ARTÍCULO NI GUISUIDYNO 1
CANCIÓN 2 Tu nombre es Jehová
Gonyxiroʼno laa Jehová
TEXTO DE ÍZ 2025: «Colgonyxiroʼ laa Jehová» (SAL. 96:8).
TEMA
¿Ximod non gonyxiroʼno Jehová?
1. ¿Ló xí rioʼ buñ galrrasaʼ ló naareʼ?
LÓ NAAREʼ xidal buñ nosi rioʼyibu galrrasaʼ por láasiyibu. Por ejemplo, ló redes sociales xidal buñ ralapy retrat par guibiʼ buñ xi láani cayonyibu o xi láani ma goygaʼlyibu. Per goxeʼsi buñ ronyxiroʼ Jehová Dios. Ló artículo reʼ, guisuidyno xi raduʼdy diitz gonyxiroʼno Jehová né xi razón napno par gonyxiroʼno láabu. Láaca sasuidyno ximod gonyxiroʼno Dios, né ximod mápa mer láacabu sonyxiroʼbu laabu.
¿XÍ RADUʼDY DIITZ GONYXIROʼNO JEHOVÁ?
2. ¿Ximod bislooy Jehová galxiroʼ xtuny laidy dainy Sinaí? (Láaca bibiʼ dibuj).
2 La Biblia, raslooyni que Jehová nac toib Dios nirodann. Diti xidzú después ni bireʼ gudx Israel xan xomandary gudx Egipto, Jehová bunyxiroʼbu láacabu de toib mod ni radziguiaʼ buñ. Gonyno pensary ló ni góc dzúcu: xidalguixo israelitas sagaʼyibu ñeʼ dainy Sinaí par guicadiagyibu xi nainy Dios gaiby layibu. Guidopy dainycu riegni né xcaay. Rac toib xo rodann né rareʼ gohx dainycu, rabiʼ buñ riapynís né ratz guisioʼo né nigolú fuers rien que noʼ ni cacudx dxitguic nimal (Éx. 19:16-18; 24:17; Sal. 68:8). Israelitas nigolú bidziguiaʼyibu órni bibiʼyibu ximod gocxiroʼ Jehová.
Laidy dainy Sinaí, Jehová buny xidal galrradziguiaʼ par naslooybu buñ israelitas galxiroʼ xtunybu. (Bibiʼ párrafo 2).
3. ¿Xí raduʼdy diitz gonyxiroʼno Jehová?
3 ¿Né xí noʼ de lóono? ¿Labúu gonyxiroʼno Jehová la? Labúu gonyno láani. Toib mod ni labúu gonyxiroʼno Jehová láani ngú, gaibyno stipnés galnadip né cualidades sacróyen ni napbu. Stoib mod ni labúu gonyno láani ngú, guinino que láabu ngú ni racnébu lóono gonyno toib cós (Is. 26:12). Toib ejemplo ni raslooytzay láani ngú ejemplo xtuny rey David. Ló toib oración ni bunybu nisló gudx Israel, goniʼbu: «Xtunylo, oh, Jehová, nac galxiroʼ, galnadip, né galmóz, portín guirá ni noʼ lainy guibá né ló gudxlio nacni xtunylo». Órni bilox bunybu oración, «guidopy congregación goliskiaʼyibu Jehová» (1 Crón. 29:11, 20).
4. ¿Ximod bunyxiroʼ Jesús Jehová?
4 Órni Jesús goyoʼ ló Gudxlio, bunyxiroʼbu Bixiosbu de xidal mod. Por ejemplo, guirá ór golexabu que galrradziguiaʼ ni bunybu, bunybu láani por xcalnadip Jehová (Mar. 5:18-20). Láaca bunyxiroʼbu Bixiosbu por mod goniʼbu de Jehová né por mod godabiobu stipnés. Toibtica buelt, órni Jesús casuidy lainy toib sinagoga, lad guirá buñcu goyoʼ toib buñgonaʼ ni ma sané 18 íz de goló noʼ demony laidy. Xtol demonycu, gonaʼcu gosachonybu. ¡Nabann ni godudybu ló! Órni Jesús biduʼdy cuent que nigolú godudybu ló galrrioʼob, Jesús binladx láabu né goniʼbu: «Buñgonaʼ ma diti caxoʼlo». De ngú, godixbu ñabu laidy buñgonaʼcu, né nimaca góc ndopbu né «gosalóbu bunyxiroʼbu Dios» (Luc. 13:10-13). Buñgonaʼ ni bial gopbu razón par ñonyxiroʼbu Jehová; né lóono láaca.
¿XÍ RAZÓN NAPNO PAR GONYXIROʼNO JEHOVÁ?
