1. Mod ná 1 Pedro 5:2, ¿xí responsabilidad nap ancianos?

 JEHOVÁ ma bunycuent dxiinreʼ ancianos par gan xilieen xtuny Jehová. Ancianos rabiʼyibu dxiinreʼ xomod toib privilegio portín racnéyibu xhermanyibu né ronyibu rutirigaʼlni layibu par gacyibu xomod ni ran xiil (Jer. 23:4; bíil 1 Pedro 5:2). ¡Galán ni noʼ herman de clas reʼ ni ronygolú dxiin lainy congregación!

2. ¿Xí galnagan racaló tipnés ancianos?

² Órni ronyibu dxiinreʼ, racalóyibu xidal galnagan. Por ejemplo par ganyibu congregación non gonyibu xiroʼ dxiin. Guibiʼno ni gosaclóo Tony, toib anciano ni rabés Estados Unidos. Bidudybu cuent que raquiin gacbu modesto órni guicaʼbu stipnés dxiin. Tony ná: «Órni gosaló galguitz COVID-19 goyogoluʼ dxiin, biquiin ñoʼ ni ñacné ximod ñac reunión né predicación, né gosaguela ñoni guirá dxiin ni gochbu naʼ. Per ná buni xiroʼ xtem goyoʼ más dxiin. Né conforma godudy dzú má diti biila la Biblia má diti bisudi xquiichi nili buni oración». llir, toib anciano de Kosovo, cualóbu gadzé galnagan. Golésbu ló toib lagary ro goyogoluʼ guerr né gosac naganbu nasobbu ni ná xcudx Jehová. Láabu nábu: «Órni sucursal gonab naʼ ñacnéya herman ni noʼ toib lagary ro nogoluʼ riesga, bidzubi. Nagan gap buñ balory, né guirá instrucciones ni bidudybu rolooyni diti tampa naquiinni». Né toib misionero de Asia ni laa Tim, gosacnaganbu ñonyibu guirá dxiin ni napbu. Láabu nábu: «Goyoʼ ór nigolú bidzag xpensari né goyoʼya nabann». ¿Xí labúu gony ancianos órni guicalóyibu galnagan reʼ?

3. ¿Xigony galán que guiráno non guibiʼno ejemplo xtuny Gedeón?

³ Ancianos labúu guisuidy xidal cós mod buny Gedeón (Heb. 6:12; 11:32). Gonbu xcudx Dios (Juec. 2:16; 1 Crón. 17:6). Ancianos ni noʼ ló naareʼ, xomodca Gedeón, napyibu  responsabilidad de ganyibu xcudx Jehová ló tiemp nagan (Hech. 20:28; 2 Tim. 3:1). Por ngú, ancianos labúu guisuidyibu mod góc Gedeón, láabu gócbu modesto, gócbu buñdxo, bisobbu né buny guantarybu. Láaca ejemplo xtuny juez reʼ sacnéni guirá ni noʼ lainy congregación par guisac par layibu guirá dxiin ni rony ancianos né gacnéyibu né guidopy xcalnabanyibu (Heb. 13:17).

4. ¿Ximod bislooy Gedeón que gócbu modesto né buñdxo?

⁴ Gedeón gócbu modesto né buñdxo. b Órni toib ángel góoch láabu que Jehová ma golú láabu par ñacnébu israelitas, ni goyoʼ xan xomandary buñ madianitas, gócbu buñdxo né goniʼbu: «Xfamila diti tampa rasacyibu que guirá xfamil Manasés né naʼ diti rasaca de xfamil bixiosa» (Juec. 6:15). Bunybu pensary que diti labúu ñonybu dxiincu. Per Jehová gon que labúu ñonybu láani, né xcalrracné Jehová birebuʼ xchiin Gedeón.

5. ¿Xí cós labúu nagoʼ prueby pal ancianos nacyibu modestos né nacyibu buñdxo?

⁵ Ancianos ronyibu dada rutirigaʼlni layibu par gacyibu modestos né buñdxo (Miq. 6:8; Hech. 20:18, 19). Diti riatzyibu por ni nanyibu ronyibu, né ni ma bunyibu. Láaca diti ratzuitzgoluʼyibu né láacayibu órni diti rareʼ xchiinyibu galán o diti rareʼni xomodpa nainy layibu. Per noʼ tipnés cós ni labúu coʼ prueby layibu pal nacyibu modestos né buñdxo. Guisetlano chop ejemplos. Pentzi toib anciano rasaguel gony xidal dxiin per después rabiʼbu que diti labúu ronybu guiráni. Pentzi guidziguiaʼ buñ láabu por dxiin galán ni ronyibu o pentzi guiniʼ buñ mal de láabu por mod bunyibu toib cós. Órni rac guirá ndeʼ, ¿ximod labúu gacnéni ancianos ejemplo xtuny Gedeón?

