ARTÍCULO NI GUISUIDYNO 7
CANCIÓN 15 Alabemos al Primogénito de Jehová
¿Xí raduʼdy diitz par lóono ni ratuʼdy Jehová scásiʼ xcalkiéno?
«Looy ratudylo scásiʼ xcalkié buñ» (SAL. 130:4).
TEMA
La Biblia napni xidal comparación ni racné lóono guientzaayno né guisac par lóono ni ratuʼdy Jehová scásiʼ xcalkiéno.
1. Órni toib buñ raiby lóono que ma bituʼdybu scásiʼ ni bunyno láabu, ¿xigony nagan guienno xí ni biduʼdybu diitz?
«MA BITUʼDI SCÁSIʼ NI BUNYLO NAʼ». ¡Nigolú rialdó xcalnabanyno órni toib buñ ni bunynano raiby ndeʼ lóono! Per, ¿xipa nainy buñcu naduʼdy diitz órni goniʼbu que ma bituʼdybu scásiʼ ni bunyno láabu? Rioʼ ór nagan ganno láani, portín diti guirá buñ rien toibsi mod ni guituʼdy buñ scásiʼ xcalkié saʼ. Pentzi nainy guiduʼdybu diitz que nacno ximigbu xomod nírcu. O sigory nainy guiduʼdybu diitz que ma diti sasetnaladxbu láani, per ma diti sadzakno saʼno suusi nírcu.
2. ¿Ximod rabexa la Biblia mod ratuʼdy Jehová scásiʼ xcalkié buñ? (Láaca bibiʼ ñeʼ guiich).
2 ¡Jehová diti nac xomod lóono! Ni toib buñgudxlio ratuʼdy xcalkié saʼ xomod láabu. Toib salmista góoch láabu: «Looy ratudylo scásiʼ xcalkié buñ, né por ngú rapdo respet looy» (Sal. 130:4). a Mod ratuʼdy Jehová scásiʼ xcalkié buñ né guidopy xcalnabany nigolú rasacni. Pal nainy ganno xi láani ngú guituʼdy buñ scásiʼ xcalkié stipnés, non guicaano cuidad ejemplo xtuny Jehová. Rioʼ ór ló Escrituras Hebreas raquiin toib diitz ni rabexa nosi mod ratuʼdy Jehová xcalkié buñ, né dipa par cuéxani mod ratuʼdy buñgudxlio xcalkié saʼ.
3. ¿Xigony ranino que mod ratuʼdy Jehová scásiʼ xcalkié buñ né mod ratuʼdyno scásiʼ xcalkié saʼno, diti nacni toibsi midid? (Isaías 55:6, 7).
3 Mod ratuʼdy Jehová xcalkié buñ scásiʼ né mod ratuʼdyno scásiʼ xcalkié saʼno, diti nacni toibsi midid. Órni Jehová ratuʼdy scásiʼ xcalkié toib buñ, rialadxbu láani, né raduʼdybu lagary buñcu guidzak láabu stoib. Jehová ratuʼdybu xcalkié buñ né guidopy xcalnabanybu. ¡Nigolú radziguiaʼno ngú! (Bíil Isaías 55:6, 7).
4. ¿Xí ma buny Jehová par gacnébu lóono guienno ximod ratuʼdybu scásiʼ xcalkiéno?
4 Lóono diti ratuʼdyno scásiʼ xcalkié buñ xomod rony Jehová láani, por ngú, stiplóocano diti labúu ñentzaayno láani. Per Jehová racné lóono par guienno láani né tipnés comparación ni radzelno ló Xtiitzbu. Ló artículo reʼ guisuidyno xidalni. Modreʼ sabiʼno guirá ni rony Jehová par guinitlóbu galkié né guidzakbu buñ stoib. Ni guisuidyno reʼ sacnéni lóono par guibiʼno mod ratuʼdy Jehová scásiʼ xcalkiéno de xidal mod, né modcu guientzaayno Bixiosno Jehová ni ronladx lóono, né guisacbu más par lóono.
JEHOVÁ RINÉ XCALKIÉNO
5. ¿Xí láani rac órni Jehová ratuʼdy scásiʼ xcalkiéno?
