Bixiosa né xinaʼya gocyibu católicos. Per, órni bibiʼyibu ló la Biblia que laa Dios ngú Jehová, gocyibu testigos xtuny Jehová. Bixiosa ni góc carpinter ma diti bisaʼbu imagen xtuny Jesús, né bunytzaaybu toib lagary lainyca lidxdo par ñacni toib Salón del Reino. Ngú góc primer Salón ni goyoʼ lainy San Juan del Monte, toib gudx de Manila, capital xtuny Filipinas.

Goola ló íz 1952, né bixiosa né xinaʼya nimaca bisuidyibu naʼ de Jehová, xomodca bunyibu né tap buch lagola né tzón bisan lagola. Conforma goniʼsa, bixiosa buny animar naʼ par ñoola toib capítulo xtuny la Biblia guirá dzú. Láaca bisuidybu né naʼ tipnés publicaciones xtunyno. Goyoʼ ór bixiosa né xinaʼya biduʼdyibu lidxdo par ñaʼan circuit né tzeʼel né betelitas. Guirá herman reʼ gochyibu lóodo experiencias ni buny animar né goloʼ nakit xfamila. Né ngú bichiin lóodo par nagoʼdo xchiin Jehová primer lagary lainy xcalnabánydo.

Bixiosa né xinaʼya gocnéyibu naʼ par ñapa fe. Ló íz 1971, después ni goity xinaʼya xtol galguitz, bixiosa né naʼ gócdo precursor. Per ló íz 1973, dzú gopa 20 íz, goity bixiosa. Gosaca que goyoʼya toobi portín ma diti goyoʼyibu né naʼ. Per, «esperanza» ni sieed ló la Biblia ni napno confianz que sac cumplir, gocni xomod toib ancla ni gocné naʼ ló sentido emocional né espiritual (Heb. 6:19). Diti xidzú después ni goity bixiosa, herman buny nombrar naʼ precursor especial lainy toib isla xtuny Coron, ni noʼ Palawan.

Dzú bidxina isla xtuny Coron, 21 íz napa. Goniʼsa lainy toib gudxrop né bidziguiaʼya órni bidxina toib isla ro goxeʼsi lagary goyoʼ guii, né diti tampa goyoʼ nís, camión né mot. Ná goyoʼ chop tzón herman, diti gopa toib compañer ni ñac precursor, né goyoʼ ór toobi buni predicar. Primer beʼo ni goyoʼya cú nigolú  góc naganni portín nigolú bisetnaladxi xfamila né ximiga. Guirá goxin gorudxaʼya né bibiʼya vitzón lainy guibá. Goniiny naʼ nasiana asignación xtuni né nabiguetta lidxi.

Órni gosaca que noʼya toobi, goodxi Jehová guirá ni noʼ lainy xcalnabani. Bisetnaladxi tipnés cós ni buny animar naʼ ni biila ló la Biblia né ló publicaciones xtunyno. Buni pensary ló ni ná Salmo 19:14, né biduʼdi cuent que Jehová guirá ór ñac «Guielaa xtuni» né ni Ralaa naʼ pal ñoni pensary ló cós ni rioladxbu, xomod ló cós ni bisaʼbu né cualidades ni napbu. Goyoʼ toib artículo xtuny revista La Atalaya, ni góc laa «Usted nunca está solo», a nigolú gocnéni naʼ. Biila láani xidal buelt. Gocni ór ni goyoʼya toobi né Jehová; né par naʼ nigolú gosacni portín biquiinna láani par goninéya láabu, bisuʼdi né buni pensary ló ni bisuʼdi.

Diti xidzú después ni bidxina isla xtuny Coron buny nombraryibu naʼ anciano, né naʼsi góca anciano lagarycu, por ngú naʼ non nagoʼya Scuel par ni Rasuidy stipnés Xtiitz Dios, Reunión ro Rasuidyno guinino Xtiitz Dios, Reunión ro Rasuidyno ni ná la Biblia né Estudio de Guiich ni caniʼ. Né láaca non natuʼdi discurs guirá xomal. ¿Ximod gocnéni naʼ? Ma diti gopa tiemp par nasaca que noʼya toobi.

