ARTÍCULO NI GUISUIDYNO 28
CANCIÓN 123 Seamos leales y sumisos al orden teocrático
¿Nanlo xí láani galnigolú né xí láani galrrascú la?
«Colguisagaʼdxich, né dxich colcoʼ cinturón lainyto, láani ngú galnigolú» (EFES. 6:14).
TEMA
Guisuidyno ximod labúu ganno galnigolú ni sieed de Jehová né galrrascú ni sieed de Buñdzab né xi enemigno.
1. ¿Xí rasaclo por galnigolú?
LÓONO ni nacno xpiin Jehová nadxiʼno galnigolú xtuny Xtiitz Dios. Fe xtunyno rareʼni ló Xtiitz Dios (Rom. 10:17). Nandxichno que Jehová goloʼ congregación cristiana xomod «toib pilary né rony defenderni galnigolú» (1 Tim. 3:15). Rasobno né gan herman ni ragonés lóono portín rabexayibu galnigolú ni sieed ló la Biblia né radudyibu instrucciones ni racné lóono gonyno ni ná Dios (Heb. 13:17).
2. Mod ná Santiago 5:19, ¿xí riesga racalóno ni nacno xpiin Jehová?
2 Ná ma cuacuentno galnigolú né nanno que non guisobno ni raiby xcudx Dios lóono, noʼ riesga galsitno de galnigolú (bíil Santiago 5:19). Buñdzab ñoladx ma diti ñapno confianz ló la Biblia o ló guirá instrucciones ni radudy xcudx Jehová lóono (Efes. 4:14).
3. ¿Xigony dipa guisianno galnigolú? (Efesios 6:13, 14).
3 (Bíil Efesios 6:13, 14). Mápa mer Buñdzab saquiin galrrascú par gonybu que gudxrop guicaló xcudx Dios (Apoc. 16:13, 14). Láaca nanno que Buñdzab sony rutirigaʼlni láabu par guiscúbu xpiin Jehová (Apoc. 12:9). Por ngú nigolú rasac ganno xi láani galnigolú né xi láani galrrascú né guisobno galnigolú (Rom. 6:17; 1 Ped. 1:22). Ndeʼ nigolú rasac gonyno par diti gaityno ló gran tribulación.
4. ¿Xí guisuidyno ló artículo reʼ?
4 Ló artículo reʼ guisuidyno chop cualidades ni raquiinno par guidudyno cuent xi láani ngú galnigolú ni sieed ló la Biblia, né par guicacuentno mod ragonés xcudx Jehová. Láaca guisuidyno tzón cós ni non gonyno par dipa guisianno galnigolú.
CUALIDADES NI NON GAPNO PAR GANNO XI LÁANI GALNIGOLÚ
5. ¿Ximod radzak ni gapno respet Jehová né ni ganno xí láani galnigolú?
5 Gapno respet Jehová. Ni gapno respet Jehová radudyni diitz que nigolú nadxiʼno láabu né por ngú diti ronyno cós ni labúu guisioʼob láabu. Raniiny lóono guisuidyno ximod labúu ganno xi láani ngú cós tzaay né xi láani ngú cós mal, xi láani ngú galnigolú né xi láani galrrascú par guicacuent Jehová lóono (Prov. 2:3-6; Heb. 5:14). Dipa non guidudyno lagary que ni guidzuibyno buñgudxlio gacni más xiroʼ que galnadxiʼ ni napno Jehová, pal ñonyno ngú nagoʼ nakitno xcalnabany buñgudxlio, né ni rioladx buñgudxlio, Jehová diti rioladx láani.
6. ¿Xí góc né chii buñ ni goyláach por ni bidzuibyibu buñgudxlio?
