ARTÍCULO NI GUISUIDYNO 4
CANCIÓN 18 Gracias por el rescate
¿Xí rasuidy xcalgoity Jesús lóono?
«Scareʼ bislooy Dios xcalnadxiʼ lóono» (1 JUAN 4:9).
TEMA
¿Xí rasuidy xcalgoity Jesús lóono de cualidades sacróyen ni napbu né ni nap Jehová?
1. ¿Ximod racnéni lóono ni guisetnaladxno xcalgoity Jesús guirá íz?
¿XCALGOITY Jesús nacni toib galrrascad nigolú sacróyen ja? (2 Cor. 9:15). Raduʼdyno guixquix por ni goity Jesús por lóono, portín por ngú labúu racno ximig Jehová né rapno oportunida de guibanyno tipzó. Napno xidal razón par guiduʼdyno guixquix Jehová, láabu biduʼdybu galrrascadcu lóono portín ronladxgoluʼbu lóono (Rom. 5:8). Jesús buny mandary lóono nasetnaladxno xcalgoitybu guirá íz, par gacnébu lóono guiduʼdyrano guixquix né dipa guialadxno ni bunybu por lóono (Luc. 22:19, 20).
2. ¿Xí guibiʼno ló artículo reʼ?
2 Íz reʼ, Memorial sácni dzú sábda 12 de abril íz 2025. Né guiráno nainy tzoʼno. Ni cueʼno tiemp ló xomal xtuny Memorial nigolú sacnéni lóono par gonyno pensary ló guirá ni Jehová né Xiin ma buny por lóono. Ló artículo reʼ sabiʼno xi rasuidy xcalgoity Jesús lóono de láabu né de Jehová. Ló stoib artículo ni sieed sabiʼno ximod racné xcalgoity Jesús lóono né ximod labúu guislooyno que raduʼdyno guixquix.
¿XÍ RASUIDY XCALGOITY JESÚS LÓONO DE JEHOVÁ?
3. ¿Ximod labúu nalaa xcalgoity toibsi buñ xidalguixo buñ? (Láaca bibiʼ dibuj).
3 Xcalgoity Jesús rasuidyni lóono que Jehová rioladx gony xinésni (Deut. 32:4). ¿Xigony ranino ngú? Adán diti bisobdiitz Dios, por ngú guiráno bianéno galkié né galgoity (Rom. 5:12). Jehová bixelbu Jesús par bilaabu lóono de galkié né galgoity. Per ¿ximod xcalgoity toibsi buñ labúu nalaa xidalguixo buñ? Apóstol Pablo golexa láani modreʼ: «Portín, xtol xcalnayaʼ toibsi buñguieeu [Adán] xidalguixo buñ bidxin gop galkié, scúca por ni bisobdiitz toibsi buñ [Jesús] xidalguixo sony xinésni» (Rom. 5:19; 1 Tim. 2:6). Ló stoib diitz, pal guiráno ni nacno buñgudxlio bidxin goyoʼno xan xomandary galkié né galgoity portín toibsi buñguieeu ni diti gop galkié diti bisob Dios, por ngú par nareʼno xan xomandary galkié biquiin que toibsi buñguieeu ni diti nap galkié nasob Dios.
Toibsi buñ goloʼ lóono xan xomandary galgoity né galkié, né toibsi buñ bilaa lóono. (Bibiʼ párrafo 3).
4. ¿Xigony diti labúu naduʼdy Jehová lagary que xiin Adán ni nasob nabany tipzó?
4 ¿Per fuerspa ñaity Jesús par nalaabu lóono la? ¿Xí diti labúu naduʼdy Jehová lagary que xiin Adán ni nasob láabu nabany tipzó la? Sigory par lóono ralooyni galán ñonybu láani modcu, per guisetnaladxno que Jehová dipa raché órni rony xinésni. Por ngú diti labúu natuʼdybu scásiʼ xcalnayaʼ Adán né ñonybu suusi diti góc xitcal.
5. ¿Xigony labúu gapno confianz que Jehová guirá ór sony xinésni?
5 Per gonyno pensary que Jehová diti naduʼdy xiin par ñaity por lóono, né naduʼdybu lagary que xiin Adán nabany tipzó. ¿Xí ñac? Pal ñonybu láani, ngú naduʼdy diitz que diti ronybu xinésni, por ngú pentzi tipnés buñ nanabdiitz pal ñonybu ngúca né stipnés cós. Por ejemplo, ¿ma diti ñony cumplirbu toibtica cós ni biduʼdybu xtiitzbu gonybu la? Per diti non tzoʼno galrrasaʼ por ngú, portín Jehová buny xinésni, ná ngú godiña naduʼdybu Xiimbu ni ronladxgoluʼbu par ñaity. Por ngú napno confianz que láabu guirá ór sonybu xinésni.