Sacró goniya xtiitz Dios lainy isla xtuny Coron né conforma godudy tiemp tipnés buñ ni bisuʼdi ni ná la Biblia goyonis. Per láaca cualóya tipnés galnagan. Por ejemplo, par nadxina toib territorio, goyoʼ ór gosaaya galadzú né diti goona púti ñaasi órni nadxina. Congregación ro goyoʼya láaca goniʼyibu xtiitz Dios lainy xidal islas mitien. Par labúu nadxina guirá islas cu, goyoʼya lainy lanch ná casi guirá ór xcuann nisdaʼ góc nadipni por guiedaʼa. ¡Né naʼ diti goona nasobloʼya! Per Jehová guirá ór gop né gon naʼ. Después biduʼdi cuent que láabu bisuidybu naʼ par asignación ni nacaʼya, ro nacalóya galnagandaʼ.

Ló íz 1978, bixelyibu naʼ Papúa Nueva Guinea, ni riaʼan niis lad norte xtuny Australia. Papúa Nueva Guinea nacni toib gudxrop ronoʼgolu dainy né xiroʼni xomod España. Ná lainy gudxrop cu bibany midid tzón millón buñ, goyoʼ más de 800 diitz ni goniʼ buñ. Per casi guirá buñ goniʼ pidgin de Nueva Guinea, ni láaca laa tok pisin.

Primer bixelyibu naʼ toib congregación ni goniʼ diitz inglés lainy gudx Port Moresby. Per diti goclaya cú, portín después goyaʼya toib congregación de diitz tok pisin né gosaló bisuʼdi diitzcu. Ni bisuidyibu naʼ biquiinna láani ló predicación, né ngú gocné naʼ par nasuʼdi diitzcu más naguel. Ló tidxósi tiemp ma labúu bituʼdi discurs ló diitz tok pisin. Diti ma bisaʼya tobiz lainy gudx Papúa Nueva Guinea, órni góc toib cós ni bidziguiaʼya: buny nombraryibu naʼ superintendente xtuny circuit né gochyibu naʼ niguena congregación ni raniʼ diitz tok pisin ni goyoʼ lainy xidal gudx.

Congregaciones de circuit de lagarycu nigolú sit biaʼanni de saʼni, por ngú buni que ñac xidal samblia xtuny circuit né dipa goyoʼya toibsi lagary. Primer, diti bimbuya nili gudxrop reʼ, nili xtiitzyibu, nili costumbres ni  napyibu, por ngú gosaca que goyoʼya toobi. Né, pór dainy láani, né nagan nasaa buñ cú, por ngú diti labúu niguena congregación lainy camión. Por ngú casi guirá xomal goyoʼya lainy roplan. Goyoʼ ór nosi naʼ goyoʼya lainy toib roplanlaʼ. Órni goyoʼya lainy roplan láaca goloʼni naʼ ló galrrasaʼ xomod órni goyoʼya lainy lanch.

Goxeʼsi buñ gop teléfono. Por ngú pór guiich bicaʼya lóo congregación. Xidal buelt nír naʼ bidxina que guiich ni bixela, por ngú gonaba buñ ñacné naʼ par nadzela herman. Guirá ór ni bidzela layibu, godabioyibu naʼ né galrronladx, né bisetnaladxi xigony buni rutigoygaʼlni naʼ par nadxina ronoʼyibu. Jehová gocné naʼ de xidal mod, né ngú buny que nasaca que goyoʼya gax de láabu.

Órni goyaʼya reunión primer buelt, lainy toib isla ni laa Bougainville, toib galtzeʼel bixiich bibig ronoʼya. Gonabdiitzyibu naʼ: «¿Rasetnaladxlo lóodo la?». ¡Scú, bisetnaladxi layibu! Órni laʼra bidxina gudx Port Moresby buni predicar layibu, né bisuʼdi layibu ni ná la Biblia, per después toib herman de lagarycu bisuidy layibu. ¡Né goyonisyibu! Ngú góc toibtica de xidal galnasác ni cuaʼya ló tzón íz ni goyoʼya Papúa Nueva Guinea.