5. ¿Xí razón napno par gapno respet Jehová?
5 Ronyxiroʼno Jehová portín rapno respet láabu. Napno xidal razón par gapno respet láabu. Jehová nap xiroʼgolu galnadip; xcalnadipbu diti radopyni (Sal. 96:4-7). Ló ni bisaʼbu riendxichni balaati nanbu. Láabu raduʼdybu galnabány lóono né raduʼdybu guirá ni raquiinno (Apoc. 4:11). Láabu dipa rasiambu lóono (Apoc. 15:4). Rarebuʼ guirá ni ronybu né rony cumplirbu xtiitzbu (Jos. 23:14). Por ngú profeta Jeremías góoch láabu: «Lad guirá buñ ni noʼ xcalrrien de guirá gudxrop né lad guirá gobiernos xtunyibu, yadi ni toib ni nac xomod looy» (Jer. 10:6, 7). Napno xidal razón par gapno respet Bixiosno ni noʼ guibá. Per diti nosi napno respet láabu, láaca nadxiʼno láabu.
6. ¿Xigony nadxiʼno Jehová?
6 Ronyxiroʼno Jehová portín nadxiʼno láabu né guidopy xcalnabanyno. Jehová nap xidal cualidades ni rony que gandxiʼno láabu. Por ejemplo, ronladxbu né riembu ni rasac buñ (Sal. 103:13; Is. 49:15). Órni radudyno ló galrrioʼob rioʼbu xalagaryno né rioʼobni láabu (Zac. 2:8). Racnébu lóono guibigaxno ronoʼbu né gacno ximigbu (Sal. 25:14; Hech. 17:27). Láaca, nacbu humilde né «riachcadaʼbu par guibiʼbu guibá né gudxlio, par guilísbu ló yodée buñdxo. Ralísbu buñ pobre ló guix» (Sal. 113:6, 7). ¿Chú láabu diti ná gonyxiroʼ toib Dios de clas reʼ? (Sal. 86:12).
7. ¿Xí oportunida sacróyen napno?
7 Ronyxiroʼno Jehová portín raniiny lóono que buñ guimbu láabu. Xidal buñ diti nantzay ximodpa nac Dios. ¿Xigony? Portín Buñdzab ma goniʼ galrrascú de láabu né rasiegbu xpensary buñ (2 Cor. 4:4). Ronybu que buñ gony pensary que Jehová rony castigarbu buñ órni rony buñ toib galkié, né diti riembu galrrioʼob ni radudy buñ né láabu napbu dool por guirá cós mal ni rac ló Gudxlio. Per lóono nanno ni nigolú. Napno oportunida par gacnéno buñ guiduʼdy cuent xi claspa Dios nacbu, né modreʼ gonyxiroʼno láabu (Is. 43:10). Nigoreʼ guisuidyno tipnés versículos de Salmo 96, ro ritlaa ximod gonyxiroʼno Jehová. Ni guisuidyno sacné lóono ximod labúu gonyxiroʼno Dios.
¿XIMOD LABÚU GONYXIROʼNO JEHOVÁ?
8. ¿Xí ngú toib mod ni gonyxiroʼno Jehová? (Salmo 96:1-3).
8 (Bíil Salmo 96:1-3). Labúu gonyxiroʼno Jehová né ni ranino de láabu. Versículos reʼ raruʼni xpiin Dios gonyxiroʼ láabu né canción, guiliskiaʼ laabu, guiniʼ diitz sacró ni ralaa né guiniʼyibu de galxiroʼ xtuny Jehová lad guirá gudxrop. Modreʼ labúu gonyxiroʼno Bixiosno ni noʼ guibá. Xpiin Jehová ni bibany ló dzú ni see né ni bibany ló siglo primero, biquiinyibu guirá oportunida ni gopyibu par buny defenderyibu laa Jehová, né goniʼyibu cós tzaay ni buny Dios por layibu (Dan. 3:16-18; Hech. 4:29). ¿Ximod labúu guisuʼno layibu?
9, 10. ¿Xí rasuidyno ni gosaclóo Angelina? (Láaca bibiʼ retrat).
9 Guibiʼno ni gosaclóo toib hermana de Estados Unidos ni laa Angelina. a Láabu gopbu balory né buny defenderbu laa Jehová ló xchiimbu. Nacopyra cayonybu dxiin lagarycu, por ngú biruʼyibu hermana reʼ ló toib reunión ro radxin guirá ni nacopyra gosaló cayony dxiin par naniʼyibu tidxó de layibu par nimbu stipnés layibu. Bisuidybu mod guiniʼbu né biyopybu tipnés retrat par naslooybu balaati nakit noʼbu ni nacbu testigo xtuny Jehová. Per, toib xcompañerbu ni goniʼ antes que láabu, goniʼbu que goniʼsbu xomod testigo xtuny Jehová, per después gosalóbu goniʼbu cós mal de lóono. Angelina ná: «Nigolú bitin xcalnabani. Per gonabdiidza naʼca: ¿Xí guiduʼdi lagary guiniʼyibu galrrascú de Jehová o gony defender láabu la?».