6. ¿Ximod labúu gac ancianos modestos xomod Gedeón? (Láaca bibiʼ retrat).

⁶ Gonab galrracné. Buñ ni nac modesto nanyibu que diti labúu gonybu guiráni. Gedeón gócbu modesto, por ngú gonabbu xcalrracné stipnés (Juec. 6:27, 35; 7:24). Ancianos ni naní xcalrrien ronyibu  modcuca. Tony, ni bisetlano ló párrafo chop ná: «Por mod goniʼsa cuacuenta más dxiin que ni labúu ñoni, goloʼya guica naniya de modestia órni rasudi toibsi né xfamila né gonaba tzeʼela ñacnébu ná. Né bibiʼya toib video ni noʼ ló jw.org ni laa, Xomodca buny Jesús guisuidyno né gapno confianz layibu». Tony gosaló gonabbu xcalrracné stipnés né láabu raibybu lóono ximod birecaabu: «Rac guirá dxiin ni non gac lainy congregación, né nigoreʼ ma más napa tiemp par guidzaktzaya Jehová».

7. ¿Ximod labúu guisuʼ ancianos mod buny Gedeón órni rioʼ ni raniʼ mal de layibu? (Santiago 3:13).

⁷ Diti guitzuitzto pal rioʼ ni raniʼ mal de lóoto. Ni raniʼ buñ mal de toib anciano labúu coʼni prueby láabu. Ejemplo xtuny Gedeón láaca labúu gacnéni lóono. Gonbu que nacbu buñ galkié né órni xpuñ Efraín goniʼ mal de láabu, diti bidzuitzbu (Juec. 8:1-3). Xalagary nadzuitzbu gócbu buñdxo né bicadiagbu buñreʼ, né galrronladx labúu bichocbu ló xcalnadzuitzybu. Ancianos ni noʼ xcalrrien ronyibu xomod Gedeón. Órni buñ raniʼ mal de layibu, racadiagyibu né nadaʼa racapyibu (Bíil Santiago 3:13). Órni ronyibu ndeʼ, ronyibu que herman guiguaʼ sacró.

8. ¿Ximod non gony ancianos órni rioʼ herman ni radziguiaʼ layibu? Bisetlaa toib ejemplo.

⁸ Colgonyxiroʼ Jehová. Órni bunyxiroʼyibu Gedeón por ni bunybu gan madianitas, láabu bunyxiroʼbu Jehová (Juec. 8:22, 23). ¿Ximod labúu guisuʼ ancianos mod buñ Gedeón? Gonyxiroʼyibu Jehová órni guirebuʼ cós ni gonyibu (1 Cor. 4:6, 7). Por ejemplo, pal toib herman raibybu toib anciano que nigolú sacró mod rasuidybu, anciano labúu guiniʼ que ni goniʼbu sieedni ló Xtiitz Dios né guiráno rasuidyno pór galrrasuidy ni radudy xcudx Jehová lóono. Rioʼ ór raquiin que ancianos guinabdiitzyibu láacayibu pal mod rasuidyibu ronyxiroʼni Dios o ronyxiroʼni láacayibu. Guibiʼno ni gosaclo toib hermano ni laa Timothy. Órni bidxinbu gócbu anciano nigolú bioladxbu natudybu discurs. Láabu nábu: «Órni gosaloya discurs buni láani sioʼoldii né láaca scúca né ejemplos ni raquiinna, né herman nigolú bisanadx naʼ. Per diti birecaani galán portín bisanadxyibu naʼ né diti bunyxiroʼyibu a Jehová o la Biblia». Per después, Timothy bidudy cuent que non natzaʼbu mod rasuidybu par diti nadudy midid nadziguiaʼ herman láabu (Prov. 27:21). ¿Ximod birecaabu? Láabu nábu: «Nigoreʼ noʼ herman ni raiby naʼ que discurs ni bitudi gocnéni layibu órni godudybu ló toib galnagan órni cualóyibu toib prueby o gocnéni layibu par ñoʼyibu más gax Jehová. Rioʼya más nakit por ni raiby herman naʼ nigoreʼ que por ni bunyxiroʼyibu naʼ nírcu».

9. ¿Ló xí cós goyoʼ prueby galrrasobdiitz né balory xtuny Gedeón? (Bibiʼ retrat ni sieed laidy guiich reʼ).

