1. Golexa né toib ejemplo xigony non guisobno mod ragonés Jehová.

 BUNYSI pensary que ma binitlo lainy guixdaʼ. Noʼ riesga ronoʼlo: nimal ni labúu guá looy, yac venen né xidal clas nimal mitien. Láaca noʼ riesga guirel guiee ñeʼlo né guiablo. ¿Ñoladxlo que toib buñ ni rimbu lagarycu nasanés looy né diti nasaclolo xitcal ja? Gudxliogoxreʼ nacni xomod guixdaʼ cu. Bidzagoluʼ riesga loni, né máspa la, rioʼ riesga mod radzakno Jehová. Per napno toib ni rasanéstzaay lóono: Jehová. Raibybu lóono xi néz non saano par diti tzoʼ xi gacno né guidxinno ló Gudxlio copy, ro sabanyno por tipzó.

2. ¿Ximod ragonés Jehová lóono?

² ¿Ximod rasanés Jehová lóono? Raquiimbu la Biblia. Per láaca raquiimbu buñgudxlio ni raniʼ por láabu. Por ejemplo, raquiimbu «mós ni rony xinésni né naní xcalrrien» par guidudybu galrro espiritual ni racné lóono ganno xi láani gonyno (Mat. 24:45). Diti láasiyibu raquiin Jehová par guisanés lóono. Superintendentes de circuit né ancianos rony animaryibu né radudyibu consej lóono par guicalóno galnagan. Radudyno guixquix Jehová ni casanésbu lóono modreʼ ló dzú ni nagandaʼ reʼ. Modcu labúu gacrano ximigbu né labúu saarano ló néz ni riné ronoʼ galnabany tipzó.

3. ¿Xí guisuidyno ló artículo reʼ?

³ Ná scú, rioʼ ór labúu guisac naganno guisobno mod ragonés Jehová lóono, né máspa la, órni buñ galkié raiby láani lóono. ¿Xigony? Pentzi ni raibybu lóono diti ngú ni nainy guicadiagno. O pentzi ronyno pensary que consej ni radudyibu lóono diti noʼ pu raquiinni o diti láani ngú ni  raniʼyibu né por ngú diti sieedni de Jehová. Órcu non gapno más confianz que Jehová casanés xcudx, né ni más galán par lóono ngú guisobno. Par gony nadipno confianz cu, ló artículo reʼ guisuidyno tzón cós: 1) ximod golonés Jehová gudx Israel, 2) ximod cagonésbu lóono ló naareʼ né 3) xi galnasác racaʼno ni rasobno mod ragonésbu lóono guirá ór.

¿XIMOD GOLONÉS JEHOVÁ GUDX ISRAEL?

4, 5. ¿Ximod bislooy Jehová que biquiimbu Moisés par nagonésbu israelitas? (Bibiʼ dibuj ni sieed laidy guiich reʼ).

⁴ Jehová golú Moisés par nabeʼbu israelitas de gudx Egipto né bidudybu prueby nayaa que biquiimbu Moisés par nasanés layibu. Toibtica prueby láani ngú, xcaay ni bibiʼyibu rodzu né guii ni bibiʼyibu gueʼel (Éx. 13:21). Moisés cuanal láani, né por ngú láabu né israelitas bidxinyibu ro nisdaʼ xináa. Órni israelitas biaʼanyibu galay, toib lad goyoʼ nisdaʼ xináa né stoib lad soldad egipcio, bidzuibyibu. Goniʼyibu que Moisés biché por ni goynee layibu lagarycu. Per diti gocni scú. Jehová ngú ni buny que Moisés niné layibu lagarycupa (Éx. 14:2). Né Jehová bilaa layibu né toib galrradziguiaʼ rodann (Éx. 14:26-28).

⁵ Por 40 íz, Moisés cuanalbu xcaaycu par golonésbu xcudx Dios ló yoovich. a Goyoʼ ór, Jehová buny que xcaaycu ñoʼni laidy yoʼ lairy xtuny Moisés, ro guirá israelitas labúu nabiʼ láani (Éx. 33:7, 9, 10). Desde xcaaycu, Jehová goninébu Moisés, né de ngú ma láabu bidudybu instrucción xcudx Jehová (Sal. 99:7). Por ngú israelitas gopyibu prueby que Jehová biquiin Moisés par nasanés layibu.