6 Pal galrradzuiby ni napno buñgudxlio ñacni mas xiroʼ que respet ni napno Jehová labúu ñonyno crer cós ni diti noʼ de acuerdo né galnigolú ni sieed de Jehová. Gonyno pensary ló 12 israelitas ni goyláach Layoo ni Dios Biduidy xtiitz guicaʼyibu. Chii israelitas ni goyee, galrradzuiby ni gopyibu cananeos gocni más xiroʼ que galnadxiʼ ni gopyibu Jehová né por ngú goniʼyibu: «Diti labúu sacalóno buñcu portín más nadipyibu que lóono» (Núm. 13:27-31). Goyoʼ razón par nadzuibyibu, portín buñ cananeos gocyibu más buñdxibloo. Per órni goniʼyibu que diti labúu ñonyibu gan xi enemigyibu bialadxyibu Jehová. Non nagoʼyibu guicyibu ló ni goniiny Jehová ñony israelitas. Láaca non nasetnaladxyibu ni buny Jehová por layibu. Modcu nadudyibu cuent que cananeos diti labúu ñonyibu gan ni nap Xiroʼgolu galnadip. Per Josué né Caleb góc gadzé mod: layibu gopyibu fe né goniiny nacacuent Jehová layibu. Por ngú gochyibu gudx Israel: «Pal Jehová noʼ nakit né lóono, labúu sapno confianz que sinébu lóono ló layoocu né sadudybu láani lóono» (Núm. 14:6-9).
7. ¿Xí láani labúu gacné lóono par gony nadipno respet ni napno Jehová? (Láaca bibiʼ dibuj).
7 Toib cós ni labúu gacné lóono par gony nadipno respet ni napno Jehová, láani ngú guisetnaladxno cós ni rioladxbu antes de coʼno guicno gonyno toib cós (Sal. 16:8). Órni goʼolo toib historia ni sieed ló la Biblia, gonabdiitz looy: «pal ñoʼya cú, ¿xí láani ñooni?». Por ejemplo, buny pensary que cacadiaglo guirá cós ni goniʼ chii israelitas cu. ¿Ñonylo crer layibu né nadzuibylo buñcu la? ¿O ñac más xiroʼ galnadxiʼ ni naplo Jehová né ni nainy guisoblo láabu? Xidal israelitas diti bidudyibu cuent que nigolú ngú ni goniʼ Josué né Caleb. ¿Ximod birecaayibu? Diti bioʼyibu ló Layoo ni Dios Biduidy xtiitz guicaʼyibu (Núm. 14:10, 22, 23).
¿Chú layibu ñonylo crer? (Bibiʼ párrafo 7).
8. ¿Xí cualidad non gapno, né xigony?
8 Gacno buñdxo. Jehová rabeʼxilat galnigolú a buñ ni nac buñdxo (Mat. 11:25). Órni bisuidyno galnigolú gócno buñdxo né cuacuentno xcalrracné stipnés (Hech. 8:30, 31). Ná scú, non gapno cuidad par diti gacno buñ farmay. Pal nacno buñ farmay labúu ñonyno pensary que mod rabiʼno cós toibsi midid rasacni né guirá principios ni sieed ló la Biblia né instrucciones ni radudy xcudx Jehová lóono.
9. ¿Xí sacné lóono par gacrano buñdxo?
9 ¿Xí láani sacné lóono par gacrano buñdxo? Guisetnaladxno que Jehová más xiroʼ que lóono (Sal. 8:3, 4). Láaca labúu gonyno oración par gacno buñdxo né guidudyno lagary que stipnés guisuidy lóono. Jehová sacné lóono par coʼno primer lagary ni ronybu pensary, ni rasuidybu lóono né xcalrracné Xtiitzbu né xcudxbu, né diti mod ni ronyno pensary. Órni goʼolo la Biblia biyopy prueby ni raslooy que Jehová nigolú rioladx gacno buñdxo né rianladxbu galfarmay. Né pal racaʼlo toib dxiinien ro xidal buñ guibiʼ looy diti guiatzlo.
¿XÍ NON GONYNO PAR DITI GUISIANNO GALNIGOLÚ?
10. ¿Chú layibu biquiin Jehová par golonésbu né bidudybu instrucciones xpiimbu?
