Ló Segunda Guerra Mundial bixiosa né xinaʼya bisianyibu Estonia né seeyibu Alemania, ro goola. Después bunyibu puext par goyoʼdo nilésdo Canadá. Lidxdo goyoʼni gaxca Ottawa. Golésdo toib squin xcurguid. Gócdo buñ pobre, per nica gopdo dxitguit par godosíldo

Toibtica dzú, testigos xtuny Jehová bilnéyibu xinaʼya ni ná Apocalipsis 21:3, 4. Ni bisuidybu bidxinni lainy xcalnabanybu né dada gorudxaʼbu. Galnigolú bidxinni lainy xcalnabanyibu, né diti xidzú bixiosa né xinaʼya goyonisyibu.

Ná diti tampa gonyibu inglés, guirá ni bisuidyibu ló la Biblia, bisobyibu láani. Casi guirá sábda, ná buny bixiosa dxiin guidopy gueʼel ro bisiaayibu guip, bixiosa goynébu naʼ né beela Sylvia predicación. Né guirá xomal bidopdo xomod famil par bisuidydo Guiich ni caniʼ. Bixiosa né xinaʼya bisuidybu naʼ nadxiʼya Dios, né ngú gocné naʼ par goyonisa ló íz 1956, órni gopa 10 íz. Galnadxiʼ ni gop bixiosa né xinaʼya Jehová, ngú racné naʼ dada por nagaisy.

Después ni bireʼya scuel, ma dipa goona xipa ñoni. Buni pensary que pal ñaca precursor, ma diti labúu ñapi lainy toib roplan xomod goniiny naʼ, né nimbuya stipnés lagary. Gosaló buni dxiin ló toib estación de radio né bioladxi dxiincu. Buni dxiin godzudaʼ, né por ngú ma diti labúu goyaʼya reunión; né dada bidzaga buñ ni diti gondxiʼ Dios. Per ni bisudi ló la Biblia gocné naʼ par natzaʼya mod bibani.

Goylesa gudx Oshawa (Ontario). Cu bimbuya Ray Norman, bisanbu Lesli né stipnés precursores. Guiráyibu godabioyibu naʼ. Bibiʼya que nakit noʼyibu, né ngú buny que natzaʼya mod buni pensary. Buny animaryibu naʼ par ñaca precursor. Né ló septiembre íz 1966 gosaloya. Nakit goyoʼya. Per goyoʼ tipnés cós ni bitzaʼ mod bibani.

Órni casaaya ló scuel secundaria, bistzaaya solicitud par ñaʼya Betel de Toronto (Canadá). Né después, ni ma naca precursor, biruʼyibu naʼ par ñaʼya Betel por tap íz. Per  nigolú bioladxi Lesli, né bidzubi ma diti nabiʼya láabu pal nacacuent invitación cu. Bunygoluʼya oración, né cuacuenta invitación cu, ná bioʼobni naʼ, bisiana Lesli.

Lainy Betel, buni dxiin ló lavandería, né después, de secretario. Bidxin midid, góc Lesli precursora especial lainy gudx Gatineau (Quebec). Bunygoluʼya pensary xi láani cayonyibu, né pal xinésni ngú ni buni. Né nigolú bidziguiaʼya: órni biruʼyibu Ray, bisan Lesli Betel, né lainy toibsi cuart goyoʼdo guiropcado. Né modcu bidzaga Lesli stoib. Bunydo galtzeʼel 27 de febrero íz 1971, dzúcu gocni último dzú ni goyoʼya Betel ló tap íz.

Buny asignaryibu lóodo toib congregación ronoʼ herman ni raniʼ diitz francés gudx Quebec. Né diti xidzú biruʼyibu naʼ par ñaca superintendente de circuit. Par dzúcu napa 28 íz, por ngú gosaca que mbioxhlasiensa naʼ, né que diti naana xidal cós. Per ni ná Jeremías 1:7, 8 gocnégoluʼ naʼ. Lesli xidal buelt gosaclóo desgrasy né camión, gosac naganbu ñaisybu, por ngú goyoʼya galrrasaʼ mod ñeeni lóodo ló galcircuit. Per láabu gochbu naʼ: «Pal Jehová caruʼ lóono. ¿Xí diti non guiyopyno mod gonyno láani la?» Cuacuentdo invitación cu, né goyoʼdo ló galcircuit 17 íz.

