Ná scú, Jehová nainy gapno paseins né cuésno dzú ni ma golúbu par gonybu ni ma goniʼbu. ¿Xigony nainy láabu gonyno ngú? Né ¿xí labúu gacné lóono par tzoʼno nakit laʼga cabésno?

¿XIGONY RANIINY JEHOVÁ CUÉSNO?

Guibiʼno ni ná la Biblia: «Jehová rabés né paseins par gacnébu lóoto, né puextca noʼbu par guislooybu galrronladx. Portín Jehová nacbu toib Dios ni rony xinésni. Dichós guirá buñ ni rabés láabu né gan» (Is. 30:18). Isaías gochbu diitzreʼ a buñ judíos ni diti goyoʼ ló razón (Is. 30:1). Per ló dzúcu goyoʼ buñ judíos ni diti bisian Jehová. Diitzcu bidudyni esperanza layibu, né láaca radudyni esperanza lóono ló naareʼ.

Por ngú, ¿xigony non cuésno né paseins? Portín Jehová láaca cabés né paseins. Láabu ma golúbu toib dzú par guinitlóbu gudxliogoxreʼ né cabésbu guidxin dzúcu (Mat. 24:36). Órni guidxin dzúcu, siendxichni que guirá ni raniʼ Buñdzab de Jehová né xpiin diti nigolúni. Órcu Jehová sabeʼ Buñdzab né guirá ni noʼ xiladbu. Per ma bidudybu xtiitzbu que «guislooybu galrronladx» xpiimbu.

Laʼga cabésno, sigory Jehová diti sabeʼ guirá galnagan ni cadudyno ló. Per raibybu lóono que labúu tzoʼno nakit. Xomod goniʼ Isaías, labúu tzoʼno nakit laʼga cabésno cós sacró ni rabésno né gan (Is. 30:18). a ¿Ximod? Guibiʼno tap cós ni labúu gonyno.

¿XIMOD TZOʼNO NAKIT LAʼGA CABÉSNO?

Coʼno guicno ló cós sacró. Rey David bibiʼ xiroʼgolu cós mal laʼga bibanybu (Sal. 37:35). Ná scú, bicaʼbu ndeʼ: «Dzudiguieʼ goyoʼ nisló Jehová né golés láabu né paseins. Diti guidzuitzlo pal rabiʼlo que carebuʼ xpensary buñ mal» (Sal. 37:7). David bisob consej reʼ. ¿Ximod? Goloʼbu guicbu ló ni bidudy Jehová xtiitz guilaa láabu. Né láaca gosac par láabu guirá  cós tzaay ni buny Dios por láabu (Sal. 40:5). Pal láaca ragoʼno guicno ló cós tzaay ni nagoo lóono, né diti ló cós mal, diti tampa sasac naganno cuésno gony Jehová ni ma goniʼ.

Guiquintzayno nitisi oportunida ni tzoʼ par gonyxiroʼno Jehová. Ni bicaʼ Salmo 71, ni ralooyni góc David, gochbu Jehová ndeʼ: «Per naʼ, naʼ sabésriya; sonyxiroʼya looy más» (Sal. 71:14). ¿Ximod bunyxiroʼbu Jehová? Goninébu stipnés buñ de Jehová né buny cantarbu alabanzas (Sal. 71:16, 23). Lóono láaca labúu guisuʼno David né gonyxiroʼno Jehová órni rony predicarno, órni ranino de Jehová né xfamilno né ximigno né órni rony cantarno canciones ni napno. Por ngú, órni gony cantarlo toib canción del Reino, cuá cuidad de xi caniʼni. Guirá ndeʼ sacnéni lóono tzoʼno nakit laʼga cabésno gony Jehová ni ma goniʼ.

Tudyno tiemp né xhermanno. Órni David gop galnagan, gochbu Jehová ndeʼ: «Nisló buñ ni diti rasian looy sabaʼji esperanza xtuni» (Sal. 52:9). Xomodca David godudy tiemp né xpiin Jehová né ngú buny animar láabu, lóono láaca labúu tudyno tiemp né xhermanno ló reunión, ló predicación né stipnés ór (Rom. 1:11, 12).

Gony nadipno esperanza ni napno. Salmo 62:5 ná: «Nigolú rabésa lóo Dios dzudiguieʼ portín esperanza xtuni sieedni de láabu». Nigolú rasac guibiʼno esperanza xtunyno xomod toib cós ni sac cumplir, né máspa pal fin diti nimaca radxinni xomod bunyno pensary. Nac nitisi tiemp ni cuésno, non gapno confianz que Jehová sony cumplir guirá ni ma goniʼ. ¿Né ximod labúu gony nadipno esperanza cu? Guisuidyno Xtiitz Dios né guicaano cuidad profecías ni napni, mod radzakni saʼni né guirá cós ni rasuidyni lóono de Jehová (Sal. 1:2, 3). Láaca non gonyno oración né guinabno espíritu xtunybu par gacnéni lóono guidzakno láabu sacró, laʼga rabésno gony cumplirbu ni ma bidudybu xtiitzbu guidudybu galnabany tipzó lóono (Jud. 20, 21).

Xomodca rey David, labúu gapno confianz que Jehová rabiʼ guirá buñ ni cabés gonybu ni ma goniʼbu né que raslooybu xcalnadxiʼbu ni diti radzaʼ layibu (Sal. 33:18, 22). Por ngú, par labúu tzoraʼno nakit laʼga cabésno né paseins gony Jehová ni ma goniʼ, coʼno guicno ló cós sacró ni rac lainy xcalnabanyno né diti ló cós mal, gonyxiroʼno Dios, tudyno tiemp né xhermanno né gony nadipno esperanza sacróyen ni napno.