ór gosaca que noʼ ni cayatz naʼ né gopa laxtima naʼca. Per stipnés ór, nigolú bidzutzi portín Luis ma diti goyoʼ né naʼ». Láaca goniʼbu que goyoʼ ór gosacbu que goyoʼbu toibbu né nigolú goyoʼbu ló galrrasaʼ portín non ñonybu tipnés cós ni Luis buny. Par láabu, gocni suusi ñoʼbu ló toib guiérodann lainy nisdaʼ. ¿Ximod racné Jehová lóono órni rioʼob xcalnabanyno né ma diti labúuni lóono?

8. ¿Xí radudy Jehová xtiitz gony né lóono ló Isaías 33:6?

⁸ Ni rony Jehová. Láabu ma bidudybu xtiitzbu que sacnébu lóono par diti cuenunysi gonyno pensary o guisacno (bíil Isaías 33:6). Órni toib bark noʼ ló toib guiédxiblo lainy nisdaʼ, labúu guisisgoluʼni né fuers né tzeeni room. Par diti gonyni scú, xidal bark napni tigaaga lad tipnés cós ni rabíil lainy nís par diti guisisgoluʼni. Modcu rasisni más tzagaa né buñ ni noʼ lainy barkcu ma diti radzuibyibu né rioʼyibu goxt. Per, xidal máquinas ni racné par diti tzoʼ xi gac toib bark, más sacró ronyni dxiin pal barkcu diti rasagadzuni. Modcuca, pal nainy lóono que  Jehová gacné lóono par diti guisisgoluʼno órni tudyno ló galnagandaʼ, diti non guisagadzuno, ni radudy diitz, gonyno xchiin Jehová né diti guisianno láabu.

9. ¿Ximod racné herramientas ni radudy xcudx Jehová lóono par guisacno sacró? (Láaca bibiʼ retrat).

⁹ Ni non gonyno. Pal rasacno xidal cós, né rasacno que noʼno ló toib guiédxiblo, gonyno rutirigaʼlni lóono par guidzakno Jehová sacró. Nigolú, sigory diti labúu gonyno midid bunyno nírcu, per guisetnaladxno que Jehová nac razonable (bitzak láani né ni ná Lucas 21:1-4). Diti guialadxlo cueʼlo tiemp par guisuidylo xquiichlo né gonylo pensary loni. Jehová raquiin xcudx par guidudybu artículos né videos sacróyen ni labúu gacné lóono guisacno sacró. Par guidzelo ni caquiinlo, biquiin herramientas xomod aplicación JW Library^®, Índice de las publicaciones Watch Tower né Ni gacné a testigos xtuny Jehová guisuidyibu la Biblia. Monika, ni bisetlano nagaa, goniʼbu que biquiimbu herramientas reʼ órni bioʼob xcalnabanybu. Por ejemplo, goyoʼ ór biyopybu diitz xian, galrrascú o lealtad, né bíilbu información cu dada órni gosacbu sacró. Láabu nábu: «Nigolú bioʼob xcalnabani órni biyobi ni ñoola, per órni bilox biila láani ma gosaca sacró, gosaca suusi naguʼuch Jehová naʼ. Laʼga biila, bidudi cuent que Jehová bientzaay mod gosaca né gocnébu naʼ». Jehová láaca labúu gacné looy par guisaclo sacró dada órni tudy galnagan ni cacalólo (Sal. 119:143, 144).

JEHOVÁ SANÁS LÓONO

10. ¿Ximod labúu guisacno órni rasaclono desgrasy?

¹⁰ Órni rasaclono desgrasy, labúu tzoʼ dzú ro guisacno que ma diti napno fuers ló sentido físico né emocional. Sigory guibiʼno lóocano xomod toib buñ ni nírcu labúu bixony per nigoreʼ ma rasobioobu ñeʼbu. Labúu guisac naganno gonyno tipnés tarié ni nírcu bunyno, o diti tzoʼ gan lóono gonyno tipnés cós ni nírcu bioladxno. Xomodca Elías, pentzi nosi guiniiny lóono gatno né gaisyno (1 Rey. 19:5-7). ¿Xí radudy Jehová xtiitz gony órni guisacno que ma diti napno fuers?

11. ¿Xí más rony Jehová par gacné lóono? (Salmo 94:18).

¹¹ Ni rony Jehová. Radudybu xtiitzbu que sanásbu lóono (bíil Salmo 94:18).  Xomodca toib buñ ni raxony ni gocnaa, raquiin galrracné par guiás, sigory saquiinno galrracné par tzodieʼno gonyno xchiin Jehová. Pal rasacno modcu, láabu raibybu lóono ndeʼ: «Naʼ, Jehová Dios xtunylo, nanaʼsa ñalo niis ladbuʼ; naʼ raabi looy: Diti guidzuibylo. Naʼ sacnéya looy» (Is. 41:13). Órni rey David godudy ló xidal prueby né cualó buñ láabu, bibiʼbu que Jehová goyoʼ né láabu, né por ngú gochbu ndeʼ Jehová: «ñalo ladbuʼ ranás naʼ» (Sal. 18:35). Per ¿ximod ranás Jehová lóono?