Nigolú goyoʼ xchiindo órni goyoʼdo ló galcircuit, né por ngú diti gopa tiemp par Lesli. Noʼ ni bisuidyni naʼ. Toib lonys, rosildiguieʼ, gosuch timbre. Órni bixala puert diti bibiʼya ni toib buñ, nosi toib dzoim, ro goyoʼ toib mantel, ques, páa, cuánnax, vin, né toib guiich ni ná: «Goyné tzeʼelo guidimbu lóo». Naradit dzúcu. Per non nasudi xtiscursa, né goodxi Lesli que diti labúu ñaʼya. Biembu naʼ, per goyoʼ nabambu. Per órni gosaló bisudi xquiichi diti gosaca sacró. Órcu bisetnaladxi ni ná Efesios 5:25, 28. Buni pensary, pal Jehová cayony que nasetnaladxi que non tzoʼya galrrasaʼ ximod rasac tzeʼela. Buni oración, né goodxi Lesli: «Yoʼ». Né nigolú bibaladxbu. Né goyoʼdo roloo toib guʼuc sacróyen, biscaʼdo mantel layoo... né nigolú sacró godudydo dzúcu guiropcado. ¡Dada gopriya tiemp par bisudi xtiscursa!

Xidal congregación goyguendo, desde Columbia Británica dada Terranova, né nigolú sacró gosacdo goyguendo guirá congregación cu. ¡Né guirá ni goloʼya guica de guimbuya xidal lagary, gosaló birebuʼni! Toibtica buelt buni pensary ñaʼya Escuela de Galaad, per diti goniiny naʼ ñaca misionero lainy stoib gudxrop. Buni pensary que misioneros nacyibu buñ especial, né gosaca que diti labúu ñaca mod nacyibu. Né bidzubi naxelyibu lóodo gudx ni noʼ África ro nogoluʼ galguitz né guerr. Nakit goyoʼya lagary reʼ.

Ló íz 1992 ma gopdo permís nanido xtiitz Dios, lainy tipnés gudx ni antes góc Unión Soviética. Por ngú gonabdiitzyibu lóodo pal nasagueldo nabiguetdo Estonia stoib. Diti cabésdo ngú, por ngú gonabdo xcalrracné Jehová par ñando xi láani ñonydo. Né bunydo pensary stoib: «Pal Jehová caruʼ lóono, ¿xí diti non guiyopyno mod gonyno láani la?». Né cuacuentdo invitación cu, né rasetnaladxi goniya: «Galán diti tzoʼdo África».

Órcuca bisuidydo diitz estonio. Diti xidzú de goló bidxindo Estonia, biruʼyibu lóodo par tzoʼdo ló galcircuit. Non niguendo 46 congregaciones né xidal grupos ló tzón gudxrop bálticos né lainy gudx Kaliningrado (Rusia). Por ngú, bisuidydo tipnés diitz, letón, lituano né ruso. Gosac nagando láani. Per guirá herman bibiʼyibu xtem ni bunydo né gocnéyibu lóodo. Ló íz 1999 bixal toib sucursal lainy gudx Estonia né goyoʼya lad comité né Toomas Edur, Lembit Reile né Tommi Kauko.

Bimbudo xidal Testigos ni goynéyibu Siberia. Ná nigolú bioʼobni layibu ni goyoʼyibu press né por ni goyoʼyibu sit de xfamilyibu, diti bireʼganyibu, guirá ór goyoʼyibu nakit né goniʼyibu né gan xtiitz Dios. Ndeʼ gocné lóodo par labúu ñoʼdo nakit ná nadudydo ló galnagan.

