ARTÍCULO NI GUISUIDYNO 2
CANCIÓN 132 Ahora ya somos uno
Buñguieeu, colgap respet tzeelto
«Buñguieeu, [...] colgap respet láabu» (1 PED. 3:7).
TEMA
¿Ximod labúu gap buñguieeu respet tzeʼel por mod raniʼ né mod rony?
1. ¿Xí láani ngú toibtica razón por ni goloʼ Jehová galtzeʼel?
JEHOVÁ nac «Dios ni rabaladx» né raniiny láabu tzoʼ nakitno (1 Tim. 1:11). Ma biduʼdybu xidal galrrascad lóono par guibanyno nakit (Sant. 1:17). Toibtica galrrascad reʼ, ngú galtzeʼel. Órni toib buñguieeu né toib buñgonaʼ rotzñayibu, raduʼdyibu xtiitzyibu gandxiʼyibu, gapyibu respet né ganyibu saʼyibu. Ni guidzaktzayibu saʼyibu ngú sony que guibaladxyibu (Prov. 5:18).
2. ¿Ximod nac xidal galtzeʼel ló naareʼ?
2 Nabanni, per ló gudxliogoxreʼ, xidal galtzeʼel diti ronyibu ni raniʼyibu dzú ni ronyibu galtzeʼel. Né, por ngú, diti rabanyibu nakit. Organización Mundial de la Salud goniʼni que xidal buñguieeu raguinyibu tzeʼelyibu, né láaca ronynayibu tzeʼelyibu né xtiitzyibu. Sigory órni noʼyibu nisló xidal buñ raslooyibu que nigolú nadxiʼyibu tzeʼelyibu, per órni ma noʼyibu láasiyibu ma ronynayibu tzeʼelyibu. Láaca, xidal galtzeʼel rioʼ ló galnagan portín buñguieeucu rabiʼ pornografía.
3. ¿Xí labúu gony que toib buñguieeu gonynaa tzeʼel?
3 ¿Xigony tipnés buñguieeu ronynayibu tzeʼelyibu? Sigory portín scúca góc bixiosyibu, por ngú ronyibu pensary que diti mal gonynayibu tzeʼelyibu. Stipnésyibu rabésyibu lainy tipnés lagary ro buñ ná que, par gac buñ toib buñ ni «nigolú nac buñguieeu», non guislooyibu tzeʼelyibu chú rony mandary. O sigory bixiosyibu diti bisuidy layibu guichocyibu ló xcalnadzuitzyibu. Né tipnés buñguieeu ni rabiʼ pornografía ma nábu gonyibu ngúca né tzeʼelyibu portín ronyibu pensary que par ngúsi napyibu tzeʼelyibu. Né máspa, tipnés buñnan ná que xtol COVID-19, galnagan reʼ gocxiroʼni. Per, guirá cós ni ma bisetlano diti raduʼdyni razón toib buñguieeu par gonynaa tzeʼel.
4. ¿Xí diti non gony herman buñguieeu ni ma noʼ tzeʼel, né xigony?
4 Herman buñguieeu ni ma noʼ tzeʼel, non gapyibu cuidad par diti gonyibu pensary xomod rony pensary gudxliogoxreʼ de buñgonaʼ. a ¿Xigony? Portín ni rony buñ pensary, radxin midid rony buñ láani. Gonyno pensary ni góc lainy congregación ni goyoʼ Roma ló siglo primero, lainy congregación reʼ goyoʼ pór ungidos. Después ni goyoʼ congregación reʼ, Pablo bicaʼ lóoyibu ndeʼ: «Ma diti guibanyto mod nabany buñ ló naareʼ» (Rom. 12:1, 2). Diitzreʼ bislooyni que tipnés cristianos bunyra tipnés costumbres né bunyibu pensary xomod buny pensary buñ de dzúcu. Por ngú, Pablo góoch layibu que raquiin natzaʼyibu mod ronyibu pensary né mod ronyibu. Diitzreʼ láaca raguiñani buñguieeu ni noʼ tzeʼel ló naareʼ. Nabanni, per tipnés herman ronyibu pensary mod rony pensary gudxliogoxreʼ né ronynayibu tzeʼelyibu. b ¿Ximod ná Jehová cobioo buñguieeu tzeʼel? Galrracapy xtuny galrranabdiitz reʼ sieedni ló texto temático xtuny artículo reʼ.