10 Guirá ór gop confianz mod ragonés xcudx Jehová lóono. Ló xtzú israelitas, Jehová biquiin Moisés né Josué par bidudybu instrucciones xcudxbu (Jos. 1:16, 17). Órni israelitas bibiʼyibu chop biinreʼ xomod buñ ni Jehová golú par conés layibu goyeeni galán layibu. Xidal íz después órni goyoʼ congregación cristiana, Jehová golonés congregación reʼ né xcalrracné 12 apóstoles.(Hech. 8:14, 15). Después, láaca biquiinyibu stipnés ancianos xtuny gudx Jerusalén. Herman bisob guirá instrucciones ni bidudy biinreʼ layibu, «guirá congregación góc nadip fe xtunyibu né guirá dzú gocyibu más xidal» (Hech. 16:4, 5). Ló naareʼ, Jehová láaca radudybu xcalnasácbu lóono órni rasobno instrucciones ni radudybu né xcalrracné xcudxbu. ¿Ximod nasacbu pal diti nasaguelno nasobno herman ni ma golúbu par guisanir ló xchiimbu? Par ganno láani, guisuidyno ni gosaclóo israelitas órni mápa mer ñoʼyibu ló Layoo ni Dios Biduidy xtiitz guicaʼyibu.
11. ¿Xí góc né guirá ni diti goniiny nasob buñ ni golú Jehová par nagonés layibu? (Láaca bibiʼ dibuj).
11 Laʼga israelitas see ló néz par guidxin ló Layoo ni Dios Biduidy xtiitz guicaʼyibu, tipnés buñxirop gosaló goniʼyibu pal nigolúpa caquiin Jehová Moisés par conés layibu. Goniʼyibu: «Guidopynac gudx [diti nosi Moisés] nac nayaa, né Jehová noʼ né layibu» (Núm. 16:1-3). Nigolú, par Jehová «Guidopynac gudx» góc nayaa, per láabu golúbu Moisés par nagonés gudx (Núm. 16:28). Por ngú órni guirá israelitas ni góc nayaʼ goniʼyibu mal de Moisés, de Jehová ngú ni goniʼyibu mal. Diti goloʼyibu guicyibu ló ni nainy Jehová, xalagary ngú goloʼyibu guicyibu ló ni goniiny layibu, goniiny ñapyibu más galnadip né nasanadx buñ layibu. Jehová bigaity buñ ni bikíil israelitas par diti nasobyibu Jehová né láaca bigaitybu xidal mil israelitas ni goyoʼ xiladyibu (Núm. 16:30-35, 41, 49). Labúu gapno confianz que ló naareʼ Jehová diti rioladxbu buñ ni diti rap respet mod ragonés xcudxbu.
¿Chú layibu ñacnélo? (Bibiʼ párrafo 11).
12. ¿Xí razón napno par gapno confianz ló xcudx Jehová guirá ór?
12 Napno xidal razón par gapno confianz ló xcudx Jehová. Órni herman ni rasanir ló xchiin Jehová rabiʼyibu que non guitzaʼno mod rienno toib galnigolú ni sieed ló la Biblia o mod ronyno tipnés dxiin, nimaca ratzaʼyibu láani (Prov. 4:18). Ronyibu láani portín ni más rasac par layibu láani ngú coʼ nakityibu Jehová. Láaca, ronyibu rutirigaʼlni layibu par cueʼyibu guirá ni ragoʼyibu guicyibu gonyibu ló Xtiitz Dios, né ndeʼ non gonyno guiráno ni nacno xpiin Jehová.
13. ¿Xí láani ngú «diitz nasac», né xí non gonyno né láani?
13 «Diti guisianlo diitz nasac» (2 Tim. 1:13). ¿Xí láani ngú «diitz nasac»? Galrrasuidy ni sieed ló la Biblia (Juan 17:17). Guirá ni ronyno crer rareʼni ló galrrasuidy reʼ. Xcudx Jehová rasuidy lóono par guisuʼno láani. Pal guirá ór ronyno láani, sieeni lóono galán.
14. ¿Ximod bisian tipnés cristianos «diitz nasac»?