10 Órni xcompañerbu bilox goniʼ, Angelina dzudiguieʼ buny toib oración dopien. Órcu, biyopybu mod gochbu xcompañerbu: «Naʼ xomodca looy goniʼsa xomod testigo xtuny Jehová, né nacraya láani». Mersi ñoʼ toib galrradíilien, per Angelina diti bidzuitzbu. Órcu, primer bislooybu tipnés retrat sacróyen ni goleʼbu órni goyeebu tipnés lagary laʼga cayonybu xchiin Jehová né después biyopybu mod buny defenderbu ni ronybu crer (1 Ped. 3:15). Órni bilox goniʼbu, xcompañerbu ma diti cadzuitz né láabu, né goniʼbu que láaca rasetnaladxbu cós sacróyen ni godudybu ló órni goniʼsbu xomod testigo xtuny Jehová. Angelina ná: «Raquiin gony defenderno laa Jehová. ¡Nacni toib privilegio!». Par lóono nacni toib privilegio guiliskiaʼno né gonyxiroʼno laa Jehová, ná órni stipnés raniʼ mal de láabu.
Labúu gonyxiroʼno Jehová né ni ranino. (Bibiʼ párrafos 9 né 10). b
11. ¿Ximod ma bisob xpiin Dios dada ló dzú ni see ni ná Salmo 96:8?
11 (Bíil Salmo 96:8). Labúu gonyxiroʼno Jehová né cós ni rasac ni napno. Guirá xpiin Dios ronyxiroʼ láabu modreʼ (Prov. 3:9). Por ejemplo, buñ israelitas biduʼdyibu cós ni rasac ni gopyibu órni bisaʼyibu né gonyibu templo (2 Rey. 12:4, 5; 1 Crón. 29:3-9). Stipnés xpiin Cristo «biquiinyibu cós ni gopyibu» par gocnéyibu Jesús né xpiin (Luc. 8:1-3). Né, ló siglo primero, tipnés herman láaca bixelyibu tipnés cós par gocnéyibu xhermanyibu (Hech. 11:27-29). Ló naareʼ láaca labúu gonyxiroʼno Jehová né donación xtunyno.
12. ¿Ximod ronyxiroʼno Jehová né donación ni raduʼdyno? (Láaca bibiʼ retrat).
12 Guibiʼno toib ejemplo ni raslooy ximod ronyxiroʼno Jehová né donación ni raduʼdyno. Ló íz 2020, lainy gudx Zimbabue goyoʼ toib sibaa galnalaʼ ni gocla xiroʼ tiemp, né xidalgoluʼ buñ goyoʼ ló riesga ñaity por galrralán. Né ladyibu goyoʼ toib hermana ni góc laa Prisca. Per, ná goyoʼ sibaa reʼ, hermana reʼ bireʼbu predicación guirá dzú miérc né vierna, scú bunybu dada ló dzú ni ma nalaʼbu ló xaliobu par nagoʼbu binii. Xpesinbu buny borla láabu portín xalagary ñonybu dxiin ló xaliobu gosaabu goniʼbu xtiitz Dios né góoch buñ láabu: «¡Saitylo galrralán!». Per láabu né confianz cuapybu: «Jehová dipa sasiambu xpiimbu». Diti xidzú, por donación ni raduʼdyno, xcudx Jehová bixel tidxó galrro pal láabu. Tipnés xpesinbu bidziguiaʼ né goniʼyibu: «Dios dipa ma bisian looy. Nainy lóodo gando más de láabu». Né gatzyibu gosaló goyee reunión.
Labúu gonyxiroʼno Jehová né cós ni rasac ni napno. (Bibiʼ párrafo 12). c
13. Mod ná Salmo 96:9, ¿xí non gonyno par labúu gonyxiroʼno Jehová?
13 (Bíil Salmo 96:9). Labúu gonyxiroʼno Jehová por mod ronyno. Sacerdotes ni buny xchiin Jehová ló dzú ni see non ñáasyibu né ñacyibu buñ nayadit órni ñonyibu xchiin Jehová lainy tabernáculo né lainy templo (Éx. 40:30-32). Lóono láaca ronyno dada rutirigaʼlni lóono par gacno buñ nayaa, per ni más rasac, xcalnabányno gacni nayaa nisló Dios (Sal. 24:3, 4; 1 Ped. 1:15, 16). Non gonyno dada rutirigaʼlni lóono par guitzaʼno mod gócno nírcu né guibanyno mod ná Dios. Ndeʼ raduʼdy diitz guisianno cós mal, né cós buidy ni bunyno, né guisuidyno gonyno pensary né gonyno por guislooyno cualidades sacróyen ni nap Jehová (Col. 3:9, 10). Né xcalrracné Dios, dada buñyox né buñdxibloo labúu guitzaʼyibu né guibanyibu mod rasuidy Dios.