5. Mod ná 1 Pedro 3:7, ¿ximod non cobioo buñguieeu tzeʼel?
5 (Bíil 1 Pedro 3:7). Jehová ranabbu buñguieeu gapyibu respet tzeʼelyibu. Né ndeʼ raslooy buñ láani por mod ragobioo buñ saʼ. Toib buñguieeu rapbu respet tzeelbu órni ragobiobu tzeelbu né galrronladx né galnatzaay. Ló artículo reʼ, guisuidyno tipnés mod ni raslooy buñguieeu que napyibu respet tzeʼelyibu. Per primer guisuidyno xi láani rony buñguieeu ni raslooy que diti nap respet tzeʼel.
DITI GONYTO CÓS NI RASLOOY QUE DITI NAPTO RESPET TZEELTO
6. ¿Ximod rabiʼ Jehová buñguieeu ni raguin tzeʼel? (Colosenses 3:19).
6 Órni raguin buñ tzeʼel. Jehová rianladxbu buñ ni ronynaa stipnés (Sal. 11:5). Né máspa diti rioladxbu órni toib buñguieeu ronynaa tzeʼel (Mal. 2:16; bíil Colosenses 3:19). Mod ná texto temático, 1 Pedro 3:7, pal toib buñguieeu ronynabu tzeelbu diti labúu sadzaktzaybu Jehová. Sigory nili sacadiag Jehová oración xtunybu.
7. Mod ná Efesios 4:31, 32, ¿ximod dipa non guininé buñguieeu tzeʼel? (Láaca bibiʼ «Ni rareʼ loguiaʼ»).
7 Órni ronynaa buñ tzeʼel né xtiitz. Tipnés buñguieeu raninébu tzeelbu né diitz nadox né raquiimbu tipnés diitz ni rasioʼob xcalnabanyibu. Per Jehová rianladxbu buñ ni radzuitz huaity, ni racadié rudx, né ni raninaa stipnés, c mod ná Efesios 4:31, 32 (bíil láani). Jehová rabiʼbu guiráni né racáabu cuidad ximod raniné buñguieeu tzeʼel, ná órni noʼyibu laniolidxyibu. Toib buñguieeu ni nachóng rac xtiitz né tzeʼel diti nosi ronybu mal xcaltzeelbu, láaca ronybu mal mod radzakbu Dios (Sant. 1:26).
8. ¿Xí rony pensary Jehová de pornografía, né xigony?
8 Pornografía. ¿Xí rony pensary Jehová de pornografía? Rianladxbu láani. Toib buñguieeu ni rabiʼ galyoxh diti labúu radzaktzaybu Jehová né raslooybu que diti napbu respet tzeelbu. d Jehová rabés que buñguieeu diti guiscúyibu tzeʼelyibu, nili né xpensaryibu. Jesús goniʼbu que pal toib buñguieeu rabiʼ stoib buñgonaʼ né rony pensary ló galyoxh «ma bunybu galyoxh né gonaʼ reʼ lainy xcalnabanybu» (Mat. 5:28, 29). e
9. ¿Xigony rianladx Jehová que toib hermano gony lafuersbu tzeelbu par gony cós ni tzeelbu diti rioladx órni ratnéyibu saʼyibu?
