ARTÍCULO NI GUISUIDYNO 3
CANCIÓN 35 Asegurémonos de lo más importante
Goloʼ guiclo gonylo cós ni rioladx Jehová
«Sabiduría rasalóni órni radzuibyno Jehová, né conocimiento xtuny Santísimo ngú entendimiento» (PROV. 9:10).
TEMA
¿Ximod guiquiinno conocimiento, entendimiento né discernimiento par cutzayno xí láani gonyno?
1. ¿Xí láani non gonyno guiráno, né xigony rioʼ ór naganni?
GUIRÁ dzú ragoʼno guicno gonyno tipnés cós. Tipnésni diti tampa naganni, xomod xi láani guasiʼlno o pu ór tzagaisyno. Per noʼ stipnés cós ni más nagan. Por ejemplo, xi gonyno par diti guixoʼno, ximod tzoʼno nakit, ximod ganno xfamilno o ximod guienno Dios. Nainy lóono que ni coʼno guicno gacnéni xfamilno né gacnéni lóono, per ni máspa raniiny lóono, láani ngú coʼ nakitni Jehová (Rom. 12:1, 2).
2. ¿Xí láani sacné looy par cutzaylo xí láani gonylo?
2 Ló artículo reʼ sasuidyno tzón cós ni labúu gacné looy par cutzaylo xi láani gonylo: 1) ganlo xipa mod nacni, 2) guisetnaladxlo ni rony pensary Jehová de láani né 3) gonylo pensary xi láani más sacné looy. Láaca sabiʼno xi non gonyno par gapno discernimiento (Prov. 2:11).
GON XIPA MOD NACNI
3. Golexa né toib ejemplo xigony nigolú raquiin ganlo xipa mod nacni antes ni coʼlo guiclo gonylo toib cós.
3 Primer cós ni non gonylo par cutzaylo xi láani gonylo láani ngú ganlo xipa mod nacni. ¿Xigony rasac gonylo ngú? Buny pensary que toib buñ ni caxoʼ goluʼ riee ló doctor. ¿Nimaca ñaiby doctorcu láabu xi remeidy guicaʼbu pal yása guinabdiitzbu buñcu xí racbu la? Yaca. Modcuca, looy sabútzaylo xi láani gonylo pal primer rasuidytzaylo guirá información ni raguiña cós ni cadudylo ló. ¿Ximod gonylo láani?
4. Mod ná Proverbios 18:13, ¿ximod labúu gandxichlo xipa mod nacni? (Láaca bibiʼ retrat).
4 Pal ronylo galrranabdiitz, ngú sacné looy ganlo cós ni raquiin ganlo. Por ejemplo, buny pensary que noʼ ni raruʼ looy tzeelo toib galnakitien. ¿Non tzeelo la? Pal diti rimbulo buñ ni gony galnakitien cu o diti nanlo xi láani gonybu, labúu gonylo guirá galrranabdiitz reʼ: «¿Púti né pu ór gacni? ¿Balac buñ tzoʼ ló galnakitien cu? ¿Chú guibiʼ guirá ni gac cú? ¿Chú láabu tzee? ¿Xí láani gac ló galnakitien cu? ¿Sioʼ nistzóny la?». Ni ganlo xcalrracapy guirá galrranabdiitz reʼ sacnéni looy par ganlo xi láani gonylo (bíil Proverbios 18:13).
Buny galrranabdiitz par ganlo guiráni. (Bibiʼ párrafo 4). a
5. ¿Xí non gonylo órni ma nanlo xipa mod nacni?
5 Órni ma nanlo guiráni, buny pensary xi labúu gac. Por ejemplo, ¿pal ranlo que ló galnakitien cu tzee buñ ni diti nap respet ni rony mandary Jehová o sioʼ nistzóny né diti tzoʼ chú guicá cuidad láani ga? ¿Galnakitien cu labúu gacni toib galnakitien ro diti rac xinésni la? (1 Ped. 4:3). ¿Né xí láani gonylo pal ni tzeelo galnakitien cu ronyni que diti tzeelo reunión né diti guireʼlo predicación? Ni gonylo pensary xi láani labúu gac sacnéni looy par cutzaylo xi láani labúu gonylo. Noʼ stoib cós ni non gonylo. Ma nanlo ximod rabiʼlo láani; per ¿ximod rabiʼ Jehová láani? (Prov. 2:6).
BISETNALADX NI RONY PENSARY JEHOVÁ
6. Mod ná Santiago 1:5, ¿xigony non guinabno Jehová gacné lóono?
6 Gonab Jehová gacné looy par ganlo ximod rabiʼbu láani. Láabu raduʼdybu xtiitzbu guiduʼdybu sabiduría buñ né guidopy xcalnabanybu sin guisetlabu láani (bíil Santiago 1:5). Sabiduría cu sacnéni lóono par guientzaayno pal ni coʼno guicno gonyno sagoʼ nakitni Jehová.