6. ¿Ximod cuacuent israelita mod golonés Jehová layibu? (Números 14:2, 10, 11).

⁶ Nabanni, casi guirá israelitas diti goloʼyibu cuent guirá prueby ni bislooy que Jehová golú Moisés par naniʼ xalagarybu (bíil Números 14:2, 10, 11). Xidal buelt diti bunyibu crer dxiin ni cuaʼ Moisés, por ngú Jehová diti bidudy lagary ñoʼyibu ló layoo ni bidudybu xtiitzbu guicaʼ israelitas (Núm. 14:30).

7. ¿Chú layibu bisob mod golonés Jehová? (Números 14:24; láaca bibiʼ dibuj).

⁷ Per, goyoʼ stipnés israelitas ni bisob mod golonés Jehová layibu. Por ejemplo, Jehová goniʼ: «Caleb [...] cuanalrabu naʼ né guidopy xcalnabanybu» (bíil Números 14:24). Dios bidudy galnasác láabu né dada bidudybu lagary Caleb nabú pu lagary de gudx Canaán ñanbu (Jos. 14:12-14). Xomodca Caleb, xiin guirá israelitas bidudyibu lagary nagonés Jehová layibu. Né «gopyibu xiroʼ respet Josué laʼga bibanyibu», ni góc buñguieeu ni golú Jehová par ñoʼ xalagary Moisés xomod líder de gudx Israel (Jos. 4:14). Por ngú Jehová bidudy galnasác layibu né bidudybu lagary ñoʼyibu ló layoo ni Jehová bidudy xtiitz nacaʼyibu (Jos. 21:43, 44).

8. ¿Ximod golonés Jehová xcudx ló xtzú reyes? (Láaca bibiʼ dibuj).

⁸ Xidal íz después, Jehová golú jueces par nasanés xcudxbu. Después, ló xtzú reyes, goloʼbu tipnés profetas par ñony dxiinreʼ. Guirá reyes ni diti bisian Dios bicadiagyibu consej xtuny profetas. Por ejemplo, rey David gócbu buñdxo né  cuacuentbu consej ni bidudy profeta Natán láabu (2 Sam. 12:7, 13; 1 Crón. 17:3, 4). Rey Jehosafat bisobbu ni góoch profeta Jahaziel láabu né buny animarbu gudx Judá ñap fe ló profetas xtuny Dios (2 Crón. 20:14, 15, 20). Né, ló tiemp nagan, rey Ezequías gonabbu xcalrracné profeta Isaías (Is. 37:1-6). Guirá ór ni reyes bisobyibu mod golonés Jehová layibu, Jehová bisiab xcalnasác loguiaʼyibu né gonbu xcudxbu (2 Crón. 20:29, 30; 32:22). Biendxichni que Jehová biquiimbu profetas par nasanés xcudx. Per, casi guirá reyes né israelitas diti bisobyibu (Jer. 35:12-15).

¿XIMOD GOLONÉS JEHOVÁ CRISTIANOS NI GOYOʼ LÓ SIGLO PRIMERO?

9. ¿Ximod golonés Jehová cristianos ló siglo primero? (Láaca bibiʼ dibuj).

⁹ Ló siglo primero, Jehová goloʼ congregación cristiana. ¿Ximod golonés Jehová xcudx dzúcu? Golúbu Jesús par ñac guic congregación (Efes. 5:23). Per, Jesús diti goninébu tigaaga cristianos par ñaibybu biinreʼ xi láani gonyibu, xalagary ngú biquiimbu apóstoles né ancianos de gudx Jerusalén par nasanir ló dxiincu (Hech. 15:1, 2). Láaca, lainy tigaaga congregación goyoʼ ancianos par golonés herman (1 Tes. 5:12; Tito 1:5).

10. a) ¿Ximod cuacuent casi guirá cristianos ni goyoʼ ló siglo primero guirá instrucción ni cuaʼyibu? (Hechos 15:30, 31). b) ¿Xigony tipnésyibu diti cuacuentyibu ni goniʼ xalagary Jehová ló dzú ni see? (Bibiʼ cuadriyen « ¿Xigony tipnés diti naʼ guicacuent ni riendxich?»).

¹⁰ ¿Ximod cuacuent cristianos ni goyoʼ ló siglo primero guirá instrucciones ni cuaʼyibu? Casi guiráyibu bisobyibu láani né gan. Né, «bibaladxyibu por diitz sacró» ni cuaʼyibu (bíil Hechos 15:30, 31). ¿Ximod cagonés Jehová xcudx ló naareʼ?