⁹ Después ni golú Jehová a Gedeón par ñac juez, goyoʼ prueby láabu pal rasobdiitzbu né napbu balory. Cuaʼbu toib dxiin ro goyogoluʼ riesga, non nanitlóbu altar xtuny Baal ni gop bixiosbu (Juec. 6:25, 26). Después Gedeón gopbu xidalguixo soldad né chop buelt gonab Jehová láabu que goxeʼsi soldad non ñapbu (Juec. 7:2-7). Después Jehová buny mandary láabu que nacalóbu xi enemigbu galagueʼel (Juec. 7:9-11).

10. ¿Ximod labúu tzoʼ prueby pal toib anciano rasobdiitz?

¹⁰ Ancianos puextca tzoʼyibu par guisobyibu (Sant. 3:17). Órni toib anciano  rasob, racanalbu né gan guirá instrucciones ni radudy la Biblia né ni radudy xcudx Dios, né modcu radxin racyibu toib ejemplo par stipnés. Per rioʼ ór rasac naganbu guisobbu. Pentzi rioʼ ór rasac naganbu ganbu xi instrucciones copy noʼ. Sioʼ ór labúu guinabdiitzbu láacabu pal guirá instrucciones ni má cuaʼbu saquiinni. Pentzi sioʼ ór, herman guinab láabu gonybu toib dxiin ronoʼ riesga ló clas galnagan reʼ. ¿Ximod labúu guisuʼ ancianos mod buny Gedeón?

11. ¿Xí labúu gacné ancianos par guisob?

¹¹ Bicadiag guirá instrucciones né bisob láani. Dios gochbu Gedeón ximod nanitlóbu altar xtuny bixiosbu. Puti lagary nasaʼbu toib altar par Jehová né xi nimal non nadudybu xomod sacrificio. Gedeón diti goniʼbu pal xinésni ngú ni gonab Jehová láabu, nimaca bisobbu. Ló naareʼ ancianos racaʼyibu instrucciones xtuny xcudx Jehová por guiich, anunys né pautas. Guirá ndeʼ racni par ganyibu lóono ló sentido físico né espiritual. Guirá ancianos rasobdiitzyibu guirá instrucciones ni radudy Jehová layibu, né por ngú ronladxgoluʼno guiráyibu. Por ni rasobdiitzyibu, guirá congregación racaʼ galnasác (Sal. 119:112).

12. ¿Ximod labúu guisob ancianos ni ná Hebreos 13:17 órni xcudx Jehová ratzaʼ ni ma noʼ?

¹² Colguisaguel órni xcudx Jehová ratzaʼ tipnés cós. Guisetnaladxno que Jehová gonabbu Gedeón que non ñanébu chop tzónsi soldad (Juec. 7:8). Sigory bunybu pensary: «¿Xí nigolú raquiin gac ndeʼ la? ¿Sarebuʼni la?». Ná scú Gedeón bisob. ¿Ximod rasuʼ ancianos mod buny Gedeón? Rasobyibu guirá ni raniʼ xcudx Jehová (bíil Hebreos 13:17). Por ejemplo, íz 2014, Tidxó buñ ni nap xiroʼ Galnan bitzaʼyibu mod gonyibu gaxt bidxiich loguiaʼ Salones del Reino né loguiaʼ Salones de Asambleas (2 Cor. 8:12-14). Ló dzú ni see, sucursal bidudy bidxiich congregación par nasaʼyibu Salón, né después nadxiguetyibu láani. Per nigoreʼ sucursal ratop bidxiich ni radudy guirá congregación ni noʼ ló guidopynac Gudxlio par labúu guiaʼ Salón ro caquiinni, nac nitisi bidxiich ni guidudy tigaaga congregación. Órni toib anciano ni laa José gonbu cambio ni ma goyoʼ, bunybu pensary que diti sarebuʼni. Goniʼbu ndeʼ: «Sarebuʼni stoib lagary, per reʼ la, yaca. Diti labúu siaʼ ni toib Salón del Reino». Per ná scú, bisobbu. ¿Xigony? Nábu: «Bisetnaladxi ni ná Proverbios 3:5, 6, que non gapa confianz lóo Jehová. ¡Radziguiaʼya ximod labúu cuanésni! Diti nosi bisaʼdo más Salones del Reino, xalagary ngú láaca ma bisuidydo guidudydo ni napdo par labúu gacnéni ni radudy stipnés herman».

13. a) ¿Xí láani gop Gedeón confianz? b) ¿Xí labúu gony ancianos par gacyibu xomod Gedeón? (Láaca bibiʼ dibuj).