9 Órni toib buñguieeu rony lafuers tzeʼel par gony tipnés cós ni diti rioladxbu órni ratnéyibu saʼyibu. Órni tipnés buñguieeu ratnéyibu tzeʼelyibu, rony lafuersyibu buñgonaʼ par gonyibu tipnés cós ni buñgonaʼ diti rioladx, né ndeʼ rony buidyni né ronynani tzeʼelyibu o ronyni que buñgonaʼ guisac que tzeelbu diti ronladx láabu. Toib buñguieeu ni rony modreʼ, raslooybu que rioʼbu ló galrrasaʼ por láasibu, né Jehová rianladx láani. Láabu rabésbu que buñguieeu guislooy galnadxiʼ né galrronladx tzeʼel né gapbu respet xcalrrien tzeelbu né mod rasacbu (Efes. 5:28, 29). Nigoreʼ, ¿xí labúu gony toib buñguieeu pal ma goyoʼ dzú bunybu toibtica cós ni ma bisetlano ló subtítulo reʼ? ¿Xí labúu gonybu par labúu guitzaʼbu mod ronybu pensary né mod ronybu?
¿XÍ LABÚU GONY TOIB BUÑGUIEEU PAR GUISIAMBU MOD NACBU NÉ GAPBU RESPET TZEELBU?
10. ¿Xí labúu guisuidy buñguieeu ni ma noʼ tzeʼel de Jesús?
10 ¿Xí labúu gony toib cristiano par guisiambu nitisi cós ni ronybu ni ronynaa tzeelbu? Gonybu rutirigaʼlni láabu por guisuʼbu Jesús. Nigolú, láabu dipa goyoʼ tzeelbu, per mod bunybu né xpiimbu nacni toib galán ejemplo ni labúu guisuʼ buñguieeu ni ma noʼ tzeʼel (Efes. 5:25). Guibiʼno xi láani labúu guisuidy buñguieeu ni ma noʼ tzeʼel mod goniné, né mod buny Jesús né xpiin.
11. ¿Ximod godabioo Jesús xpiin?
11 Jesús godabioo xpiin né galrronladx né respet. Dipa gócbu buñ mal né xpiimbu. Nigolú, láabu gócbu Señor xtunyibu, per ná gópbu galnadip dipa biquiimbu láani par ñonybu que xpiimbu nadzuiby láabu. Xalagary ngú, gócbu buñdxo (Juan 13:12-17). Gochbu xpiimbu: «Colguisuidy de naʼ, portín naca buñ nadaʼa né buñdxo. Ronoʼya sasaladxto» (Mat. 11:28-30). Toib buñ nadaʼa diti nacbu débil, xalagary ngú nadipbu: labúu rony mandarybu láacabu, né diti raduʼdybu lagary que mod rasacbu gaiby láabu xi gonybu.
12. ¿Ximod goniné Jesús stipnés?
12 Jesús biquiin diitz par bisialdóbu xcalnabany buñ né par gocnébu buñ nasac sacró. Diti biquiimbu diitz ni nasioʼob xcalnabany xpiimbu (Luc. 8:47, 48). Né ná xi enemigbu goninaa né bitzaldaʼ láabu, «diti cuapybu scúca» (1 Ped. 2:21-23). Goyoʼ ór más bioladxbu diti naniʼbu xitcal (Mat. 27:12-14). ¡Nacbu toib galán ejemplo par herman buñguieeu ni ma noʼ tzeʼel!
13. ¿Ximod guislooy toib buñguieeu que nacbu toibsi né tzeelbu? (Mateo 19:4-6; láaca bibiʼ retrat).
13 Jesús gochbu buñguieeu ni ma noʼ tzeʼel que diti non nascúyibu tzeʼelyibu né stoib buñgonaʼ. Bisetlabu ni goniʼ Bixiosbu órni goniʼbu: «Buñguieeu [...] sadxin sac toibsi né tzeʼel» (bíil Mateo 19:4-6). Diitz griego ni rac traducir «sadxin sac toibsi» raduʼdyni diitz «guiguiʼtbu». Ndeʼ raduʼdy diitz que galnadxiʼ ni tzoʼ lainy toib galtzeʼel non gacni dxich. Pal toib buñ ni ma noʼ tzeʼel ñony toib cós ni nasioʼob xcalnabany tzeelbu, guiropcayibu nadudyibu ló galrrioʼob. Toib buñguieeu ni radzaktzay né nadxiʼ tzeʼel diti sasaguel guibiʼ pornografía. Nimaca sabiʼbu stoib lad par diti guibiʼbu «cós ni diti raquiin» (Sal. 119:37). Labúu guinino que ronybu toib acuerdo né bisalóbu par diti guibiʼbu né guiniiny tzonébu toib buñgonaʼ ni diti nac tzeelbu (Job 31:1).