12. Pal diti rasacno sacró, ¿chú láabu labúu guiquiin Jehová par gacné lóono?

¹² Xidal buelt Jehová ranás lóono órni ronybu que stipnés buñ guiniiny gacné lóono. Por ejemplo, toibtica buelt David nigolú bireʼgan, per ximigbu Jonatán goyguen láabu par buny nadipbu né buny animarbu David (1 Sam. 23:16, 17). Né láaca, Jehová golú a Eliseo par nadudy galrracné ni biquiin Elías (1 Rey. 19:16, 21; 2 Rey. 2:2). Scúca né lóono, Jehová labúu guiquiin xfamilno, ximigno, o ancianos par guinásyibu lóono. Per, órni diti rasacno sacró, sigory ni guiniiny lóono ngú tzoʼno toibno. Né diti mal guisacno modcu. Per, ¿xí non gonyno par guicaʼno galrracné ni radudy Jehová lóono?

13. ¿Xí non gonyno par guicaʼno xcalrracné Jehová? (Láaca bibiʼ retrat).

¹³ Ni non gonyno. Gonyno rutirigaʼlni lóono par diti galsitno de stipnés. Órni ralsitno de stipnés, ronyno pensary en lóocano né ló galnagan ni cadudyno ló. Né ngú labúu gony que diti cutzayno xi gonyno (Prov. 18:1). Nigolú, guiráno raquiinno tzoʼno toibno rioʼ ór né máspa órni rasaclono toib desgrasy. Per, pal nayopyno mod par ñoʼno toibno xidzú tiemp, labúu nabeʼno tiplad ni caquiin Jehová par guinás lóono. Por ngú, ná cadudyno ló galnagandaʼ, guicacuentno xcalrracné xfamilno, ximigno, né ancianos. Guibiʼno láani xomod galrracné ni caxel Jehová ro noʼno par guinásbu lóono (Prov. 17:17; Is. 32:1, 2).

JEHOVÁ SASIALDÓ XCALNABANYNO

14. ¿Xí labúu guitzuiby lóono?

¹⁴ Sigory sioʼ ór sadzuibygoluʼno. Ló la Biblia, sieed tipnés historias xtuny xpiin Dios ni diti bisian láabu, ni bidzuiby xtol xi enemig o godudy ló stipnés galnagandaʼ  (Sal. 18:4; 55:1, 5). ¿Né lóono ga? ¿Cacalóno oposición xtol buñ ni rinéno scuel o ni ronynéno dxiin, xfamilno o buñchiin la? ¿Caxonéno toib galguitz ni labúu guigaity lóono la? Órni radudyno ló de clas galnagan reʼ, labúu guisacno xomod toib mbiox mitien ni radzuiby. ¿Xí rony Jehová par gacné lóono?

15. Mod ná Salmo 94:19, ¿xí radudy Jehová xtiitz gony?

¹⁵ Ni rony Jehová. Láabu rasialdóbu xcalnabanyno (bíil Salmo 94:19). Gonyno pensary ló toib nidxigonaʼyen ni cadzuibygoluʼ né diti labúu raisy xtol guié guisioʼo. Órcu bixiosbu rieed ronoʼbu, raguʼuch láabu, né rasialdóbu xcalnabany nidxiyen reʼ dada raisybu. Ná nigolú cayac guié guisioʼo, ma diti radzuibybu né rasacbu que diti tzoʼ xi sacbu portín bixiosbu caguʼuch láabu. Scúca, órni radzuibyno pentzi guiquiinno que Bixiosno ni noʼ guibá cuʼuch lóono par guisacno sacró. ¿Xí raquiin gonyno par guisialdó Jehová xcalnabanyno?

16. Pal nainy lóono que Jehová guisialdó xcalnabanyno, ¿xí non gonyno? (Láaca bibiʼ retrat).

¹⁶ Ni non gonyno. Nigolú rasac guiaʼno tudyno tiemp né Jehová, gonyno oración né golno Xtiitzbu (Sal. 77:1, 12-14). Modcu, órni tudyno ló galnagan, ni primer tudy guicno láani ngú guiyopyno xcalrracné Bixiosno ni noʼ guibá. Gaibyno Jehová guirá ni ragoʼ lóono ló galrrasaʼ né ratzuiby lóono, né guidudyno lagary guicapybu né guisialdóbu xcalnabanyno né la Biblia (Sal. 119:28). Noʼ tipnés libros ni sieed ló la Biblia ni labúu gacné lóono órcu, xomod libros xtuny Job, Salmos né Proverbios, né ni goniʼ Jesús ló capítulo 6 xtuny Mateo. Pal raninélo Jehová né roʼolo Xtiitzbu, sabiʼlo ximod rasialdóbu xcalnabanylo.

17. ¿Xí láani non guisetnaladxno?

¹⁷ Non guisetnaladxno ndeʼ: ná cadudyno ló galnagandaʼ, Jehová guirá ór sioʼbu cu par gacnébu lóono. Dipa sasiambu lóono toibno (Sal. 23:4; 94:14). Guisetnaladxno, láabu ma bidudybu xtiitzbu que sanbu, sacnébu, sanásbu né sasialdóbu xcalnabanyno. Isaías gochbu Jehová: «Saplo guirá ni rayopy xcalrracnélo, sadudylo layibu toib paz ni diti sadzaʼ, portín napyibu confianz looy» (Is. 26:3). Por ngú gop confianz lóo Jehová né biquiintzay guirá galrracné ni radudybu looy. Pal ronylo láani, saplo fuers par gony guantarylo nitisi galnagandaʼ ni guicalólo ló xcalnabanylo.