6. ¿Ximod racné xcalgoity Jesús lóono guibiʼno balaati ronladx Jehová lóono? (1 Juan 4:9, 10).
6 Xcalgoity Jesús raslooyni que Jehová rony xinésni, per ni más rabeʼ loguiaʼni ngú, galnadxiʼ ni napbu lóono (Juan 3:16; bíil 1 Juan 4:9, 10). Jehová bixelbu Xiimbu par ñaity por lóono, portín nainy láabu guibanyno tipzó né láaca gacno xfamilbu. Buny pensary ló ndeʼ: órni biché Adán, ma diti gócbu xfamil Jehová. Né por ngú guiráno diti nacno xfamil Dios. Per, né xcalrracné xcalgoity Jesús, buñ ni gap fe lóo Dios né guisob láabu, labúu sadxin dzú sacyibu xfamilbu. Né desde nigoreʼ, Jehová labúu ratuʼdy scásiʼ xcalkiéno né labúu racno ximigbu né radzakno xhermanno. ¡Balaati ronladx Jehová lóono! (Rom. 5:10, 11).
7. ¿Ximod ni gonyno pensary ló galrrioʼob ni godudy Jesús ló racnéni lóono guienno balaati nadxiʼ Jehová lóono?
7 Labúu guientzaayno balaati nadxiʼ Jehová lóono pal ronyno pensary balaati car godix Jehová par bilaa lóono. Buñdzab ná que xpiin Dios sasian láabu órni tudy ló galnagandaʼ. Par guislooybu que Buñdzab rascú, Jehová biduʼdy lagary que Jesús nadudy ló galrrioʼob antes ni ñaity (Job 2:1-5; 1 Ped. 2:21). Órni buñ bixiichyibu Jesús né soldad godin né bicaʼ láabu ló yac nadop, Jehová bibiʼ guirá ni góc desde lainy guibá. Láaca bibiʼbu balaati galrrioʼob godudy Xiingaʼnbu ló órni goity (Mat. 27:28-31, 39). Jehová labúu nacaa ló guirá buñcu ortísi par diti natuʼdyibu Xiimbu ló galrrioʼob. Por ejemplo, órni buñ goniʼ: «Dios guilaa láabu pal nainy gacnébu Xiimbu», Jehová labúu nalaa Xiin (Mat. 27:42, 43). Per, pal ñonybu láani, diti labúu nareʼno xan xomandary galkié né galgoity né nigoreʼ buñgudxlio diti ñap esperanza. Por ngú Jehová biduʼdy lagary que Xiimbu nadudy ló galrrioʼob né ñaity.
8. ¿Xigony nanno que nigolú bioʼobni Jehová órni bibiʼbu Xiimbu cadudy ló galrrioʼob? (Láaca bibiʼ dibuj).
8 Nigolú, Jehová diti biquiimbu xcalnadipbu par nalaabu Xiimbu, per ngú diti raduʼdy diitz que diti rioʼobni láabu ni rasaclóo buñ. Jehová bisaʼ lóono par labúu tzoʼ ni guisacno, bisaʼbu lóono xomod láabu, por ngú riendxichni que láaca noʼ ni rasacbu. Né la Biblia ná que goyoʼ buñ ni bisioʼob «xcalnabany Dios» né goloʼ nabann láabu (Sal. 78:40, 41). Gonyno pensary ló Abrahán né Isaac. Jehová gochbu Abrahán naduʼdy xiin xomod sacrificio (Gén. 22:9-12; Heb. 11:17-19). Buny pensary balaati bioʼob xcalnabany Abrahán órni cayonybu puext par guigaitybu xiimbu. ¿Né Jehová ga? ¿Ximod gosacbu órni bibiʼbu buñ bituʼdy Xiimbu ló galrrioʼob né bigaity láabu? Nigolú bioʼob xcalnabanybu. (Bibiʼ ló jw.org video ni laa Ejemplos de fe: Abrahán [parte 2]).
Nigolú bioʼobni Jehová bibiʼbu Xiimbu cadudy ló galrrioʼob. (Bibiʼ párrafo 8).