¿XIMOD CAGONÉS JEHOVÁ LÓONO LÓ NAAREʼ?

11. Bisetlaa toib ejemplo ni raslooy ximod ragonés Jehová ni raniʼ por láabu ló naareʼ.

¹¹ Ló xtzúno, Jehová cagonésra xcudx né xcalrracné la Biblia né Xiimbu ni nac guic congregación. ¿Napno prueby de que Jehová caquiinrabu buñgudxlio ni  raniʼ xalagarybu la? Scú. Gonyno pensary, ló ni góc ro ma calox siglo diecinueve. Charles Russell né ni gocné láabu, bidudyibu cuent que íz 1914 ñacni toib íz ni rasac par Gobierno xtuny Dios (Dan. 4:25, 26). ¿Ximod gonyibu láani? Bíilyibu profecías ni sieed ló la Biblia. Né Jehová golonés layibu par ñony investigaryibu. Ni góc ló Gudxlio ló íz 1914 bislooyni que Gobierno xtuny Dios ma gosaló cayony mandary: Gosaló Primera Guerra Mundial né gosaló galguitz ni ragaity xidalguixo buñ, xo rodann né galrralán (Luc. 21:10, 11). Biendxichni que Jehová biquiin guirá buñguieeucu ni natzaay xcalnabany par gacné xcudx.

12, 13. ¿Xí láani góc ló Segunda Guerra Mundial par naniʼyibu más xtiitz Dios né nasuidyibu buñ?

¹² Láaca gonyno pensary ló ni góc ló Segunda Guerra Mundial. Herman ni gosanir ló central mundial bisuidyibu ni ná Apocalipsis 17:8 né bienyibu que después ni nalox Segunda Guerra Mundial diti nadxin Armagedón, xalagary ngú, ñoʼ toib tiemp ro naguaʼ buñ sacró ni nadudy lagary ñac predicar a más buñ. Por ngú, xcudx Jehová buny toib cós ni dzúcu ralooyni diti láani ngú: Gosaló Colegio Superior Bíblico de la Watchtower de Galaad, b ni nasuidy misioneros par naniʼ xtiitz Dios né nasuidyibu buñ stipnés lagary ni noʼ ló Gudxlio. Ná goyoʼ guerr, bixelyibu herman lainy xidal gudxrop. Láaca, mós ni rony xinésni goloʼ toib scuel ni góc laa Curso en el Ministerio Teocrático c par ñacnéyibu guirá publicadores ñac galán mextra. Guirá ndeʼ goloʼni puext xpiin Jehová par ñonyibu dxiin ni ñapyibu después.

¹³ Riendxichni que Jehová golonés xcudx ló dzú nagancu. Desde dzú bilox Segunda Guerra Mundial, xpiin Jehová ma labúu napyibu permís par caniʼyibu xtiitz Dios lainy xidal lagary. Por ngú xidal buñ ma cayimbuyibu Jehová, né ló naareʼ rac predicar ló guidopynac Gudxlio.

14. ¿Xigony labúu gapno confianz mod ragonés xcudx Jehová né ancianos lóono? (Apocalipsis 2:1; láaca bibiʼ retrat).

 ¹⁴ Ló naareʼ, Tidxó buñ ni nap xiroʼ Galnan cayopyrayibu mod ragonés Cristo. Ronyibu rutirigaʼlni layibu que guirá instrucción ni radudyibu tzoʼni de acuerdo né ni ná Jehová né Jesús. Né xcalrracné superintendentes de circuit né ancianos, radxin guirá instrucción cu lainy congregación. d Ancianos ni nac ungidos né láaca guirá ancianos noʼyibu «loña ladbuʼ» xtuny Cristo (bíil Apocalipsis 2:1). Guirá ancianos nacyibu buñ galkié, por ngú rioʼ ór rachéyibu, xomod gosaclóo Moisés, Josué né apóstoles (Núm. 20:12; Jos. 9:14, 15; Rom. 3:23). Per, nanno que Jesús ragonésbu mós ni rony xinésni né ancianos, né sonyrabu láani «guirá dzú dada dzú ma guidubylagaʼ gudxliogoxreʼ» (Mat. 28:20). Por ngú, napno razón par gapno confianz mod ragonés Jehová lóono né xcalrracné guirá herman reʼ.