7. ¿Ximod labúu ganlo xí rony pensary Jehová? Bisetlaa toib ejemplo.
7 Después ni guinablo Jehová conés looy, cuá cuidad ximod guicapybu. Guisetlano toib ejemplo. Pal rieelo toib lagary né ranitlo, pentzi sanablo toib buñ ni rabés lagarycu par gacnébu looy. ¿Nabéslo ñaibybu looy pú niis nanáslo ja? Nacadiagtzaylo ni ñaibybu looy. Modcuca, después de guinablo Jehová guiduʼdy sabiduría looy, buny por «guicadiaglo» mod guicapybu looy né biyopy xi principios ni sieed ló la Biblia radzak né cós ni cadudylo ló. Gonyno pensary ló invitación ni bisetlano ló párrafos ni ma godudy. Órni coʼlo guiclo pal tzeelo galnakitien cu, labúu coʼlo cuent ni rasetlaa la Biblia de galnakitien ro diti rac xinésni, ni diti guidzak buñ né stipnés ni diti rony ni ná Jehová o coʼ buñ primer lagary Gobierno xtuny Dios (Mat. 6:33; Rom. 13:13; 1 Cor. 15:33).
8. ¿Xí raquiin gonylo pal raquiinlo galrracné par guidzelo información ni cayopylo? (Láaca bibiʼ retrat).
8 Rioʼ ór labúu guiquiinlo galrracné par guidzelo información ni cayopylo. Toib hermano o hermana ni nap experiencia labúu gacné looy. Per galán láani que stiplooyca gony investigarlo. Noʼ xiroʼ información ló guirá ni raquiinno par guisuidyno, xomod Ni gacné a testigos xtuny Jehová guisuidyibu la Biblia né libro Textos bíblicos para la vida cristiana. Bisetnaladx que ni non gonylo láani ngú, gonylo cós ni rioladx Jehová.
Goloʼ cuent ni rony pensary Jehová. (Bibiʼ párrafo 8). b
9. ¿Ximod labúu gandxichno que ni coʼno guicno gonyno sagoʼ nakitni Jehová? (Efesios 5:17).
9 ¿Ximod labúu gandxichno que ni coʼno guicno gonyno sagoʼ nakitni Jehová? Primer, non guimbutzaayno láabu. Proverbios 9:10 náni que «conocimiento xtuny Santísimo ngú entendimiento». Ndeʼ raduʼdy diitz que par gapno entendimiento non guimbuno cualidades xtuny Jehová, ni nábu gonybu, cós ni rioladxbu né cós ni rianladxbu. Gonabdiitz looy: «Nigoreʼ ni ma naana de Jehová, ¿xí cós ni goni sagoʼ nakitni láabu?» (bíil Efesios 5:17).
10. ¿Xigony más rasac par lóono principios ni sieed ló la Biblia xalagary costumbres ni nap xfamilno o costumbres ni noʼ lainy xcudxno?
10 Par coʼ nakitno Jehová sigory saquiin gonyno tipnés cós ni guisioʼob xfamilno o ximigno. Por ejemplo, pentzi bixios né xinaʼ toib mbioxhlas rakíilyibu xiimbu gony galtzeʼel né toib buñguieeu ni nap xiroʼ bidxiich ni labúu gan layibu ná buñguieeu reʼ diti noʼ dxichbu ló sentido espiritual. Nigolú, diti nainy layibu que xiindzapyibu tudy ló galsii. Per, ¿chú gacné láabu par guidzaktzaybu Dios? ¿Xí rony pensary Jehová de láani? Radzelno xcalrracapyni ló Mateo 6:33, ro rony animarni cristianos guiyopyibu primer Gobierno xtuny Dios. Ná rapno respet bixiosno, xinaʼno né buñ ni rabés lagary ro rabésno, ni más rasac par lóono ngú coʼ nakitno Jehová.
BUNY PENSARY XI LÁANI MÁS SACNÉ LOOY
11. Mod ná Filipenses 1:9, 10, ¿xí cualidad sacné looy par gonylo pensary xí láani gonylo?
11 Después ni guisuidylo principios ni sieed ló la Biblia ni radzak né cós ni cadudylo ló, non gonylo pensary xi láani más sacné looy (bíil Filipenses 1:9, 10). ¿Ximod gonylo láani? Biquiin discernimiento par ganlo xi labúu ñac pal ronylo láani. Sioʼ ór diti sasac naganlo ganlo xi láani gonylo, per láaca sioʼ ór diti sanlo xi láani más sacné looy. Discernimiento sacnéni looy par cutzaylo xi láani gonylo.