9. ¿Xí rasuidy Romanos 8:32, 38, 39 looy de galnadxiʼ ni nap Jehová looy né guirá xpiimbu?
9 Xcalgoity Jesús rasuidyni lóono que diti noʼ stoib ni ronladxgoluʼ lóono xomod Jehová, nili ximigdxinno, o xfamilnadxno (bíil Romanos 8:32, 38, 39). Né, Jehová ronladx lóono más que ni ronladxno lóocano. Buny pensary ló ndeʼ: ¿nainy guibanylo tipzó la? Jehová nigolú raniiny que guibanylo tipzó. ¿Raniiny looy tudy scásiʼ xcalkiélo la? Jehová nigolú raniiny tudy scásiʼ xcalkiélo. Nosi ni ranabbu lóono ngú, guicacuentno xcalrrascadbu, guisobno né gapno fe láabu. Xcalgoity Jesús raslooytzayni balaati nadxiʼ Jehová lóono. Né ló gudxlio copy sasuidyno más de xcalnadxiʼ Jehová (Ecl. 3:11).
¿XÍ RASUIDY XCALGOITY JESÚS LÓONO DE LÁABU?
10. a) ¿Xí láani más goloʼ Jesús ló galrrasaʼ antes ni ñaitybu? b) ¿Ximod buny nayaa Jesús laa Bixios? (Láaca bibiʼ cuadriyen ni laa « Ni Jesús diti bisian Jehová buny nayaani laa Jehová»).
10 Jesús nigolú rioʼ galrrasaʼ por mod rabiʼ buñ Bixiosbu (Juan 14:31). Goyoʼgolubu ló galrrasaʼ que ni buñ goniʼ que diti gopbu respet né goniʼbu galrrascú de Dios, ñony buidyni laa Bixiosbu. Por ngú gochbu Bixiosbu ndeʼ: «Bixiosa, pal labúuni, goleʼ copa reʼ ronoʼya» (Mat. 26:39). Jesús diti bisiambu Jehová dada dzú goitybu, por ngú labúu bisiábu laa Bixiosbu.
11. ¿Ximod bislooy Jesús que nigolú gondxiʼbu buñ? (Juan 13:1).
11 Xcalgoity Jesús, láaca rasuidyni lóono que láabu rioʼbu galrrasaʼ por buñ, né máspa por xpiimbu (Prov. 8:31; bíil Juan 13:1). Jesús gon que laʼga ñoʼbu ló Gudxlio, nadudybu ló xiroʼ galnagan, nadudybu ló xiroʼ galrrioʼob né ñaitybu. Per diti bunybu xchiin Jehová por compromis, xalagary ngú, né guidopy xcalnabanybu goniʼbu xtiitz Dios, bisuidybu né gocnébu buñ. Né dada dzú ni ma gaitybu, goleʼbu tiemp par godiʼpbu ñeʼ xpiimbu, né buny animarbu né bisuidybu xpiimbu (Juan 13:12-15). Né, después, laʼga caabu ló yac nadop, biduʼdybu esperanza buñ mal ni goyoʼ cueʼbu né gochbu Juan ñan xinaʼbu, María (Luc. 23:42, 43; Juan 19:26, 27). Ló guidopy tiemp ni Jesús buny xchiin Jehová ló Gudxlio, bislooybu que nigolú gondxiʼbu buñ né goitybu por buñ.
12. ¿Ximod cayonysa Jesús sacrificios por lóono?
12 Cristo «goitybu toibsi buelt né por tipzó», per cayonyrabu sacrificios por lóono (Rom. 6:10). Jesús cayonyra dxiin nadip par guiduʼdybu xidal cós sacróyen ni labúu racaʼno por xcalgoitybu. Buny pensary ló guirá dxiin ni ronybu xomod Rey, Sumo Sacerdote né guic congregación (1 Cor. 15:25; Efes. 5:23; Heb. 2:17). Xcuentbu noʼ guitopbu ungidos né xidalguixo buñ, toib dxiin ni sasloxbu antes de guilox gran tribulación (Mat. 25:32; Mar. 13:27). a Láaca rabiʼbu que tzoʼ galrro par xpiimbu ló sentido espiritual ló dzureʼ ni ma cadubylagaʼ (Mat. 24:45). Né ló Tipmil Íz ni gony mandarybu, sonyrabu dxiin par gacnébu lóono. Mod ma bibiʼno, órni Jehová bunycuent Xiingaʼn, diti nosi bunybu láani par ñaitybu por lóono, láaca par ñonybu xidal cós por lóono.