 ¹³ Colgony xchiin Jehová né balory. Gedeón bisob ni ná Jehová ná goyoʼ riesga né ná bidzuibybu (Juec. 9:17). Después ni gocné Jehová láabu, Gedeón gopbu confianz que Dios ñacné láabu par nalaa xcudxbu. Ancianos ni rabés lagary ro diti napyibu permís guiniʼyibu xtiitz Dios nacyibu xomod Gedeón. Né balory, raniʼyibu ximod gac reunión né rasaniryibu ló predicación ná pal tzeeyibu press, tzoʼ ni guinabdiitz layibu tipnés cós, guisnityibu xchiinyibu o noʼ ni gonynaa layibu. c Órni tzoʼ gran tribulación, ancianos non gapyibu xiroʼ balory par guisobyibu instrucción ná pal noʼ riesga o yaca. Pentzi instrucción ni guicaʼyibu nacni ro guiniʼyibu de mensaje de condena ndeʼ nacni xomod guieerop xtuny laver. O pentzi radzakni né ni gonyno par guilaano órni guicaló Gog de Magog lóono (Ezeq. 38:18; Apoc. 16:21).

14. ¿Ximod goyoʼ prueby aguante xtuny Gedeón?

¹⁴ Órni Gedeón góc juez xtuny gudx Israel, bunygoluʼbu dxiin né bistzagni láabu. Órni madianitas bixonyibu ló guerr ni góc goxin, Gedeón cuanal layibu desde guʼuc Jezreel dada guʼuc Jordán, ni sigory gop guixbataʼ né gúch rolooni (Juec. 7:22). ¿Xí bunybu? ¿Bireʼganbu la? ¡Yaca! Ná láabu né 300 xpiimbu cadzagyibu, godudyibu ló guʼuc né cuanalrayibu madianitas. Goygaʼlyibu madianitas né binitlóyibu guirá biinreʼ (Juec. 8:4-12).

15. ¿Xí láani labúu coʼ prueby aguante ni nap toib anciano?

¹⁵ Ni gan buñ congregación né family labúu guistzagni a toib anciano ló sentido físico, mental o emocional. Ancianos ni rasac modreʼ, ¿ximod labúu guisuʼyibu Gedeón?

16, 17. a) ¿Xí láani gocné Gedeón par buny guantarybu? b) ¿Xí láani nap ancianos confianz? (Isaías 40:28-31; láaca bibiʼ retrat).

 ¹⁶ Colgap confianz que Jehová sadudy fuers lóoto. Ngú ni buny Gedeón, né Jehová gocné láabu (Juec. 6:14, 34). Toibtica buelt, Gedeón né xpiin cuanalyibu chop rey madianitas ni rolooyni caxony, né dxiʼpyibu xcameyibu (Juec. 8:12, 21). Per né xcalrracné Jehová, israelitas reʼ goygalyibu biinreʼ né bunyibu gan. Ancianos ni noʼ ló naareʼ láaca labúu gapyibu confianz lóo Jehová, Dios ni diti radzag né ni diti raxacladx. Láabu guirá ór sadudybu fuers guirá ni caquiin láani (bíil Isaías 40:28-31).

¹⁷ Ganno xi láani ritlaa ló experiencia xtuny Matthew, ni nac miembro de toib Comité de Enlace con los Hospitales. ¿Xí láani racné láabu gony guantarybu? Láabu nábu: «Ma bibiʼya ximod góc cumplir ni ná Filipenses 4:13. Xidal buelt, órni cadzaga né rasaca que ma diti labúu goni más, raninéya Jehová né guidopy xcalnabani né ranaba láabu guidudybu fuers ni caquiinna par labúu gacnéya herman. Órcu rasaca que Jehová radudybu fuers ni caquiinna par gony guantary». Xomodca Gedeón, ancianos nigolú rabeʼyibu xtiempyibu par ganyibu xilieen né galnadxiʼ ná cacalóyibu galnagan. Non gacyibu modestos né guidudyibu cuent que diti guirá ór labúu gonyibu ni rioladxyibu gonyibu. Per ló guirá cós, ancianos napyibu confianz que Jehová sadudy fuers ni canabyibu par diti guireʼganyibu (Sal. 116:1; Filip. 2:13).

18. Mod ma bisuidyno, ¿ximod labúu guisuʼ ancianos mod buny Gedeón?

¹⁸ Mod ma bisuidyno, ancianos labúu guisuidyibu xiroʼ de ejemplo xtuny Gedeón. Non gacyibu modestos né buñdxo órni guicaayibu más responsabilidad né órni tzoʼ ni guiniʼ mal de layibu o ni gonyxiroʼ layibu. Láaca non guisobyibu né gapyibu balory, né máspa nigoreʼ ni ma cabigax xfin gudxliogoxreʼ. Né non gapyibu confianz que gac nitisi gac Jehová sadudy fuers layibu par gony guantaryibu. Por ngú, ronladxgoluʼno né nigolú rasacyibu por dxiin nadip ni ronyibu (Filip. 2:29).