Bixiichdata toib. Diti buni pensary pal ximiga rioladx religión. Órcu gonabdiidza láabu: «¿Ñacsa nanlo ni ná la Biblia?». Diti cuapybu naʼ, ma después gochbu naʼ que xinaʼbu nac testigo xtuny Jehová né bisuidy láabu tipnés cós. Goniiny ñaana más, por ngú gonabdiidza tipnés cós láabu.

Casi guidopynac gueʼel biiydo diitz. Ximiga golexa que Buñdzab ngú ni rony mandary Gudxlio reʼ (Juan 14:30). Sigory looy ma nanlo láani, per naʼ diti goona láani órcu, por ngú goniiny ñaana más. Bicadiaga que ni rony mandary Gudxlio reʼ nacbu toib Dios tzaay ni rony xinésni. Per diti bidzakni né guirá cós ni bibiʼya. Ná ló dzúcu napsaya 26 íz, per bibiʼya xidal cós ni goloʼ naʼ ló galrrasaʼ.

Bixiosa góc piloto xtuny Fuerza Aérea de Estados Unidos. Por ngú desde dzú góca mbiox goona que tisintiempsi labúu nasaló guerr. Guirá soldad goyoʼyibu puext né tisintiempsi labúu nasaló toib guerr. Nigolú nagan góc órni goyaʼya scuel xirop lainy gudx California xtol guerr ni góc lainy gudx Vietnam. Xcompañera né naʼ cualódo buñchiin por ngú policia cualó lóodo né yac, né bixonydo né rioʼ ór dada biroc xpudo xtol gas ni bisalyibu loguiaʼdo. Gocni toib tiemp nagan. Bigaityibu buñ ni gosanir ló política, cualóyibu buñchiin, godíilyibu né buñ ni diti buny pensary toibsi mod. Diti goona xi ñoni.

Ló íz 1970 goyguni dxiin roʼ nisdaʼ ni noʼ niis lad norte de Alaska, ro buni gan xiroʼ bidxiich. Después goyaʼya gudx Londres (Inglaterra), cú gosiiya toib mot né goyoʼya néz saʼya niis lad sur, diti goona pu nadxina. Xidal beʼo después bidxina África. Ro saʼya bimbuya buñ ni nac xomodca naʼ, ni diti bioladx mod nac Gudxlio reʼ ni goniiny nasac sacró.

Por guirá ni bibiʼya né bicadiaga bidudi cuent que la Biblia nap razón órni rabexa  que Gudxlio reʼ noʼni ladxña toib espíritu ni nigolú mal. Goniiny ñaana pal rioʼ Dios galrrasaʼ por lóono.

Chop tzón beʼo después goona láani. Godudy íz bimbuya né binladxi xidal buñguieeu né buñgonaʼ ni góc fiel ná cualó nitisi galnagan.

Órni bibigueta Londres, biyobi xinaʼ ximiga, láabu bidudybu toib Biblia naʼ. Después goyaʼya niis gudx Ámsterdam (Países Bajos). Toibtica dzú noʼya locay ro cayoola la Biblia né xcalrracné toib lámpara. Órcu toib Testigo godudy niscú né gochbu naʼ que cuéxabu ni cayoola. Después, órni goyoʼya lainy gudx Dublín (Irlanda), goyguenna sucursal de testigos xtuny Jehová. Godapa xitz puert sucursalcu né bixalyibu par nadudi, né cú bimbuya toib herman ni ma xidzú noʼ lainy xcudx Jehová ni laa, Arthur Matthews. Goodxi láabu que nainyna guisudi la Biblia, né goyoʼbu puext guisuidybu naʼ.

Nigolú bioladxi ni bisudi, guirá ór biila libros né revistas ni rabeʼ Testigo. Né láaca biila la Biblia. Ló reunión, nigolú bidziguiaʼya ximod mbiox nan ximod rarexa galrranabdiitz ni raniiny buñnan gan ma xidzú íz, xomod xigony nogoluʼ cós mal, chú láabu ngú Dios né pal noʼ galnabany después de galgoity. Guirá ximiga gocyibu Testigos, né scú gocni portín diti bimbuya buñ de lagarycu. Layibu gocnéyibu naʼ ñonladxi Jehová né naniiny naʼ ñooni xchiimbu.