14. ¿Xí rasuidyno de ejemplo xtuny Jack? (Láaca bibiʼ retrat).
14 Guibiʼno ni gosaclóo Jack, toib buñdxibloo ni bigaity xidalgoluʼ buñ né por ngú bireʼ laabu Demony. Por ni bigaitybu xidal buñ non ñaitybu. Per, laʼga cabésbu dzú ni ma gaitybu, gosaguelbu nasuidybu la Biblia né toib hermano ni riee riguen buñ ni noʼ lachquiip. Ná bunybu xidal cós mal ló dzú ni see, Jack bitzaʼbu mod gócbu, né después goyonisbu xomod testigo xtuny Jehová. Por ni bitzaʼbu mod gócbu dzú ni ma gaitybu tipnés buñ ni gon lachquiip dada gorudxaʼyibu órni góc despediryibu de Jack. Toib soldad ni buny dxiin lagarycu goniʼ: «Dzú ni see, Jack góc ni más góc buñ mal lad guirá buñ ni goyoʼ reʼ. Per nigoreʼ láabu ni más natzaaybu». Ti xomal después ni goity Jack, herman ni goyee par nagoʼ reunión lainy lachquiip cu bibiʼyibu bidxin toib buñ ni dipa ma goyee reunión. ¿Xigony goyeebu reunión dzúcu? Portín nigolú bidziguiaʼbu ni bitzaʼ Jack né goniiny ñanbu xi ñonybu par ñony adorarbu Jehová. Ndeʼ rasien lóono que mod ronyno labúu gonyxiroʼni Bixiosno ni noʼ guibá (1 Ped. 2:12).
Labúu gonyxiroʼno Jehová né mod ronyno. (Bibiʼ párrafo 14). d
¿XIMOD MÁPA MER GONYXIROʼ JEHOVÁ LAA?
15. ¿Xí mápa mer gony Jehová par gonyxiroʼbu laabu? (Salmo 96:10-13).
15 (Bíil Salmo 96:10-13). Ro ralox Salmo 96 náni que Jehová nac toib Rey ni rony xinésni órni rony juzgar. ¿Ximod mápa mer gonyxiroʼ Jehová laa? Xinésni gony juzgarbu buñ. Mápa mer guinitlóbu Babilonia la Grande portín cayony buidyni laabu (Apoc. 17:5, 16; 19:1, 2). Tipnés buñ ni guibiʼ órni guinitló religión falz sigory saniiny layibu guienyibu Jehová toibsi né lóono. Después, ló Armagedón, Jehová sanitló xcudxliogox Buñdzab. Sanitlóbu ni rianladx né rony buidy laabu, per salaabu guiránac buñ ni nadxiʼ láabu, ni rasob né ni rioladx gonyxiroʼ láabu (Mar. 8:38; 2 Tes. 1:6-10). Después ni gony mandary Cristo ló Tipmil íz, órni ma bilox buny juzgarbu buñ, órcu Jehová salox sasiá laa (Apoc. 20:7-10). Ló dzúcu, «ló gudxlio sioʼgolu xcalnan de galxiroʼ xtuny Jehová xomod noʼ nís ló nisdaʼ» (Hab. 2:14).
16. ¿Xí láani ma goloʼlo guiclo gonylo? (Láaca bibiʼ dibuj).
16 ¡Nigolú sacróyen sácni órni guiránac buñ gonyxiroʼ Jehová! Laʼga cabésno guidxin dzúcu, guiquiinno guirá oportunida ni napno par gonyxiroʼno Dios xtunyno. Par cueʼ loguiaʼyibu dxiin rodann ni napno, Tidxó buñ ni nap xiroʼ Galnan ma golúyibu Salmo 96:8 par gacni texto de íz 2025: «Colgonyxiroʼ laa Jehová».
¡Sadxin dzú guirá buñ sonyxiroʼ Jehová! (Bibiʼ párrafo 16).
CANCIÓN 12 Jehová, nuestro gran Dios
a Tipnésyibu bidzaʼ laayibu.