Bireʼya isla xtuny Coron ló íz 1978, per antes ni nareʼya bimbuya toib hermana ni goyodieʼ ló xchiin Jehová né ni buny dxiin nadip ni góc laa Adel. Toibbu bisniʼsbu chop xiimbu, Samuel né Shirley, gonbu xinaʼbu, né láaca gócbu precursora regular. Beʼo may íz 1981, bibigueta Filipinas par buni galtzeʼel né Adel. Gosaló bunydo dxiin toibsi xomod precursor regular né gondo xfamildo.

Ná ma goyoʼ xfamila, ló íz 1983 buny nombraryibu naʼ precursor especial. Bixelyibu naʼ isla xtuny Linapacan, lainy Palawan. Ná gocni toib lagary ni goyoʼ nigolú sit, ro diti goyoʼ Testigos, guirádo goylésdo cú. Órni ma sanédo midid tobiz lagarycu, goity xinaʼ Adel. Toib cós ni gocné lóodo né galnabann ni gosacdo láani ngú ni goyodieʼdo gonido xtiitz Dios né buñ. Bisuidydo xidal buñ ni bientzaay ni ná la Biblia, né bibiʼdo que biquiin ñoʼ toib Salón del Reino lainy isla cu, por ngú bisaʼdo toib mitien. ¡Nigolú bibaladxdo ni bibiʼdo que ló tzónsi íz, bidop 110 buñ ló Memorial! Né xidal de layibu goyonisyibu después ni bireʼdo cú.

Ló íz 1986, bixelyibu naʼ Culion, toib isla ro goyoʼ toib lagary ro goyoʼ pór buñ ni bixoné lepra. Después Adel láaca bidxin góc precursora especial. Primer, moda bidzuibyiendo naninédo buñ ni biyaa laidy xtol lepra. Per publicadores de lagarycu gochyibu lóodo que guirá buñcu ma cuaʼyibu remeidy xtuny lepra né que diti labúu nadudyni lóodo. Tipnésyibu goyeeyibu reunión lidx toib hermana. Nimaca bianédo buñ de lagarycu, né nigolú bioladxdo ñaibydo buñ ni gosac que nili Dios nili buñ godabioo layibu esperanza ni napno. Né nigolú sacróyen gosacdo órni bibiʼdo balaati goyoʼ nakityibu órni gonyibu que nadxin dzú ñacyibu buñ nasac (Luc. 5:12, 13).

 ¿Né ximod biaʼ xiindo lainy isla xtuny Culion? Adel né naʼ biruʼdo chop hermanas mbioxhlas de isla xtuny Coron par ñony compañer lóodo par ñacyibu ximig xiindo. Samuel, Shirley né chop hermanas reʼ nigolú bioladxyibu gocnéyibu buñ nimbu galnigolú. Layibu bisuidyibu xidal mbiox de la Biblia, né Adel né naʼ bisuidydo bixiosyibu né xinaʼyibu. Goyoʼ toib ór ro bisuidydo 11 famil. Diti xidzú después goyoʼ xidal buñ ni goniʼs ló sentido espiritual né labúu goyoʼ toib congregación copy.

Primer, nosi naʼ góca anciano lagarycu. Por ngú sucursal gonab naʼ nagoʼya reunión guirá xomal par xhoon publicadores ni goyoʼ isla xtuny Culion, né ñoni ngúca par gaʼ publicadores ni goyoʼ lainy toib gudx ni laa Marily. Par nadxindo cú non ñoʼdo lainy bark tzón ór. Después ni ralox reunión, guirádo gosaado por xidal ór laidy dainy par bisuidydo buñ lainy toib gudxyen ni laa Halsey.

Conforma godudy tiemp, xidal buñ bidxinyibu gocyibu Testigos lainy gudx Marily né Halsey, por ngú bisaʼdo toib Salón del Reino lainy guiropca gudx reʼ. Xomodca góc lainy Linapacan, herman né buñ ni goniiny ñan más de la Biblia, biduʼdyibu guirá cós ni biquiin par ñaʼ Salón né gocnéyibu par ñaʼni. Lainy auditorio xtuny Salón ni noʼ Marily labúu bidop midid 200 buñ né láaca labúu gocxiroʼni más par góc samblia cú.