Ló íz 1972 goyonisa. Tobiz después góca precursor né gocnéya toib congregación mitien ni goyoʼ gudx Newry (Irlanda del Norte). Buny rentar toib yoʼ ni goyoʼ laidy dainy. Gaxca cú goyoʼ tipnés yós, né por ngú goyaʼya ronoʼyimu par bitudi discurs xtuni nislóyimu. Laʼga casoʼyimu ni cayóyimu, ralooyni cacadiagtzayimu naʼ. Ná nili bicaʼyimu rudx, gocnéyimu naʼ par nasudi natudi discurs nisló buñ. Ló íz 1974 góca precursor especial; xcompañera góc Nigel Pitt, ni nacsa ximigdxina.

Ló tiempcu goyoʼ galrradíil gudx Irlanda del Norte. Scú bimbu buñ gudxcu. Godíilyibu locay, bicuaʼcyibu buñ desde sit, bigastiryibu saʼyibu né bisalyibu bomba scú godudydzuyibu. Guirá ndeʼ góc xtol religión né xtol política. Per buñ católico né protestantes gonyibu que Testigos diti rioʼno lad política, por  ngú cuaʼdo lagary nanido xtiitz Dios né diti tampa goyoʼ riesga. Casi guirá ór, buñ ni raninédo ló predicación gochyibu lóodo que diti ñoʼdo tipnés lagary portín ñoʼ ni labúu nasaclodo.

Ná scú, goyoʼ ór goyoʼdo ló riesga. Toibtica dzú naʼ né Dennis Carrigan, ni láaca góc precursor, goyoʼdo gonido xtiitz Dios lainy toib gudx ni noʼ gaxca. Diti goyoʼ Testigos lagarycu, né toibsi buelt de goló goyoʼdo cú. Toib buñgonaʼ bigotz falz lóodo né goniʼbu que nacdo soldad británicos ni cayoʼ nagach, sigory portín diti gonido xomod buñ irlandés. Nigolú bidzuibydo. Gondo que pal naninédo toibtica soldad labúu nagaityibu lóodo o nacaʼyibu toib tir roʼ xipdo. Dennis né naʼ golésdo camión, lagarycu diti goyoʼ buñ né nigolú nachich gocni. Órcu bibiʼdo que toib camión bibigax ronoʼ cafetería ro bidzeldo buñgonaʼcu. Bireʼbu né goninébu guiropca buñguieeu ni sieed lainy camióncu, nigolú cadzuitzbu né biloyñabu lóodo. Órcu guiropca buñguieeucu tzagaa tzagaa bibigaxyibu lóodo né xcamionyibu, gonabdiitzyibu lóodo xi ór radudy camióncu. Órni bidxin camióncu, goninéyibu chofer xtuny camióncu, per diti labúu bicadiagdo xi goniʼyibu. Nosi lóodo biaʼpydo lainy camióncu, por ngú bunydo pensary que sabeʼyibu lóodo lainy gudxcu né noʼ ni sonyibu lóodo. Per diti noʼ xi gócdo. Órni bietjdo lainy camióncu, gonabdiidza chofercu: «¿Xí goniiny ñony guiropca buñguieeuca?». Láabu cuapybu lóodo: «Diti tzoʼto ló galrrasaʼ. Naʼ goodxi layibu chú lóoto. Diti noʼto ló riesga».

Ló íz 1976, ló toib samblia de distrit a ni góc lainy gudx Dublín, bimbuya Pauline Lomax, toib precursora especial de Inglaterra ni goyoʼ ló sambliacu. Gócbu toib hermana espiritual, gócbu buñdxo né galán buñ. Láabu né bisanbu, Ray, desde mbioxien goyoʼyibu lainy xcudx Jehová. Tobiz después, Pauline né naʼ bunydo galtzeʼel, né nacsado precursor especial lainy gudx Ballymena (Irlanda del Norte).