Tiptisi godudy íz né casi diti gonabdo dzú nalat, Lesli nigolú bidzag. Órcu diti bidudydo cuent que napbu toib galguitz ni laa fibromialgia. Por ngú goloʼdo guicdo nabiguetdo Canadá. Por ngú, órni biruʼyibu lóodo par ñoʼdo scuel par herman ni rony dxiin ló Comités de Sucursal, gudx Patterson (Nueva York), bunydo pensary que diti labúu ñoʼdo. Per después ni bunydo oración, cuacuentdo invitación cu. Jehová bisiab xcalnasác ro noʼdo. Né ló ni noʼdo ló curso reʼ Lesli goyee ló doctor. Né bidxin midid ma labúu bunydo ni cayonydo.

Toibtica goxin íz 2008, órni ma noʼdo Estonia, central mundial goniné lóodo, ro gonabdiitzyibu naʼ pal nasagueldo nacacuentdo toib invitación par ñoʼdo República Democrática del Congo. Diti goona xi nacaabi layibu, né máspa portín stoib dzúcu non nacaabi layibu pal guicacuentdo invitación cu. Diti goodxi xitcal Lesli, par labúu ñaisybu. Naʼ diti labúu gotiasi, portín guidopy gueʼel goninéya Jehová, né goodxi láabu guirá ni ragoʼ naʼ ló galrrasaʼ pal ñoʼdo África.

Stoib dzúcu, órni goodxi láani Lesli, gonido: «Jehová caruʼ lóono par tzoʼno África. ¿Ximod labúu ganno que diti labúu gonyno láani, né que diti sioʼ nakitno, sial diti gonyno láani?». Por ngú, después de 16 íz de goló  noʼdo Estonia, goyoʼdo Kinsasa ni noʼ gudx Congo. Sucursal cu gopni toib jardín nigolú móz, né sacró gosac buñ lagarycu. Toibtica cós ni bicuatzay Lesli lainy cuart xtunydo, gocni toib tarjeta ni goloʼtzaybu desde dzú ni goyoʼdo Canadá, ni ná: «Biaal ro guisagaʼyibu looy». Después ni bimbudo herman, bisuidydo buñ ni ná la Biblia né goyoʼdo nakit xomod misioneros, bidudydo cuent que labúu tzoʼdo nakit. Né bidxin midid gopdo privilegio de tzáguendo sucursal de sa 13 gudxrop ni noʼ África. Modcu bidudydo cuent que nigolú sacróyen nac guirá gudxcu. Ma diti bidzubi, né bidudydo guixquix Jehová por ni bixelyibu lóodo África.

Gudx Congo-Kinsasa bidudyibu galrro lóodo ni diti bunydo pensary que labúu ñoodo, xomod tipnés nimalien. Per órni bibiʼdo xhermanno que nigolú naníx cayóyibu láani, bunydo prueby né bidudydo cuent que nigolú naníxni.

Gopdo oportunida ñacnédo, ñoʼdo nadudydo despensa né galrracné espiritual a stipnés herman ni goyoʼ gudxcu o ro goyoʼ tipnés buñ ni bunynaayibu buñgonaʼ né mbioxien. Casi guirá herman diti tampa gopyibu bidxiich. Per nigolú bidziguiaʼdo ni bibiʼdo que napyibu fe que siás gueʼet, que nigolú nadxiʼyibu Jehová, né que diti rasianyibu xcudx Jehová. Ejemplo galán xtunyibu nigolú gocnéni lóodo. Tipnés herman bisnityibu lidxyibu né xcosechyibu. Ndeʼ buny que nadudi cuent que tiptisi labúu guisnit buñ xcós ni rasac, né que ni más rasac láani ngú xchiin Jehová. Ná nagan mod godudyibu, hermanos reʼ nagabga ór bitzotzyibu roʼyibu. Mod bunyibu gocnéni lóodo par nacalódo né balory xidal clas galnagan.