5 Ló la Biblia, xidal buelt radzak galkié né cós ni nanaʼ. Por ejemplo, rey David goniʼ: «Portín guirási ór cayoni pensary ló xcalkiéya; nacni toib guix nanaʼ, nigolú nanaʼni par naʼ» (Sal. 38:4). Per, Salmo 25:18 né 32:5 náni que Jehová ratuʼdy scásiʼ xcalkié buñ ni rac arrepentir. Diitz hebreo ni ló versículo reʼ rac traducir xomod tudy scásiʼ xcalkié buñ, raduʼdyni diitz «guilís» o «tzané». Ndeʼ rony que guibiʼno Jehová xomod toib buñguieeu nadip, ni ralís né ni rabeʼ laidyno galkié ni nanaʼ ni nooyno né rinébu láani.
«Ratudybu scásiʼ [«ralísbu», «rinébu»]» (Sal. 25:18).
6. ¿Pu riné Jehová xcalkiéno?
6 ¿Né pu riné Jehová xcalkiéno? Ló Salmo 103:12 radzelno toib comparación ni racné lóono guientzaayno láani: «Dios riné xcalkiéno sitgoluʼ, xomod sit noʼ ro ralainy govitz né ro riaʼis govitz». Niis roʼ ralainy govitz né ro riaʼisni, nigolú sit noʼni de saʼni. Verso reʼ rasuidyni lóono que órni Jehová ratuʼdy scásiʼ xcalkiéno, rinébu xcalkiéno nigolú sit. ¡Balaati rony nadip ndeʼ lóono!
«Sitgoluʼ, xomod sit noʼ ro ralainy govitz né ro riaʼis govitz» (Sal. 103:12).
7. ¿Ximod rabexa la Biblia ni rony Jehová né xcalkiéno? (Miqueas 7:18, 19).
7 Órni Jehová riné xcalkiéno sit de lóono, ¿raduʼdyni diitz que rianébu láani la? Yaca, portín rey Ezequías góoch láabu: «Ma bisalo nixitzlo guirá xcalkiéya» (Is. 38:9, 17). Por ngú, órni rac arrepentirno, Jehová ranás xcalkiéno né rasalbu láani lainy toib lagary ro dipa sabiʼbu láani stoib. Versículo reʼ láaca labúu gac traducirni modreʼ: «Ma bunylo que ñacni suusi diti buni galkié». La Biblia raslooy que ndeʼ nigolú, né diitz ni sieed ló Miqueas 7:18, 19 (bíil láani). Ca náni que Jehová rasalbu guirá xcalkiéno guetdii lainy nisdaʼ. Ló dzú ni see, pal toib cós riab guetdii lainy nisdaʼ, ma dipa labúu radzel buñ láani stoib.
«Ma bisalo nixitzlo guirá xcalkiéya» (Is. 38:17).
«Sasaʼlo guirá galkié lainy nisdaʼ dada guetdii» (Miq. 7:19).
8. ¿Xí ma bisuidyno dada nigoreʼ?
8 Né guirá comparaciones reʼ, ma bisuidyno que órni Jehová ratuʼdy scásiʼ xcalkiéno, rinébu xcalkiéno né modcu rabeʼbu ni nanaʼ laidyno. Né xomod goniʼ David: «Nakit rioʼ guirá buñ ni godudy scásiʼ guirá galkié ni buny, né ni biaa xcalkié; nakit buñguieeu ni diti sasetnaladx Jehová galkié ni buny» (Rom. 4:6-8). ¡Ngú ni raduʼdy diitz guituʼdy buñ scásiʼ xcalkié stipnés!
JEHOVÁ RANITLÓ GALKIÉ
9. ¿Xí comparaciones raquiin Jehová par gacnébu lóono guienno ximod ratuʼdybu scásiʼ xcalkiéno?
9 Nigoreʼ guibiʼno stipnés comparaciones ni sieed ló la Biblia, ni racné lóono guienno ximod sanitló Jehová xcalkié buñ ni rac arrepentir né xcalrracné xcalgoity Jesús. Por ejemplo, la Biblia ná que Jehová raguiʼp né rasiá galkié né modcu rony nayaabu buñ galkié (Sal. 51:7; Is. 4:4; Jer. 33:8). Jehová, láacabu rabexabu ximod rac guirá ndeʼ: «Ná xcalkiéto gacni xomod escarlata ni xinabuu, siaʼan quiichbeeni xomod yel; ná gacni ni xinabuu xomod lairy carmesí, sadxin sácni xomod lana» (Is. 1:18). Manch color escarlata ni xinabuu o color carmesí, nagan par cueʼ buñ láani de lairy. Modreʼ Jehová raslooy que labúu gonybu que ma diti guiaʼan xitcal de xcalkiéno.