14 ¿Xí ñac pal nasianno «diitz nasac»? Guibiʼno ni góc ló siglo primero. Tipnés cristianos goniʼyibu que xtzú Jehová ma bidxinni. Sigory goyoʼ toib guiich ni goniʼ ngú, ro buñ buny pensary que bicaʼ apóstol Pablo. Tipnés cristianos de Tesalónica diti goyoʼyibu galrrasaʼ ñanyibu pal nigolúni, bunyibu crer láani né gochyibu láani stipnés. Buñ diti nascú layibu pal nasetnaladxyibu ni góoch Pablo layibu (2 Tes. 2:1-5). Apóstol Pablo góoch layibu diti ñonyibu crer guirá ni nacadiagyibu. Né par diti nasacloyibu ngúca stoib, bisloʼoxbu ni rarop guiich ni bicaʼbu ló biinreʼ né diitzreʼ: «Naʼ, Pablo, racaʼya dioxh reʼ né ñaya, ni nac toib señ ló guirá xquiichi. Modreʼ racaʼya» (2 Tes. 3:17).
15. ¿Ximod labúu gapno lóono de guirá galrrascú ni ralooyni nac galnigolú? Bisetlaa toib ejemplo. (Láaca bibiʼ retrat).
15 ¿Xí rasuidyno ni bicaʼ Pablo a herman de Tesalónica? Pal radxin guidiagno toib historia ni guidziguiaʼno o toib cós ni diti noʼ de acuerdo né ni ma bisuidyno ló la Biblia, gacno buñ ni naniʼ xcalrrien. Ló Unión Soviética, xi enemigno bikiʼsyibu toib guiich ni ralooyni bicaʼ central mundial ro buny animarni tipnés herman narestzoo. Ná ralooyni nigolú ni cuá ló guiichcu, herman ni diti bisian Jehová diti buny crer láani. Bidudyibu cuent que guirá ni cuá ló guiichcu diti goyoʼni de acuerdo né guirá ni ma bisuidyibu. Ló xtzúno, xi enemigno raquiinyibu internet par kitquelyibu lóono né par diti guiguaʼno toibsi. Par diti guiañ gac naní xcalrrienno raquiin guicaano cuidad pal guirá ni racadiagno o ni rolno noʼni de acuerdo né guirá ni ma bisuidyno (2 Tes. 2:2; 1 Juan 4:1).
Diti guidudylo lagary guiscú buñ looy né galrrascú ni ralooyni nac nigolú. (Bibiʼ párrafo 15). a
16. Mod ná Romanos 16:17 né 18, ¿xí láani non gonyno né buñ ni rarestzoo de galnigolú?
16 Goyoʼ toibsi né herman ni diti rasian Jehová. Dios raniiny que guiráno gony adorarno láabu toibsi, né nosi sonyno láani pal diti rasianno galnigolú. Ni rarestzoo de galnigolú ronyibu que congregación diti guiguaʼ toibsi. Por ngú, Dios raiby lóono diti coʼno cuent layibu par diti gonyibu que galsitno de galnigolú (bíil Romanos 16:17, 18).
17. ¿Xí láani sac pal nanno xí láani galnigolú né dipa rasianno láani?
17 Pal nanno xipa ngú galnigolú né dipa rasianno láani, sioʼno nayaa nasac ló sentido espiritual (Efes. 4:15, 16). Diti sadudyno lagary guiscú Buñdzab lóono, né Jehová sap lóono ló gran tribulación. Dipa guisianlo galnigolú né «Dios ni nap paz» sioʼ né looy (Filip. 4:8, 9).
CANCIÓN 122 ¡Mantengámonos firmes, inmovibles!
a MOD RAREXA DIBUJ NÉ RETRAT: Escenificación. Ma xidzú íz, herman ni bibany ló Unión Soviética cuaʼyibu toib guiich ni ralooyni bicaʼ central mundial per ni bicaʼ láani ngú xi enemigno. Ló xtzúno, xi enemigno labúu guichetzyibu falz ló internet de xcudx Jehová par guiscúyibu lóono.