Ló íz 1993, órni xiindo ma xiroʼ, Adel né naʼ gosalódo ló galcircuit lainy Filipinas. Después ló íz 2000, herman biruʼ naʼ par ñaʼya scuel ni laa Escuela de Entrenamiento Ministerial par bisuidyibu naʼ par nagoʼya scuel cu. Gosaca que diti labúu ñoni láani, per Adel guirá ór buny animar naʼ né gocnébu naʼ par nasetnaladxi que Jehová naduʼdy fuers naʼ par ñoni láani (Filip. 4:13). Adel gonbu xi naniʼbu portín bunybu xchiin Jehová ná bixoʼbu.

Ló íz 2006, laʼga cayoni dxiin xomod instructor, doctor goniʼ que Adel nap párkinson. Diti gondo xi ñonydo. Goodxi láabu nasiando  asignación xtunydo par labúu ñando ñacbu remeidy, per Adel góoch naʼ: «Ranaba looy, biyopy toib doctor ni gacné naʼ né xcalguidza. Né naana que Jehová sacné lóono né asignación xtunyno». Ló xhoop íz ni godudy, Adel bunyrabu xchiin Jehová né diti bitzotz roʼbu. Órni ma diti labúu gosaabu, buny predicarbu ló silla de ruedas. Órni ma diti tampa labúu goniʼbu, buny comentarbu né toib o chop diitz ló reunión. Herman guirá ór bixel mensaj lóbu, ro bicaʼyibu balaati binladxyibu Adel por ni buny guantarybu. Adel goity ló íz 2013. Más de 30 íz buni dxiin né toib compañer ni diti bisian Jehová né ni binladx naʼ, per nigoreʼ ni ma goitybu, goyoʼya nabann né gosaca que goyoʼya toobi stoib.

Goloʼya guica diti nasiana asignación xtuni, xomod naniiny Adel. Nigolú goyoʼ xchiina né ngú gocné par diti nasaca que noʼya toobi. Desde íz 2014 dada íz 2017 herman góoch naʼ niguena congregaciones ni raniʼ diitz tagalo lainy gudxrop ro diti gopno permís guinino xtiitz Dios. De ngú, goyguena congregaciones ni raniʼ diitz cuca lainy gudx Taiwán, Estados Unidos né Canadá. Ló íz 2019, goloʼya Scuel par ni Raniʼ Xtiitz Dios ni góc ló diitz inglés lainy gudx India né Tailandia. Nigolú goyoʼya nakit né guirá dxiin ni gopa. Laʼga más ragoʼya guica ló xchiin Jehová, más rioʼya nakit.

Guirá lagary ro buni xchiin Jehová, bianéya herman. Por ngú guirá ór rasac nagana guisiana layibu. Per ma bisuʼdi gapa confianz lóo Jehová órcu. Ma xidal buelt bibiʼya ximod ma gocné Jehová naʼ, né ngú racné par guicacuenta nitisi cós ni guidzaʼ. Nigoreʼ roni dxiin xomod precursor especial lainy gudx Filipinas. Nigolú rasaca sacró lainy congregación copy ro bidxina, layibu nacyibu xfamila ni ran naʼ né galrronladx. Né nigolú noʼya nakit ni rabiʼya que Samuel né Shirley racanalyibu ejemplo de fe xtuny xinaʼyibu (3 Juan 4).

Nigolú, ma godudi ló xidal prueby ló xcalnabáni, xomod ni bibiʼya ximod godudy tzeʼela ló galrrioʼob, né dxoga dxoga bistopy galguitzcu láabu. Láaca biaʼya né xidal cós ni bidzaʼ ló xcalnabáni. Per ma bibiʼya que Jehová «diti noʼbu sit de tigaagano» (Hech. 17:27). «Ña Jehová diti nigolú dopni» par diti labúu gacnébu né gony nadipbu xpiimbu, ná noʼyibu lainy lagary ni noʼ nigolú sit (Is. 59:1). Nigolú raduʼdi guixquix portín Jehová nac Guielaa xtuni né dipa ma bisiambu naʼ. Dipa goyoʼya toobi.