ARTÍCULO NI GUISUIDYNO 5
CANCIÓN 108 El amor leal de Jehová
¿Ximod racné xcalnadxiʼ Jehová lóono?
«Cristo Jesús bieed ló gudxlio par guilaabu buñ galkié» (1 TIM. 1:15).
TEMA
¿Ximod racné xcalgoity Jesús lóono, né ximod labúu guislooyno Jehová que raduʼdyno guixquix por láani?
1. ¿Ximod labúu coʼ nakitno Jehová?
GONYNO pensary que rascadno toib buñ ni ronladxno toib cós sacróyen né ni labúu guiquimbu. ¿Nasac nabanno pal buñcu nosi nagoʼtzay né ñaladx láani ja? Per ñoʼ nakitno pal buñcu naduʼdy guixquix né naquiin cós ni biscadno láabu. ¿Xí rasuidyno de ejemplo reʼ? Jehová bunycuent Xiin por lóono. ¡Nigolú rioʼ nakitbu órni rabiʼbu que raduʼdyno guixquix por xcalgoity Jesús né por galnadxiʼ ni bislooybu lóono! (Juan 3:16; Rom. 5:7, 8).
2. ¿Xí guisuidyno ló artículo reʼ?
2 Per, conforma radudy íz, labúu ñaladxno balaati rasac galrrascad ni biduʼdy Jehová lóono. Noʼno nakit ni napno láani, per labúu nagoʼtzayno né ñaladxno láani. Par diti guisaclono ngú né guiduʼdyrano guixquix, non gonyno pensary ló guirá ni ma buny Jehová né Jesús por lóono. Né por ngú cuá artículo reʼ. Guinino ximod racné xcalgoity Jesús lóono nigoreʼ né ximod labúu sacnéni lóono ló dzú ni sietra. Láaca sabiʼno ximod labúu guislooyno Jehová que raduʼdyno guixquix por xcalnadxiʼbu, né máspa ló xtzú Memorial.
¿XIMOD RACNÉNI LÓONO NIGOREʼ?
3. ¿Ximod racné xcalgoity Jesús lóono nigoreʼ?
3 Xcalgoity Jesús ma cayacnéni lóono. Por ejemplo, por láani, Jehová ratuʼdy scásiʼ xcalkiéno. Né diti lafuers ronybu láani, xalagary ngú, ronybu láani portín raniiny láabu. Ló toib canción David goniʼ: «Looy, Jehová, natzaaylo né puext noʼlo par guitudylo galkié scásiʼ» (Sal. 86:5; 103:3, 10-13).
4. ¿Par chú layibu bixel Jehová Xiin goity? (Lucas 5:32; 1 Timoteo 1:15).
4 Noʼ ni rasac que diti noʼ xi portín guituʼdy Jehová scásiʼ xcalkiéyibu. Per, guiráno diti noʼ xi portín guituʼdy Jehová scásiʼ xcalkiéno. Apóstol Pablo goniʼ: «Diti labúu gac laaya apóstol». Per de ngú, goniʼbu: «Por xcalrronladx Dios naca ni naca» (1 Cor. 15:9, 10). Órni rac arrepentirno de xcalkiéno, Jehová ratuʼdy láani scásiʼ. ¿Xigony? Diti portín bunyno gan láani, xalagary ngú, portín nadxiʼbu lóono. Por ngú, diti guisac malno pal ronyno pensary que diti noʼ xi portín guituʼdy Jehová scásiʼ xcalkiéno, guisetnaladxno que Jehová diti bixel Xiin par ñaity por buñ ni diti nap galkié, xalagary ngú, bunybu láani por buñ galkié ni rac arrepentir (bíil Lucas 5:32; 1 Timoteo 1:15).
5. ¿Xigony ni toib buñ labúu guiniʼ que buny gan xcalrronladx Jehová?