«Ná xcalkiéto gacni xomod escarlata ni xinabuu, siaʼan quiichbeeni xomod yel» (Is. 1:18).
10. ¿Xí stoib comparación raquiin Jehová par gacnébu lóono guienno que láabu ratuʼdybu scásiʼ xcalkiéno né guidopy xcalnabanybu?
10 Xomod bitlaa ló artículo ni ma bisuidyno, galkié nacni xomod «diʼin» (Mat. 6:12; Luc. 11:4). Por ngú, órni ronyno toib galkié nisló Jehová, nacni suusi ñonyno más diʼin. Per, órni Jehová ratuʼdy scásiʼ xcalkiéno, nacni suusi ñaladxbu diʼincu né ma diti nanabbu lóono naguixno láani. Ló stoib diitz, diti ranabbu quiixno galkié ni ma bituʼdybu scásiʼ. ¡Balaati rialdó xcalnabanyno ni nanno que Jehová ratuʼdy scásiʼ xcalkiéno modreʼ!
«Bitudy scásiʼ xcalkiédo» (Mat. 6:12).
11. ¿Xí raduʼdy diitz la Biblia órni raniʼni que rietj xcalkiéno? (Hechos 3:19).
11 Jehová diti nosi rialadxbu xtiʼinno, láaca ralitbu láani (bíil Hechos 3:19). Ejemplo reʼ, ronyni que gonyno pensary ló toib buñ ni rony ray ló diʼin ni caa ló guiich. Nigolú, ná ma bunybu ray loni, números ni napni riensani. Per comparación reʼ diti raduʼdyni diitz gac ray ló diʼin ni napno, xalagary ngú, raduʼdyni diitz guietj tzaayni. Par guienno láani, guisetnaladxno que ló dzú ni see, tint goyaʼni de lán, tuuñ ni rabeʼ yac né nís. Por ngú, diti nagan nalit buñ láani né toib sponj ni nacop. Por ngú, órni buñ bilit toib diʼin binitlóni por tipzó. Diti biaʼan xitcal de diʼincu, né por ngú, ni toib buñ labúu nabiʼ láani, gocni suusi diti góc diʼincu. ¡Balaati raduʼdyno guixquix, que órni Jehová ratuʼdy scásiʼ xcalkiéno, ralitbu láani! (Sal. 51:9).
«Par guinitló xcalkiéto» (Hech. 3:19).
12. ¿Xí rasuidyno de comparación ro rasetlaa xcaay yasquin?
12 Ló Isaías 44:22, Jehová raquiimbu stoib comparación, par guislooybu ni ronybu né xcalkiéno: «Sanitlóya xcalrrachélo, sácni suusi nasieg xcaay láani, né xcalkiélo, suusi nasieg xcaay yasquin láani». Órni Jehová ratuʼdy scásiʼ xcalkiéno, nacni suusi nasiegbu xcalkiéno né toib xcaay yasquin, modreʼ ni toib buñ labúu guibiʼ láani.
«Sanitlóya xcalrrachélo, sácni suusi nasieg xcaay láani» (Is. 44:22).
13. ¿Ximod rasaclo ni nanlo que Jehová ratuʼdy scásiʼ xcalkiélo?
13 ¿Xí raduʼdy diitz guirá ejemplos reʼ par lóono? Órni Jehová ratuʼdy scásiʼ xcalkiéno, diti non guisacno que xcalkiéno bisian toib manch ló xcalnabányno, né sioʼni ca dada dzú gaityno. Xtiinno ma biaxni né xiruny Jesucristo, por ngú ma diti non quiixno láani. Ma bietjni, nacni suusi dipa goyoʼni cú. Né ngú ni rony Jehová né xcalkiéno órni rac arrepentirno: Ratuʼdybu scásiʼ xcalkiéno né guidopy xcalnabanybu.