Por xidal íz goyoʼdo ló galcircuit lainy gudx Belfast, Londonderry né ló stipnés lagary ro goyogoluʼ riesga. Nigolú bidziguiaʼdo fe ni gop xhermando né par labúu ñonyibu ni ná Jehová bisianyibu crenys ni gopyibu por xidal íz, goleʼyibu tiplad galrrianladx né ma godabioyibu guirá clas buñ. Biendxichni que Jehová bisiab galnasác ronoʼyibu né gon layibu.

Por chii íz bibani lainy gudx Irlanda. Ló íz 1981 biruʼyibu lóodo ñoʼdo scuel xtuny Galaad número 72. Órni bilox scuelcu, bixelyibu lóodo Sierra Leona (África Occidental).

Bibanydo lainy toib yoʼ né 11 misioneros ni góc galán buñ. Guirácado biquiindo toib cocin, tzón baño, chop lagary ro góosdo, toib teléfono, toib lavadora né toib secadora. Guirási ór goyee guii lagarycu. Guic yoʼcu goyogoluʼ bisín, né lainyguet yoʼcu goyoʼ beʼel.

Ná diti tampa sacró mod bibanydo cú, nigolú gosacdo sacró órni gonido xtiitz Dios. Guirá buñcu gopyibu respet la Biblia né bicadiagtzaybu lóodo. Xidalyibu bisuidy né gocyibu Testigos. Buñ de lagarycu  goleʼyibu laaya xomod «xoʼ Robert» né Pauline, «sois Robert». Per después ma más buni dxiin né sucursal, né por ngú ma diti tampa bireʼya predicación. Órcu ma goleʼyibu laa Pauline «sois Pauline» né naʼ, «xoʼ Pauline». Láabu bibaladxbu portín goniʼ buñ laado scú.

Xidal herman de lagarycu gocyibu buñ pobre, per Jehová guirá ór bidudy ni caquiinyibu, rioʼ ór gocni xomod toib galrradziguiaʼ (Mat. 6:33). Rasetnaladxi toibtica hermana nosi gopbu bidxiich par nasiʼbu galrro par dzúcu par ñoobu né ñoo xiimbu. Láabu bidudybu guirá xpidxiichbu a toib hermano ni caxoné malaria ni diti gop bidxiich par nasiʼ remeidy. Dzúcuca toib buñgonaʼ goyee lidx hermanacu né godix láabu par nagoʼny guicbu. Guirá ór gosaclóo herman modreʼ.

Goyoʼdo lainy gudx Sierra Leona por gaʼ íz. Después gonabyibu lóodo ñoʼdo Betel xtuny Nigeria, toib sucursal xiroʼgolu. Buni dxiinca de oficina ni buni lainy Sierra Leona, par tzeʼela bidzaʼni né góc naganni. Ma diti goniʼbu xtiitz Dios 130 ór por beʼo nili bisuidybu buñ xomod nírcu, nigoreʼ ma godipbu lairy guidopynac dzú. Gosac naganbu ñanébu láani, per después bidudybu cuent que herman radudy guixquix por ni ronybu né bunybu xtem por ñony animarbu stipnés betelitas.

Diti bimbudo guirá costumbres ni goyoʼ lainy gudx Nigeria, por ngú biquiin nimbutzaaydo láani. Rasetnaladxi toibtica dzú toib hermano goyee lainy oficina xtuni né cu bitnébu toib hermana ni laʼra bidxin lainy Betel. Biscaʼya ñaya par naninéya dioxh láabu, per láabu bixixipbu nislóya. Diti goona xi ñoni, órcuca bisetnaladxi ni ná Hechos 10:25, 26 né ni ná Apocalipsis 19:10. Órcu gonabdiidza naʼca: «¿Xí láani goni? ¿Noʼ ni gaabi láabu la?». Per después buni pensary: «Ma nanbu ni ná la Biblia por ngú biruʼ herman láabu guieetbu Betel».