Tisintiempsi gonabyibu lóodo ñoʼdo sucursal ni noʼ Hong Kong. Diti buni pensary que nilésdo Lejano Oriente. Per Jehová ma gocné lóodo né galnadxiʼ ló stipnés asignación, por ngú, gosaguelcado. Ló íz 2013, ná bioʼobni lóodo, góc despedirdo de ximigdo  né de lagary sacróyen de África, ná diti gondo ximod ñac lagary ro nabésdo.

Ni goyoʼdo Hong Kong, toib gudx ro bidzagoluʼ buñ, nigolú bitzaʼni mod bibanydo, né nigolú gosac nagando nasuidydo chino cantonés. Per herman sacró godabioo lóodo né bioladxdo galrro de lagarycu. Xchiin Jehová naguel goniʼsni lagarycu, né layoo nigolú car goyoʼni lagarycu, Tidxó Buñ ni nap xiroʼ Galnan ni Rasanir, goloʼyibu guicyibu natoʼyibu sucursal cu, né stipnés layoo ni gopyibu. Diti xidzú, ló íz 2015, Lesli né naʼ goyoʼdo sucursal ni noʼ Corea del Sur, ro cayonydo dxiin dada nigoreʼ. Diitz ni raniʼ buñ lagary reʼ, láaca naganni. Per racnéni lóodo, órni herman raiby lóodo que ma más galán ranido coreano, per riatz guisuidyrado más.

Gosac nagando ñoʼ ximigdo stoib. Per bidudydo cuent que, pal nír lóodo rayopydo mod guininédo herman, né ragobiodo layibu, más naguel rimbudo stipnés herman. Guirá herman toibsi midid nac, né Jehová bisaʼ lóono sacróyen por ngú labúu ranino ni noʼ lainy xcalnabanyno, labúu tzoʼ ximigno né labúu gonladxno guiráyibu (2 Cor. 6:11).

Ma bisuidydo que raquiin cobiodo buñ xomod rony Jehová láani né guibiʼdo guirá prueby ni raslooy que Jehová ronladx né ragonés lóodo. Guirá ór ni bireʼgando, né gonabdiitzdo lóocado pal stipnés herman rioladx mod nacdo, bíildo tipnés guiichen ni bidudy ximigdo lóodo. Bibiʼdo que Jehová cuapy oración xtunydo, gocnébu né bidudybu fuers ni biquiindo.

Ló guirá ór ni ma godudy, Lesli né naʼ ma bidudydo cuent que, ná nigolú noʼ xchiindo, nigolú rasac cueʼdo tiemp par tzoʼdo toibsi. Láaca bisuidydo que raquiin guixiichdo de lóocado, né máspa órni casuidydo stoib diitz. Guirá goxin ronydo pensary ló toib cós ni bioladxgoluʼdo né radudydo guixquix Jehová.

Nanto la, dipa buny pensary pal ñaca misionero o nabésa lainy stipnés gudxrop. Per ma bibiʼdo que né xcalrracné Jehová, labúu rarebuʼni, né ngú ragoʼ nakitni naʼ. Roni pensary xomod profeta Jeremías órni goniʼbu: «Biscúlo naʼ, Jehová» (Jer. 20:7). Scú láani, ma bidudybu xidal galrradziguiaʼ sacróyen lóodo né galnasác ni diti cabésdo. ¡Dada ma bunybu ni goniiny naʼ, ni ñoʼya lainy roplan! Ma goyoʼdo xidal lagary ro diti buni pensary ñaʼya. Ma goyguendo sucursal ló gáay continentes. Né nigolú radudi guixquix Lesli, portín ló guirá asignaciones ni cuaʼdo, gocnégoluʼbu naʼ né nakit goyoʼbu.

Guirá ór rasetnaladxdo chupar ronydo ndeʼ né xigony ronydo láani. Galnasác ni napdo nigoreʼ, nacni tidxóyen, portín dzú ni sietra Jehová saxal ladxña né sadudy «ni raniiny xcalnabany guirá ni nabany» (Sal. 145:16).