JEHOVÁ RACACUENT LÓONO XOMOD XIMIGBU STOIB
Bixiosno ni noʼ guibá ratuʼdybu scásiʼ xcalkiéno, por ngú labúu radzaktzayno láabu. (Bibiʼ párrafo 14).
14. ¿Xigony labúu gapno confianz mod ratuʼdy Jehová scásiʼ xcalkiéno? (Láaca bibiʼ guirá dibuj).
14 Órni Jehová ratuʼdy scásiʼ xcalkiéno, labúu gapno confianz que racbu ximigno stoib. Ni ganno ndeʼ, racnéni lóono par ma diti guigotzno dool lóocano né par diti guidzuibyno né gonyno pensary que Jehová riné xian né cayopybu mod gony castigarbu lóono. ¡Ngú diti sac! ¿Xigony napno confianz que Jehová diti sony ngú? Portín láacabu gochbu profeta Jeremías: «Naʼ satudi scásiʼ xcalrrachéto né diti sasetnaladxi xcalkiéto stoib» (Jer. 31:34). Apóstol Pablo goniʼ de versículo reʼ órni goniʼbu: «Diti sasetnaladxi xcalkiéto stoib» (Heb. 8:12). ¿Xí raduʼdyni diitz?
«Diti sasetnaladxi xcalkiéto stoib» (Jer. 31:34).
15. Órni Jehová raiby lóono que ma diti sasetnaladxbu xcalkiéno stoib, ¿xí láani raduʼdybu diitz?
15 Ló la Biblia, diitz rasetnaladx diti guirá ór raduʼdyni diitz coʼno guicno cós ni ma godudy. Rioʼ ór raduʼdyni diitz gonyno alga. Por ejemplo, buñguieeu ni cuá ló yac nadop cueʼ Jesús góoch láabu: «Bisetnaladx naʼ órni ma noʼlo ló Gobierno xtunylo» (Luc. 23:42, 43). Buñguieeucu diti nosi gonabbu Jesús ñony pensary lóbu orcúsi. Né Jesús biduʼdy diitz que sonybu alga por buñguieeucu: Jesús salís láabu lad gueʼet. Por ngú, órni Jehová ná que diti sasetnaladxbu xcalkiéno stoib, raduʼdybu diitz que diti sony castigarbu lóono. Diti sasetlabu láani nislóno nigoreʼ, nili guixí, nili stoib dzú, portín ma bituʼdybu scásiʼ xcalkiéno.
16. Mod ná la Biblia, ¿ximod rasacno órni ratuʼdy Jehová scásiʼ xcalkiéno?
16 Guibiʼno stoib comparación ni raquiin la Biblia par gacnéni lóono guientzaayno ximod rasacno órni Jehová ratuʼdy scásiʼ xcalkiéno. Guiráno noʼno «xan xomandary galkié», por ngú nacno buñ galkié. Per, órni Jehová ratuʼdy scásiʼ xcalkiéno, nacni suusi nachigdoʼbu caden, né modcu rareʼno xan xomandary galkié (Rom. 6:17, 18; Apoc. 1:5). Ni nanno que Jehová ratuʼdy scásiʼ xcalkiéno, ragoʼ nakitni lóono, rasacno xomod toib mós ni rareʼ xan xomandary xpixuan.
«Bireʼto xan xomandary galkié» (Rom. 6:18).
17. ¿Xigony labúu guinino que órni ratuʼdy Jehová scásiʼ xcalkiéno nacni suusi nasialbu lóono? (Isaías 53:5).
17 (Bíil Isaías 53:5). Ló último comparación ni guisuidyno, la Biblia rasetlaa galkié xomod toib galguitz ni ragaity. Per Jehová ma bisial lóono né xcalgoity Xiimbu né modcu labúu radzakno láabu stoib (1 Ped. 2:24). Órni toib buñ ni caxoʼsii riaal, nigolú rabaladxbu. Né modcuca rasacno órni Jehová ratuʼdy scásiʼ xcalkiéno né «rasialbu» mod radzakno láabu.
«Por xi heridbu bialno» (Is. 53:5).
¿XÍ RADUʼDY DIITZ PAR LÓONO NI RATUʼDY JEHOVÁ SCÁSIʼ XCALKIÉNO?