Buñguieeu ni diti rascú tzeʼel diti rasaguel guibiʼ pornografía. (Bibiʼ párrafo 13). g
14. ¿Xí guirá non gony toib buñguieeu par guidzaktzaybu tzeelbu né Jehová stoib?
14 Né diti ngúsi, toib buñguieeu ni raguin né raninaa tzeʼel, non gonybu tipnés cós par guidzaktzayibu tzeelbu né Jehová stoib. ¿Xí láani non gonybu? Primer, non guiduʼdybu cuent que mal ngú ni cayonybu. Jehová rabiʼ guiráxadit cós; yadi cós nagach par láabu (Sal. 44:21; Ecl. 12:14; Heb. 4:13). Ni rarop, ma diti quimbu nili guininabu tzeelbu né guitzaʼbu mod ronybu (Prov. 28:13). Ni rion, guiduʼdybu cuent balaati bunynaabu Jehová né tzeelbu né guinabbu guituʼdyibu scásiʼ ni bunybu (Hech. 3:19). Non guinabbu Jehová gacné láabu par gony mandarybu ni ronybu pensary, ni raniʼbu né ni ronybu, né guiniiny láabu guitzaʼbu mod ronybu (Sal. 51:10-12; 2 Cor. 10:5; Filip. 2:13). Tap, gonybu dxiin ló ni ma gonabbu Jehová né guisuidybu guianladxbu diitz ni ronynaa né nitisi cós ni rony mal stipnés (Sal. 97:10). Gáay, nimaca guiyopybu xcalrracné ancianos xtuny congregación, ancianos sacné láabu né galnadxiʼ (Sant. 5:14-16). Né, ni rasaiʼny xhoop, non ganbu xi cós non gonybu par diti tzaguiabbu ló cós malcu stoib. Toib buñguieeu ni ma noʼ tzeʼel né rabiʼ pornografía láaca non gonybu guirá ndeʼ. Jehová sasiab xcalnasác loguiaʼbu por ni gonybu rutirigaʼlni láabu par guitzaʼbu (Sal. 37:5). Per diti nosi raquiin que toib cristiano cueʼ tiplad cós ni diti raslooy respet tzeelbu; láaca non guisuidybu gapbu respet tzeelbu. Guibiʼno ximod labúu gonybu láani.
¿XIMOD GAPTO RESPET TZEELTO?
15. ¿Ximod labúu guislooy toib buñguieeu galrronladx tzeʼel?
15 Guislooyto galrronladx tzeelto. Tipnés buñguieeu ni sacró rabany lainy xcaltzeel, riaʼyibu raslooyibu guirá dzú balaati ronladxyibu tzeʼelyibu (1 Juan 3:18). Toib cristiano ni ma noʼ tzeʼel labúu gonybu ngú né cós mitien, por ejemplo, labúu guinásto ña tzeelto o cuʼdxto láabu. Láaca labúu guixelto toib mensaj ló tzeelto ro gaibyto láabu «Rasetnaladxi looy» o «¿Ximod noʼlo tzeʼela?». Nagabga ór labúu guiscadto ti xar guieʼ láabu o siʼto galrro ni rioladxbu guábu. Órni toib buñguieeu rony ndeʼ, rapbu respet tzeelbu né ndeʼ rony dxich xcaltzeelbu.
16. ¿Xigony non guiliskiaʼ toib buñguieeu tzeʼel?