5 Ná ma sanéno xidzúgolu íz cayonyno xchiin Jehová, dipa non gonyno pensary que lóono bunyno gan xcalrronladxbu. Nigolú, par láabu nigolú rasac guirá ni ronyno por láabu (Heb. 6:10). Per láabu biduʼdybu Xiimbu xomod toib galrrascad, diti par quiixbu lóono por ni cayacnéno láabu. Pal nanino que lóono ngú ni bunyno gan xcalrronladxbu, naduʼdyno diitz que diti biquiinno ñeed Jesús né ñaity por lóono (bitzak láani né Gálatas 2:21).
6. ¿Xigony buny Pablo rutigoygaʼlni láabu ló xchiin Jehová?
6 Pablo gon que diti labúu ñonybu gan natuʼdy Jehová scásiʼ xcalkiébu. Per pal gonbu láani, ¿xigonysa bunybu rutigoygaʼlni láabu ló xchiin Jehová? Portín goniiny naslooybu que nigolú biduʼdybu guixquix por xcalrronladx Dios (Efes. 3:7). Modcuca, lóono ronyrano xchiin Jehová né gan, diti portín nainy gonyno gan xcalrronladxbu, xalagary ngú, portín nainy guislooyno láabu que raduʼdyno guixquix por láani.
7. ¿Xí stoib mod racné xcalgoity Jesús lóono nigoreʼ? (Romanos 5:1; Santiago 2:23).
7 Stoib galnasác ni raduʼdy xcalgoity Jesús lóono, láani ngú, ni labúu racno ximig Jehová. a Mod bisuidyno ló artículo ni godudy, órni rálno diti maca nacno ximig Dios. Per né xcalrracné xcalgoity Jesús, labúu rioʼ «nakitno por paz xtuny Dios» né rabigno ronoʼbu (bíil Romanos 5:1; Santiago 2:23).
8. ¿Xigony non guiduʼdyno guixquix Jehová por privilegio ni napno ni labúu raninéno láabu?
8 Gonyno pensary ló toib cós ni rasac ni labúu ronyno portín nacno ximig Jehová: Oración. Láabu diti nosi racadiagbu oración ni rac nisló xidal buñ ló reunión, láaca racadiagbu oración ni tigaagano ronyno. Nigolú, órni raninéno Jehová, rasacno sacró né lóocano, per nga diti nac galnasác ni rareʼ loguiaʼ, ni raninéno Jehová racnéni lóono guidzaktzayno láabu (Sal. 65:2; Sant. 4:8; 1 Juan 5:14). Órni Jesús goyoʼ ló Gudxlio, casi guirá ór bunybu oración, portín gonbu que Jehová cacadiag láabu né que guirá oración cu ñacnéni laabu par nadzaktzaybu Jehová (Luc. 5:16). Nigolú raduʼdyno guixquix por xcalgoity Jesús, portín por láani, labúu radzaktzayno Jehová né ronyno oración.
¿XIMOD LABÚU GACNÉNI LÓONO LÓ DZÚ NI SIETRA?
9. ¿Ximod sacné xcalgoity Jesús ló dzú ni sietra xpiin Jehová ni diti guisian láabu?
9 ¿Ximod sacné xcalgoity Jesús buñ ni diti guisian Jehová ló dzú ni sietra? Jehová saduʼdy galnabany tipzó layibu. Xidal buñ rony pensary que diti labúu guibany buñ tipzó, portín ma xidalgoluʼ íz cayaity buñ. Per Jehová bisaʼ buñgudxlio par guibany tipzó. Né, ná nigoreʼ nagan gonyno pensary que labúu guibany buñ tipzó, ronyno crer que labúu sabanyno tipzó, portín nanno que nigolú car godix Jehová par labúu gacni: biduʼdybu Xiimbu goity por lóono (Rom. 8:32).
10. ¿Xí esperanza nap ungidos né stipnés xiil?
