¿MA CUALÓLO toib galnagandaʼ né gosaclo que diti goyoʼ chú ñacné looy la? Ná nabanyno ló toib «tiemp nagan, né nagan par gony guantary buñ láani», né ndeʼ labúu gony que guisacno que noʼno toibno né tzoʼ nabanno, diti noʼ xi portín guicalóno galnagan nosi lóono (2 Tim. 3:1). La Biblia ná que labúu gapno xcalrracné ximigdxinno «ló tiemp ni noʼ galnagan» (Prov. 17:17).

Apóstol Pablo gopbu ximigbu ni buny compañer láabu órni goyeebu stipnés lagary né ni gocné láabu de xidal mod (Col. 4:7-11). Órni goyoʼbu press lainy gudx Roma, ximigbu buny cós ni láabu diti labúu bunybu. Por ejemplo, Epafrodito bunycuent láabu cós ni biquiimbu né ni bixel herman de Filipos par láabu (Filip. 4:18). Tíquico bikiʼs guiich ni bicaʼ Pablo par gadzéga congregación (Col. 4:7). a Né xcalrracné ximigbu, Pablo labúu buny xchiin Jehová órni goyoʼbu press lainy lidxcabu né órni goyoʼbu lainy press. ¿Né lóono ga? ¿Ximod labúu gacno toib amigdxin?

Ló naareʼ xidal herman raslooy né ejemplo xtuny que amigdxin rasacgoluʼ. Guibiʼno ni gosaclóo Elísabet, toib precursora regular ni nac de gudx España. Órni doctor goniʼ que xinaʼbu nap cáncer né sagaityni láabu, goyoʼ toib hermana ni bislooy que nac toib amigdxin, portín casi guirá ór bixelbu mensaj sacróyen lóo Elísabet ro bicaʼbu textos ni sieed ló la Biblia. Elísabet ná: «Guirá mensaj reʼ, gocnéni naʼ par diti nasaca que noʼya toobi né biduʼdyni fuers naʼ par ñoni guantary» (Prov. 18:24).

Labúu sadzaktzayno xhermanno pal racnéno layibu né tipnés cós ló sentido espiritual. Por ejemplo, ¿labúu ninéno toib herman golien reunión o predicación la? Ngú labúu ñac toib oportunida sacróyen par gony animarno saʼno (Rom. 1:12). Per, noʼ herman ni diti labúu rareʼ lidx. ¿Ximod labúu gacno toib amigdxin par layibu?

Noʼ herman ni diti labúu riee reunión lainy Salón portín caxoʼyibu o cacalóyibu stipnés galnagan. Ngú ni góc né David, doctor goniʼ que napbu cáncer né cuaʼbu quimioterapia más de xhoop beʼo. Ló xhoop beʼocu, láabu né tzeelbu Lidia, góc conectaryibu ló reunión por videoconferencia.

¿Ximod gocné congregación layibu? Órni bilox reunión tipnés herman ni goyoʼ lainy  Salón del Reino biaʼanyibu par goninéyibu David né Lidia por videoconferencia. Né láaca, herman bixel mensaj sacróyen lóoyibu órni buny comentaryibu ló reunión. ¿Ximod gocnéni layibu? David né Lidia gosacyibu que ximigyibu binladx layibu.

¿Labúu gony predicarno né herman ni diti labúu rareʼ lidx la? Pal natzaʼno tipnés cosien labúu naslooyno guirá herman reʼ que diti ma bialadxno layibu (Prov. 3:27). ¿Labúu guicaʼno guiich né layibu o gony predicarno por teléfono la? Láaca ancianos labúu guiniʼ que herman ni diti labúu rareʼ lidx gac conectar por videoconferencia ló reunión par guireʼ buñ predicación. David né Lidia biduʼdy guixquix por ndeʼ. David ná: «Ni góc conectardo né grupo de predicación par nanido tipnés cós ni sieed ló la Biblia né ni bunydo oración, nigolú gocnéni lóodo». Né, pal rasuidyno toib buñ ni ná la Biblia, ¿xigony diti raruʼno láabu guisuidybu ni ná la Biblia lidx toib hermano ni diti labúu rareʼ? Nigolú, gonyno láani pal rabiʼno que labúu gonyno láani né que diti noʼ riesga.

Órni radudyno tiemp né herman ni diti labúu rareʼ lidx, rabiʼno cualidades sacróyen ni napyibu né radzaktzaayno layibu. Por ejemplo, órni rabiʼno ximod raquiinyibu la Biblia par guidxinyibu lainy xcalnabany buñ, radziguiaʼno layibu. Órni racnéno herman de guirá modreʼ, labúu tzoʼ más ximigno (2 Cor. 6:13).

Ni goyoʼ Tito né Pablo, nigolú bisialdóni xcalnabany apóstol reʼ (2 Cor. 7:5-7). Ngú rony que guisetnaladxno que labúu guisialdóno xcalnabany ximigno diti nosi né xtiitzno, láaca pal rioʼno cueʼyibu né ronyno cós por layibu (1 Juan 3:18).

Xhermanno de Rusia nacyibu toib galán ejemplo por mod racnéyibu saʼyibu. Guibiʼni ni gosaclóo Serguéi né tzeelbu Tatiana. Policia goyoʼ lidxyibu par bibiʼyibu xi noʼ lainyni né después goynéyibu galtzeʼel reʼ par gonabdiitzyibu tipnés cós. Primer bislaʼyibu Tatiana, né bibiguetbu lidxbu. Serguéi rasetlaa xi láani góc órni bidxin Tatiana lidx: «Toib hermana ni gop balory bidxin lidxdo. Después stipnés herman láaca bidxin né bicuatzayibu xcósdo ni biretzlas».

Serguéi ná: «Nigolú rioladxi ni ná Proverbios 17:17: Toib amigdxin guirá ór nadxiʼ né nacbu toib buchgolnéno ló tiemp ni noʼ galnagan. Nigoreʼ ni cadudi ló persecución, textocu más rasacni par naʼ; naana que diti labúu ñoni guantary galnagan reʼ toobi. Jehová ma biduʼdy ximiga ni nap balory ni dipa ma bisian naʼ». b

Ló tiemp reʼ ni nigolú nagan, raquiin gapno ximigno ni gacné lóono. Né ló gran tribulación más saquiinno layibu. Por ngú, desde nigoreʼ, gonyno rutirigaʼlni lóono par gacno toib amigdxin (1 Ped. 4:7, 8).