12, 13. ¿Ximod labúu gacné discernimiento looy par cutzaylo xí dxiin gonylo?
12 Buny pensary ló ndeʼ. Cayopylo dxiin par labúu guiyaʼanlo xfamilo né radzelo chop dxiin. Rasuidytzaylo guirá ni nanlo, xomod xi clas dxiin láani, balac ór gonylo láani, pal riaʼni gax o sit de lidxlo. Guiropca dxiincu labúu gony toib cristiano láani. Pentzi sioladxlo toib dxiin portín rioladxlo de clas dxiincu o portín saguiixyibu más looy. Per noʼ tipnés cós ni non coʼlo cuent antes ni ganlo xi láani gonylo.
13 Por ejemplo, ¿toibtica de dxiincu sagobni xtiemplo né ma diti labúu sieelo reunión la? ¿Sabeʼni xtiemplo ni raquiinlo par gacnélo xfamilo ló sentido emocional né espiritual la? Ni gonylo de clas galrranabdiitz reʼ sacnéni looy par coʼlo primer lagary cós ni más rasac, xomod mod rienlo Jehová né cós ni raquiin xfamilo xalagary bidxiich. Órcu sagoʼlo guiclo gonylo cós ni sasiab Jehová xcalnasác loguiaʼ.
14. ¿Ximod racné discernimiento né galnadxiʼ lóono par diti gonyno cós ni guichel ñeʼ stipnés?
14 Discernimiento láaca ronyni que gonyno pensary, ximod raguiñani stipnés ni ragoʼno guicno gonyno, né modcu diti gonyno cós ni guichel ñeʼ stipnés (Filip. 1:10). Ndeʼ nigolú rasac órni ragoʼno guicno gonyno cós ni raguiña nosi lóono, xomod mod gactzayno né mod guacno xhapno. Por ejemplo, pentzi rioladxno tipnés clas lairy. Per, ¿pal lairy ni rioladxno ronynani xcalrrien stipnés ga, ná nacyibu herman o yaca? Discernimiento sacnéni lóono par gapno respet mod rasacyibu. Né galnadxiʼ sachiinni lóono par gacnéno stipnés né gacno modestos (1 Cor. 10:23, 24, 32; 1 Tim. 2:9, 10). Modcu saslooyno que nadxiʼno né napno respet stipnés.
15. ¿Ló xí gonylo pensary antes ni coʼlo guiclo gonylo toib cós ni rasac?
15 Pal ni coʼno guicno nigolú rasacni, buny pensary xi láani labúu gonylo par labúu gacni. Jesús bisuidy lóono gonyno pensary balac gonyno gaxt (Luc. 14:28). Por ngú buny pensary balaati tiemp, fuers né bidxiich saquiinni par gacni. Ló tipnés cós galán láani gooylo xtiitzni né xfamilo par ganto xi láani gonyto tigaagato par labúu gacni. ¿Xigony rasac gooyto xtiitzni? Portín labúu sacnéni looy par ganlo pal noʼ tipnés cós ni non guitzaʼlo o pentzi noʼ stoib cós ni más galán ni labúu gonylo. Né láaca, pal ranabdiitzlo xfamilo xi ronybu pensary, né racadiagtzaylo layibu, diti sasac naganyibu gacnéyibu looy (Prov. 15:22).
GOLOʼ GUICLO GONYLO TOIB CÓS NI GUIREBUʼ
16. ¿Xí raquiin gonylo par guirebuʼ ni gonylo? (Láaca bibiʼ cuadriyen « ¿Ximod cutzayno ni gonyno?»).
16 Pal ma bunylo guirá ni bisetlano, ma noʼlo puext par cutzaylo xi láani gonylo. Ma nanlo guiráni né ma bisuidytzaylo principios ni sony que ni coʼlo guiclo gonylo coʼ nakitni Jehová. Nigoreʼ, ma labúu guinablo Jehová que guirá ni gonylo guirebuʼni.
17. ¿Xí láani racné buñ par cutzay ni gony?
17 Pentzi ma goloʼlo guiclo xidal cós ni birebuʼ. Ná scú, bisetnaladx que ni racné buñ par gan xi láani gony ngú sabiduría ni sieed de Jehová, diti pal naní guic buñ o pal nap experiencia. Nosi láabu labúu guiduʼdybu conocimiento, entendimiento né discernimiento, né guionca cós reʼ raduʼdyni sabiduría (Prov. 2:1-5). Scú láani, Jehová labúu sacné looy par cutzaylo cós ni rioladxbu (Sal. 23:2, 3).
CANCIÓN 28 Cómo hacernos amigos de Jehová