18. ¿Xí rasuidyno de guirá comparaciones ni sieed ló la Biblia ni raslooy ximod ratuʼdy Jehová scásiʼ xcalkiéno? (Láaca bibiʼ cuadriyen ni laa, «¿Ximod ratuʼdy Jehová scásiʼ xcalkiéno?»).
18 ¿Xí rasuidy guirá comparaciones ni sieed ló la Biblia lóono mod ratuʼdy Jehová scásiʼ xcalkiéno? Que órni ratuʼdybu scásiʼ xcalkiéno, galkiécu ranitlóni por tipzó. Ndeʼ raduʼdyni lagary guidzaktzayno Bixiosno ni noʼ guibá. Per diti non guialadxno que ni guituʼdy Jehová scásiʼ xcalkiéno, diti nacni portín ronyno gan láani, né diti fuerspa gonybu láani. Nacni toib galrrascad ni raduʼdybu lóono, portín nadxiʼbu né ronladxbu lóono (Rom. 3:24).
![Xidal dibuj ro rarecaa guirá comparaciones ni bisuidyno ló artículo reʼ. Xidal dibuj: Rinébu xcalkiéno. 1. «Ratudybu scásiʼ [«ralísbu», «rinébu»]»: Noʼ ni calís toib sac xiroʼ né ni nanaʼ laidy toib hermano. 2. «Sitgoluʼ, xomod sit noʼ ro ralainy govitz né ro riaʼis govitz»: Riaʼis govitz. 3. «Ma bisalo nixitzlo guirá xcalkiéya»: Jehová casapy toib sac xiroʼ né ni nanaʼ nixitz trono xtunybu. 4. «Sasaʼlo guirá galkié lainy nisdaʼ dada guetdii»: Toib sac xiroʼ né ni nanaʼ raguichni lainy nisdaʼ. Xidal dibuj: Ranitlóbu xcalkiéno. 1. «Ná xcalkiéto gacni xomod escarlata ni xinabuu, siaʼan quiichbeeni xomod yel»: Toib hermana nóc toib blus quiich ni nap toib manch ni xinabuu. Después, hermana reʼ nóc blus cuca né ma diti napni manch. 2. «Bitudy scásiʼ xcalkiédo»: Chop ña rachés toib guiich laʼga toib hermano raniʼ ni rasac. 3. «Par guinitló xcalkiéto»: Toib ña ralit ni caa ló guiich. 4. «Sanitlóya xcalrrachélo, sácni suusi nasieg xcaay láani»: Xcaay yasquin. Xidal dibuj: Racacuentbu lóono xomod ximigbu stoib. 1. «Diti sasetnaladxi xcalkiéto stoib»: Toib hermano rabiʼ guibá. 2. «Bireʼto xan xomandary galkié»: Chop ña cachigdoʼ caden. 3. «Por xi heridbu bialno»: Jesús caa ló yac nadop. Ló stoib dibuj, rien toib hermano cayony oración lainy parque.](https://assetsnffrgf-a.akamaihd.net/assets/m/2025291/ZPL/wpub/2025291_ZPL_cnt_12_xs.jpg)
19. a) ¿Xigony raduʼdyno guixquix? (Romanos 4:8). b) ¿Xí guisuidyno ló artículo ni sieed?
19 (Bíil Romanos 4:8). ¡Nigolú raduʼdyno guixquix portín mod ná Salmo 130:4, Jehová ratuʼdy «scásiʼ xcalkié buñ»! Per guisetnaladxno, pal nainy lóono que Jehová guituʼdy scásiʼ xcalkiéno, non guisobno abís ni biduʼdy Jesús: «Pal diti ratudyto scásiʼ xcalkié stipnés, Bixiosto láaca diti satudy scásiʼ xcalkiéto» (Mat. 6:14, 15). Por ngú, nigolú rasac guisuʼno mod ratuʼdy Jehová scásiʼ xcalkiéno. Ló artículo ni sieed, sasuidyno ximod gonyno láani.
CANCIÓN 46 Gracias, Jehová
a Texto hebreo raquiinni diitz ni raslooy que nosi Jehová ratuʼdy scásiʼ xcalkié buñ por tipzó. Xidal traducciones xtuny la Biblia diti ragoʼyibu cuent láani órni rony traduciryibu Salmo 130:4.