GALNASÁC NI RACAʼNO ÓRNI RASOBNO MOD RAGONÉS JEHOVÁ LÓONO

15, 16. ¿Xí rasuidylo de guirá ni ma bisob mod ragonés Jehová xcudx?

¹⁵ Ni rasobno mod ragonés Jehová lóono, racnéni lóono dada nigoreʼ. Por ejemplo, Andy né tzeelbu, Robyn, bisobyibu consej ni ná guibany buñ senciy (bibiʼ ni rarop nota de estudio de Mateo 6:22, ló Biblia de estudio ni noʼ ló dixtil). Ngú gocné layibu par ñonyibu dxiin ló construcción ni rac lainy xcudx Jehová. Robyn ná: «Bibanydo ló lagary mitien, né xidal buelt diti gopdo lagary ro labúu nagaaydo ni ñoodo. Né láaca nigolú rioladxi cueʼya retrat, per bitoʼya casi guirá cámaras xtuni. Ná gorudxaʼya órni bitoʼya láani, goloʼya guica goni xomod Sara, tzeʼel Abrahán, né diti buni pensary ló ni bisiana, xalagary ngú, ló ni guicaʼya» (Heb. 11:15). ¿Rabaladxyibu né ni bunyibu la? Robyn ná: «Nakit noʼdo portín nando que cadudydo Jehová guirá ni napdo. Órni ronydo dxiin par Jehová, nacni suusi ñonydo prueby ximod gac ló Gudxlio copy». ¿Né xí rony pensary Andy? Láabu nábu: «Diti noʼ stoib cós ni ragoʼ nakit buñ, que ni tzodieʼ buñ ló xchiin Jehová».

 ¹⁶ ¿Xí láani ngú stoib mod ni racnéni lóono guisobno mod ragonés Jehová? Guibiʼno ni gosaclóo toib hermana ni laa Marcia. Órni bistubylagaʼbu scuelbu, bicadiagbu consej ni cuaʼbu né gócbu precursora (Mat. 6:33; Rom. 12:11). Láabu nábu: «Toib scuel xirop ná nadudy toib beca naʼ de tap íz. Per naʼ goloʼya guica ló metas espirituales, por ngú bisudi toib dxiinien ni labúu nayaʼan naʼ né ñaca precursora. Ngú góc toibtica cós ni goloʼya guica ni más galán ñoni ló xcalnabani. Nigoreʼ naca precursora regular, né xchiina radudy lagary naʼ roni dxiin xomod voluntaria externa lainy Betel né goni stipnés dxiin sacróyen lainy xcudx Jehová».

17. ¿Xí stipnés mod racnéni lóono guisobno mod ragonés Jehová? (Isaías 48:17, 18).

¹⁷ Rioʼ ór, xcudx Jehová radudyni consej par diti coʼno bidxiich primer lagary né de stipnés cós ni labúu ñony que ma diti nasobno ni rony mandary Dios. Ló guirá ndeʼ, ni rasobno mod ragonés Jehová racnéni lóono, ronyni que gapno toib galrrien nayaa né diti guioʼob guicno(1 Tim. 6:9, 10). Modcu labúu tzodieʼno gonyno xchiin Jehová. Diti noʼ stoib cós ni ragoʼ nakit lóono né rony que guisacno sacró (bíil Isaías 48:17, 18).

18. ¿Xigony nainy looy guisoblo mod ragonés Jehová?

¹⁸ Jehová saquiinrabu buñgudxlio par guisanésbu xcudxbu ló gran tribulación né órni gony mandary Cristo por Tipmil Íz (Sal. 45:16). Ló dzúcu, ¿sasobrano mod ragonés Jehová lóono, dada órni quiñani guisianno cós ni rioladxno la? Pal rasobno nigoreʼ, diti sasac naganno guisobno ló dzú ni sietra. Por ngú, guirá ór guisobno mod ragonés Jehová lóono, né ngú raguiña mod ragonés Jehová lóono né xcalrracné buñguieeu ni ma golúbu par gan lóono (Is. 32:1, 2; Heb. 13:17). Napno razón par gapno confianz lóo Jehová, ni ragonés né racné lóono diti guiabno ló riesga ló sentido espiritual né guidxinno ló Gudxlio copy ro sabanyno tipzó.