BISUIDYRA
13. ¿Ximod ni gonylo pensary labúu gacnéni looy guisuidylo más cós de galnadxiʼ ni nap Dios né Cristo lóono?
13 Ni gonylo pensary, sacnéni looy par guisuidylo balaati nadxiʼ Jehová né Jesucristo lóono. Sigory labúu goʼolo toib o más Evangelios ló xtzú Memorial de íz reʼ. Diti goʼolo xiroʼ ló toibsi ór, xalagary ngú bisuidy tzagaa par guidzelo xi razón noʼ par gandxiʼlo Jehová né Jesús. Né diti guialadxlo ndeʼ: góoch stipnés ni casuidylo.
14. Mod ná Salmo 119:97 né nota, ¿xí raquiin gonyrano par guisuidyno más de xcalgoity Jesús né stipnés galrrasuidy? (Láaca bibiʼ retrat).
14 Pal ma xidzú naclo Testigo, pentzi ranabdiitzlo looyca pal sadzelo cós copy de temas ni ma xidal buñ rimbu, xomod, mod rony Dios xinésni, xcalnadxiʼbu né xcalgoity Jesús. Per diti ralox rasuidy buñ temas reʼ. ¿Xí labúu gacné looy par guisuidyralo más? Guiquintzaylo guirá información ni napno ló publicaciones xtunyno. Pal radzelo toib texto ni diti rienlo, biyopy información. Né después, buny pensary ló ni bidzelo né ló ni bisuidylo de Jehová, Xiimbu, né galnadxiʼ ni napyibu looy (bíil Salmo 119:97 né nota).
Ná ma sanéno xidal íz ló galnigolú, labúu guiduʼdyrano guixquix Jehová por xcalgoity Jesús. (Bibiʼ párrafo 14).
15. ¿Xigony raquiin guiyopyrano cós ni rasac ni sieed ló la Biblia?
15 Diti guireʼganlo pal órni roʼolo o rasuidylo la Biblia diti radzelo cós copy. Labúu guinino que ni guisuidy buñ la Biblia nacni suusi nayopy buñ or. Xidal buñ radudybu xiroʼ ór o dada xidal dzú rayopyibu or. Rapyibu paseins né diti rareʼganyibu portín nanyibu que ná guidzelyibu tlaʼ mitien, nigolú rasacni. Cós ni rasac ni radzelno ló la Biblia más rasacni que or (Sal. 119:127; Prov. 8:10). Por ngú gop paseins né diti guiañ goʼolo né guisuidylo la Biblia (Sal. 1:2).
16. ¿Ximod labúu guisuʼno Jehová né Jesús?
16 Laʼga casuidylo, biyopy mod guisoblo ni casuidylo. Por ejemplo, labúu guisuʼlo mod rony Jehová xinésni órni cobiolo guirá buñ. Labúu guisuʼlo galnadxiʼ ni nap Jesús Bixios né stipnés buñ, órni tzoʼlo puext tudylo ló galrrioʼob por laa Dios, órni gacnélo herman, ná ngú raguiña gonylo tipnés sacrificios né guiniʼlo xtiitz Dios né gacnélo layibu guicaʼyibu xcalnasác xcalgoity Jesús.
17. ¿Xí guisuidyno ló artículo ni sieed?
17 Laʼga más guienno né guisac xcalgoity Jesús par lóono, más sandxiʼno Jehová né Xiin. Né órcu layibu láaca sandxiʼyibu más lóono (Juan 14:21; Sant. 4:8). Por ngú, guiquintzayno guirá ni raduʼdy Jehová lóono par guisuidyrano más de xcalgoity Jesús. Ló artículo ni sieed, guisuidyno ximod racné xcalgoity Jesús lóono, né xi labúu gonyno par guislooyno que nigolú raduʼdyno guixquix por xcalnadxiʼ Jehová.
CANCIÓN 107 Dios nos enseñó a amar
a Ló Efesios 1:10, Pablo goniʼbu de guidop «cós ni noʼ lainy guibá». Ló Mateo 24:31 né Marcos 13:27, Jesús goniʼ que guidop «guirá ni ma golúbu». Órni pablo né Jesús goniʼ de guidop, gadzéga cós biduʼdyibu diitz. Pablo biduʼdybu diitz órni Jehová rabú chú gac xiimbu ló sentido espiritual né rac ungiryibu né espíritu santo. Né Jesús biduʼdy diitz órni guirá ungidos ni noʼsa ló Gudxlio tzee guibá ló gran tribulación.