10 Ná galnabány tipzó, nacni toib galnasác ni sacaʼno ló dzú ni sietra, Jehová raniiny láabu, que desde nigoreʼ gonyno pensary loni. Ungidos ma cabésyibu tzeeyibu guibá né gonyibu mandary né Jesús ló Gudxlio (Apoc. 20:6). Stipnés xiil láaca ma raniiny layibu guibanyibu ló toib Gudxlio móz, ro ma diti sioʼ galrrioʼob (Apoc. 21:3, 4). ¿Naplo esperanza de guibanylo tipzó ló Gudxlio la? Guiropca esperanza reʼ toibsi midid rasacni. Né Jehová bisaʼ buñgudxlio par guibany tipzó ló Gudxlio. Por ngú ni guibanyno tipzó ló Gudxlio sagoʼ nakitni lóono.
11, 12. ¿Xí tipnés galnasác sacaʼno ló Gudxlio móz? (Láaca bibiʼ retrat).
11 Buny pensary ximod guibanylo ló Gudxlio móz. Galguitz né galgoity ma diti sagoʼni looy ló galrrasaʼ (Is. 25:8; 33:24). Jehová saduʼdy guirá cós tzaay ni guiniiny xcalnabanylo. ¿Xí láani ñoladxlo nasuidylo? ¿Ñoladxlo nasuidylo más de nimal né manybiguin la? ¿Ñoladxlo nascoʼolo toib instrumento la? ¿Ñoladxlo nabeʼlo dibuj la? Ló Gudxlio móz saquiinno buñ ni gan guisaʼ yoʼ, buñ ni coʼ binii, ni gonytzaay galrro, ni gan né guisagaʼ yaguien né guieʼyen, buñ ni gony herramientas, ni gan né gonytzaay cós né buñ ni gacné de stipnés mod (Is. 35:1; 65:21). ¡Saplo xidzúgolu tiemp par guisuidylo nitisi guiniiny looy!
12 ¡Nigolú sacróyen gac órni guicacuentno buñ ni guiás lad gueʼet! (Hech. 24:15). Né láaca sacróyen guisuidyno más de Jehová né guirá cós ni bisaʼbu (Sal. 104:24; Is. 11:9). Per ni más sacróyen la, láani ngú que labúu gony adorarno Jehová né diti guisac malno portín bunyno toib cós mal. ¿Diti natzaʼlo guirá galnasác sacróyen reʼ ni guicaʼlo ló dzú ni sietra por galnakit ni nasaclo tipratien ni raduʼdy galkié ja? (Heb. 11:25). Galnabány ni gapno, más sacróni que nitisi cós ni labúu gapno nigoreʼ ló gudxlio reʼ. Bisetnaladx que sadxin dzú ro Gudxlio móz diti nosi sácni toib promesa, sacni nigolú. Né guirá ndeʼ diti labúu ñacni pal Jehová diti ñandxiʼ lóono né naxel Xiin par ñaity por lóono.
¿Xí galnasác ni guicaʼ buñ ló Gudxlio móz nainy gaplo? (Bibiʼ párrafos 11 né 12).
GUISLOOYNO JEHOVÁ QUE RADUʼDYNO GUIXQUIX LÁABU POR XCALNADXIʼBU
13. ¿Ximod labúu guislooyno que raduʼdyno guixquix por xcalnadxiʼ Jehová? (2 Corintios 6:1).
13 ¿Ximod labúu guislooyno Jehová que raduʼdyno guixquix por ni bixelbu Xiimbu goity por lóono? Coʼno xchiimbu primer lagary ló xcalnabányno (Mat. 6:33). Portín Jesús goity «por guirá buñ, por ngú buñ ma diti guibany par laʼsiyibu, xalagary ngú guibanyibu por ni goity por layibu né biás lad gueʼet» (2 Cor. 5:15). Dipa nainy guialadxno xigony raduʼdy Jehová xcalrronladx lóono (bíil 2 Corintios 6:1).
14. ¿Ximod labúu guislooyno que napno fe ló instrucciones ni raduʼdy Jehová lóono?