Bitoya, per gosaló biiy diitz né láabu, né después biyobi xi costumbres napyibu lainy gudxcu. Bidudi cuent que hermanacu cayonybu mod rony buñ de lagarycu. Buñguieeu láaca bixixipyibu nisló buñ. Nacni  toib mod ni raslooyibu respet, diti portín cayenyibu buñ. Dada ló la Biblia sieed laa buñ ni buny modcu (1 Sam. 24:8). ¡Buenti midid diti goodxi xitcal láabu par diti nasacbu mal!

Bimbudo xidal herman de gudx Nigeria ni bislooy xiroʼgolu fe laʼga bibany. Toibticayibu góc laa Isaiah Adagbona. b Órni gócbu mbioxhlas bimbubu Jehová né después doctor goniʼ que napbu lepra. Bibanybu lainy toib gudx ro goyoʼ guirá buñ ni gop lepra, né nosi láabu gócbu Testigo ni goyoʼ lagarycu. Ná cualóbu xiroʼ galnagan, gocnébu más de 30 buñ ni gop lepra par góc testigo xtuny Jehová né gocnébu par goyoʼ toib congregación lagarycu.

Íz 1996 bixelyibu lóodo gudx Kenia par ñonydo dxiin Betel. Ndeʼ góc primerdiguieʼ buelt ni bibigueta lainy gudxcu desde dzú gosacloya ni bisetlaya órni gosaló artículo reʼ. Lainy Betel bidxin xidal mig nagaʼ. Guirá mig reʼ golanyimu cuánnax ni goyné herman. Toibtica dzú toib hermana diti bisiegbu xpentanbu. Órni bibiguetbu, bibiʼbu que xidal mig cayó cuánnax ni bidzelyimu. Bicaʼbu rudx né bireʼcabu lainy cuartcu. Guirá migcu láaca bidzuibyimu, bicaʼyimu rudx né bireʼyimu niis roʼ bentan.

Pauline né naʼ gocnédo congregación ni goniʼ diitz suajili. Diti xidzú gochyibu naʼ nagoʼya reunión ni laa Estudio de Libro de Congregación (ni rimbuno nigoreʼ xomod Reunión ro rasuidyno ni ná la Biblia). Per naʼ diti labúu goniʼtzaya diitz suajili. Nír bisudi información par labúu ñoni galrranabdiitzcu. Pal racapyibu ni diti sieed ló guiich diti goona xi goniʼyibu. Bixacladxi, né gosaca mal por herman. Bidziguiaʼya que gopyibu paseins naʼ né gocyibu buñdxo.

Nili tobiz goclado lainy gudx Kenia. Ló íz 1997 biruʼyibu lóodo ñoʼdo lainy Betel xtuny Brooklyn (Nueva York). Nigoreʼ bidxindo lainy toib gudx ni nap xiroʼ bidxiich, ni láaca labúu gac toib galnagan (Prov. 30:8, 9). Per reʼ herman láaca napyibu xiroʼ fe. Diti raquiinyibu xtiempyibu nili xpidxiichyibu par gacyibu buñ ric, raquiinyibu láani par gacnéyibu guirá dxiin galán ni rony xcudx Jehová.

Por xidal íz, ma bibiʼdo que herman nap fe ná racalóyibu xidal clas galnagan: lainy gudx Irlanda, ná goyoʼ galrradíil; lainy gudx África, ná gocyibu buñ pobre né bibanyibu sit, né lainy gudx Estados Unidos, ná gopyibu bidxiich. Jehová rabaladxgoluʼ órni rabiʼbu que xpiimbu raslooy que nadxiʼ láabu ná racaló bisaʼsi galnagan.

Guirá íz reʼ naguel godudyni o xomod ná Job 7:6, radudyni más naguel que carret xtuny buñ ni raguip lairy. Nigoreʼ ronydo dxiin central mundial ni noʼ Warwick (Nueva York), toibsi né buñ ni ronladxgoluʼ saʼ. Sacró rasacdo né noʼdo nakit portín ronydo rutirigaʼlni lóodo por gony apoyardo Rey xtunydo, Jesucristo, ni mápa mer guidudy galnasác guirá ni nac fiel láabu (Mat. 25:34).