16 Guiduʼdyto guixquix né guislooyto galrronladx. Toib buñguieeu rapbu respet tzeelbu órni raibybu tzeelbu xigony rasacbu par láabu né ronybu que tzeelbu guisac sacró. Por ejemplo, guirá ór raduʼdybu guixquix por ni racné tzeelbu láabu (Col. 3:15). Órni toib buñguieeu raliskiaʼ tzeʼel, buñgonaʼcu rasac que diti sacbu xitcal, que tzeelbu ronladx né rap respet láabu (Prov. 31:28).
17. ¿Ximod labúu guislooy toib buñguieeu que nacbu buñtzay né tzeelbu?
17 Colgac buñtzay né tzeelto. Toib buñguieeu ni nadxiʼ tzeʼel, rabiʼbu tzeelbu xomod toib galrrascad ni nigolú rasac ni biduʼdy Jehová láabu (Prov. 18:22; 31:10). Por ngú, ranbu né ragobiobu tzeelbu né galrronladx, dada órni noʼyibu guiropsiyibu. Diti rony lafuersbu tzeelbu par gony cós ni diti rioladxbu o ni ronynaa xcalrriembu órni ratnéyibu saʼyibu. f Né buñguieeucu láaca ronybu rutirigaʼlni láabu par gapbu toib galrrien nayaa nisló Jehová (Hech. 24:16).
18. ¿Xí láani non coʼ buñguieeu guic? (Láaca bibiʼ cuadriyen ni laa « Tap mod ni guislooylo que raplo respet tzeʼelo»).
18 Buñguieeu ni ma noʼ tzeʼel, labúu gapto confianz que Jehová rabiʼ né rasac par láabu guirá ni ronyto par gapto respet tzeelto. Colcoʼ guicto dipa gonyto cós ni diti raslooy respet tzeelto, né colgac buñtzay né layibu né colcobioo layibu né galrronladx. Modcu saslooyto que ronladxto layibu né que rasacyibu par lóoto. Pal rapto respet tzeelto, sadzaktzayto Jehová (Sal. 25:14).
CANCIÓN 131 «Lo que Dios ha unido»
a Buñguieeu ni ma noʼ tzeʼel labúu goʼolyibu artículo ni laa «¿Ragobiolo buñgonaʼ xomod rony Jehová láani la?», ni bireʼ ló Guiich ni caniʼ enero íz 2024.
b Pal tzeʼelo godin o goninaa looy, labúu gacnéni looy goʼolo artículo ni laa «Ayuda para las víctimas de la violencia doméstica», ni sieed ro ná «Otros temas», ló jw.org né ló JW Library®.
c NI RAREʼ LOGUIAʼ: Diitz «diitz ni ronynaa» raguiñani guiniʼ buñ diitz ni rasioʼob stipnés, diitz ni raxoʼox. Raguiñani nitisi cós ni nompa raniʼ buñ par gonynaa stipnés.
d Bibiʼ ló jw.org né ló JW Library artículo ni laa «La pornografía puede destruir su matrimonio».
e Artículo ni laa «¿Xí láani labúu gonylo pal tzeʼelo rabiʼ pornografía?», ni bireʼ ló Guiich ni caniʼ beʼo agost íz 2023, labúu gacnéni buñgonaʼ ni nap tzeʼel ni rabiʼ pornografía.
f La Biblia diti raniʼtzay xi cós ni rony toib galtzeʼel órni ratné saʼ nac cós nayaa né cós buidy. Guiropcayibu non coʼyibu guicyibu gonyibu cós ni guislooy que nainy gonyxiroʼyibu Jehová, que nainy tzoʼ nakityibu né saʼyibu né gac nayaa xcalrrienyibu. Né diti saibyibu stipnés mod ronyibu lainy xcaltzeelyibu.
g MOD RAREXA DIBUJ NÉ RETRAT: Toib Testigo noʼ ló dxiin, né buñ ni ronynébu dxiin raiby láabu guibiʼ pornografía.