14 Stoib mod ni raslooyno que raduʼdyno guixquix por xcalnadxiʼ Jehová, láani ngú gapno fe né guisobno instrucciones ni raduʼdybu lóono. ¿Né ximod rac ngú? Órni raquiin coʼno guicno xi láani gonyno, xomod pal tzoʼno toib scuel xirop o yaca, o xi dxiin gonyno, non coʼno cuent ni nainy Jehová gonyno (1 Cor. 10:31; 2 Cor. 5:7). Órni raslooyno que napno fe por mod ronyno, rac toib cós sacróyen: fe xtunyno né mod radzakno Jehová rac nadipni más. Né esperanza ni napno láaca rac dxichni (Rom. 5:3-5; Sant. 2:21, 22).
15. ¿Ximod labúu guislooyno que raduʼdyno guixquix ló xtzú Memorial?
15 Stoib mod ni labúu guislooyno que raduʼdyno guixquix por xcalnadxiʼ Jehová né xcalgoity Jesús, láani ngú guiquintzayno xtzú Memorial. Diti nosi non gonyno rutirigaʼlni lóono par tzoʼno Memorial, láaca non guiruʼno stipnés (1 Tim. 2:4). Órni guiruʼno buñ, gaibyno layibu xi rac ló reunión reʼ ni nigolú rasac. Labúu guislooyno layibu videos ni sieed ló jw.org ni laa, ¿Xigony goity Jesús? né Guisetnaladxno xcalgoity Jesús. Ancianos saruʼyibu inactivos. ¿Ronylo pensary balaati sabaladx ni noʼ lainy guibá né ló Gudxlio pal tipnés xiil xtuny Jehová ni binit rabiguet lainy xcudxbu la? (Luc. 15:4-7). Ló Memorial diti nosi guinino dioxh xhermanno, láaca guinino dioxh buñ ni primerdiguieʼ buelt guidxin né buñ ni ma xidzú diti goyee. ¡Gonyno que guirá ni guidxin ló Memorial guisac sacró! (Rom. 12:13).
16. ¿Xigony non gonyno más ló xchiin Jehová ló xtzú Memorial?
16 ¿Labúu gonyno más ló xchiin Jehová ló xtzú Memorial la? Ndeʼ nac toib galán mod ni labúu guislooyno Jehová que raduʼdyno guixquix por guirá ni láabu né Jesús buny por lóono. Laʼga más guinino xtiitz Dios, más sacnébu lóono, né más sac nadip confianz ni napno láabu (1 Cor. 3:9). Né láaca, guisetnaladxno golno textos ni non golno ló xtzú Memorial, ni sieed ló follet Examinemos las Escrituras todos los días né ló Ni non gonyno ló reunión. Dada labúu guisuidytzayno guirá textos reʼ.
17. ¿Xí láani rony que Jehová guibaladx né lóono? (Láaca bibiʼ cuadriyen ni laa « Tap mod ni guislooyno que raduʼdyno guixquix por xcalnadxiʼ Jehová»).
17 ¿Né xí rac pal diti labúu gonylo guirá ni ma bisetlano ló artículo reʼ? Diti tzoʼlo ló galrrasaʼ. Bisetnaladx que Jehová diti ratzakbu ni ronylo né ni rony stipnés. Láabu rabiʼbu ni noʼ lainy xcalnabanylo né rioʼbu nakit portín nanbu que raduʼdylo guixquix por galrrascad ni biduʼdybu looy (1 Sam. 16:7; Mar. 12:41-44).
18. ¿Xigony raduʼdyno guixquix Jehová né Jesús?
18 Pal diti naxel Jehová Xiin par ñaity por lóono, diti labúu natuʼdybu scásiʼ xcalkiéno, diti labúu ñacno ximigbu né diti ñapno esperanza de guibanyno tipzó. Guirá ór guislooyno que raduʼdyno guixquix por xcalnadxiʼ Jehová, portín xcalnadxiʼbu bichiinni láabu par naduʼdybu guirá galnasác cu lóono (1 Juan 4:19). Né láaca guislooyno que raduʼdyno guixquix portín Jesús gondxigoluʼ lóono né por ngú goitybu por lóono (Juan 15:13).
CANCIÓN 154 Un amor sin final
